Reysen na Jerusalem ende Jordaan

[fol. 159r]

Hiernae volcht die Jordaensche reys

Alhoewel wy opten Jordaen niet en moechten coemen overmits die Arabianen, soe sal ick den selfden reys bescryven twelck ick gescreven hebbe uuyt die boecken vanden genen die daer in persoen geweest zyn.

Item alsmen reysen sal nae den Jordaen, soe zyn alle die ezelen bereyt opten berch Syon, daer die peregrinen mede voorryden ende visenteeren die heylige plaetzen, gelegen tuschen den berch van Syon ende Bethanien.

Comende boven die stadt Bethanien drie ofte vier boochscoten weechs, compt ghy in een scone valeye. Daer staet een schoone tempel, in welcken tempel Joachim quam met zyn gebueren, doende zyn offerhande naeden ouden gewoente. Ende Joachims offerhant werden vanden priesters versmaet omdat hy geen kinderen by Anna zyn huysvrou hadden.

Recht voor desen tempel staet een schoene fonteyne met zeer kuel, zoet, claer water. Van daer soe rytmen al tuschen hoeghe berghen doer ende bywylen over tgheberchte, vyf milen geduerende. Alsdan compt ghy in een zeer schoen plat lant, zeer vruchtbaer.

Ende int laeste van dit geberchte leyt een zeer hoeghen berch, geheeten Mons Quarantana.

[fol. 159v]

Daer is die plaetse daer Christus gebenedyt heeft gevast xl dagen ende xl nachten, aldaer Godt getempteert werden vanden viant om van steen broot te maecken. Van deese plaetze vuerden den viant Jesus gebenedyt op een ander hoge berch. Ende wees hem alle die rycken des werlts, seggende: ‘Ist dat ghy myn’ &c. Op deese plaetse is aflaet van sonden.

Onder den selfden berch loopt een fonteyn, geheeten Fons Helizei die in voorleden tyden sout was. Ende Helizeus werp daer sout in, ende dat water werden soet, ende is nu een schoene lopende beecke. Jae alsoe sterck datter wel een watermolen by malen souden. Ende dit water loept voorts naer een stadt geheten Jerico, welcke stadt gelegen is een groete halve myle vanden berch Quarantana.

Als die bibel verclaert, soe heeft Jerico een groete stercke stadt geweest, in welcke stadt die bespieders van Josue verbercht waeren in een lichte vrous huys, geheeten Rahab, welcke huys noch staet. Maer nu is Jerico seer cleyn ende ombemuert ende heeft anders geen water sonderlinge dan dat waterbeeckgen dat doer Jerico loopt.

Soe verde alsmen met een appel souden moghen werpen, buyten die stadt Jerico, staet een groet viercant huys, int middel open onder den hemel, ende op die vier hoecken elcx

[fol. 160r]

een thoerne daer noch volck in woent.

Ende dit plach te syn dat huys van Sacheus daer dat evangely of spreect. Ende in dit huys soe rusten hem die pillegerums des nachs gemeenlyck. Ende op Helizeus fonteyn des daechs. Ende hier omtrent staen veel boemen.

Van dit huys omtrent een Duytsche mile voorts staet een viercant clooster van Griecken. Ende is die plaetze daer Sint Jan Baptiste placht te woenen in die woesteyne doen hy den Heer sach coemen ende sprack: ‘Ecce agnus Dei’. ⁷⁷² Ende van hier soe machmen dat Doode Meer sien daer Sodoma ende Gomorra mit noch drie ander steden versoncken zyn om haer groete sonden.

Men seyt dat in dat water des Dooden Meers gheen vischen nochte vogelen in mogen leven, maer daer syn met allen veel serpenten in. Ende bysonder een serpent dat blint is, genoemt Tyrus, daermen den besten Veneetschen drieakel of maeckt. [375] Ock werpt dat Doode Meer veel ferments ⁷⁷³ op als die zee by ons die scelpen opwerpt. [376]

Van dit voorseyde cloester wat verder dan men met eenen booch souden moghen scieten, soe loept een rivier die Jordaen geheeten. Ende heeft hoeren oorspronck inden berch Libano uuyt twee fonteynen die daer uuytspringen. Deen het Jor ende den ander hiet Daen, maect tesamen Jordan.

772 ‘Zie het lam Gods’

773 Versta: zout.

[fol. 160v]

Ende is een seer schoen lopende rivier, alzoe zeer lopende als den Ryn. Ende is wyt tot sommighe steden ses ofte seven roeden. [377] Ende eynt haeren loop in die Doode Zee die alle dat water vanden Jordaen verslint ende nae haer neempt.

In desen Jordaen doopten Sint Jan Christum gebenedyt ende daer sach hy den Heyligen Geest dalen neder op dat hooft van Christo gebenedyt. Ende hoerden den stemme des Vaders uuyt den hemel seggende: ‘Dit is myn beminde Soen daer ick myn welbehagen in hebbe. Hoert hem’. Ende aldaer is oflaet van alle zonden. [378]

Op dander zyde vanden Jordaen daer leyt Arabien, ende is een woest wilt volck, sonder steden ofte sloeten of dorpen, maer wonnen in bergen ende holen onder die aerde, ende houden geen zekere plaetze, maer wonnen nu hier nu daer, daer dat lant vruchtbaerste is. Ende hebben genen heer nochte oversten, want niemant en can haer bedwingen.

Ende compt daer ymant die haer met fortesse bedwingen wil, soe loepen sy xl ofte tachtich milen te lantwaerts in, nemende wyf, kynderen, ossen, scapen ende alle hoer ander goet met haer ende geven dat lant tevoren. Ende alst in hoer lant dier tyt is, soe comen sy met

[fol. 161r]

groeten hoepen over die Jordaen ende quellen dat lant van Syrien ende ander omleggende lande seer. Alst mi gebuerden by onse tyden, soedat wy daerom op den Jordaen niet en moechten coemen alst voor gescreven is. [379]

Als nu die pellegrums haer gewaschen hebben inden Jordaen ende haer devotie gedaen hebben, soe keeren zy wederom den selfden wech die zy gecoemen zyn nae Jerusalem tot opden berch van Syon, aldaer sy alsdan blyven eten ende maecken goet chier, ⁷⁷⁴ ende gaen dan rusten in haer logys. Ende daermede is die Jordaensche reyse volbracht.

τελωσ [380]

FINIS

Eynt

774 en het er goed van nemen