Cronyke van Vlaenderen. Deel 1

⁺Hoe die fransse heren in Scotlant.., ende oic hoe Franssoys Ackerman met sinen gesellen misten van die stede van Airdenburch te stelen.

⁺...Dese Scotten.... dairaf ic u nu een luttel vertoeven wille, ende beginnen weder wat te spreken van den saken van Vlaenderen, ende oic van den huwelijke des jongen coninx van Franckrijke dat binnen desen somer toe ghinck, oic mede van hoe die stede van Airdenburch bijna gewonnen ende gestolen wert, dair hem die burchgrave van Myaus ende here Jan van Juemont hilden in garnysoen.

Sint ende na der tijt dat here Rifflairt van Vlaenderen met sinen vreenden die nederlage gehadt hadden van dien van Gent uptie reyse in den IIII Ambochten, wert here Robbrecht van Betuynen, burchgrave van Myaus, binnen Airdenburch gesent, dair hij vandt heren Jan van Juemont ende die andere gesellen; ende hij bracht dair met hem omtrent XL glayen, ridderen ende knechten, die alle therte zeer willich totten oirloge hadden. Doe dese burchgrave dair binnengecomen was, arbeyde hij, ende oic here Jan van Juemont, zeer om die reparacie ende starckenisse van der stede van Airdenburch an allen eynden, want Franssoys Ackerman ende die van Gendt studeerden dair dach ende nachte up, hoe sij hoere vyanden souden mogen

+ fol. 143 v⁰

+ fol. 144 v^o

[p. 475]

crencken ende scade andoen, sodats hieromme van groten node was, scarpelijken voir hem te syen ende wael voirsien ende behoedt te wesen die plaetsen die dien van Gendt naiste lagen, als Oudenairden, Denremonde, Brugge, der Sluys, den Damme ende Airdenburch; want dese Franssoys Ackerman was zeer abel ende subtijl van upset om steden ende sloten te stelen ende te beclymmen, dair hij oic vele cloecker subtijlre gesellen toe hilt, die hem dat plagen te helpen doen. Hieraf gebuerde dat, omtrent den uutganck van meye, dese Franssoys Ackerman met omtrent VII^M man, al te harnasse, uut Gendt schiet⁺ in meninge ende met enen upsette die stede van Airdenburch te beclymmen ende te stelen, uut groter begeerten die hij hadde van dairbinnen te belopen dat ridderscap ende edele mannen dairinne wesende ende bijsonder die cappiteine, here Jan van Juemont, die hij boven allen zeer begeerde te crijgen mogen, die den Gentoyseren so onmatelijken hinderlijken geweest hadden, ende so menygen schade an hoeren burgeren, so an dootslaen, so an hangen, blinden oghen uut te steken, oren af te snijden, handen ende voeten af te houden, of crepel ende lam te maken, dat sij hem dootlijken haten; ende quam dese Franssoys up dit upset met sinen hope; up enen woensdage smorgens recht in der dageraet, voir Airdenburch, met hem hebbende hoir clymlederen, alle wael te passe ende bereyt. Nu lagen up dese uyere binnen Airdenburch up hoir bedden, ende sliepen zacht ende soet, upt betruwen van hoir wake ende hoir gett, dien die wake van dier nachte bevolen was, die burchgrave van Myaus, here Jan van Juemont, here Rifflairt van Vlaenderen, here Thierchelet van Montengies, die here van Doumairt, here Perducas du Pont-Saint-Marchy, die here van Longevael ende here Jan sijn zone,

+ fol. 145

[p. 476]

here Huge die Suel, die here van Lallaing, ende here Reynalt van Loumet, met noch meer andere edelre mannen, die in groter vresen hoirs lijfs lagen ende sliepen, want alrede was bijnae alle dat gett van der nachtwake van hoire wake gescheyden ende thuysgegaen, ende die van der dachwairde en waren noch niet up hoir stede gecomen, doe Franssoys Ackerman met sinen gesellen gecomen waren met horen lederen up horen halsen, ende waren alrede over die grafte een deel, ende hoir lederen upgerecht, ende begonden hemselven up te helpen ende upwairt te clymmen langes die muyeren. Des waren dair van waenschifte gebleven, die noch van hoir nachtwairde ende wake binnen der stede niet gescheyden en waren, die here van Sint-Aubijn ende een jonchere uut Pyccardye, geheten Engreham Sendekijn, ende noch een pyckenair met hem; dese ghingen noch langes der muyeren tesamen wanderen, eer sij wouden gaen slapen, also sij mede in die nachtwairde geweest hadden; twelke een groot geluck van dien van binnen was, want, sonder enygen twyvel, en hadden sij dair niet geweest, Airdenburch hadde verloren geweest ende alle die heren ende edele mannen up hoere bedden belopen.