Archives ou correspondance inédite de la maison d'Orange-Nassau (première série). Tome VIII 1581-1584

† Lettre MCXXXV.
Le Duc d'Anjou au Prince d'Orange. Négociation avec le Prince de Parme (ARCH. ROY.).

Mon Cousin, vous verrez maintenant par effect que c'est le Prince de Parme quy poursuyt d'entrer en quelque accord, estant le S^r de Goignies, Gouverneur de Quesnoy, revenu icy me trouver de sa part. Il y a trois jours qu'il y est, mais je ne I'ay veu que le lendemain qu'il y fust arrivé. Il m'a tenu plusieurs beaux propos du désir qu'a le dit Prince de Parme d'estre médiateur d'un bon accord, pour la commisération et pène qu'il a de tant de pouvre peuple ruyné pour la continuation de ces guerres, quy ne poeult plus durer, sans une désolation de tout le pays et principalement de Cambresis, Haynault et Artois; Surquoy je luy ay bien faict cognoistre que je ne me reculerois jamais de ce quy seroit raisonnable, et s'il vouloit mectre quelque chose en avant, j'y entendrois voluntiers; mais je vous diray bien qu'à le veoir icy, il semble qu'il ne s'y ennuye poinct; car il ne pourchasse pas fort ses audiences, ny son retour. J'en advertis Mess^rs les Estats, afin qu'ilz cognoissent comment je procède en toutes mes actions, et que je ne feray jamais rien à leur préjudice,

[p. 270]

⁺dont je vous prie, mon Cousin, les asseurer, et qu'incontinent que je verray clair en cest affaire, ilz en sçauront aultant que moy; quy sur ce, n'estant ceste à aultre fin, prieray Dieu qu'Il vous ayt, mon Cousin, en Sa très-sainte et digne garde. A Chateau Thiéry, le 16^me jour de novembre 1583.

Vostre affectionné Cousin,

Françoys.

A mon Cousin, Monsieur le Prince d'Oranges.

+ 1583. Novembre.