Archives ou correspondance inédite de la maison d'Orange-Nassau (première série). Tome II 1566

Lettre CLXXXV.
Le Comte B. de Mérode au Comte Louis de Nassau. Sur les prêches aux environs de Malines.

Monsieur, Dimanche dernir le 11^e de ce mois ont comparu pour le comenscement environ 1500 personnes à ung villaige entre Malins et Villefort¹, nomé Simpse, pour entendre la parolle de Dieu, et coment ce Ministre, après avoir faict, pensoit retourner vers Bruselles, il at esté retenu au dit Villefort dedains unne hostelerie, sains

1 Vilvorde.

[p. 222]

⁺lui faire quelque tort ou violence, et hyer le 15^e l'on at encor faict aux mesme lieu unne autre presche par ung autre Ministre devant disner, où qu'il y at eu environ 3000 personnes à ce que l'on présume, entre lesquelles at esté descouvert que le premier Ministre estoit detenu coment ci-desus, desort que 12 ou 15 bon compaingions sont allé au dit lieu avecques armes et l'ont menez hors jusques sur la plasce de la presche, où qu'il at l'après-disner faict son office asistant de plusieurs auditeurs. L'on m'at dict aussy que dimanche prochain l'on doit faire quelque autre assemblée près d'unne maison de l'escouttet de Malins, qui est unne heure de chemin de la ville susdit, et que plusieurs d'Anvers s'i doibvent trouver pour metre en train et asseurer ceux de Malins, voiant qu'il sort encor avecques craint et ne sont encor faict au chapuron¹. Les dit escoutet de Malins avecques aucuns du Magistras ont esté à Brusselles pour donner à entendre à son Allteze ces assamblée, mais ne scay quelle reponsce il ont eu: toutfois il a faict serer² les portes hyer pour tenir les borgois hors: je ne scay à quelle intention, ni à quelle fin ceci poldrat venir, car les borgois ce mescontent fort. Qui ferat fin, priant le Créateur avoir vostre singnorie en sa sainte grâce. De Raemsdonck, le 16 de ce mois d'aoust l'an 1566.

Entièrement prest à faire services,

Bernart de Merode.

A Monsieur Monsieur le Conte de Nassau, Catzenellenboech, Vianden etc. Anvers.

+ 1566. Août.

1 chaperon.

2 serrer (fermer).