Briefwisseling van Hugo Grotius. Deel 9

[p. 572]

3765. 1638 september 14. Van G.J. Vossius¹.

Illustri viro Hugoni Grotio Ger. Jo. Vossius.

S.P.

Sero vespere nunc, quem annis non vidi quindecim, ad nos venit nobilissimus iuvenis Ludovicus Maurerius² in pueritia sua cum fratribus³ et paedagogo Pritolao⁴ convictor meus, filius cognitissimi tibi Auberti Maurerii⁵ christianissimi regis⁶ ad has foederatae Belgicae gentes quondam legati eo auri re dignioris, quod constantissime malis temporibus bonae faverit caussae. Sed is summo mane cras abit Hagam, ubi, credo, paullum commorabitur inde in Picardiam abiturus ad regem christianissimum, tandem se stituturus in Parisiorum urbe. Nec quia tardae propterea hae fuerint literae, committendum puto, plane ut sileam. Potius, praeter morem, ne nihil scribam, eius generis scribam, quae serius si legas, referat nihil et, credo, antequam has acceperis, iam aliunde cognoris.

Multa nobis de conaminibus ad Calloam pollicebamur: de exitu silere melius quam quicquam promere. Geldrae obsidio infra pretium verborum est. Princeps Arausionensis⁷ nunc Noviomagi aut Mokerheidae agit operam daturus, ne Gallis noceat Hispanus cardinalis⁸. Nam Cuicensi in ditione omnibus intentus manebit: nec tamen putatur hac aestate nulla re memorabili acta, domum reversurus. Dolet enim post magnos conceptus cuncta minus prospere successisse.

Mari interea non male res geruntur. Martinus Herbertius⁹ Dorpio¹⁰ in praefectura maris subrogatus, hactenus Dunkerkanos sic continuit, ne ulla illorum navium, nisi improspere, exitum moliretur, magno sane nostro, et Gallorum, commodo. Nam in Biscaiam subsidio adversum Burdigalensem ire episcopum¹¹ conabuntur. Nunc etiam adfertur ipsum nescio quid tentare incendiariis navibus. Praeclara omnia de eo nobis pollicemur, quia fortem adeo se hactenus comprobavit. Et videntur hostes idem sentire, quia timor jam ipsos occupavit. Ostenda septem naves egressae, tanquam metum incussurae, portum Texaliensem obsederant: sed nostris vix visis fugam maturavere. Videntur jam nullas, nisi naves mercatorias praeda refertas quaerere. Vix enim alioqui stipendia precederent. Regina mater¹² magno in urbe hac honore excepta fuit: et prout rumor fert, non in Brabantia, aliisve in locis pulcrius se esse exceptam profitetur. De privatis scribam literis proximis¹³. Heroinae conjugi et liberis salutem omnes plu(rimam) dicimus.

Amstel(odami), MDCXXXVIII, XIV Septembris.

1 Hs. Amsterdam, UB., coll. 30 Av. Eigenh. oorspr. Beantw. d. no. 3788.

2 Louis Aubéry du Maurier.

3 Maximilien, Daniël en Maurice.

4 Benjamin Prioleau; zie dl. II, p. 97 n. 4.

5 Benjamin Aubéry du Maurier was van 1613 tot 1624 Frans gezant in Den Haag geweest.

6 Lodewijk XIII van Frankrijk.

7 Frederik Hendrik.

8 De kardinaal-infant don Fernando.

9 Maerten Harpertsz. Tromp.

10 Filips van Dorp.

11 Henri d'Escoubleau de Sourdis.

12 Maria de Medici.

13 No. 3802.

[p. 573]

Adres: Illustrissimo et imcomparabili viro Hugoni Grotio, serenissimae reginae et regni Suecici ad regem christianissimum legato Lutetiam Parisiorum.

In dorso schreef Grotius: 14 Sept. 1638. Vossius.

en boven aan de brief: Rec. 29 Sept.