Briefwisseling van Hugo Grotius. Deel 7

2572. 1636 mei 1. Aan L. Camerarius¹.

Illustrissime Domine,

Parat jam abitum dux Bernhardus Vinariensis², cum pecunia non quantam voluit, sed quantam auferre potuit, millibus florenorum sexcentis: promissis large oneratus. Qui si nobis ad Rhenum, atque utinam trans Rhenum, proferre arma poterit, facilius erit in posterum Suedos inter Gallosque et literarum et consiliorum commercium.

Classis tum in Santonico, tum in Massiliensi littore ventos et imperium exspectans minatur Hispaniae, nec Italiam sine metu sinit. Parmae non timetur, postquam Mutinensis³ bello se subduxit. De Placentia bene speratur, quod et ducis uxor⁴ ipsa praesens et dux⁵ ex Gallia in Italiam rediisse nuntiatus animos addunt fidemque firmant oppidanis, et necessaria, etiamsi duret obsidio, in aliquot suppetunt⁶ menses.

Foederati Galliae, praeterquam quod Bremum munit Sabaudus⁷, nihil agunt magni. Dux Rohanius⁸ diu jam quiescit ob tenues copias et Mantello - is locus ad Adduam est - muniendo intentus. Ausus tamen est IV Aprilis aliquot suorum praemissis inter Comensem et Clavennensem lacus penetrare in agrum Mediolanensem magno agrestium terrore nec sine caede militum hostilium, quorum pars magna in juga montium suffugium habuit. Quominus, quae ibi sunt, oppida aut castella irrumperet, machinae deerant; nec copiarum satis, quibus supplementum per suos hic flagitat, si non quantum vult, nonnihil tamen obtenturus vir ingentis animi et rebus parvis bene uti gnarus.

Germani ad quinque aut sex millia super eos, qui jam in agro Placentino omne militaris licentiae genus exercent, dicuntur Alpes beneficio Helvetiorum pontificiae religionis transituri; transire nondum intelliguntur.

Haec sunt, quae nunc habebamus non pessima. Det Deus meliora, teque, Illustrissime Domine, cum tuis omnibus sospitet.

Illustrissimae Dominationi Tuae omni observantia addictissimus
H. Grotius.

1 Copie Uppsala, UB., cod. 388a, ep. 42; gedrukt Epist., p. 230. Copie Den Haag, ARA. Eerste afd. coll. Hugo de Gr. Aanw. 1911 XXIII no. 2, p. 14. Ludwig Camerarius was Zweeds gezant in Den Haag.

2 Bernhard, hertog van Saksen-Weimar.

3 Francesco d'Este, hertog van Modena.

4 Margherita de Medici, dochter van Cosimo II, groothertog van Toscane.

5 Odoardo Farnese, hertog van Parma; zie over zijn opgewekt verblijf in Parijs o.a. VI no. 2494, p. 554.

6 De copie te Den Haag heeft resp.: addat, firment en suppetat.

7 Vittorio Amedeo, hertog van Savoye.

8 Henri, hertog van Rohan, luitenant-generaal van het Franse leger in Graubünden en de Veltlin.

[p. 120]

Lutetiae, Cal. Maii n.c. A.ⁱ MDCXXXVI.

Adres: Ludovico Camerario, Reginae Regnique Sueciae Consiliario et Legato apud Praepot. Ord. Foeder. Belgii.

Boven aan de brief in de copie te Uppsala in margine: Redd. A.^o 1636 Hagae 8 Iunii st. n.