Cronyke van Vlaenderen. Deel 1

Hoe die van Oudenairden uuter stede van Oudenairden gejaecht worden ende die stede bleef gents, [ende hoe Amerygo Marceel dat slot van Merquel wan in Overingen, ende hoe hijt weder overgaf bij dadingen van VI^M francken].

Weet voirwair dat doe die goeden luden, die binnen Oudenairden up hoir bedde lagen ende dit gecrye van ‘Gendt! Gendt!’ hoirden, in groten node zeer vervairt ende mismoedich waren, ende, vernemende dat hair stede gestolen ende verloren was ende dair niet in te doen en was dan alle liveloos ende goedeloos te wesen, ende hoirden, dair sij up hoir bedde lagen, dat men hair dueren ende huysen ontween sloech ende hemluden dair doot inne, ende dat nyemant dair weer voir en boot, noch voir hemselven noch int gemeen, overmits dat sij so haestelijken ende onversiens overvallen worden, worden sij zommyge hem bedeynckende dat sij hem bergen souden, diet bijbringen mochte. Dair sprongen die mannen naict uten bedde, ende begaven huys, hof ende alle dat sij ter werelt hadden, waren sij arm of rijck; ende die sommyge diet konden zwommen over die Schelt ende quamen so wech; andere vielen over die muyeren ende voirt over die graften, ende berghden hem also sonder yet voir hem te nemen; mer hij was al geluckich

[p. 428]

die also naict wech mochte comen, sodat dair binnen dier nachte menich man tlijf liet, so verslagen, so gedreinct in die Schelte, die gairne tlijff geberght hadden ende niet zwemm'en en konden of so vervairt waren dat sij niet zwemmen en mochten, dies doe dair groit ellende in deser nachte was. Doet quam an den dach, ende die van Gendt hem meyster ende heren van der stede vonden, setten sij al uut dat dairinne was, wijf ende kindt, in hair linden clederen of in noch snoder abijt, ende sonden se so binnen Doirnicke; die mannen die wechgecomen waren quanten oic al naickt, die een tot Bergen in Henegouwen, dander tot Condeet, tot Valenchijn, tot Aeth, tot Doirnicke, of dair sij beste waenden te wesen. Dese tijdinge quam binnen Gendt, dair sij bovenmaten zeer af verblijt waren alle Gendt. doir, ende seechden alle die van Gendt hoedat Fransois Ackerman sculdich waere gepresen ende vermairt te wesen voir een waeldadich ende vroom man sijns lijfs, dat hij sulken upset hadde connen begripen ende dat an sulken starcken stede volbringen als Oudenairden was. Dair bleef doe dese Franssois Ackerman binnen Oudenairden, ende wert dair cappiteine af, up welk conquest hij al te groten goet verwarff, want die stede vol goets was ende vol goeder provancien, die oic die stede van Gendt zeer wael dienden, als tarwe, haver, wynen ende veel andere provanden; ende alle dat goet dat dair binnen was uut Franckrijke, uut Vlaenderen, uut Doirnicke of uut Arthoys, wert al gepairt ende gebueyt; mer, wes dairbinnen gevonden wert den lande van Henegouwen toebehorende, en wert niet vermindert, noch en namen dair nye een penninck wairt goets af, ten wert wael betaeldt.

[p. 429]

Dese materie willen wij wat vergeten ende keren⁺ weder ten saken van Vlaenderen ende totten belegge van Bourburch.

+ fol. 129 bis v^o