Briefwisseling van Hugo Grotius. Deel 9

[p. 469]

3684. 1638 juli 22. Van I. Jasky¹.

Illustrissime et Excellentissime Domine,

Domine observandissime,

Non parum mirabitur Excellentia Vestra, cum has leget, me eo audaciae processisse, ut praesentes ad Excellentiam Vestram dederim. Nam cui non mirum videbitur me in latinitate puerum et qui eam vix primis - quod dicitur - labris degustavi, ausum fuisse ad principem literarum et seculi nostri decus latinas exarare literas. Sed cum Excellentia Vestra meam in humanitatem suam confidentiam et discendi desiderium cogitabit, facile me, ut spero, pro benevolentia sua - qua me hactenus dignata est - excusabit et meos qualesquales conatus non improbabit.

Praeter exspectationem multorum plerique domini commissarii ad commissionem teloniaream a republica deputati² Varsaviae advenerunt, et quotidie adveniunt. Dux Radzivilius³ Palatinus Vilnensis ex morbo periculoso adhuc debilis nuper Varsaviam venit, ut eidem negotio teloniareo autoritate sua adsit. Bona nos spes alit negotium hoc amicabiliter compositum iri et turbas has breviter cessuras praesertim, si aliquam notabilem pecuniae summam ad testandam humillimam observantiam nostra S. Reg. Maiestati⁴ offeremus, quod tamen non nisi magna cum difficultate exhausto quippe aerario fieri poterit. Placanda ira Deum donis et sacrificiis.

Rex constituit mense Augusto Czenstichoviam devotionis ergo adire, et inde, ut fama fert, Egram Bohemorum ad curandam valetudinem proficisci.

Factiosorum Cosaquorum vires quotidie augescunt praecipue per eos, qui propugnatores libertatis religionis suae videri volunt. Sed eos brevi - ut putatur - illustrissimus dominus generalis Koniecpolsky⁵ in ordinem rediget.

Excellentiam vestram divinae protectioni meque favori ipsius quam diligentissimus commendo.

Excellentiae Vestrae observantissimus cliens
Israel Köhne dictus Jasky m.pp.

1 Hs. Utrecht, RA. Prov. Arch. Boetzelaer 556, 10. Eigenh. oorspr. Tesamen met no. 3673 beantw. d. no. 3737.

2 Gabriël Schumann en Christoph Ricci.

3 Christoph Radzivill (1585-1640).

4 Wladislas VII (IV) van Polen.

5 Stanislaus Koniecpolski.

Dab. Dantisci, 22 Iulii A.^o 1638.

Boven aan de brief schreef Grotius: Rec. 17 Augusti 1638.