Briefwisseling van Hugo Grotius. Deel 10

4068. 1639 april 16. Aan Willem de Groot¹.

Vereor, mi frater, ne caesariana illa spina, cujus mentio est in literis tuis quarti Aprilis², diu haereat in Batavorum pedibus.

Vidi edictum regis³ contra imperii sui contemtores Scotos. Multa rex vera dicit: sed commotis semel animis etiam vera morbum augent. Deum rogo, ut ea pax regnis illis detur, per quem salva maneat regis auctoritas, reipublicae vinculum et in Ecclesia ea obtineat gubernatio, quam instituerunt apostoli, probavit Ecclesiarum toto orbe diffusarum consensus et multorum, antequam papa cristas erigeret, saeculorum felix experientia.

Danus⁴ etiam Suediae suspectus est; itaque limes contra Scaniam Norvegiamque multo custoditur milite. Classem etiam auget regina nostra⁵. Quicquid ille rex parturit, non diu latebit.

Hamburgenses non immerito timent principem et libertati ipsorum et immunitati contrarium. Habet et cum Polono⁶ illam de vectigali ad Dantiscum controversiam, sed ne quid hostile rursum incipiat, imperatoris⁷ eum ni fallor reverentia retinebit. Caveant sibi et Batavi in illis suppolaribus insulis.

Uxor diploma ad iter tutum adhuc a Bruxellis exspectat. Miror, ubi tamdiu haeserint Mileteriana⁸. Retine tibi de singulis opusculis exemplum. Caetera da iis, quos idoneos lectores existimaveris.

Vale, frater optime.

Tibi obligatissimus frater
H. Grotius.

1 Gedrukt Epist., p. 882. Antw. op no. 4052; tesamen met no. 4069 beantw. d. no. 4101.

2 No. 4052.

3 Karel I van Engeland; zie no. 4067, p. 259 n. 1.

4 Christiaan IV.

5 Christina van Zweden.

6 Wladislas IV (VII).

7 Ferdinand III.

8 Zie no. 4052, p. 227 n. 5.

Lutetiae, 16 Aprilis 1639.