Archives ou correspondance inédite de la maison d'Orange-Nassau (première série). Tome VIII 1581-1584

[p. 82]

† Lettre MLXVIII.
⁺Le Cardinal de Granvelle à la Duchesse de Parme. Menées de la France (MS. B. GR. XXXII. p. 49).

.... Combien que j'aye en ce contraires ceulx de la Hasienda⁽¹⁾, que font pour ce à l'encontre de moy tous les mauvais offices qu'ilz peuvent et par toutes voyes, pour ce qu'ilz entendent que je diz les vérités, si ne laissé-je pourtant de poursuyvre comme je doibs, advienne après ce que Dieu vouldra; combien que je confesseray à v. Alt. que souvent je me lasse et désespère de ce que j'apperçois que, congnoissant le Roy la faulte, il n'y donne remède, pour estre si irrésolu et long, et que à ceulx qui font mal, non seullement il ne les chastie, mais comme il est si bon Prince, ne leur monstre encoires mauvais visaige, ce que véritablement porte grand préjudice à ses affaires, car où il n'y a chastoy, ny rémunération balancée avec juste balance, les affaires n'ont accoustumé prendre bon chemin; et sur ce poinct aurois-je beaucop à dire, si j'estois près de v. Alt., comme je luy ay touché cydevant par mes lettres; mais ce sont choses que ne se peuvent confier à aultre, qui que ce soit.

L'allée de d'Alençon en Zeelande et Anvers, avec tout ce qu'est là passé, à la vérité, m'estonne peu, et j'espère que, devant que le moys de may passe, il se repentira de son voyage, et tant plus s'il retourne en Angleterre, selon qu'est la commune opinion, et je me range entièrement en celle de v. Alt., que ce n'est chose que luy convienne, et que pourtant ne se debvroit croire; mais il ha faict tant d'aultres choses sans fondement de raison que je ne

+ 1582. Mars.

(1) Hasienda. Voyez T. VII. p. 504.

[p. 83]

⁺m'esbéyray d'aultres nouvelles faultes qu'il puisse faire. Les humeurs de ceulx de par delà se conforment tousjours mal avec les François, car il y a trop de différence; et comme qu'il soit, avec toute la mauvaise opinion qu'ilz ont conceu des Espagnolz, soit à tort ou à droict, je tiens qu'ilz aymeroient sans comparaison plus iceulx que la tyrannie et insolence des François, auxquelz, comme v. Alt. dit, nous comportons¹ trop, et y-a long temps que v. Alt. sçait mon opinion sur ce, mais jusques à présent je n'y vois remède, et si ne sçay quelle aultre déclaration de guerre nous debvons actendre, puisque la Royne de France mère la nous faict ouverte et la confesse, à couleur de sa prétention vaine, fondée en l'air et de si loing au Royaume de Portugal, et que son filz publicquement l'aide, et que Alançon nous la faict aussi ouverte, courant tous les jours ses gens sur les pays de sa M., nous retenant Cambray, au ravictaillement de laquelle assistoient ceulx du camp du Roy son frère, comme il dit, pour non l'abandonner et de non le laisser en danger, estant frère. J'ay souvent dit que je me souviens des termes que feu l'Empereur de glorieuse mémoire usoit en l'endroit du feu Roy François premier, non luy comportant chose quelconque, et avec cela le tenoit en frain, et si estoit plus puissant beaucop que le Roy moderne, et si sçavoit largement dadvantaige, et avoit plus de valeur et meilleurs gens: par où je tiens que, si nous tenions le mesme chemin de feu sa M. Impériale, noz affaires s'en porteroient mieulx; j'en ay souvent deschargé ma conscience, et avec ce me contenteray de ce quil adviendra; ung bien y a, que pour toutes leurs emprinses il-y-a peu d'ar-

+ 1582. Mars.

1 permettons, souffrons (Holl. verdragen).

[p. 84]

⁺gent et guères plus de crédit; l'on a cherché à Gennes d'en recouvrer sur gaiges de joyaulx, mais sans effect, et dois le moys de septembre l'évecque de Carcaçone, Rosselay, solicite à Venise pour recouvrer deux cent mil escus, sur semblables gaiges, mais jusques oyres il n'y-a heu effect, ny n'ay encoires entendu que à Lyon l'on aye recouvert les 400^m escuz qu'ilz debvoient envoier en Suisse, et si n'est le repos de la France tant asseuré que avec peu de sollicitation que l'on pourroit faire soubz main, l'on ne leur résuscita la guerre intestine, et tant plus facilement donnant quelque ayde, ou de gens ou d'argent, à aulcuns: que me donne espeoir que noz affaires pour cette année passeront mieulx, s'il plait à Dieu, et mesmes que sa M. s'arme de tous coustels, et au Portugal ha plus de gens de guerre que je ne vouldrois, pour s'opposer aux emprinses de la Royne-mère, et de Dom Antonio, l'exécution desquelles se différent aussi de faulte d'argent.... Madrid, 30 mars.

+ 1582. Mars.