Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.tSpel vanden Wynghaert.
Ao. 1533

dUpperste Mueghentheyt, als een staetelic man vp doude eeuwe ghehabituweirt.
Duechdelic Vermaen, ghehabituweirt als een hofmeester tryonphant.
Voorghaende Bewys, gheabituweirt als eenen gheestelicken wercman.
Ziende Blende, gheabituweirt als een ruter vander banc.
Hoorende Doof, gheabituweirt als een vraukin vanden gheduene.
Vroom Labuer, gheabytuweirt als een edel man.
Ghewillich Volghen, gheabituweirt ghelyc eenen hofman.

+ Prologhe.

 
Al dat juecht heift/ ziet men ontsprynghen.
 
De vueghelkins zynghen.
 
De crudekins brynghen
 
Elc zyn bloesseme/ naer zyn gheleghentheyt.
5
Hoe zouden wy meinschen/ ons ghedwynghen?
 
Tsaysoens omrynghen
 
Duer Gods ghehynghen
 
Verwect tsins aerds/ naer elcx gheneghentheyt
 
Tsy voorspoet of bejeghentheyt.
 
 
10
Onsen aerdt ons als nu verwect
 
Om te thooghen perfect
 
Gods woort onbevlect
 
Soo sint Matheeus/ jn twyntichste heift bescreuen
 
Wiens woorden al dat leift/ moet zyn subgect.
15
Wyeder tjeghen trect
 
Ofte mede ghect
 
DUpperste Mueghentheyt/ heues beuel ghegheuen
 
Hier jnt leuen.
 
 
 
Sheeren beuel es/ elc wilter vp mercken
20
Tsy leecke of clercken
 
Dat wy sullen wercken
 
Jn zyns wynghaerts heerscepye.
 
Dats thelich ghelooue/ der kerstene kercken
 
Dat jn eeneghe percken
25
Men ziet bezwercken
 
Met de Lazerussche sonde der ketterye
 
Vul heresye.
 
 
 
Ende om te thooghene/ naer ons advys
 
Jonc hout grys
30
Blonc ende wys
 
Dat zy hem behooren/ ende zouden wachten.
 
Want wye sheeren wynghaert/ doet mesprys
 
Hy steict zynen bys
 
Van huer ghespys.
35
Ghelyc de onghelooueghe dat zy slachten.
 
Men salse niet achten.+
 
 
 
Om dat mer vynt/ vele ziende blent
 
By wien ghescent
 
Wort den wynghaert jent
40
Vander kersten kercke/ dats ons helich ghelooue
 
Versteent jn sonden/ tot jnden hent
 
Hoe ment keert of went
 
Blyuende bekent
 
Ghebonden binnen der dolacien scooue
45
Als dhoorende dooue
 
 
 
Dus die anhooren wille/ ons spils bediet
 
Doch voor hem ziet.
 
Creicht ghy verdriet
 
By squaelicx bewaeren/ neggligencie
50
Dat hu juweelen buerssen/ wierden bespiet
 
Wy en kennense niet
 
Die hem daer toe biet
 
Maer bidden elcken hier jn presencie
 
Om audiencie.

Hier naer volghet tspel ghemaect vp de ewangelye van sinte Matheeus jn zyn twyntichste capittel by my Cornelis Eueraert ende ghespeilt vp onser Vrauwen anunciacien dach xxv jn Maerte xvc ende drye ende dertich voor Paesschen.

 

Per my so reine verclaert.++

 

Spiritus sancti assit gracia.

dUpperste Mueghentheyt als een staetelic man vp doude eeuwe ghehabituweirt.
55
Als vader des huusghesins/ diet al regierende es
 
Den tyt verleenende/ diet al verchierende es
 
Ende stierende es/ ter vruchtbaerheden
 
Al dat groeyt/ men nv anthierende es
 
De eerde ten labuere huer obedierende es
60
Ende verfierende es/ duer smesschens zeden.
 
Tes tyt om vp heffen/ dat licht vertreden.
 
Men ziet nv sceeden/ tdrooghe van tgroene.
 
Boomen wynghaerden/ worden besneden.
 
Planten ende zayen/ es jn saysoene.
65
Dus eist behoorlic/ ende manniere van doene
 
Dat jc mynen wynghaert/ ooc moet roucken
 
Mids welcken dat jc bem/ van opinyoene
 
Dat jc wercklieden/ wil ghaen soucken
 
Ende mynen wynghaert/ doen heghenen snoucken
70
Van quaeden rancken/ daer an ghestaen.
 
Jc wilse doen voorsien/ an allen houcken
 
Vp datse goede vruchten/ mach ontfaen.
 
Waer zyt ghy myn officier/ Duechdelic Vermaen?
 
Spoet hu zaen met snellen keere
75
Ende volcht my naer.
Duechdelic Vermaen ghehabituweirt als een hofmeester tryonphant.
 
Thuwen ghebode heere
 
Bem jc bereedt om my te bewyndene
 
Tot uwen dienste.
Upperste
 
Om te vyndene
 
Werclieden die ten labuere/ weten den vont
 
So willic vut ghaen jnden moorghenstont.
80
Want jnden nuchtent/ hem elc om wercken biet.
Duechd.
 
Ghunder heere/ jnt bemercken ziet
 
Staet een persoon/ vp dat hy hu greyt
 
Die ten labuere/ om werc verbeyt
 
Zoo hy scynt zynde/ jnt habyt ghecleet.+
Upperste
85
Hem willic toe ghaen/ spreken ghereet.
 
Vrient doet my besceet/ naer myn advys.
 
Hoe es uwen naeme?
Voorghaende Bewys gheabituweirt als eenen gheestelic[ken] wercman.
 
Voorghaende Bewys.
Duechd.
 
Die naeme heift prys/ diese keestelicken vaet.
Upperste
 
Voorghaende Bewys?
Voorgh.
 
Jae heere.
Duechd.
 
Den gheestelicken staet
90
Verstae jc daer by/ clouc ter weerden.
Upperste
 
Ende uwe spaede?
Voorgh.
 
Besouc der Eerden
 
Heet dit haelaem/ daer jc mede slaeue.
 
Jnt openen der eerden/ als jcse graeue
 
Pleghic met Besouc/ myn spade
95
Te sceedene tgoede/ vanden quade.
 
De eerde zuueric/ ende maecke reenich
 
Van alle harde greysichede steenich.
 
Alle oncruden bem jc een dwynghaert
 
Met mynder spaede.
Upperste
 
Mynen wynghaert
100
Dien jc bevynde/ belemmert becommert
 
Met erruereghe rancken/ onghenommert
 
Waer by dat zy/ ghecrycht dangieren
 
Dien willic doen zuueren/ ende doen anthieren.
 
Dus zonder vieren/ zoo sult ghy ghaen+
105
Jn mynen wynghaert/ met Duechdelic Vermaen.
 
Want alzoo Canticorum/ jnt tweetste belyt+
 
Om wynghaert te snyden es ghecommen den tyt.
 
Dus zonder resspyt/ wilt hu voughen
 
Tot mynen dienste./ Jc zal vernoughen
110
Huwen aerbeyt met loone/ daghelicx bekent
 
Naer tghewerck uwer handen.
Voorgh.
 
O vaderlic regent
 
Obedient/ zonder te zyne rebel
 
So willic vulcommen/ al hu beuel.
 
Want den meinsche snel/ zoo Dauids vermaen zy
115
Sal huut/ tot zynen aerbeyt/ ghaen vry.
Pausa.
Ziende Blende gheabituweirt als een ruter vander banc.
 
Hoorende Doof
Hoorende Doof gheabituweirt als een vraukin vanden gheduene.
 
Ziende Blent
Ziende
 
Hoe staen de saken?
Hoorende
 
Dats wel ghevraecht.
Ziende
 
Hu slichaems scoof
Hoorende
 
Hem noch redelic kent.
Ziende
 
Hoorende Doof
Hoorende
 
Ziende Blent
Ziende
120
Myn hertkin alst loof+
Hoorende
 
Ter groenicheyt went.
Ziende
 
Wat ghaen wy maken?
Hoorende
 
Dat hu behaecht.
Ziende
 
Hoorende Doof
Hoorende
 
Ziende Blent
Ziende
 
Hoe staen de saken?
Hoorende
 
Dats wel ghevraecht.
 
Jonste huer draecht/ thuwaerts myn caerkin.
125
Hoe becomt hu tvasten?
Ziende
 
Wat een goet jaerkin.
 
Niet een haerkin/ en doet my tvasten pant.
 
Maer seght my/ hoe ghaet hu tvasten te hant?
 
Jc weet wel ghy zout noode/ tvasten breken.
Hoorende
 
Jc hebbe alzoo veil lieden/ doot ghesteken
130
Als daghen ghevast/ welcke teenynghe.
Ziende
 
Lettel of gheen?
Hoorende
 
Dats de meenynghe.
 
Jc laetse vasten/ dies ghelooft zyn.
Ziende
 
Die jnde kercke staen hardts ghehooft zyn.
 
Om wel te vastene/ dat jcse scicke.
Hoorende
135
Dat zyn de beilden.+
Ziende
 
Veil bet [dan] jcke
 
Mueghenser tjeghen/ gheseyt jnt claere.
Hoorende
 
Jae maer ghy ziet wel/ alle jaere
 
Dat houdt ende jonc/ groot ende cleene
 
Hem abstineren/ desen tyt ghemeene
140
Van allen zuuele/ naer den heessche.
 
Jnschelycx deruen zy/ van allen vleessche.
 
Eyren laeten zy/ harde of nissche.
 
Ende jn stede van dien/ ghedoen zy met vissche.
 
Ghy ziet dat soberlic leuen/ elc by dien wille.
Ziende
145
Jc zye vry wel al dat jc zien wille
 
Dat ghy alssic zyt/ van opinioene.
 
Noode ghaet ghy/ ten sermoene
 
Vreessende te hoorene/ uwe ghebreken.
 
Ende al hoort ghy hyement/ segghen of sprekin
150
Datmen behoort/ naer Gods ghebode te leuene
 
Aelmoessene te doene/ ende om Gode te gheuene
 
Of om te biechten te ghaene/ van tsondich bedryf
 
Daer zyt ghy/ puer hoorende styf.
 
Ende om nyement[s] motyf/ wyes hem stooren wille
155
En sult ghy anders hooren
Hoorende
 
Dan jc hooren wille.
 
Wy zyn juuste/ van eender condicie
 
Meer gheneghen/ tot sondeghe malicie
 
Dan tot duechdelic werc/ wye der hem toe went.
 
Jc blyue Hoorende Doof/ ende ghy Ziende Blent.
Pausa.
Upperste
160
Duechdelic Vermaen/ vrient ghetrauwe
 
Om te visenteren/ de lusteghe landauwe
 
Mynen wynghaert/ bem jc vp weghe.+
 
Tes wel redene/ dat jc anscauwe
 
Of Voorghaende Bewys/ jnt wyde jnt nauwe
165
De ghebreken betert/ ende heghent te deghe.
 
Dus naer hu pleghe/ te desen termyne
 
Volcht my naer.
Duechd.
 
Heere tbehoort te zyne
 
Dat die werclieden stelt ten labuere
 
Ende daghelicx betalen moet huer dachuere
170
Tes hoot dat sulc hem zonder bezwyc spoet
 
Om te ziene of men/ hem ghelyc doet.
 
Want al zyn eeneghe/ rasch ander zyn traech.
 
Ende om te werckene/ naer tbehaech
 
Eenen werckman/ werct gheerne naer tadvys
175
Vanden meester die zyn aerbeyt/ gheift loon of prys.
Pausa cleene.
Voorgh.
 
Helpe hoe vyndict hier onghereet.
 
Om handt an te slaene/ jc nauwelic weet
 
Waer jc eerst zal mueghen beghunnen.
 
Jc spitte jc delue/ by ende breet
180
Soo dat vut myn leden breket zweet.
 
Nauwe sallicx meester/ gheworden cunnen.
 
Dit werck zoudic/ een ander wel junnen.
 
Want den aerbeyt/ vermoeyt my bouen somme zeere.
Upperste
 
Godt voorder den werckman.
Voorgh.
 
Wellecomme heere.
185
In alder reuerencie/ moet hu gheschien vruecht
Upperste
 
Hoe staet mynen wynghaert?
Voorgh.
 
Alzoo ghy zien muecht
 
Ontheghent ontreet/ an allen zyden+
 
Becommert belemmert/ als nu ten tyden
 
Met onbehoorlicke rancken van cleender weerde.
190
Ende met Bezouc/ vyndic de eerde
 
Vul distelen doornen/ ende vul braemen.
Duechd.
 
Se moet gheheghent zyn naer tbetaemen
 
Zoudese bequaeme/vruchten voort brynghen.
Voorgh.
 
Duechdelic Vermaen tzyn behoorlicke dynghen.
195
Anders zoudese/ verghaen versteruen.
Upperste
 
Mynen wynghaert/ en mach niet bederuen.
 
Want om die te zuueren/ es den tyt saysoenelic.
Voorgh.
 
Heere alleene eist my ondoenelic.
 
Want hoe jc my mach/ jnt wercken moeyen
200
Et quaede cruut zoude/ my ouer groeyen
 
Eer jc twerc ten haluen/ hadde vulbrocht
 
Ghemerct jc hebbe/ drye hueren ghewrocht
 
Ende lettel scynet/ an allen houcken.
Upperste
 
Jc zal huut ghaen/ ende noch werclieden zoucken
205
Die hu mynen wynghaert/ sullen helpen reeden.
 
Duechdelic Vermaen/ ende jc [onder] ons beeden
 
Sullender naer zien/ al elcken cant.
Duechd.
 
Ghunder heere comt eenen callant
 
Goet ten labuere/ alzoo my dyncke.
Upperste
210
Et valt my juuste jnde clyncke
 
Eer hy ontflyncke/ Duechdelic Vermaen
 
Dat jc hem spreke.
Duechd.
 
Heere twort ghedaen+
 
Vrient twoort wilt verstaen/ dat Paulus Timotheum somt
 
Weist neerstich ende gherynghe/ tot den heere comt.
215
Mynen meester hu by my ontbiet
 
Om hu te sprekene.
Vroom Labuer gheabytuweirt als een edel man.
 
Dat en willic niet
 
Laeten/ noch vallen/ themwaerts stedich.
 
Heere wat es hu belieuen?
Upperste
 
Hoe gaet ghy dus ledich?
 
Tes scande dat ledicheyt/ hu dus bekuert.
Vroom
220
Heere van nyement/ en bem jc ghehuert
 
Om aerbeyt te doene/ zoet ofte zuer.
Upperste
 
Hoe es uwen naeme?
Vroom
 
Vroom Labuer
 
Bem jc gheheeten/ onder den volcke.
Upperste
 
Vroom Labuer?
Vroom
 
Jae heere.
Duechd.
 
Onder shemels wolcke
225
Dat jc Vroom Labuer/ voor aerm ende rycke
 
Byden hedelen staet ghelycke
 
Clouc ende vayljant/ onder shemels luchten.
 
Ende hoe heet hu mes?
Vroom
 
Vreessich Duchten.
 
Al dat warrich es ende van quaeder zeden
230
Wort met Vreessich Duchten/ of ghesneden.
 
Syn scerpheyt en wederstaet/ cranc noch stercken.+
Upperste
 
Ghy sult van stonden an/ ghaen wercken
 
Jn mynen wynghaert/ zonder draelen.
 
Ende al dat recht es/ sallic hu betalen.
235
Mynen pennync salhu/ ghebueren by dien
 
Jn voorme van loone.
Vroom
 
Et zal gheschien.
 
Tot uwen wercke heere/ sallic my spoeden.
 
Want daer staet ghescreuen/ [t]elcx ghevroeden
 
Tot den Tessaloonen/ naer Paulus vermeten
240
Die niet en werct/ die en zal niet heten.
Pausa.
Ziende
 
Wye zoude die bruudt leden?
Hoorende
 
Dat ware goet gheweten.
 
Die feeste zoude ons zeer snoode snercken.
Ziende
 
De ledicheyt steict ons.
Hoorende
 
Want wy noode wercken.
 
Ons zinnen/ naer straecheyts bloesseme staen.
Ziende
245
Hy stonde met ons/ claer als droesseme waen
 
Die ons van werckene spraecke dat ofte dit.
Hoorende
 
Wy slachten als sulc/ die voorde kerckduere zit
 
Wiens leden zoo vut werck zyn/ jc moetet wroughen
 
Sy en cunnen hem ten aerbeyde niet ghevoughen
250
Al heift mense te wercke/ noot ofte begheerrynghe.
Ziende
 
Dat heift ghedaen/ de sober neerrynghe+
 
Daer menich ter aelmoessene/ by veraermt es.
Hoorende
 
Wanneer den stoc/ jn dhandt verwaermt es
 
Traeghe ledicheyt/ heiftse ghebeten.
Ziende
255
Al zynse jnt poortael/ der kercken gheseten
 
Ende eenich predicaer/ staet om te prekene
 
Zy [en] dayngieren thooft/ jnde kercke te stekene
 
Om Gods woort te hoorenne./ Es dat niet vry?
Hoorende
 
Waen zy slachten hu/ ende my
260
Die ter ledicheyt hebben/ elc bysondere vinne.
Ziende
 
Weitge waer jc my verwondere jnne?
 
Jc en cant niet langher veynsen stille.
 
Jc en weet niet wat jcker vut peynsen wille.
 
Dat dUpperste Mueghentheit/ met vermaen goet
265
Aldie hy ledich vynt ter stont ghaen doet
 
Jn zynen wynghaert/ tes vreimt te ghevroedene.
Hoorende
 
Om te werckene/ tes goet te bemoedene
 
Nyement en mach themwaerts/ stedich bien.
Ziende
 
Hy en mach ommers nyement/ ledich zien.
270
Tscynt of zynen wynghaert/ hadde haesten.
Hoorende
 
Hy zal al nemen/ vanden naesten
 
Om zyn werck te doene/ tsy licht of zwaer.
Ziende
 
Of wy ooc anstaen?
Hoorende
 
Varre van daer.
 
Jc en hebs gheenen vaer/ hoe jc stuene.
275
Waenge dat hy ander neimpt/ dan de ghuene
 
Die aerbeyt ghewuene/ zyn jnt gheduer waen?+
Ziende
 
Voorghaende Bewys/ ende Vroom Labuer zaen
 
Ghynghen jnt werck/ zyns wynghaerts nv te stonden.
Hoorende
 
Die staen te zynen/ dienste verbonden.
280
Hy heiftse daer toe/ ghehuert vercoren.
Ziende
 
Al zoude den wynghaert/ ghaen verloren
 
Myn leden en staen niet/ tot eenich werc.
Hoorende
 
An tleuen vanden meinsche/ elc nemes merck.
 
Eist leeck of clerc/ mannen of wyfuen
285
Die ledich es/ zal ledich blyuen.
Pausa.
Vroom
 
Die loon ontfaen wil moet werckens pleghen
 
Dus bem jc vp weghen/ naer sheeren ghebodt
 
Ten wynghaerde om wercken.
Voorgh.
 
Soo helpe my Godt
 
Noynt wercken alleene/ my zoo verdroot.
Vroom
290
Jc comme hu by.
Voorgh.
 
Tes vry wel noot.
 
Hier es wercxs ghenouch/ dat jnt gheduer dient.
Vroom
 
Wel Voorghaende Bewys
Voorgh.
 
Wat Vroom Labuer vrient
 
Hu comste verblyt my/ menichfuldich.
Vroom
 
Jc comme om hu te zyne ghehuldich
295
Sheeren wynghaert/ te zuueren te reedene.+
 
Ende omme tquaede van tgoede te sceedene
 
Soo hebbic Vreessich Duchten tmes.
 
Want jc bevynde/ dat sheeren wynghaert es
 
Vul quaede rancken/ voor bloote ende stoute
300
Waterscoten drooghe/ ende beseecten houtte
 
Dies hy goede vruchten zoude ghemissen.
Voorgh.
 
Wye goetjaer can/ zoo hooghe pissen?
 
Et moet hem wonderlic te handt ghaen.
Vroom
 
Beseect hout moet ghy/ naer shofliedens verstant slaen.
305
Dat zyn dese rancken/ jnden bethooghe
 
Die men bevynt half groene half drooghe.
 
Dese om of snyden/ moet men tbemerc draeghen.
Voorgh.
 
Wy en durren vry naer gheen werc vraeghen.
 
Dus ghaen wy hem rasch/ ende tangherlic an.
Vroom
310
Een yghelic zal doen dat hy can.
 
Want alzoo sinte Pauwels scryuende vry es
 
Jc aerbeyde naer tghuent/ dat voor my es.
Pausa.
Upperste
 
Duechdelic Vermaen/ hoe macht gheschien
 
Dat jc moet zien
315
Den wynghaert/ daer my den zin vp acht
 
Aldus duer groeyen/ vul ketterien
 
Ende bouen dien
 
Vulder onvruchtbaereghe ranken ghescacht.
 
Jc hebbese besceermt/ bewaert bewacht
320
Jnt Egipsche lant
 
Ende van daer ghenomen/ by mynder macht
 
Ende elders gheplant
 
Jn een eerde vruchtbaer/ zeer tryonphant
 
Naer myn behaghen.
325
Nv vyndicse ghecorumpeirt/ an elcken cant+
 
By svyants laghen.
 
Jc mach wel met Joel de prophete claghen
 
Segghende zoo hy jn drouuen scyne relt
 
Mynen wynghaert men/ tot een woestyne stelt.
Duechd.
330
O Vpperste Mueghentheyt/ wiens naeme divyne spelt
 
Hoe by fenyne helt/ uwen wynghaert jnt scauwen
 
Ghy sultse noch helpen.
Upperste
 
Jae jc en trauwen.
 
Jc wil dat mense/ reparere ende heghene.
 
Want den dach es hooghe.
Duechd.
 
Ontrent den neghene
335
Mach de huere/ vanden daghe wesen.
Upperste
 
Nyement en zal vp zyn saken traghe wesen.
 
Dus wilt hu tmywaerts/ jnt volghen sterc bieden.
 
Jc wil weder vut ghaen/ om meer werclieden
 
Vp dat myn werc/ te eer mach vulbrocht zyn.
340
Dus willicse hebben/ zy moeten ghesocht zyn.
 
Want jc selue segghe/ die zouct die vynt.
Ghewillich Volghen gheabituweirt ghelyc eenen hofman.
 
Jc stae hier en gape vp den wynt.
 
Jc wilde wel om wercken/ hyeuwers jnt cot stallen.
 
Ontbeyt en salder niet/ jn mynen pot vallen?
345
So bem jc wel een ongheluckich visschere.
 
Ghunder comt eenen man. Jn langhe geen frisschere
 
En hebbic ghesien/ an zyn ghelaet zedich.
Upperste
 
Hoe commet dat ghy aldus staet ledich?
 
Ghy sult hu by dien/ jn sketyfuicheyts scult gorden.+
 
Wye naer ledich ghaen ghaet/ zal met aermoede vervult worden.
 
Tsyn de woorden/ van Salomon ghesproken.
Ghewill.
 
Heere ten heift an my/ niet ghebroken
 
Dat jc niet ghewrocht hebbe./ Weist niet verbolghen.
Upperste
 
Hoe es uwen naeme?
Ghewill.
 
Ghewillich Volghen
355
Mynen naeme onder groot/ ende cleene ghaet.
Upperste
 
Ghewillich Volghen?
Duechd.
 
Den ghemeene staet
 
Verstae jc by desen/ jn myn sins jngienen snel.
 
Ghewillich Volghen/ zal hu dienen wel
 
Jn uwen wynghaert heere/ tot allen saken.
360
Maer om de naeme/ van uwer raecken
 
Dewelcke mynen heere/ hier openbaer greyt
 
Wilt die hem nomen.
Ghewill.
 
Ghehuldich Aerbeyt
 
Heet dese raecke/ dien ghy ziet tandich
 
Ende beteekent/ de labueren menegherandich
365
Die jc daghelicx/ jn tsweet myns aenschyn
 
Met aerbeyde doen moet/ by daghe of maenschyn
 
Omden scaemelen cost/ te ghecryghene.
 
Maer naer saerbeyts werck / ten staet my niet te swyghene
 
Wort my dickent cleen loon ghegheuen.
Duechd.
370
Ecclesiastici zeuene/ daer staet ghescreuen
 
Tot allen labuerders/ wilt dit mercken ziet
 
Versmaet gheen aerbeydelicke/ wercken niet.
 
Noch jnt selue/ jnt neghenste bewesen worden
 
Die wercken/ sullen ghepresen worden.
 
Tsessendertichste cappittel/ naer desen claer zeyt+
 
Gheift loon den ghuenen/ die hu aerbeyt.
 
Jnt veerthienste werct/ gherechticheyt voorde doot dyn.
Upperste
 
Jn mynen wynghaert/ werclieden noot zyn.
 
Dus volcht my naer zonder draelen.
380
Jc zal huwes wercxs/ dachuere betalen.
 
Jc en slachte menich/ vrec dynghaert niet
 
Den loon te mynckene.
Duechd.
 
Sheeren wynghaert ziet
 
Staet hier voor ooghen/ daer Voorghaende Bewys merct
 
Ende Vroom Labuer/ elc een om prys werct.
385
Ghewillich Volghen/ weist assistent desen.
Ghewill.
 
Thuerlieder assistencie/ sallic diligent wesen
 
Met Ghehuldich Aerbeyt/ mynder raecken sterc.
Upperste
 
Voorghaende Bewys/ hoe muecht ghy maken twerc?
 
Met Vroom Labuer/ wort doch bate verworuen
390
An mynen wynghaert?
Voorgh.
 
ende Vroom tsaemen. Wy hopen jaet heere.
Upperste
 
Hoe machse commen jn desen state bedoruen?
 
Berecht my dat ende stelt te vreden myn.
Vroom.
 
Den ghuenen die byden weghe gheleden zyn
395
Siende den wynghaert met vruchten alst heift gheluct
 
Hebben daer of ghesneden/ ghetrocken ghepluct
 
Groene ryppe/ quaet ende goet heere.
Voorgh.
 
De beesten hebbender jnne ghewroet zeere.
 
Princepalic den beer/ ongheloghen
400
Heift anden wortel/ gheknaut ghesoghen
 
Waer by huer juecht es vermindert verachtert.
Duechd.
 
Exodi twee en twyntich staet/ wye dat lachtert+
 
Hyements acker/ of wynghaert bescaet
 
Aerghert/ ofte by beesten/ bescaeden laet
405
Die zal vanden besten/ voor alle dynghen
 
Van zyn acker ofte wynghaert jnt stede brynghen.
 
Tes sheeren woort/ vp dat ment hilde.
Ghewill.
 
Tjeghens den beer/ loopende jnt wilde
 
Salmen den wynghaert/ bescermen bewaeren.
Upperste
410
Daer omme hebbic hu willen vergaeren
 
Om mynen wynghaert te thuunnen te grachtene.
 
Ende om voor den heltschen beer te wachtene
 
Behouft huer stercte/ te desen saysoene nv.
Duechd.
 
Al dat de handt vermach te doene hu
415
Doet dat neerstelic./ Want jnde helle
 
Derwaerts ghy vaert/ tot uwen ghequelle
 
En es niet tot uwer scennessen
 
Werc/ wysheyt/ noch ooc kennessen.
 
Ecclesiastici neghene/ ons dit verthoocht.
Upperste
420
Mynen wynghaert/ om voorsien allomme behoocht.
 
Ende al dat quaet es ende onbehoorich
 
Weerret daer huut/ vynt ghy hyet wederspoorich.
 
Neerstich ende rasch/ doch jn myn werc ghaet.
Duechd.
 
Prouerbiorum/ twee ende twyntich jnt bemerck staet
425
Siet ghy eenen man/ rasch jnt labuer ghaen
 
Die zal voorde conynghen/ als een muer staen
 
Ende niet voorde onhedele/ van statuere.
 
Dus omme alle werclieden/ van valuere
 
Scryft Pauwels Thimotheum/ weist twoort anveerdich
430
Den werckman es/ zynen loon weerdich.
 
Wel hem die neerstich/ jnt werck slaeuende es.
Upperste
 
Alzoo zaen/ als den dach ten avende es
 
Huwen aerbeyt zalhu ter stont gheloont zyn.
 
Ende alle ledeghe/ hoe zy ghepersoont zyn
435
Sallic zenden/ thuwer hulpe vermeerynghe.+
 
Dus willic nemen myn wederkeerynghe
 
Met Duechdelic Vermaen./ Doet diligencie.
 
Jc beuele hu mynen wynghaert/ jn myn absencie.
Pausa.
Ziende
 
Hoorende Doof/ bey scoone sprute
440
Slachtge den cochuut/ ligghe te mute?
 
Steket thooft hute/ wel lieue sloorkin.
Hoorende
 
Wat sallic segghen van desen ghute?
Ziende
 
Hoorende Doof bey scoone sprute
Hoorende
 
Jc ghelooue en jc myn nuesekin snute
445
Jc salt slyngheren ontrent hu oorkin.
Ziende
 
Hoorende Doof bey scoone sprute
 
Steket thooft hute/ wel lieue sloorkin.
Hoorende
 
Jc comme hu by.
Ziende
 
Doet hu devoorkin
 
Myn aerdich moorkin ghewillich jnt handelen.
Hoorende
450
Wat ghaen wy verzieren?
Ziende
 
Allomme wandelen
 
Ten Karstaengeboome/ ende ter Potterye
 
Om pardoen te halenne/ ter eeren van Marye
 
So veil lieden doen/ tes wel te wickene.
Hoorende
 
Jae maar meest/ om alle dync te bescickene
455
Ende om te versegghene/ dat elc ghesien can
 
Dat hadde desen ende dat hadde dien an.
 
Tdeen habyt was reyn/ tdander hadde beplec.+
Ziende
 
Wy zien elcx messit/ maer niet ons ghebrec.
 
Deene stepte licht ende dander ghync stedich.
Hoorende
460
Maer selue zyn wy traech ende ledich.
 
Wy trecken ons/ van der duechden vaesschen scier.
Ziende
 
Dat salmen zien waere Paesschen hier
 
Snuchtens vrouch/ met der zunnen rysene.
Hoorende
 
Dan eist allomme buten te bysene
465
Ter bruloft ter kermesse tes goet te dynckene
 
Ende buter mylen/ een kannekin te drynckene.
 
Houde costumen/ zoude quaet om laeten dueghen.
Ziende
 
Ten zoude ons niet vele baten mueghen.
 
Dus laeten wy vaeren/ al sulcken snaetere.
Hoorende
470
Wy[e] comt ghundere?
Ziende
 
Dats quaet watre.
 
Tes dUpperste Mueghentheyt/ met zyn officier.
Hoorende
 
Al wilden wy ons hyeuwers berghen hier
 
Wy en mueghen vutden weghe/ niet eenen voet crommen.
Ziende
 
Hy moet ons juuste/ jnt ghemoet commen.
475
Jc duchte hy zal ons verspreken ach.
Upperste
 
Seghtme wat hu beeden/ ghebreken mach
 
Dus ledich ghaende/ zynde naerde noene ziet.
Hoorende
 
Heere wy en zyn niet/ ghewuene te doene hiet.
 
Om ons ooc te huerenne/ en heift hem nyement ghevoucht.
Duechd.
480
Vp dat den heere/ mach worden vernoucht
 
Doet dat hulieder naemen/ hem worden bekent.
Hoorende
 
Jc heete Hoorende Doof.+
Ziende
 
Ende jc Ziende Blent
 
Die van beghinsels tot den hent/ vp Gods ontfaermen ghaet.
Duechd.
 
Hierby verstae jc den aermen staet
485
Vanden sondaeren mannen ende vrauwen
 
Die traech ter duecht zyn/ vp tbetrauwen
 
Dat zy Gods ghenaede/ sullen ghecryghen.
Hoorende
 
Dat eist dat eist./ Cunge niet zwyghen?
 
Ghy beghunt de waerheyt daer te tastene.
Upperste
490
Jc hebbe hu ghesocht/ voor tbeghin der vastene
 
Om jn mynen wynghaert/ dhandt an werck te stekene.
 
Ende tot noch toe zyt ghy jn ghebrekene.
 
Nochtans zoo sochtic hu van tyde te tyden.
Duechd.
 
Een ledeghe siele/ zal hongher lyden
495
Jn zyn Prouerbien/ stryct Salomon dit vonnesse.
 
Hoort jn twyntichste/ noch zyn jonnesse.
 
Omder couden wille/ en wilde die traeghe niet ploughen.
 
Soo salhy jnden zomer/ om brootbidden hem voughen
 
Ende nyement en salhem/ te gheuene verghen.
Ziende
500
Dat zoude mueghen onsen leuene erghen
 
Niet hebben bidden moeten/ ende niet ghecryghen dan.
 
Thuwen dienste willen wy nyghen tjan.
 
Bewyst ons werck/ wy sullender ons toe setten.
Upperste
 
Ghaet ter stont/ zonder eenich letten
505
Jn mynen wynghaert/ te mynen beuele spoet
 
Ende naer hu vermueghen lettel of vele doet.
 
Volcht Vroom Labuer/ ende Voorghaende Bewys.
Hoorende
 
Wy nemen ter stont derwaerts onsen bys.
 
Want men seght costumelic/ weirt vroet of zot wroucht
510
Hy es wys die hem naer sheeren ghebodt voucht.
Pausa.
Hier werckense altesaeme jnden wynghaert.
Voorgh.
 
Daer vyndic een wortel/ van grooter onweerdicheden.+
 
Hy slacht dese stynckende vulder houeerdicheden
 
Scynende van duechden/ niet vele van dooghe.
Vroom
 
Daer zye jc een rancke staende puer drooghe.
515
Vreese Duchtich myn mes/ salse fray of snyden.
Ghewill.
 
Die slacht dese erruereghe/ an allen zyden
 
Die drooghe ghewercken jnt bemerc bieden.
Ziende
 
Godt voordere de meesters.
Ghewill.
 
Wellecomme werclieden
 
Die ons ten wercke/ zeere verstercken sult.
520
Waer es thaelaem/ daer ghy mede wercken sult?
 
Want ghy en brynct/ mes raecke noch spade maet.
Voorgh.
 
Genesi jnt vier ende twyntichste thuwen versade staet
 
Dese lieden zyn vreidsaem/ ende willen by ons wercken man.
 
Laetse commen anthieren/ ende de eerde wercken dan.
525
Want dat landt breet es/ van bevanghe
 
Ende behouft werckmannen./ Jnt corte of langhe
 
Moetse ghehouft zyn by stercke/ of verweecte crancke.
Vroom
 
Jc zye noch een beseecte/ rancke
 
Half groene half drooghe./ Die moet gheweert zyn.
Ghewill.
530
Soo slachtense die vander ketterye ghedeert zyn
 
Half groene half drooghe/ jn Gods leerynghe.
 
Quaelic can mense/ doen ofkeerynghe
 
Van huerlieder quaeder/ opynye vermetelic.
Voorgh.
 
Jc vynde hier/ een bytteghe wortel netelic
535
Vul haetnydegher quaetheit/ tot elcx verzwaeren.
Ghewill.
 
Worpse huut. Jc salt al verghaeren+
 
Met ghehuldich aerbeyt/ niet om verfrayen.
 
Wat sult ghy doen?
Ziende
 
Wissen drayen.
 
Jc hebs my voortyts/ cunnen bewynden.
Hoorende
540
Ende jnt stede van coppelen sallic bynden.
 
Waerder tvier jn daer quaeme rooc of.
Vroom.
 
Daer staet een waterscote/ die moet ooc of.
 
Den wynghaert behouft/ zuuer ende claer zynde.
Voorgh.
 
Helpe dominus wat jc daer vynde.
545
Eenen harden steen/ van mynen onbrekelic.
Ghewill.
 
Die ghelyct dese hardtneckeghe/ verstekelic
 
Wiens opynie van quaeder malicie
 
Noch by leerynghe/ noch met justicie
 
Niet ghebreken en can jn gheender mannieren.
Ziende
550
Jc weet wel mocht/ jcse regieren
 
Jc dedese wel naerde/ behoorte caermen.
Ghewill.
 
Wat zout ghyse doen?
Ziende
 
Huerlieder poorte waermen.
 
Dit hout zoudic thueren keere sommen.
Voorgh.
 
Ghenouch van dien.
Hoorende
 
Waer omme?
Vroom
 
Wy zien den heere commen
 
Met Duechdelic Vermaen./ Laet sulcke verhalynghe.+
Upperste
 
Duechdelic Vermaen/ zonder draelynghe
 
Tes tyt betalynghe/ te doene den slaeuende
 
Ghemerct den dach es commen/ ten avende.
 
Ende Thobias seght/ diet wel besocht heift
560
Gheift loon ter stont/ die hu ghewrocht heift.
 
Tes redene dat aerbeyt/ loon behoupt.
 
Dus Duechdelic Vermaen/ de wercklieden roupt.
 
Jc zal naer tbehooren/ elcken vernoughen vry.
Duechd.
 
Heere jc salder toe voughen my.
565
Comt alle ghy werclieden jnt generale.
 
Ontfanct uwen loon/ jn voorme van betale
 
Des wercxs dat elcken/ heift ghedaen zaen.
Ziende
 
Jc duchte wy en sullen/ nie[t] vele ontfaen waen.
 
Al commen wy achtere/ tsal cleen verlet zyn.
Ghewill.
570
Hu elleboghe mochte wel ghebet zyn
 
Om te rustene/ vander/ moethede.
Hoorende
 
Gheift hy ons hiet/ et wort zyn goethede.
 
Jc en scat niet anders/ by gheualle waen.
Duechd.
 
Heere de wercklieden/ hier alle staen
575
Om loon des aerbeyts/ naer tbesommen dyn.
Upperste
 
Waer zynse die laetsts/ ghecommen zyn
 
Jn mynen wynghaert/ te mynder obediencie?
 
Jc wilse eerst betalen/ tes myn jntencie
 
Van huerlieder aerbeyt/ ende labuere.
Ziende en Hoorende.
580
Wy zyn hier heere.
Upperste
 
Niet als huere
 
Of verdiente van wercke by hu ghedaen ziet
 
En sult ghy loon/ van my ontfaen niet.
 
Nochtans al comt/ ghy laete ten beghunne
 
Huut mynder goetheyt/ dat jc hu junne+
585
Mynen pennync./ Zytse anveerdich.
Hoorende
 
O Vpperste Mueghentheyt/ jc en bems niet weerdich
 
Mids dat jc jn hu wynghaert/ soberlic ghehooft hebbe.
Upperste
 
Neimpt ghylieden den pennync/ dien jc hu belooft hebbe
 
Voor uwen aerbeyt/ van my te loone.
Voorgh.
590
Hoe heere ghy gheifse elc jn persoone
 
Thuerlieder loone/ alzoo vele als wy?
Vroom
 
Wy hebben ommers ghewrocht langher dan zy.
 
Dese betalynghe tot grooter furye dient.
Upperste
 
Jc en doe hu gheen/ jnjurye vrient.
595
Dus wilt hu zonder claeghe vreden.
Ghewill.
 
Wy hebben al dhitte/ vanden daeghe leden
 
Ende neerstich ghewrocht/ naer recht en zedene
 
Vanden nuchtent tot den avende./ Tdynct ons onredene
 
Dat zy ghelyc wy alzoo vele ontfaen.
Upperste
600
Hebbic niet hulieden van hu dachuere vuldaen
 
Naer besprec ende voorwaerde/ jn voorme van loonenne?
Voorgh.
 
Wy en weten ons/ daer of niet te becroonenne.
 
Maer waert dat wy/ meer dan zy ontfynghen
 
Wy en zouden niet murmereren onderlynghen.
 
Want ons labuer ende thuerlieder/ es groot van ghescille.
Duechd.
 
Mach elc met tsyne niet doen/ dat hy wille
 
Houden of gheuen zonder hyements vraghe
 
Dien hy wil tsy rassche of traeghe?
 
Als hy hu gheift/ dat hy hu sculdich es
610
Wat hindert hu dat hy ghehuldich es
 
Dien hy doet commen binnen/ swynghaerts wercke?
Upperste
 
Mynen wynghaert/ dheleghe kerstenkercke+
 
Es tkersten ghelooue niet vreimde want
 
Jc hebt hu jn elcxs/ herte gheplant.
615
Dus die hem met een ghelooue/ jn duechden erft
 
Mynen wynghaert houffent./ Ter contrarien bederft
 
Hy die quaet doet/ tes Crisostimus woort.
Voorgh.
 
Ysaias jnt vyfste/ es segghende hoort
 
Den wynghaert/ vanden grooten heere Sabaoth
620
Es dat helich huus/ van Ysrael gheloouende jn Godt.
 
Schelycx es ons ghelooue/ by dien exemple
 
Gods wynghaert/ Gods kercke / ofte temple
 
Daer alle gheloouende kerstenen/ jnne vergaeren.
Duechd.
 
Den wynghaert der kercken/ heift jn bewaeren
625
Voorghaende Bewys/ elc gheestelic prelaet
 
Met Vroom Labuer/ den edelen staet
 
Mids Ghewillich Volghen/ den ghemeene volcke.
Vroom
 
Wy drye staeten onder/ shemels reene wolcke
 
Gods wynghaert ons ghelooue/ dheleghe kercke
630
Synse sculdich te bescermenne/ by onsen ghewercke
 
Van alderhande/ quaede heresye
Ghewill.
 
Ende van dese felle vileyneghe ketterye
 
Daer nv mede besmet zyn/ veil steghe welpen.
Upperste
 
Den scaemelen staet wilt te weghe helpen.
635
Maectse nv jn mynen/ wynghaert bekent
 
Die hoorende doof zyn/ ende ziende blent
 
Die als noch jn sonden leuen/ ghelyc als beesten.
Duechd.
 
En zynt doch niet al dienende gheesten
 
Dewelcke huut ghesonden worden jnden dienste
640
Als de ghuene die worden sullen de ghevrienste
 
Erfghenaemen/ der eeuwegher salicheyt?
Ziende
 
Wy hebben ledich ghestaen by onser dwaelicheyt+
 
Veruaert voor sbriesschende leeus verscueren
 
Verwonnen van tvleesschelic/ bekueren+
645
Ledich ter duecht/ tonsen proffytte niet zienende
 
Onsen naesten niet helpende/ Godt niet dienende
 
Lettel ghepeinst omden toecommenden dach.
Hoorende
 
Den prophete Michee/ seght met gheclach
 
Wee my lachen/ jc bem gheworden
650
Als een bezyden/ des wynghaerts ghetorden
 
Vergadert jnden herft/ gheen duecht om weten.
 
Ende daer en es/ gheen druue om heten.
 
Daer Salomon seght/ met goede verstanden
 
Gheift haer vande vruchten/ haerder handen.
655
Maer met wat vruchten/ wilt mense beghaeft hebben
 
Die jn sheeren wynghaert niet gheslaeft hebben
 
Ende noch daghelicx ledich zyn jn sonden te merckene?
Voorgh.
 
Alle staeten zyn ghehouden nu te werckene
 
Jn sheeren wynghaert/ met diligencie.
660
Die met vasten bedynghe/ jn reuerencie
 
Syn doende penitencie/ sullen hoochst ghecroont zyn.
Duechd.
 
Den pennync daer zy mede/ sullen gheloont zyn
 
Dat wort Gods rycke/ dat zonder hent is.
Vroom
 
Ghelyc den pennync rondt bekent es
665
Sonder hendt middel ofte beghin
 
Schelycxs es Gods rycke meer noch min
 
Sonder beghin/ middel/ hendt/ jn eeuweghen gheduere.
Ghewill.
 
Den loon moet ghecreghen zyn met labuere
 
Niet by woorden dat ment verstaet
670
Maer daer moet toe zyn/ werck ende daet.
 
Werck [ende] daet doet/ thelsche zwerc vlieden.
Ziende
 
DUpperste Mueghentheyt/ roupt ons wercklieden.
 
Want de daet by huer selven zoo bewynt
 
Datse metten wercke/ aerbeyt vynt.+
675
Ende aerbeyt vynt loon/ goet ofte quaet.
Hoorende
 
Soo den werckman/ den dach beslaet
 
Meer met wercken dan/ met dryncken of heten
 
Alzoo sullen wy ooc/ ons wercxs secreten
 
Meer slaen ter Gods glorye/ zoot es betaemelic
680
Dan tot erdsche saken.
Vroom
 
Tes bescaemelic
 
Voor eenich werckman/ te zyne bedocht
 
Loon te heesschene/ niet hebbende ghewrocht.
 
An dien hyt begheert spreicxs/ hem lachtere.
Duechd.
 
O sondeghe creathuere/ leert hier achtere
685
Hoe commet by dits wel om sommenne
 
Dat ghy hu niet/ en scaemt te commenne
 
Jn sheeren wynghaert/ de kercke verstaen
 
Voor Gods ooghen/ ende wilt ontfaen
 
Loon van hem/ niet hebbende beseuen
690
Eenich duechdelic werck by hu bedreuen?
 
Soo Lucifer hiesch van snuchtens tbetalen
 
Heer hy ghewrocht hadde/ dies moest hy dalen
 
Met al den zynen ter helscher bruwyne.
Ziende
 
Wanneer ons leuen comt/ ten fyne
695
Dat den dach ten avende mach bedieden
 
Twelc nyement en weet/ van tghescieden
 
Dat ons de doot zal commen straelen
 
Met wat loon zal ons/ den heere betaelen
 
Daer hy an ons werc vynt/ zoo veil lacxs?
Voorgh.
700
Met nyemendt en heift hy ghemaect compacxs
 
Dan met Adam hier binden leuene
 
Ende elcken daer naer heuen vele te gheuene
 
Weerdich zynde/ by sduechs verstercken.
Vroom
 
Sy wierden ghehelicht huut huerlieder ghewercken+
705
Die voor Gods/ gheboorte waeren.
Hoorende
 
Maer de heydenen ende wy sondaeren
 
Leuende jnder ketyfueghe/ sondeghe aermicheyt
 
Syn ghehelicht/ duer Gods ontfaermicheyt.
 
Lof vloeye hem toe/ jnt hemelsche vlot.
Ghewill.
710
De heydenen heeren/ den almuechghende Godt
 
Duer zyn misericordye/ bouen allen fonteynen
 
Als vloet der gracien/ zoo tot den Romeynen
 
Paulus scryft/ met goeden accoordene.
Voorgh.
 
Gods groote ontfaermicheyt/ en ansiet gheen oordene
715
Jnt betalen alzoo Crisostimus belyt.
 
Want dUpperste Mueghentheyt ghebenendyt
 
De laetste ghecommen/ alder eerst gheloont heift
 
Ende de eerste jnt labuer/ hy laetsts verscoont heift
 
Met den loon van zynder/ glorien divyn.
Vroom.
720
Tsyn deerste gherekent seght sinte Augustyn
 
Die naer corten tyt hueren loon ontfanghen
Ghewill.
 
Als den moordenaere/ neffens Christus ghehanghen
 
Was om cort tyts wercken/ loon ghegheuen.
Ziende
 
Hy ontfync den pennync
Hoorende
 
Dats teeuwich leuen
725
Dat elcken ghewinnen mach tsynder noot.
Voorgh.
 
De murmererynghe es tverwonderen groot
 
Dat zy hadden die jn thelsche voorbouch laghen
 
Ende gheleghen hadden/ zoo meneghe daghen
 
Dat hy ghecreghen hadde sulcke gracie
730
Soo corts loon te hebbenne/ der jubelacie
 
By wien zoo lettel duecht/ ghewrocht was.+
Duechd.
 
Den pennync was ghegheuen/ daer mede ghecocht was
 
De openynghe vander/ vyperste glorye
 
Ghecommen vanden wynghaert de zuuer ceborye
735
Maria duer wiens/ odmoedich consent
 
Christus ghegroeyt es/ huut huer excellent
 
Soo men hier tooghen zal als divyne druue
 
Vp dat men om openen/ de gordynen scuue.
Pausa.
Voorgh.
 
Lof wynghaert/ bouen alle wynghaerden ghepresen
740
Ghebenendyde Maria/ moeder ende maecht
 
Rancke vut Jesse/ zuuer gheresen
 
Die Godt den vader/ dodmoedichste behaecht
 
Jn wien ghesonden heift/ onvertraecht
 
Om te beteren Adams sondeghe bescoudenesse
745
Synen eeneghen zuene/ dies men nv ghewaecht
 
Lof wynghaert lof druue/ ons alder behoudenesse.
 
 
 
Lof bouen lof moet hu toe vloeyen
 
Als wynghaert bouen alle wynghaerden bekent
 
Huut wyen ghegroeyt es/ jn svyants vernoeyen
750
Christus Godt/ ende meinsche excellent.
 
Ghy zyt den oorspronc/ ende tfondament
 
Van ons wynghaerts/ ghelooue de verboudenesse.
 
Dus segghic thuwer eeren/ zonder hent
 
Lof wynghaert lof druue/ ons alder behoudenesse.
 
 
755
Lof wynghaert Maria duechdelicxste van moede
 
Wiens druueghe vrucht/ naar sint Jans oorconden
 
Wy sacramentelic nutten/ jn vleessche jn bloede
 
Als druue van hu als wynghaert ghevonden
 
Wiens macht den vyant/ heift ghebonden
760
Om ons te wachtene/ van deeuweghe vercoudenesse.
 
Dus segghic nv ende tallen stonden
 
Lof wynghaert lof druue/ ons alder behoudenesse.
Ziende
 
Lof princesse Maria/ wynghaert playsant
 
Daer ons gheloove dheleghe kercke huut spruut.
765
Verbidt de ziende blende/ an elcken cant+
 
Dat zy commen mueghen/ binnen shemels besluut.
Hoorende
 
O moeder ende maecht/ weerde Gods bruut
 
Aduocate der sondaeren/ naer scriftueren ontvoudenesse
 
Jc Hoorende Doof/ moet gheuen jnt segghe[n] tribuut
770
Lof wynghaert/ lof druue/ ons alder behoudenesse.
Pausa.
Duechd.
 
Maria es den wynghaert/ vut wyen ghesproten
 
Es dhelege kercke/ jn wien eerst ghesloten
 
Wiert ons ghelooue/ vulmaect perfect.
 
Want gheloouende heift huer ghestelt subgect
775
Met consente/ zonder stwyffels bezwaerte
 
De Vpperste Mueghentheyt.
Vroom
 
Den vyfentwyntichsten jn Maerte
 
Ghelyc alst hedent es den dach
 
Es hooghe weerdich/ naer scriftuere ghewach
 
Omde misterien/ vp desen dach ghebuert.
Voorgh.
780
Hedent wiert de godtheyt/ ende meinscheyt jn een ghenathuert.
Ziende
 
Hedent maecte de godtheyt ende meinscheyt alyanche.
Hoorende
 
Hedent nam Christus/ zynder wuensten playsanse
 
Jnt ghebenendyde lichaeme/ van Marye.
Voorgh.
 
Hedent wort toe ghescreuen sHelichs Gheest melodye
785
Om zyn goedertierheyt ons meinschen bewesen.
Vroom
 
Hedent es Maria/ bouen alle vrauwen ghepresen
 
Als svaders dochtere/ zyn weerdste juut.
Ziende
 
Suens moedere+
Hoorende
 
sHelichs Gheest bruut
 
Bouen alle vrauwen vercoren jn gracie.
Voorgh.
790
Hedent begonste/ shemels reparacie.
 
Ende smeinschens/ salicheyt nam zyn beghin.
Vroom
 
Hedent starf Christus/ om ons ghewin
 
Andt hout des crucen de bitter doot.
Ziende
 
Abel wiert versleghen
Hoorende
 
Ende Godt gheboot
795
Abraham met Ysaac/ te doene offrande
 
Vp desen dach.
Voorgh.
 
Desen dach es helich/ omde menigherande
 
Hooghe misterien daer jnne ghesciet.
Vroom
 
O sondeghe creathueren die men noch daghelicx ziet
 
Siende blent/ ende hoorende dooue
800
Sondich leuende by crancken ghelooue
 
Ziet toe eer uwen tyt al ghaet verloren.
Voorgh.
 
Vele esser gheroupen maer lettel vercoren.
 
Tes Gods woort ende ons spels conclusye.
Vroom
 
Wilt ghy ontghaen/ der hellen confusye
805
Betert hu van alle sondeghe ghebreken.
 
Comt jn sheeren wynghaert dese toecommende weke
 
Ende stelt Christus lyden/ jn uwe memorye
 
Waer by ghewonnen es/ dupperste glorye
 
Die elcken ghecryghen mach om ghewinnen vrede
 
By sHelichs Gheest gracie/ mids der Drye Santinnen bede.

†A†M†E†N†

 

Per my so reine verclaert.+


Vorige Volgende

Over dit hoofdstuk/artikel

datums