Briefwisseling van Hugo Grotius. Deel 9

3775. 1638 september 25. Aan Willem de Groot¹.

Bene te tuosque valere, mi frater, gaudeo. Ego vires morbo et medicando fractas recipio paulatim.

Gallorum prospera exigua prae adversis jam et Fontarabiae derelicta obsidione magna clade accepta per militis contumaciam. Sed apud Genuam pugna navali Galli tribus navibus longis amissis sex hostiles cepere. Cateleti, quod impetu captum est, praefectus Gabriel de las Torres² in potestate est Gallorum, qui nunc parant se reddere hybernis.

Duci Vinariensi³ ad Brisacum capiendum majoribus opus est copiis. Ipse Colmariae adversus tertianam luctatur. De captivis non miror, si cardinalis Hispanus⁴ datum sequitur exemplum.

Res maris quod apud vos diligentius quam antehac curantur, spem mihi facit melioris in posterum fortunae.

Hic omnia ob natum delphinum⁵ in laetitia sunt eaque felicitas mala quae accidere occultat.

Schokium⁶ hominesque similes non multum curo. Liber ille de Veritate Religionis⁷ illis ringentibus vivet et florebit. De Trinitate et alias controversias directe ibi tractare non debui et qui eas ex naturali ratione aut Platonicis scitis tractarunt antehac plus laeserunt quam adjuverunt causam christianismi. Adversus socinismi calumniam a Riveto⁸ mihi motam epistolam antehac satis uberem scripsi⁹ ad D. senatorem Reigersbergium¹⁰, qui, ut spero, ejus tibi legendae copiam non invidebit. Si quid dignum lectu apud vos prodierit, facite me participem.

Tibi obligatissimus frater
H. Grotius.

1 Gedrukt Epist. p. 880. Antw. op no. 3764; beantw. d. no. 3789.

2 Zie over hem no. 3774, p. 586 n. 1.

3 Bernhard, hertog van Saksen-Weimar.

4 Don Fernando.

5 Lodewijk XIV, geboren op 5 september 1638.

6 Martin Schoock.

7 Zie no. 3764, p. 571 n. 7.

8 André Rivet.

9 Zie dl. VIII no. 3390.

10 Nicolaes van Reigersberch.

Lutetiae, 25 Septembris anni 1638.