Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.tSpel van Maria ghecompareirt byde stede van Jherusalem jn glorien gheresen.
Ao. 1527.

Jonsteghe Gheneghenthede, een vrauwelicke personage gentelic gheabytuweirt.
Begheerlic van Ghesichte, ghelyc Dauid met eender haerppe.
Vergaderynghe.
Salicheyt.
Besittynghe.
+ Jonsteghe Gheneghenthede/ een vrauwelicke personage gentelic gheabytuweirt.
 
Jc Jonsteghe Gheneghenthede ghewillich bereet
 
Maria ter eeren/ naer doude zede
 
Om met ghelyckenesse te doene besceet
 
By Jerusalem/ Gods heleghe stede
5
Dits my onmueghelic/ o moeder der vrede
 
Sonder eeneghen bystant jn dit bevanc.
 
Dus biddic hu odmoedich/ met knyenghebede
 
Dat my bystant gheworde/ eer hyet lanc.
 
My dyncke jc hoore/ der snaerren gheclanc
10
Van eender haerppe/ twelc zoete ghaet.
 
Ander waerf biddic/ om verdienen danc
 
Maria dat ghy my/ reyn maechdelic zaet
 
In staden staet.
Begheerlic van Ghesichte ghelyc Dauid met eender haerppe.
 
Hu niet en verslaet.
 
Mynen bystant/ wilt rysen vander eerden
 
Wort hu bereedt.
Jonst.
15
By uwer weerden
 
Wilt my berechten/ jn dit ghestichte
 
Hoe es uwen naeme?
Begheerl.
 
Begheerlic van Ghesichte
 
Twelc naer den/ Ebreeusschen ouerlegghene
 
Es alzo vele als Dauid te segghene
20
Vultu desiderabilis/ naerden Latyne.
Jonst.
 
Maria ter eeren Gods moeder divyne
 
Begheerlic van Ghesichte/ hier voor ooghen
 
Binde Nyeupoortsche stede/ wilt helpen verthooghen
 
De ghelyckenesse van huer/ by rethorycxsche kueren+
25
Naer den heesch der quaerten.
Begheerl.
 
Tsal hu ghebueren.
 
Maria ter eeren/ willicx my ghetemen
 
Ende te mynder/ assistencie nemen
 
De drye kyndrenchore/ wiens naeme jnt bedieden
 
Es voys ofte gheluudt.
Jonst.
 
Laet doch ghescieden
30
Jnt ansien der lieden/ houdt ende jonc.+
Begheerl.
 
Comt voort ghy heeren/ om wys ende blonc
 
Maria ter eeren/ zonder bezwyckenesse
 
By Jerusalem/ te doene ghelyckenesse
 
Gods heleghe stede/ jn gloryen gheresen.
Jonst.
35
Wat vreimder naemen?
Begheerl.
 
Se worden hu bewesen
 
Aser/ Helchana/ ende den desen
 
Heet Abiasab/ naerder Hebreeuscher tale
 
Twelc dus luudt/ jnden Latynsche verhale
 
Congegracio/ Beatitudo Possesio goet+
40
Dat jn Vlaemsche te verstaene doet
 
Vergaderynghe Salicheyt ende Besittynghe.+
Jonst.
 
Om een vercoelen/ der begheerten verhittynghe
 
Ten verstande vanden volcke/ hier jeghenwoordich
 
Wilt my berechten/ met zinnen accoordich
45
Hoe meneghe manieren my dat bewyst
 
Synder van steden?+
Begheerl.
 
Drye.
Vergaderynghe.
 
Deerste heet Vrbs/ ende ryst
 
Dande[r] twee hoochst/ ende gaet te bouen.
 
Dats daer de residencie/ der houen
 
Vande keyserlicke staet/ hout reyngnacie.
Salicheyt.
50
Maria by ghelycke comparacie
 
Mach wel zyn als Vrbs/ een stede scoone
 
Want dupperste mueghentheyt/ jn persoone
 
Jn huer te rustene/ selue begrepen heift.
Besittynghe.
 
Daer staet scriftuerlic die my ghescepen heift
55
Heift gherust jn mynen lichaeme.
Vergad.
 
De tweeste heet Ciuitas/ als een stede bequaeme
 
Onderhoorich den busscoppelicken staet.
Salich.
 
Wel zyt ghy Ciuitas reyn maechdelicke zaet
 
Die den vppersten prelaet hadde vercoren
60
Voor zyn stede/ ende vut wien hy gheboren
 
Wilde wesen/ dies ghy ghehelich[t] zyt
 
Vanden helichsten der heleghen.
Besitt.
 
Den Wyse Man belyt
 
Die vut den monde van Christus te segghene lust
 
Jnde stede ghehelicht/ hebbic gherust
65
Ende jn Jherusalem/ es myne macht.
Vergad.
 
De derde heet Opidum/ minder gheacht
 
Dan dander twee./ De redene es dit+
 
Want huer gheen hoocheyt/ en besit
 
Dan poorters/ ambochslieden ende volc ghemeene.
Salich.
70
Dese comparacie/ waere te cleene
 
Maria te ghelyckene/ dus laetent wy varen.
Jonst.
 
Jc hoore wel an hulieder openbaren
 
Dat Jherusalem/ Ciuitas es gheleken
 
Gods heleghe stede.
Besitt.
 
Scriftueren hier vp spreken
75
Dat men binnen Jherusalem onghelet
 
Hilt de gheestelicke/ ende de weerlicke wet
 
Lach te Roome/ onder de mueghentheyt
 
Vanden keysere.
Vergad.
 
Dats wel gheseyt.
 
Jherusalem esmen/ by Ciuitas ghelyckelic
80
Niet thoochste/ noch tnederste/ maer baerblyckelic
 
De rechte middel van hem beeden.
Salich.
 
Maria schelycx om een ondersceeden
 
En es thoochste noch tnederste niet beseuen
 
Maer als middel tusschen Godt verheuen
85
Ende den meinsche een troostbaer aduocate.
Dauid gheift een rolle Jonsteghe Gheneghenthede jn dhandt waer jn dat moet staen den gheheelen salm te wetene/ Fondamenta jn montibus sanctis ende dat sal men voor den thooch stellen jn grooten lettren.
Begheerl.
 
Anveert dat van my/ thuwer bate.
 
Jonsteghe Gheneghenthede hu zal ghescien
 
De ghelyckenesse. Opent hu jngien
 
Ende wilt ansien/ de woorden beloken
90
Daer jn ghescreuen.
Vergad.
 
Daer zyn ghesproken+
 
Glorieusheden van hu/ stede Gods eerbaer.+
Salich.
 
Veil gloryeusheden/ waerachtich ende waer
 
Syn van hu Maria/ vermondeirt
 
By propheten ende heleghen gheexalteirt
95
Sonderlynghe naer Esayas verclaerssen
Besitt.
 
Siet een maecht/ zal ontfaen ende bae[r]ssen
 
Een zuene die heeten zal Emanuel
 
Twelc eeuwich bediet.
Vergad.
 
Naer ons voortstel
 
Weit dat noteirlic zyn vier saken
100
Die naemelic mueghen/ een stede maken.
 
Eerst/ eendrachticheyt/ om pays en tghemeen proffyt.
Salich.
 
Ghy Maria zyt/ een heleghe stede bevryt
 
Van eendrachtichhede/ naer Gods ghebodt
 
Huwen wille stellende/ jn de wille van Godt.
105
Want noynt obediencie/ hu en ghebrack.
Besitt.
 
Dit bleeck als zou/ tot den hynghel sprack
 
Siet hier Gods dierne/ te zynen accoorde.
Vergad.
 
Tonsen ghemeene proffytte/ met dien woorde
 
Wiert tusschen Godt/ en den meinsche/ pays eendrachtich.
Salich.
110
Dander condicien/ van proffytte crachtich
 
Dat een betaemt/ ofte anneghaet
 
Dats recht van wette/ ende wysen raet.
 
Ten vierden huer eerbaer/ mannieren behouuen.+
Besitt.
 
Jn hu stede Gods/ en mochte niet verthouuen
115
Eeneghe beroerte/ daer Christus de wet vulmaect
 
Ruste jn nam.
Vergad.
 
Godt jnt middel van hu ghedaect
 
En wort niet beroerlic/ noch van hu sceedende.
Salich.
 
Dus was hy huer/ met wysen raede beleedende
 
Dauid sprekende/ byder prophecien vont
120
Godt zal huer helpen vrouch jnden moorghenstondt.
 
Ooc was zou onder shemels bewelue
 
Ghemanniert eerbaer.
Besitt.
 
Want Godt selue
 
Heift huer tabernakele ghehelicht verchiert.
Vergad.
 
Jonsteghe Gheneghenthede/ jent ghemanniert
125
Nu hebt ghy ghehoort/ naerder scriftueren bely
 
Wat deferencie/ datter tusschen zy
 
Vrbs/ Ciuitas/ ende Opidum tsaemen
 
Ooc wat condicien een stede betaemen
 
Ende al ter ghelyckenesse van Marie.
Salich.
130
Jerusalem ghelyct Ciuitas de middelste partie
 
Om datter de busscoppen/ hilden residencie.+
Jonst.
 
Beminde vrienden/ ter reuerencie
 
Van Maria/ seght waer ghegrondeirt
 
Ende by wien Jherusalem/ was ghefondeirt.
135
Wilt my de wete/ daer of verghen.
 
Tes myn begheerren.+
Vergad.
 
Jn heleghe berghen
 
Sonderlynghe twee/ Gode bequaeme.
 
Deene gheseyt Moria wiens naeme
 
Bediet vysioen ende dander daer
140
Gheheeten Syoen/ als een speghel claer.
 
Huut dese twee/ wiert Jherusalem rysende.
Salich.
 
De genealogye/ es dit wel bewysende
 
Van Maria die vut/ twee berghen rees
 
Van helicheyt ende ede[l]heyt./ Dit bewees
145
Moria berch/ van helegher contemplacie
 
Ende Syon verchiert/ met edelder gracie.
 
Dus blyfse helich/ zonder gronderynghe
 
Ende edele.
Jonst.
 
Huer fonderynghe
 
Mach wel jn heleghe berghen/ zyn ghesciet.
Vergad.
150
Den eersten fondatuer van Jerusalem hiet
 
Sem/ die byden Hebreeuschen volcke
 
Melchicedech gheheeten was/ onder shemels wolcke
 
Deerste priester/ ende conync/ naer de vloet
 
Vander deluvye.
Salich.
 
Godt Melchicedech goet
155
Priester ende conync/ net ghepeerelt
 
Heift Maria/ als zyn stede vp de weerelt
 
Ghefondeirt seght Dauidt tonser leere.
Jonst.
 
Huer heift ghefondeirt/ den vppersten heere
 
Dies eszou eeuwich ghelooft gheeert.+
Vergad.
160
Jherusalem wiert/ by Jebus vermeert
 
Daer naer by Dauid./ Al verboot hem twercken
 
God/ des tempels/ nochtans dede hyse verstercken
 
Vermeerssen verchieren/ te zynen behaghe.
 
Oock reesse jn gloryen van daghe te daghe
165
Omde aercke die elc/ te eerene pynde.
Salich.
 
Maria jnden tempel/ gheoffert zynde
 
Proffytteirde daghelicx/ van duecht jn duechden
 
Tot zy thueren jaeren quam/ als jeucht der jeuchden
 
Ende met Joseph/ ten huwelicke moeste paeren.
Besitt.
170
Joseph heift Maria/ jn shuwelicx vergaeren
 
Gheheert vermeert/ met reuerencie ziet
 
Sonder an huer/ eeneghe vyolencie hiet
 
Als heleghe stede/ te bethooghene
 
So Godt Dauid niet/ liet te ghedooghene
175
Den tempel te maeckene jn zynen tyt.
Jonst.
 
Wel heift Godt/ zyn tabernakel ghebenendyt
 
Dies men jn zyn stede moet segghen lof.
Vergad.
 
Salomon als payselic conync hier of
 
Hadde beuel des tempels ghestichte
180
Die hy vulmaecte.
Salich.
 
Gheen glorye en zwichte
 
Als den tempel vulmaect was zo beuelich
 
Godt gheboden hadde/ omde plaetse helich
 
Sancta sanctorum/ daer nyement ghemeene
 
Jn commen en mochte/ dan den busscop alleene+
185
Eens binden jaere/ om te doene zyn ghebet
 
Voorden volcke.
Besitt.
 
De aercke net
 
Waer jn themelsche manna lach besteit
 
Moyses roede/ ende andre helicheyt secreit
 
Ruste jnden tempel/ byden welcken
190
Jherusalem helich hiet/ met elcken
 
Om dese gloryeuse/ juweelen rycke.
Vergad.
 
Christus als tempel/ jnder ghelycken
 
Was jnde middel/ van uwer stede ghestelt
 
Godt ende meinsche/ met vulder ghewelt
195
Dies hu lof ende blyscepe es vermeerende.
Jonst.
 
Vreimde nacien/ waeren hu eerrende
 
Want thuus des sheeren/ was vervult met glorien.
Vergad.
 
Jonsteghe Gheneghenthede hebt jn memorien
 
Van tfonderen fondatuers/ wye ende waer
200
Den tempel ghesticht was/ ende hoe daer naer
 
Jherusalem jn glorien/ rees by dien.
Jonst.
 
Jherusalem moeste/ lustich zyn jnt ansien.
 
Dus by uwer gracien/ thoocht exsposicien
 
Van poorten mueren/ ende edeficien
205
Ende hoe Jherusalem was te dien stonde.
Vergad.
 
Jherusalem was/ bevryt jnt ronde
 
Diepe bevest tjeghens/ der vyanden gheweer.++
Salich.
 
Dit beteekent/ tjeghens tsondich ghedeer
 
De odmoet van Maria/ diepe ongrondelic.
210
Want gheen duechden/ hoe groot vermondelic
 
Sy en worden met de veste van odmoet bevryt.
Besitt.
 
Dies heift Godt bemerct de vesten wyt
 
Der odmoedt zyns diernen onghetruert.
Vergad.
 
Jherusalem was jnt ronde bemuert
215
Dryedobbel twelc was een groote stercte.
Salich.
 
Drye crachten men jn Maria bemercte.
 
Deerste een ghelooue/ jn Godt almachtich perfect.
Besitt.
 
Dander huer hope/ van salicheyt bestrect
 
Die Christus ons verlosser/ gheift tonser bate.
Vergad.
220
De derde sHelichs Gheest viereghe caritate.
 
Dus was huer stercte/ vp Godt dryevuldich gheleyt.
Salich.
 
Myn stercte ende lof twelc my menichfuldich greyt
 
Es den heere/ oock mede bevonden
 
Jn myn behout ghestelt.
Besitt.
 
Ande mueragen stonden
225
Zeuen poorten/ ten jnghanghe der stede reyne.
 
Deerste hiet de poorte der Fonteyne
 
Van Syloe dwaeter/ dat Jherusalem diende.
Vergad.
 
Den blende man/ wiert daer ziende.+
 
Dese poorte beteekent een vande vyf sinnen
230
Twelc es tghesichte.
Salich.
 
Gods moeder vul minnen
 
Tjeghens eerdsche bekuerynghe tghesichte sloot.
 
Maer jn Gods contemplacie/ openynghe groot
 
Dede zou/ dies heifse/ jn elcx termyn
 
Den heere ghezien/ aenschyn an aenschyn
235
Mach zou wel segghen thueren greye.
Besitt.
 
De tweeste hiet de poorte/ vander Valeye
 
Ende beteekent thooren/ vermeerrynghe der doctryne.
Vergad.
 
Waer pleicht leerynghe/ vulmaect te zyne
 
Daer dhooren dicwils/ worden duerscoten
240
Van eerdsche belemmerthede?
Salich.
 
Maria heift ghesloten
 
Huer hooren/ tjeghens alle spraecke vyleinich
 
Ende gheopent/ tot goddelicke woorden reynich
 
Sprekende met Dauidt/ als Gods dienaereghe recht
 
Jc hoore wat Godt den heere/ tot my secht.+
245
Myn siele vermurwede/ als heift ghesproken
 
Myn beminde.
Vergad.
 
De derde der roken
 
Ende was gheheeten/ Stercquelinya poorte.
Salich.
 
Daer duere voerdemen/ naer de behoorte
 
Donsuuerheyt der steden tmessynich luesen.
250
Dit beteekent/ et riecken der nuesen+
 
Tjeghens quaet ghesloten/ gheopent om tgoede
Besitt.
 
Maria hadde dese poorte/ jn goeder hoede.
 
Want huer nuese was/ als eenen torre
 
Van disscrecie/ vlyende/ tsondich ghesnorre
255
Maer jnde roke van Gods saluynghe looppende.
Vergad.
 
De vierde poorte/ es scriftuere ontcnooppende
 
Hiet Vetus/ gheseyt hout/ jn onser spraecke.
Salich.
 
Dit beteekent deerste verboden smaecke
 
Sbooms der sciencien/ van goet ende quaet.
260
Byde smaecke viel Adam/ jn mesdaet.
 
Dus die zyn mondt bewacht bewaert zyn siele.
Besitt.
 
Wel mach zou segghen/ ten sondeghen ghecriele
 
Sondaers wiens smaecke es/ jn sonden ghegrouft
 
Hoe zoete es den heere/ comt ziet ende prouft
265
Soet jnt bidden/ alder zoets jnt contempleren.
Vergad.
 
De vyfste hiet/ Pisscium/ naer tinterpreteren
 
Poorte der visschen/ twelc es tgheuoelen.
Salich.
 
Ghelyc de visschen/ jnt water woelen
 
Die duer de sochticheyt hem verblyden
Besitt.
270
Maria schelycx/ heift tallen tyden
 
Huer verblyt jnt handelen sochte
 
Van hueren zuene/ zoo zou wel mochte.
 
Want vande eerfsonde/ wasse reyn.
 
Dus machse van hem/ wel segghen serteyn
 
Syn rechter handt zal myn ommevanck bescudden.+
Vergad.
 
Poorta Gregis/ omde beesteghe cudden
 
Hiet de seste net/ jnt behaghen.
 
Want daer ghemeenelic/ de beesten laghen.
 
Dese bewyst spraecke/ tot den andren ghevoucht.
Salich.
280
Dat de spraecke bewaert zy/ Gode ghenoucht.
 
Want menich meinsche / onredelic daer jn leift.
Besitt.
 
Maria en heift jn huer spraecke/ noynt ghesneift.
 
Want maer vier waerfuen / men by huer ghesproken vynt
 
[Jn de scriftuere.]
Jonst.
 
Voorwaer et scynt
285
Dat de poorten van Maria/ Gods heleghe stat
 
Wel bewaert waren/ princhepalic by dat
 
Godt Syons poorten bemindt / zonder obstakelen
 
Bouen alle Jacops/ tabernakelen.
Vergad.
 
Want Syon es een stercte / daer jn gheleghen
290
Wyens poorte/ noynt open/ en was ghecreghen
 
Dan alsser den heere alleene ghync duere.
 
Noch nyement en zal te gheender huere
 
Want hy der besloten es/ duere gheghaen.
Salich.
 
Dit wy byde zuuerheyt van huer verstaen
295
Twelc es een stercte om ons anvluchten
 
Ghemerct dat huer/ zuuer ontfaermeghe vruchten
 
Ons besceermen vanden helsschen afgrysene.
Besitt.
 
Twelc dheleghe kercke pynt te bewysene.
 
Wy vlieden/ onder uwe protexcie/ voor verlies
300
Heleghe moeder Gods.+
Vergad.
 
Dauid nam verkies
 
Jn Jherusalem een plaetse/ om te doen maken
 
Eenen thor hooghe/ om te ziene tghenaken
 
Et hinderlic grieuen / der vyanden specie
 
Om tbescut der steden.
Salich.
 
De disscrecie
305
Bewyst dit die Maria edelic
 
Jn huer herte drouch/ zo redelic
 
Hooghe jn duechden/ veil ghetals.
Besitt.
 
Als thor van Dauidt/ es uwen hals
 
Die an tlichaem staet/ naest onder thooft.
310
De kercke es tlichaem/ ende Christus ghelooft
 
Es tupperste/ alleene de naeste ghy.
Vergad.
 
Vele edeficien stonder/ oock hier by
 
Menichte van huussen/ om dyveerssche nacien.
Salich.
 
Dat bewyst de menichfuldeghe gracien
315
Die jn huer waeren/ zeer ouervloedelic.
Vergad.
 
Jherusalem waeren drye watren voedelic
 
Pisscynen gheheeten/ vp tselue pas
 
Om datter gheen visch/ jnne en was.
 
Deerste vut den gheberchte / jn stede quam
320
Daer al tvolc of/ naer zeden nam
 
Syn behoufte/ tot elcx behaghen.
Salich.
 
Dit jn ghelyckenesse/ wy toe draeghen
 
De wysheyt van Maria/ onghefaelt
 
Jn wyen twater der wysheyt/ es ghedaelt
325
Twelc zou ons/ voort ghedeelt heift zonder verdrach
 
So sint Jan secht+
Besitt.
 
Jc sach
 
Het water dalen/ vut shemels pleyne zoet.
Vergad.
 
De tweeste pissyne als een fonteyne stoet
 
Binnen Jherusalem/ waer jn dat viel
330
Tsemels water/ maer duer den kiel
 
Der hoogher berghen/ wiertse oock vervult.
Salich.
 
Hier by ghy moralic/ verstaen zult
 
De liefde die Godt/ drouch tot haer
 
Ende zou tot Gode/ onderlynghe eenpaer
335
So alst twater/ ghemynghelt es onder een.
Besitt.
 
Ghelyc sint Jan es segghende/ o moeder reen
 
Die jn my by liefden rust/ jc ruste jn hem
 
Segt den heere.
Vergad.
 
Binnen Jherusalem
 
Was de derde pisscyne/ tot elcx exemple
340
Ende was gheleghen/ naest den temple
 
Jn welc watre/ dat wierden ghesont
 
Ghebreckeghe meinschen.
Salich.
 
O moederlic gront
 
Jn hu als eerde was/ donfaermicheyt/ Gods ghevloeyt
 
Die ons dorre vruchtkens/ daer mede bespoeyt
345
Of dwaende dorricheyt/ van alle ghebreken
 
Dies wy voort/ van hue eerbaer mannieren spreken.
Vergad.
 
Eer Jherusalem wiert jn glorien gheresen
 
Specialic moester twaelf/ punten wesen.
 
Want hoe meer excellencien/ jn een stede beseuen
350
Hoese hoogher ende meerder/ wort verheuen+
 
Jn gloryen/ ende jn preminencien
Salich.
 
Godt wilde Maria/ met twaelf excellencien
 
Bouen puere creathuere/ alleene beghiften.
Besitt.
 
Godt zal dat nareren/ jn svolcx ghescriften
355
En sprinchens/ die daer jn waeren en weten.
Jonst.
 
Tvolc dat waeren/ patryarcken propheten
 
De princhen dappostels/ dewangelisten
 
Die de gracien van/ Maria wel wisten
 
Ende hebbense tonser leere/ ghescreuen naect.
360
Dies zeydese/ die machtich es heift my ghemaect
 
Groote saken/ helich zy zynen naeme.
Vergad.
 
Jherusalem/ hadde eenen conync bequaeme
 
Salomon/ die jn gheen voorsienicheyt en faelde.
Salich.
 
Jn Maria schelycx den conync daelde
365
Der conynghen/ diese heift ghecreeirt
 
Van beghin der weerelt.
Besitt.
 
Ghepredestineirt
 
Was zou zonderlynghe / jc wylen las.
 
Dits deerste weerdicheyt.
Vergad.
 
Jn Jerusalem was
 
Den busscop wyen shelicheyts / vermeerssen behoort.
Salich.
370
Christus busscop/ van duechden ghync voort
 
Eens te zynen tabernakele/ jnder helicheyt.+
Besitt.
 
De tweetste weerdicheyt / mach zyn toe gheleyt
 
Maria./ Want zou es/ bouen puere creathueren
 
Sonderlynghe ghehelicht.
Jonst.
 
Tmochte wel ghebueren
375
Daer vp seght Ancelmus/ een redelic verstant
 
Dat huer weerde zoude blycken edelic. Want
 
Men vynt gheen meerder/ onder shemels ghewolc.
Vergad.
 
Jn Jherusalem moeste oock wesen tvolc.
 
Want twas tbesceermsels / vanden ghuenen
380
Diese bewuenden.
Salich.
 
Al tsaemen wy wuenen
 
Onder huer besceermen/ als moeder van ghenade.
Besitt.
 
Godt ghaf huer verstant/ ende redene jn stade
 
Van dat huer moeder/ huer bevync
 
So dat zou Jan Baptisten te bouen ghync
385
Ende alle puere meinschen / binnen sweerels betraepene.
Vergad.
 
Daer was ten vierden jn gheweer ende wapene
 
Groot ende sterck/ dat et elc was gruwelic.
Salich.
 
Tgheweer van Maria/ dat was thuwelic
 
Met Joseph tjeghens de valsche erezye.
390
Belofte der zuuerheyt/ om sketters partye
 
Was wapene tjeghens quaede erruerynghe.
Besitt.
 
Jn huer en was noynt gheen besmuerynghe.
 
Dus wast een huwelic/ onbelemmert.+
Vergad.
 
Jn Jherusalem waeren oock husen ghetemmert
395
So excellentelic / dat et was abuus.
Salich.
 
Jn hu stede Maria was een excellent huus.
 
Want dhoochste wysheyt / hadt voor zyn wuenste ghesticht.
Besitt.
 
Daer jnne een zonderlynghe/ weerdicheyt licht
 
Dat zou maecht zynde/ ontfync en baersde
400
Maecht blyuende/ zo sint Jan verclaersde
 
Heift alleene tserpents hooft/ tonder ghebrocht.
Vergad.
 
Jn Jherusalem was oock/ de wet besocht
 
Die Godt by Moyses den volcke gheboot.
Salich.
 
Maria drouch jn huer maechdelic scoot
405
Tvulbrynghen des wets/ dit an huer bleec.
Besitt.
 
Ditte hu moederlicheyt/ Gods gheleec
 
Nathuerlic waerachtich/ twelc nyement bedriecht.
Jonst.
 
Ende want een moederlic herte niet en liecht
 
So muecht ghy te rechte/ wel wesen ghedochtich
410
Raab ende Babilon/ die hem met moede sochtich
 
Bekeer[d]en ofte penitencie/ anveerden
 
Ende uwe bystandicheyt wylent begheerden+
 
Ofte sullen begheerren/ schoon edel greyne
Vergad.
 
Ten zeuensten/ so wasser de fonteyne
415
Om coelte ende bespoysels/ vut te vloeyene.
Salich.
 
Ghy fonteyne van gracien zyt bespoeyende+
 
Den meinsche met/ scriftuerlicken bewyse
 
Dies ghy als water/ quaemt vut den paradyse
 
Ons allen bespoeyen/ met goddelicker lesse.
Besitt.
420
Dies zyt ghy/ ewangeliste ende prophetesse
 
So men bevynt jn uwe cantycke meest.
 
Gabryel zeyde den Heleghen Gheest
 
Zal jn hu dalen/ ende dhoochste Gods duecht
 
Sal hu ommerynghen.
Vergad.
 
Jherusalem heift verhuecht
425
By clergye./ Want dhoochste wysheyt was jnde stat
 
Als Christus jnt middel/ der doctueren zat
 
Daer men van Moyses wet ondervraechde.
Salich.
 
Jn Maria was leerynghe die Godt behaechde
 
Als Gods dienaereghe/ ende cameriere.
Besitt.
430
Sou hadde Gods wysheyt/ binnen hueren bestiere
 
Sachtmoedich van herten/ niet om vulsommen.
Vergad.
 
Jerusalem hadde veil rycdommen
 
Princepalic als Salomon de stede was regierich.
Salich.
 
Godt was Maria met rycdommen verchierich.
435
Veil dochters vergaerden rycdom jnt belouen.
 
Maer ghy Maria/ ghaetse al te bouen.
 
Dies zyt ghy hoochst/ gheresen jn loone.
Besitt.
 
Dat bewyst der martierysacien croone
 
Die zou hadde/ bouen alle/ maertelaers lyden.+
440
Want huer herte/ moeste een zweert duersnyden+
 
Twelc meerder was/ dan lichaemelic torment.
Vergad.
 
Veil voedsels was jn Jherusalem bekent.
 
Sonder dat en mochte tvolc niet leuen.
Salich.
 
Jn Maria was tweerdich voedsels beseuen
445
Tdedelste greyn vanden coorne/ shynghels broot
 
Der reysender spyse.
Besitt.
 
Een voedsels groot.
 
Maria leift by dien/ jnt eeuwich rycke.
 
Dit noteirt dat gheen huers ghelycke
 
So glorieus/ onghecorumpeirt
450
Jn glorien gheresen es gheexalteirt
 
So alle doctueren/ exspresselic ontvouden.
Vergad.
 
Daer was oock onderlynghe neerrynghe ghehouden
 
Of de lieden hadden gheghaen/ te ruwyne.
Salich.
 
Maria wrochte ten dyveersschen termyne
455
Ledicheyt scuwende/ met sindon te werckene.
Besitt.
 
Sindon/ es salicheyt/ tonsen versterckene
 
Die Maria ons daghelicx/ presenteirt
 
Ende huer als middelareghe/ tonswaert verneirt
 
Tonsen secoursse/ jn tgoddelic pallays
 
Bouen allen heleghen.
Vergad.
460
Daer was oock pays.
 
Want Godt stelde pays/ jn al huer palen.+
Salich.
 
Hier blyct twaelfste point/ schoonst jnt verhalen.
 
Want zinnelicheyt/ redene jn hver palaysich
 
Waeren altyts jn huer/ eendrachtich en paysich.
465
Dus es zou/ jnden eeuweghen pays ghevit
 
Daer zou bouen alle/ jerachyen zit
 
Ter rechter zyde vanden goddelicken troone.
Besitt.
 
Dese twaelf condicien/ voornoomt scoone
 
Hadde Jherusalem bouen/ andre steden daer.
470
Dus reesse jn helicheyt/ ende glorien claer
 
Mids den pays/ die tusschen Godt vulbrocht was
 
Ende den meinsche.
Vergad.
 
De welcke ghecocht was
 
By Christus/ met zynen precieusen bloede
 
Twelcke hy daer sturte/ met ouervloede.
475
Gheen helegher stede/ onder shemels regierssele
Salich.
 
Gheen vrauwe ter weerlt die [in] verchierssele
 
Van preuylegien/ huer mach verhooghen
 
So wy hu fyguerlic/ sullen thooghen.
Pausa.
Fyguere. Hier scuuft men den thooch.
Besitt.
 
Ghelyc dhelichste Jherusalem pompueselic
480
De twaelf voorhaelde pointen vzeirde
 
Schelycx dhelichste/ ghepreueligierste famueselic
 
Jn teeken van dien/ zeer glorieuselic
 
Met twaelf speciale gracien tryonpheirde
 
Jn glorien daer zou/ als donghecorrumpeirde
 
Eeuwich reyngneirt/ tot wyen wy van sonden verblent ghaen.
 
Dit zyn de twaelf sterren/ die vp tcroonement staen+
Hier sluutmen den thooch.
Jonst.
 
O Maria als stede Gods van wyen
 
So veil gloryeusheden zyn/ gheseyt ghesyen
 
Laet ons de vergaderynghe goet
490
Diemen thuwer eeren tonser salicheyt doet
 
Jn seeuwich rycx/ besittynghe verjolysen
 
Twelcke de drye personagen bewysen
 
Vut jonsten te deser processye gheneghen
 
En ter Nyeupoortsche contreye zo wy pleghen
495
Ommers de Brugsche jonghers die beminnen
 
sHelichs Gheest ghifte/ ende der Drye Sanctinnen
 
Die ons verblydende/ als donghebluenste rellen
 
Jn Maria/ die scoone wuenste stellen.

†A†M†E†N†

Jtem de fyguere jnden thooch moet wesen Maria staende jnde rayen vander zuwnen hebbende de maene onder huer voeten ende vp huer hooft een croone met twaelf sterren ende voor den thooch moet staen dese metere jn grooten lettren Mulier amicta sole et luna sub pedibus eius et in capite eius corona stellarum duodecim. Apocal. 12.

Hier mede was ghewonnen den naerprys van eeren ter Nyeupoort Ao. 1527.


Vorige Volgende

Over dit hoofdstuk/artikel

datums