Archives ou correspondance inédite de la maison d'Orange-Nassau (première série). Tome VIII 1581-1584

† Lettre MLVIII.
La Reine Elizabeth aux Etats-Généraux. Recommandation du Duc d'Anjou.

*_** Elizabeth, qui sembloit presque s'être jouée d'Anjou, craignoit peut-être le dépit de son amant. Elle ne veut pas qu'on considère le mariage comme rompu; il est simplement ajourné. Le Duc est ‘ung aultre soy-mesmes.’ La Reine, surtout à son départ, le comble des marques, parfois trompeuses, de la plus tendre affection.

Messieurs. S'en allant par-delà nostre très cher cousin, Monsieur le Duc d'Anjou, combien qu'estimons qu'il ne sera grandement de besoing que vous ramentevions l'obligation que pour plusieurs respects luy avez, ne doubtant pas que selon icelle ne vous portiez envers luy avec tout honneur et respect, digne d'un Prince de son rang

[p. 62]

⁺et qualité, si ne nous a-il semblé superflu qu'il allast accompaigné de la recommandation d'une Princesse, qui, tant pour l'ancienne amitié que vos prédécesseurs ont tousjours porté à ceulx que ont tenu que tenons à présent, que pour plusieurs aultres respects, estime avoir tel intérest en vous que vous en serez poussez davantaige à honorer ung Prince qui luy est si cher et recommandé, qu'elle faict estat de luy comme d'ung aultre soy mesmes; car pour tel vous le recommandons et pour tel estimons que le recevrez, vous asseurant que l'honneur ou déshonneur qu'il recevra par-delà, sera tout tel en nostre endroict, comme si on nous l'avoit faict à nous mesmes. Sur quoy ne vous ferons plus ample discours, vous remectant à ce que noz cousins de Leycester et de Hunsdon et Mylord Howard, qu'envoions expressément pour conduyre le dit S^r Duc jusques par-delà, vous en diront plus particulierement de nostre part. En quoy vous prions de leur donner foy et crédit, comme feriés à nous mesme. Qui sera l'endroict où prierons Dieu, Messieurs, qu'Il vous ait tousjours en Sa sainte et digne garde. De Cantelbury, le 6^me jour de febvrier 1582.

Vostre bonne amye,

Elisabeth R.

+ 1582. Février.