Ecclesiasticus of de wijse sproken Iesu des soons Syrach. Nu eerstmael eurdeelt ende ghestelt in Liedekens, op bequame en ghemeyne voisen

[p. 11]

Vooreden Iesu Syrach op sijn boeck.

VEle ende groote lieden hebben ons de wysheyt (wt de wet, propheten, ende anderen die de selfde nagheuolght hebben) condich ghemaect: daer van moetmen Israel billich louen, om haerder wysheyt ende leeren wille.

Daerom sullen de ghene, diese hebben ende lesen, niet alleene wijs daer wt worden, maer oock den anderen dienen met leeren ende schryuen. Mijn groot-vader Jesus na dien hy hem sonderlinge beulijtichde te lesen de wet, de propheten, ende meer andere boecken, die ons van onsen vaderen ghelaten sijn, ende hem wel daer in gheoeffent hadde, nam hy voor oock yets-wat te schryuen van wysheyt ende goede zeden, op dat de ghene die gheerne leeren ende cloeck worden wouden, des te verstandigher ende gheschickter vverden om een goet leuen te leyden. Daerom bidde ick u, ghy willet vriendelijck aen-nemen, ende met vlyte lesen, ende ons te goede houden of wy soo wel niet spreken

[p. 12]

en konnen als de groote beroemde oratoren: VVant wat inder Hebreeuscher spraken gheschreuen is, dat en luyt soo wel niet, wanneermen het in een ander sprake bringht. Niet alleene dit mijn boeck, maer oock des wets, der Propheten, ende meer andere boecken, luyden gansch veel anders, wanneer sy in haer sprake ghesproken worden.

Als ick nv in Egypten quam inden achtendertichsten Jare, ten tijde des Conincx Ptolomei Euergetis, ende alle sijn leefdaghe daer in bleef, kreech ick tyt om veel goets dincx te lesen, ende te schryuen: daerom sach ick het voor goet ende noodich aen dat ick den vlyt ende moeyte daer-op wende, ende dit boeck ouersettede.

Ende de wyle dat ick den tyt hadde, arbeyde ick ende wende vlyt aen, dat ick dit boeck wt-maeckte, ende aen den dach brachte, op dat oock de vrende, die leeren willen, hun tot dien seden wennen, op dat sy na de wet des Heeren leuen moghen.

Eynde der vooreden Iesu Syrach.