Briefwisseling van Hugo Grotius. Deel 8

3182. 1637 juli 31. Aan S. Bielke⁸.

Illustrissime Domine,

Nescio quo modo ubique cessatur nec nisi tenuis nobis suppeditatur scribendi seges. Dux Bernhardus⁹ quid agat, non intelligimus; est, ut puto, etiam nunc in Burgundiae Comitatu.

Castilionaeus¹⁰ in confinio Lotharingiae Lutzenburgiaeque Villaunum cepit aliasque arces modicas. Illud satis prosperum Gallis, quod Landresium sperato citius hujus mensis 23 Gallis se dedit, quibus nunc vacuum illum exercitum et quas Millereius¹¹ copias ad Caletum habet, illas praeterea Castilionaei conjungere, ut quod restat anni capiendis in Belgio oppidis transigatur, dum alia ex parte cardinalem Hispanum¹² pecuniis leviter instructum Batavi detinent Bredae obsidio, quod simulatione in Flandriam expeditionis feliciter inchoatum est.

8 Gedrukt Epist., p. 348. Over Sten Bielke zie men no. 2945, p. 67 n. 7.

9 Bernhard, hertog van Saksen-Weimar.

10 Gaspard de Coligny, graaf van Châtillon.

11 Charles de La Porte, markies van La Meilleray.

12 Don Fernando; zie over hem IV, p. 412 n. 11.

[p. 452]

In Italia nihil fit laboratque pontifex¹, ut induciae inter suae sectae homines ubique aut certe in Italia fiant. Restituta sunt literarum Gallos inter et Flandros Brabantosque itinera sperantque mercatores eandem fore mercibus commeandi libertatem.

Angli nihil nisi de pace loquuntur nec ullae datae sunt naves ad Palatinorum, qui nunc in Batavis rediere, jus prosequendum; ne illa quidem de mari cum Batavis controversia ad transactionem aliquam perduci potuit, quod sane factum oportuit, siquid Angli in Austriacos molientur; enimvero non desinunt res omnes necessarias Flandriae, qui sub Hispano² sunt, portubus advectare.

Rex³ hinc it ad Castellum Thiderici, amoenum et salubre oppidum et Belgicum finem respiciens.

Picolominius⁴ in Treveris aegrotare dicitur.

Vale, Illustrissime Domine.

Illustrissimae Dominationi Tuae addictissimus
H. Grotius.

1 Urbanus VIII.

2 Philips IV, koning van Spanje.

3 Lodewijk XIII van Frankrijk.

4 Ottavio d'Arragona, prins van Piccolomini, hertog van Amalfi, bevelhebber in het leger van keizer Ferdinand III.

Lutetiae, 21/31 Iulii 1637.