Het lieffelyck orgel-pypken

[p. 100]

Dry vrolijcke Tafel-Liedekens.

Stemme: Wie wilt hooren 'k sal 't vermelden.

1. VRinden laet ons vrolijck wesen,
En met Bacchus gaen ten strijdt,
Den wijn sal het hert ghenesen,
Dat den peys hadde verblijdt,
Laet ons strijden heel playsant,
Met 't ghelaesken inde handt,
En singhen lustigh vrolijck hier,
Siet Mars onder den voet,
Met alle sijn ghebroet,
't Welck den soeten peys ons doet,
Vrindekens neemt elck nu u ghelasen,

[p. 101]

 

En wiltse met ghenuchten uyt-blasen,

 

Laet de telliooren klincken en rasen.

 

2. Lief ghebuercken eens ghedroncken

 

De ghesontheydt vanden weerdt,

 

Siet het is oock vol geschoncken,

 

Want hy sulcks van ons begheert,

 

Liever hier in dit ghelagh,

 

Als te roepen al den dagh,

 

Hola, hola, sta ferme, ter re reer,

 

Ick settet aen den mont,

 

Ick drincket uyt terstont,

 

En ick laet u sien den gront,

 

Schencker wilt myn ghelaesken weer schincken,

 

Dat mijn ghebuerken oock eens magh drincken,

 

Op dat haer keeltjen beter sou klincken.

[p. 102]

 

3. Siet ghebuerken dit ghelaesken

 

Eyscht een Liedeken van u,

 

En seght ons gheen vise-vaesken,

 

Maer singht ons wat vrolijcks nu,

 

Latet gaen eens rom-en-dom,

 

Datter weder tot my kom,

 

Ick en salder by verliesen niet met al,

 

't Gheselschap allegaer,

 

Dat sal u volghen naer,

 

Wachten naer 't ghelasken maer,

 

Drincket eens uyt, u keeltjen wilt smeren,

 

En singht eens vrolijck naer ons begheren,

 

Soo sal de spijs te beter verteren.