Geestelyck lietboeck genaemt de Basuyn
(1626)–Simon Jansz Fortuyn–
Auteursrechtvrij
[pagina 600]
| |
Op de wijse: Na u begheer Maeghdekens siet.
EEn Liedeken na u begheer
Ontfanght van my in 't goede,
Ghebruyckt het staegh tot uwer Leer,
Op dat de deught by u vermeer,
En staen meught op u hoede.
Lesen moet ghy in de schriftuer
En onthouden te deghen
Wat Godt eyst van zijn kind'ren puer,
Hoe zy altijt in soet en suer
Moeten gaen op zijn weghen.
| |
[pagina 601]
| |
Bewaert doch wel u tongh en mondt,
Als een dochter bequame,
Gheen ydel klap tot gheener stondt,
En moet geschien, die wel doorgrondt.
Wilt ghy houden goed' name.
Een dochter die na eere staet,
Moet staegh sorghvuldigh wesen,
Dat zy wel volght haer Ouders raet,
En 's Heeren wet nimmer verlaet
Maer naerstigh den Heer vresen.
Reeckent u staegh de minst te zijn
By die met u verkeeren,
Weest ootmoedigh in werck en schijn,
En tracht met vlijt t'allen termijn
Om goed' zeden te leeren.
| |
[pagina 602]
| |
'T en betaemt Eerbaer kind'ren niet
Haer selve groot te achten,
Want wat uyt hooghe moet gheschiet
Streckt teghen des Heeren ghebiet,
Hier moet ghy u voor wachten.
In al het gheen dat ghy hanteert,
Wilt u need'righ bewijsen,
Hebt acht op 't gheen den Heer begheert,
En u tot zijn beveelen keert,
Soeckt so zijn Naem te prijsen.
En volght niet nae de Maeghden zot,
Die niet in tijts toe-sagen,
Want haer ghenaeckt schand' en spot
En mosten missen 't beste lot,
Met droefheydt en wee-klagen.
| |
[pagina 603]
| |
Naerstelijck wilt doch voor u zien,
Nu den tijdt is voorhanden,
Want wat de Heer u gaet ghebien
Moet nu met vlijt van u gheschien,
Of ghy komt na in schanden.
Gheen tydt men nae dees tydt verwacht
Om yet wat goedts te pleghen,
Dus slaet dees tyt doch naerstigh acht,
En u beroepingh wel betracht,
Of ghy wordt nae verleghen.
Een Dochter die haer altijdt draeght,
Zedigh, vroom, goedertierigh,
Godt en haer Ouders wel behaeght,
Dus doch altijt na deugde jaeght
Zijt kuys, stil, en manierigh.
| |
[pagina 604]
| |
Reynigheyt wert van Godt bemint,
In woorden, en in wercken,
Dus schickt dat men u suyver vint
Als een ghoorsaem deughdigh kint,
Die Heere sal u stercken.
Roept, smeeckt, en bidt om zijn bystant
Waer ghy u hier gaet wenden,
So 't niet en schort aen uwen kant
Hy sal u willigh bien de hant,
Ende zijn trooster zenden.
Ist dat ghy door des Heeren gheest
Hier bystant kont verwerven,
Voor niemandt hier op Aerden vreest,
Want hy Lichaem en Ziel gheneest,
Voor het eeuwigh bederven.
| |
[pagina 605]
| |
'T en moet aen u niet feylen dan
Dees gheest te ghehoorsamen,
Al komt u het vleys listigh an,
Door hem kondt ghy 't wel keeren van,
Volght ghy hem nae 't betamen.
Soeck dat ghy staegh nae zijn bevel
V weghen recht gaet schicken,
So sal hy u met goedt opstel
Door zijn wijsheyt geleyden wel
Daer u ziel sal verquicken.
Dochter ontfangt dit slecht gezanck,
Als uyt Liefden gheschoncken,
En neemt het tot een Leer in danck,
Ick hope dat het noch eer lanck
V ghemoet sal ontfoncken.
't Mist wel meer. |
|