Briefwisseling van Hugo Grotius. Deel 2

762. 1622 Juni 4. Aan Willem de Groot².

Literis quas 22 Maii ad me dedisti, mi Frater, respondeo. De Apologetico³ antehac ad affinem⁴ sententiam perscripsi. Reliqua notatorum exspecto. Hexabibli⁵ duo aut tria exemplaria mitti mihi velim, ubi aliqua erit occasio. In Apologetico velim corrigi quicquid a vulgari orthographia abhorret, ne novitas operis gravitati deroget. Age gratias Camerlino⁶ pro navata opera; et dic me, si quando potero, gratias relaturum. De pace Rex agit quidem cum Reformatis: sed lentum negotium multi privatis pactionibus praecipitant, quos inter Lafortius⁷, princeps motus in agro Bearnensi, sua recipit, et insuper accepit dignitatem Marescalli cum ducentis millibus scutatorum. Etiam Sulliacus⁸ in eo est ut sibi suisque consulat. Sanctae Fidei oppidum deditum est Regi, Cleracum redditum. Montem Albanum ivit obsessum Vindocinensis⁹ cum decem millibus peditum, equitibus mille. Sex ferme peditum millia et equites sexcentos sub se habet Mommorantius¹⁰ reprimendis conatibus Rohanii. At Comes Suessionensis¹¹ Rupellam premit, cui, ad decem millia quae secum habuit militum, sex alia submitti dicuntur, divulsa civitate in primates, qui paci student, et plebem bellum et maris praedas habentem quaestui. Rocalaurius¹², qui Venetis militat, huc a vobis rediit, multaque non abs re proponit adversus Hispanicam in Rhaetos grassationem; quae Rex eiusque ministri pronis auribus accipiunt, versuri ad illa animum ubi regni pax erit constituta. De pellendo moerore quod mones, laudo et curam dabo. Adsit Deus. Parentes, sororem cum marito¹³ et liberis, tum omnes agnatos, cognatos, affines, amicos impense saluto omnes. Lutetiae 4 Iunii 1622.

Tui amantissimus Frater
H. Grotius.

2 Gedrukt Epistolae p. 765.

3 Verantwoording.

4 Nicolaas van Reigersberch; zie n^o. 751.

5 Bewijs van den waren godsdienst, zie p. 26 n. 6.

6 De Delftsche pensionaris Camerling; zie p. 23 n. 8.

7 De maréchal De la Force.

8 De hertog van Sully.

9 César hertog van Vendôme.

10 Henri hertog van Montmorenci.

11 Louis de Bourbon, graaf van Soissons.

12 Pierre Raimond de Vurigne, heer van Roquelaure; over de troepen in dienst van Venetië, zie ten Raa en de Bas, Het Staatsche leger III, reg.

13 Adriana de Groot en haar echtgenoot, Frederik van Losecaat.