Geestelyck lietboeck genaemt de Basuyn

[p. 318]

Liedeken.

Op de wijse: Ick seg a Dieu, vleysch, bloet, wy moeten scheyden.

ICk heb ghedocht
Op 't gheen ghy ginckt versoecken,
't Most zijn volbrocht,
Dus gae ick mijn verkloecken,
Om te volbrenghen u begheert,
Al zijt ghy self wel gheleert,
O doch verneert, tot 't gheen vermeert.
't Gheloof in allen hoecken.

Al uwen zin

Wilt tot die Wet Godts keeren
En u daer in

[p. 319]

 

Ghestadelijck useeren,

 

Op dat ghy zijn wil wel verklaert,

 

En u beroeping wel bewaert,

 

Veel vruchten baert, goedigh van aert,

 

Die Godt van harten eeren.

 

 

 

Na 't beste deel

 

Wilt doch van harten spooren,

 

Soeckt in 't gheheel

 

Slecht en recht te gaen vooren,

 

Straft, dreyght, vermaent, met goet opset,

 

Laet u gheen dinck hier doen belet,

 

Perfect en net, houdt Schrift en Wet,

 

Laet u 't quaet niet bekooren.

 

 

 

Pooght metter daet

 

Godts wijsheyt te verkrijghen,

 

Vroegh ende laet

 

En wilt Gods Wet niet swijgen,

 

Godts Woordt voor al te rechte snijt,

[p. 320]

 

Bewijst ghy trou arbeyder zijt

 

't Gheloof belijdt, tot aller tijdt

 

Voor Godt u hart wilt neyghen.

 

 

 

In al u werck

 

Houdt Godts ghebodt voor ooghen,

 

Wilt in Gods Kerck

 

Altijt na vrede pooghen,

 

De Liefde zy in u ghegrondt,

 

Hout vast aen Godts eeuwigh verbondt,

 

Met hart en moedt tot aller stondt,

 

Vreest Godt na u vermoghen.

 

 

 

Eenvoudigh slecht

 

Wilt Godes Woordt verklaeren,

 

Welck u te recht

 

Godts gheest sal openbaeren,

 

Wijckt ter recht noch ter slincker baen,

[p. 321]

 

Maer wilt vry-moedigh recht voort-gaen,

 

Weest niet belaen, en blijft vast staen,

 

De Heer sal u bewaeren.

 

 

 

Treurt, schrickt, noch beeft

 

Voor des Werelts vyanden,

 

Die eeuwigh leeft

 

Sal haest maecken tot schanden

 

Al haer aenslaghen, en haer doen,

 

Wilt trou des Heeren schapen voen

 

Met u sermoen, wilt haer behoen

 

Voor al der Leeuwen tanden.

 

 

 

Een doopsel reyn

 

Stelt voor uyt de Schrifture,

 

Niet in 't ghemeyn,

 

Maer die net zijn en pure,

 

En die daer doen oprechte boet,

 

Gebroken van hart, zin, en moet

 

Al 's Wereldts goet, slaen onder voet,

 

Ghetroost in soet en sure.

[p. 322]

 

Reyn onbevleckt

 

Het Avondtmael wilt leeren,

 

So die Schrift spreckt:

 

Al nae dat Woort des Heeren,

 

Met Broodt en Wijn tot een ghedacht,

 

Hoe Christus was bespot, veracht,

 

Ter doodt ghebracht, gheheel onsacht,

 

Om schult van ons te weeren.

 

 

 

So die Schrift zeyt:

 

Wast der Heylighen voeten,

 

En zijt bereyt

 

Een kus des vrees in 't groeten

 

Te doen aen die u Broeders zijn

 

Leeft so int huys des Heeren fijn

 

Met heyligh schijn, u sal gheen pijn,

 

Noch smert hier na ontmoeten.

 

 

 

Om Godts bevel

 

In den ban te ghebruycken,

 

Perfect en wel

[p. 323]

 

Wilt Schrifts verstandt eerst pluycken,

 

Hout stadigh met vermanen an,

 

Laet vleysch noch bloedt zijn u raeds-man,

 

Wilt quaet niet van, ghebruyckte dan,

 

Maer laet partye duycken.

 

 

 

Onthout, en schuw't

 

Al sulcke quaed' zondaeren,

 

't Leven vernuwt

 

Mach met geen boosheyt paeren,

 

Houdt maet, soo mooght ghy zijn verblijt,

 

Want Godt sal weder t' zijnder tijt,

 

Na elcks belijt, rechten subijt,

 

En niemandts zonde sparen.

 

 

 

Neemt doch in danck,

 

Dat ick u hier doe schencken,

 

En wilt eer lanck

 

Mijn weer int best ghedencken,

[p. 324]

 

Verquickt met u gaeven mijn gheest,

 

So ghy in die Schriftuere leest,

 

Zijt niet bedeest, voor niemandt weest,

 

Gheen quaet en sal u krencken.

't Mist wel meer.