Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.tSpel van Groot Labuer ende Sober Wasdom.
Ao. 1530.

Groot Labuer, als een temmerman hebbende een zaghe vp tscoere.
Sober Wasdom, als een meersman met eender meersse met sulfferpriemen.
Den Tyt van Nv, als een cryghsman gheacoutreirt, zeer wranc ziende ende spyttich sprekende.
Splyttemytte, als een vinnich wyfueke gheabytuweirt met slichte abytten vander houder eeuwe.
Ghaerpennync, als een vreck, des gheabytuweirt slicht naer dhoude manniere als een coorlyaen.
Beleedt van Wysheden.

+ Prologhe.

 
Den aert daer elcx aert toe es gheneghen
 
Doet gheerne allomme hueren aert blycken.
 
Elc volcht zynen aert wat dienet verzweghen
 
Alzoo men zien mach jn dyveerssche wycken
5
Byden welcken wy aertisten der rethorycken.
 
Thooghen onsen aert/ ter causen by dien hu
 
Om datter elc vruecht by zoude ghescien nv.
 
 
 
Ter eeren vanden pays/ die ons es ghebuert
 
Byder Gods gracie/ vast ende gheduerlic
10
Oock om tcrooneren ghesciet onghetruert
 
Van Kaerle onsen keyser/ ende heere nathuerlic
 
So wiert den aert tot blyscepe bekuerlic.
 
Want die zynen heere bemindt hier ofte elwaert
 
Sal altyts verblyden alshy wel vaert.
 
 
15
Al hebben wy groot labuer bestaen
 
Om soberen wasdom nv ter tyt
 
Et es om een verbeteren ghedaen
 
Om te scuwene sulcx verwyt.
 
Et hadde ons ghedaen jnt herte spyt
20
Haddet niet mueghen commen naer ons meenen
 
Want de sulcke hadde mueghen vp ons beenen.
 
 
 
Eerweerdeghe die ons conste bemint
 
Wilt ons doch audiencie bieden.
 
Maer ziet voor hu ende weist ghezint.
25
Ons waere leet/ zoudu achterdeel ghescieden.
 
Want somtyts verkeert ontrent de lieden
 
Sulc volc die ter crauwage verwect zyn.
 
Ons waere leedt zoude hu hiet ontpect zyn.+
Groot Labuer als een temmerman hebbende een zaghe vp tscoere.
 
Wel maet hoe staet?
Sober Wasdom als een meersman met eender meersse met sulfferpriemen.
 
Al cleene ghemoet.
Groot
30
Wat mach hu deerren?
Sober
 
Dats wel ghevraecht.
Groot
 
Lydt ghy bescaet?
Sober
 
Jc en weet wat doet.
Groot
 
Wel maet hoe staet?
Sober
 
Al cleene ghemoet.
Groot
 
Ghebreict hu raet?
Sober
 
Jaet waerse goet.
Groot
 
Thooft dynctme ooc zweerren.
Sober
 
Dats snel gheclaecht.
Groot
35
Wel maet hoe staet?
Sober
 
Al cleene ghemoet.
Groot
 
Wat mach hu deerren?+
Sober
 
Dats wel ghevraecht.
 
Dat my el behaecht/ dat doet my trueren.
Groot
 
Dat hu el behaecht?
Sober
 
Jae/ mocht my ghebueren
 
Jn corter hueren eeneghen troost
40
Van huer daer my den zin naer gloost
 
So wierde vruecht jn my besloten.
Groot
 
Sytge met sint Jooris viszop beghoten?
 
Voorwaer zo lydge/ een zwaer ghequel.
Sober
 
Waer omme?
Groot
 
Ey jc weet zoo wel
45
So wye met Venus meil es bestouen
 
Ghecrycht hy troost hy machs hem belouen.
 
Tes goet daer ghelieuers ghelyc ghesint zyn.
Sober
 
Tes goet minnen alsmen/ mach ghemint zyn.
 
Maer my dyncke dat jc vul trybulacie ghae.
Groot
50
Hoe zoo?
Sober
 
Jc en weet niet of jc jn huer gracie stae.
 
Huer jonste tmywaerts/ dynctme cleene drepen.
Groot
 
Wach aermen moetge den bloc alleene slepen?
 
Ghy slacht my. Ghy valt huer als de slutse an.
Sober
 
Ontbeyt maet hebge ooc de mutse dan?+
55
Doet dat ict verstant om myn ghewin hebbe.
Groot
 
My dyncke dat jcse ooc onder den kin hebbe.
 
Ende theerchste/ dat my doet tmeeste grief
 
Jc en weet niet of zou my mach hebben lief.
 
Dus blyf jc ghemoet zo lancx zo cranckere.
Sober
60
Sytge oock gheworden/ een Venusjanckere
 
Een cleen bedanckere/ een tytverliessere?
 
Wye esse die ghy zyt een verkiesere?
 
Wilt my dat segghen met corten woorde.
Groot
 
Const jcse ghecryghen te mynen accoorde
65
Jc en zoude my niet ghelaten/ als de flauwe.
 
Maer vader ende moeder houdense zo nauwe
 
Qualic machmen/ huer byzyns hiet ghebruucken.
 
Se zynder zo weygher of/ ze doense duucken
 
Ende ooc beluucken/ zeer vast jc meens.
Sober
70
Byder doot jc vaere/ schelycx alleens.
 
Want myn mutskin die scoone sprute
 
En mach oock thooft nauwe steken hute.
 
So nauwe esse onder/ vader ende moeders bedwanc
 
Om datse hier voortyts/ jnden ghemeenen ghanc
75
Elcken ghewillich was/ ende meyndere.
 
Nu houdtse de vader/ noynt gheen deyndere
 
So cort naer huer mach groot noch cleen vraghen.
Groot
 
Souden wy mueghen an een been cnaghen
 
Ghy ende jcke dat waere ooc vry.
80
Sober Wasdom berecht doch my
 
Wyen mindt ghy vp sweerels wandelynghe?+
Sober
 
Wyen jc minne?
Groot
 
Jae.
Sober
 
Couver Handelynghe.
 
Dese ghecreghic gheerne/ binnen sweerels bedelue.
Groot
 
Couuer Handelynghe? Jc beminnese selue.
85
Maer hoe gheraecker an/ seght my den keer.
Sober
 
Jc duchte/ wy en cryghense nummermeer.
 
Want Ghaerpennync/ ende Splyttemytte
 
En sullense niet willen wesen quytte
 
Couuer Handelynghe huerlieder dochtere.
90
Se zynder vp gherust ende leuen te sochtere.
 
Diese hebben zoude/ moeste wesen rycke.
Groot
 
Jc zoudese cryghen eer ghy
Sober
 
Jae slouchge gheen swycke.
 
Waen Groot Labuer/ uwen persoon
 
Soude worden versteken/ omden soberen loon
95
Dien ghy nv daghelicx/ met wercken verdient.
Groot
 
Ambochsman heere/ pennyncx vrient.
 
Sober Wasdom schelycx niet min
 
Sout met hu vaeren om tcleen ghewin
 
Dat men hu somtyts/ ziet besteden.
Sober
100
Alssic peynse omden tyt voerleden
 
Doen wy te saemen als twee ghesellen+
 
Met Couuer Handelynghe mochten rellen
 
Ende by hueren toedoene maken chiere
 
Allomme ghaende/ te wyne te biere
105
Oock alssic by uwen toedoene ongheblaemt
 
Ouervloedich Wasdom/ was ghenaemt
 
Doen wast een weerelt vul vroylich[e]de.
Groot
 
Wat men by my Groot Labuer doen dede
 
Den aerbeyt en was nyement vervelich.
Sober
110
Den Tyt van Nv maect my bequelich
 
Duer zyn quaetheyt putertiere.
Groot
 
Hy valt ons costelic.
Sober
 
Hy valt ons diere.
 
Dus draghic themwaerts cleen beminnynghe.
Groot
 
Sober neerrynghe
Sober
 
Ende cleen winnynghe
115
Ghebruucken wy byden Tyt van Nu.
Groot
 
Couuer Handelynghe es gheworden scu
 
Van ons by hem et welcke my deert.
Sober
 
Wat wy winnen
Groot
 
Twort ter stont vertheert.
 
Hoe zouden wy an Couuer Handelynghe gheraecken?
Sober
120
Wy zouden wel vry een moutkin craecken
 
Hadden wy Handelynghe jn ons bewelt.+
Groot
 
Den Tyt van Nu heifse ons/ gheheel ontstelt.
 
Want duer tderuen van hueren persoon
 
Moet jc Groot Labuer/ om cleenen loon
125
Daghelicx moede ende mat zyn slaeuende.
Sober
 
Byden Tyt van Nu van snuchtens te avende
 
Soude men Sober Wasdom by hu mercken.
Groot
 
Jc zoude wel dickens/ willen wercken
 
Meer dan jc doe const jct ghevynden.
Sober
130
Blyft den Tyt van Nv/ hy salt al verslynden
 
Habytten/ cateylgen/ al datter wel staet.
Groot
 
Den Tyt van Nu es seker fel quaet.
 
Jc wilde dat zyn strafheyt waere ouere.
Sober
 
Wy worden beroyt.
Groot
 
Wy worden zo pouere
135
My gruut dat jct moet ouerpeynsen
 
Syn quaede condicie.
Sober
 
Tsus wilt hu veynsen.
 
Jc zye den Tyt van Nv/ voor ooghen.
Groot
 
Hy en weet hem nauwe hoe quaet ghethooghen.
 
Tscynt of hy ons wilde houden verweest.
Sober
140
Jc leue puer by hem bevreest.
 
Wistic waerhy goet waere jc zouder vlien.+
Groot
 
Hy es ouer al quaet/ ten baet gheen bezien.
 
Wy moeten ons houden pacientich ghesynghelt.
Sober
 
Alleens ghelycmen de verkens rynghelt.
145
Ten baet. Wy moeten dhandt ouer herte legghen.
Groot
 
Hy comt tonswaert/ wat zalhy ons segghen
 
Al grimmende al waert een yserbyttere.
Den Tyt van Nv als een cryghsman gheacoutreirt zeer wranc ziende ende spyttich sprekende.
 
Wel ghesellen die myns zyt een verslyttere
 
Groot Labuer/ ende Sober Wasdom onvermyt
150
Wats hu verzieren?
Sober
 
Wat vreeselic Tyt.
 
Hu strancheyt doet ons lyden ghequel.
Groot
 
Tyt van Nu ghy valt zo fel.
 
Hu byzyns maect my plats versaecht.
Tyt
 
Men heift altoos ouer my gheclaecht
155
Hoe goet jc oynt was ofte hoe orybele.
Sober
 
Et ghaeter nv al buten bybele.
 
Hu sceerpheyt ons straelt als corezyueghe teteren.
Groot
 
Tyt van Nu wilt hu doch beteren.
 
Wy sullens hu danc menichfuldich lesen.
Tyt
160
Helpt hu seluen/ jc salhu ghehuldich wesen
 
Jn dien hu Godt jnt leuen laet.+
Sober
 
Tyt van Nu/ wilt ons gheuen raet.+
 
Groot Labuer/ wat holpt versweghen
 
Ende jc hebben beede/ de mutse ghecreghen
165
Vp de dochter van Ghaerpennync ende Splyttemytte.
 
Wy wierden van allen onproffytte quytte
 
Hadden wy die wy leifden met cleene pyne.
Groot
 
Se plochte hier voortyts/ zoo ghemeene te zyne
 
Couuer Handelynghe/ alzo ghy wel weit.
170
Maer vader ende moeder/ houdense nv besteit.
 
Huer jonste tonswaert/ zou tylic en spade drouch.
Tyt
 
Jc ghelooue men huer doen lettel gade slouch.
 
Groot Labuer/ al zyts ghy te drouuere
 
Doen ghy Handelynghe hadt/ by hu Couuere
175
Om te behoudene zout ghy/ tbeste ghedaen hebben.
Sober
 
Wye wiste datse ons/ zo zoude ontghaen hebben?
 
Van achterdeel en hadden wy gheen bemoeden.
Groot
 
Tyt van Nu wilt ons bevroeden
 
Hoe wy Couvere/ en willet niet zwyghen
180
Handelynghe weder zouden ghecryghen.
 
Om ons te helpene valt tonswaert stuer niet.
Tyt
 
Waent ghyse nv/ Groot Labuer ziet
 
Met uwen gheselle Sober Wasdom
 
Handelynghe te hebbene?/ Niet een vlas crom
185
En besciet met aerbeyde/ naer huer ghewacht.
 
Groot Labuer ter weerelt/ es cleene gheacht.
 
Sou moet ghecreghen zyn/ by een ander aert.
Sober
 
Ghy maect ons puer/ therte bezwaert.+
 
Ons hope thuerwaerts zal gheheel beswycken.
Tyt
190
Ghy moetse ghecryghen by andre practycken.
 
Siet jc hebbe hier twee jnstrumenten.
 
Cunt ghy hier mede/ met subtyle atenten
 
Ghetydelic zonder eenich/ veruelen
 
Een liedeken voor huer veynster spelen
195
Van een leep baesseken dansken ofte rondeken?
Groot
 
Hoe heetense?
Tyt
 
Dat heet Scalc Vondeken+
 
Ende dit jnstrument/ es gheheeten Loos Aket.
 
Siet dat ghy vp den thoon wel let.
 
Hier mede muecht ghy Handelynghe locken.
200
En cunt ghyse cryghen ghaeter mede focken.
 
Sulc zal voor hu pynen te stupen te nyghene.
Sober
 
Wy en cvnnens ons behelpen.
Tyt
 
Ses qualic anders te cryghene
 
Voor die lettel hebben/ jn sweerels eruen
 
Ten waere by huwen/ ofte versteruen.
205
Tot sulcke comt Handelynghe voort ghestreken.
Groot
 
Jc wilde Ghaerpennync waere de moort ghesteken
 
Ende jc Splyttemytte mochte/ jn eenen wal draghen
 
Dat wy Couuer Handelynghe/ ouer al zaghen
 
So mochten wy vry onbescaet leuen.
Tyt
210
Jc en can hu gheenen beteren raet gheuen
 
Ghy en ghaetse weder vrien vp een nyeu.+
 
Ende daer mede adieu.
Sober
 
Tyt van Nv adieu.
 
Wy bedancken hu beede/ van uwen raede.
 
Et wort verdient tsy vrouch of spaede.
Pausa.
Splyttemytte als een vinnich wyfueke gheabytuweirt met slichte abytten vander houder eeuwe.
215
Ghaerpennync waer zytge?
Ghaerpennync als een vreck deyn/ gheabytuweir[t] slicht naer dhoude manniere als een coorlyaen.
 
Hier Splyttemytte.
Splytte.
 
Jc worde myn zinnen van spytte quytte.
 
Tot grooter gramscap dat jc ghehelt bem.
Ghaer.
 
Hoe zo?
Splytte.
 
Om dat jc ghequelt bem
 
Van elckerlic en machic niet/ zyn met vreden.
220
Want men roupt my nv naer te veil steden
 
Daer jc hier voortyts niet en was bekent.
Ghaer.
 
Jc worde ooc anghetrocken/ duer sulcx atent
 
Van die my voortyts lieten/ voor by flyncken.
 
Maer tes om te hebbene/ laetic my dyncken
225
Couuer Handelynghe/ naer myn raemen.
Splytte.
 
Sen hebbense niet al/ diese gheerne naemen
 
Al liepse hier voortyts/ jnde ghemeene weede.
 
Groot Labuer ende Sober Wasdom beede
 
Staender ooc zeere naer vp dit saysoen.
Ghaer.
230
Wat zouder Groot Labuer mede doen?
 
Want haddy Couuer Handelynghe vp dit pas+
 
Tzoude met hem worden/ alst hier voortyts was
 
So elckerlyc an hem doen mochte mercken.
Splytte.
 
Dickens spelen ghaen/ ende selden wercken
235
By tuusschernyen/ nyeuwers vp te rouckene
 
Meer taveernen/ dan kercken te zouckene
 
Dit plochthy te doene/ naer myn vermeten
Ghaer.
 
Hy zoude hu ende my/ ter stont vergheten
 
Ghelyc mer vynt zoo men daghelicx scaut.
240
Al hebbense Couuer Handelynghe ghetraut
 
Sen rusten niet wient mach te spytte zyn
 
Ten zy datser of sceeden/ ende teeneghaere quytte zyn.
 
Sen peynsen niet hoet beaerbeyt es ofte verghaert.
Splytte.
 
Ons dochter vry wort wel bewaert.
245
Want wy sullense houden nauwe ende cort.
 
Niet lichte en wordtse van hyement beghort
 
Hy en zal van onser condicie wesen.
Ghaer.
 
Jc bem ooc wel ghemoet tot desen.
 
Want men behoort te wetene elc dit verstant vaet
250
Wyen men de dochters somtyts te hant laet.
Pausa.
Sober
 
Groot Labuer tes tyt van ghaene.
 
Spoetge gherynghe./ Zytge ghereedt?
Groot
 
Jc bem besich myn jnstrument te doen staene.
Sober
 
Groot Labuer tes tyt van ghaene.
Groot
255
Jc comme hu by fray als een haene.
 
Van haesten breict my vut de leden tsweet.+
Sober
 
Groot Labuer tes tyt van ghaene.
 
Spoetge gherynghe. Zytge ghereedt?
Groot
 
Sober Wasdom doet my besceet.
260
Jc moet by tyden zoorghe naer zede spreeden.
 
Waert niet goet/ dat wy mede leeden
 
Weergheluc/ ons beeder hont
 
Vp aventhuere gheseyt goet ront
 
Of ons hyemende wilde doen vaer gruwen?
265
Et zoude ons met zyn bassen doen waerscuwen.
 
Want hoe beter hoede hoe beter vrede staet.
Sober
 
Jc bem te vreden/ dat de beeste mede ghaet.
 
Want Weergheluc ons gheerne ontrent es.
 
Den hont met ons oock wel bekent es.
270
Hy doet ons dickent/ jnt bescaemen stuenen.
Groot
 
Ghaerpennync ende Splyttemytte hier tsaemen wuenen
 
Alzo my dyncke/ naer myn zins jntencie.
 
Maer hoe heetet huus?
Sober
 
Rume Consciencie
 
Daer Ghaerpennync/ met zynen wyfue
275
Couuer Handelynghe houdt te zynen verstyfue
 
Als vinnich deyn/ deynder dan deynstere.
Groot
 
Wy zyn hier juuste/ onder de veynstere.
 
Sober Wasdom laet ons onsen aert doen blycken.
Sober
 
Nyement en belghem van onser musycken.
280
Ons waere leet wierder hyement ghestoort.
Groot
 
Hoort alle wel toe/ twort goet disscoort.+
 
Hu zal de walghe hebben vanden soon.
Sober
 
Laet ons nemen eenen zoeten thoon.
 
Dits Godt hebs deel by ghedooghe.
Groot
285
Ghy neimpt et Loos Haket te hooghe.
 
Want myn Scalc Vondeken ghaet te neir.
Sober
 
Laet ons vp een nyeu beghunnen weir.
 
Om ons habelheyt/ zouden de heluen hyncken.
Groot
 
Wat seghtger nv of?
Sober
 
Et dynctme vanden seluen clyncken.
290
Ghy en cunt niet omme ghaen met Scalc Vondeken.
Groot
 
Orssa een averecht/ of een aerdich rondekin
 
Vp aventhuere oft ghynghe te bet.
Sober
 
Ghy met Scalc Vondeken/ ende jc met Loos Aket
 
En cunnen ons seluen/ niet behelpen.
Groot
295
Noch eens met vruechden onsen hondt heift welpen.
 
Mueghelic wy worden jnt spelen te ghalicker.
Sober
 
Et dynctme ghaen zo lancx zo qualicker.
 
Laet ons best zynghen/ een liedeken mondelynghe.
Groot
 
Jc consenteirt. Daer licht de prondelynghe.
300
Wy hadden bet mueghen/ als de stomme staen.
 
Cunnen wy met loosheyt/ of scalcheyt omme ghaen?
 
Neen wy. Et dynct my al keysaken.+
Sober
 
Groot Labuer of wy huer den mey staken
 
Tzoude lichte wesen thueren greye hiet.
Groot
 
Den mey staken?
Sober
 
Jae.
Groot
305
Ten es noch jnden meye niet.
 
Tes noch april. Waer mede hy wil ghemoeyt zyn.
Sober
 
Den mey moet nochtans jn april ghegroeyt zyn
 
Sal mense steken jnde meysche maendt.
Groot
 
Tes van hedent jn acht daghen dat ghyt waent
310
Den eersten dach/ ghy mueghes vraeghen ziet.
Sober
 
Ten staet juuste vp acht daeghen niet.
 
Ende offer hyement quaeme binnen dien tyden
 
Die ons Couuer Handelynghe wilde ontvryden
 
Saten wy niet tusschen twee stoelen jn dasschen?
Groot
315
Nu tsa wel an/ laet ons rasschen.
 
Waer es den mey zonder veil ghescal
 
Dien ghy wilt steken?
Sober
 
Sieten daer.
Groot
 
Helpe hy es zeer lanc ende smal.
 
Maer vp dat wy/ vp al wel zien te rooste
 
Hoe salse heeten?+
Sober
 
Hope van Trooste
320
Die ons Handelynghe/ verleenen mach by ghedooghe.
Groot
 
Hope staet neir ghenouch/ maer troost te hooghe.
 
Eer wy troost ghecryghen jc duchte et wort lanc.
Sober
 
Nu laet ons huer zynghen/ met onsen zanc
 
Een aerdich liedeken/ dat huer mach greyen.
325
Tes scande dat wy/ dus langhe beyen.
Pausa cleene. Tsaemen sullen zy dit liedeken zynghen vp den voys/ Licht ghy nv en slaept zo jn uwen drome.
 
Sult ghy noch langhe duucken
 
Dien wy zo gheerne zaghen?
 
Mochten wy hu gebruucken
 
Ghebetert wierde ons claghen.
330
Dickent met ydele buucken
 
Lyden wy groote plaghen.
 
Wyn bier/ jn kannen jn cruucken
 
En cunnen wy niet bejaghen.
 
 
 
Couuer Handelynghe lief
335
Wilt ons te baten commen.
 
Ghy sult wel betren tgrief
 
Dat wy lyden bouen sommen.
 
Wy en leden gheen meskief
 
Wy mueghens ons berommen
340
Alsmen hu/ by ons besief
 
Blomme bouen alle blommen.
 
 
 
Hope van Trooste reyn
 
Den mey dien wy hu steken
 
Es thuwer eeren serteyn.
345
Want wy doent by ghebreken.
 
Mocht ghy jn sweerels pleyn
 
Als voortyts zyn ghekeken+
 
Ons zoude spyts menich deyn
 
Wyn binder kelen leken.
Groot
 
Dat es den gheest.
Sober
350
Sulc zyn de treken.
 
Dats eenen voys die jn dhooren clynct ziet.
Groot
 
Al ghaetet qualic ommers ten stynct niet.
 
Padden zouder of wechlooppen groote scarden.
Sober
 
Tsus.
Groot
 
Waeromme?+
Sober
 
Jc hoore ze tarden.
355
Alzo my dyncke stilt uwe voere.
Groot
 
Serteyn zy es vppe./ Jc hoorese in roere
 
Al blyfse vast ghesloten/ jn huer secreitken.
Sober
 
Jc hebbese ghezien.
Groot
 
Waer?
Sober
 
Rechs duer dat spleitkin
 
Van weerden groot/ dierbaer ende costelic.
Groot
360
Et dynctmer riecken zo vermostelic
 
Daerse licht jc zoude voor tbederuen duchten.+
Sober
 
Mochtse by ons cryghen/ vp sweerels eruen luchten
 
Menich weert zouts ons pynen te danckene.
Ghaer.
 
Wat es hier nv/ te zynghene te janckene?
365
Hu voere stelt hier elcken/ jn onrusten.
Splytte.
 
Ghy maect ons puer vul van onlusten.
 
Wye zoude zo thieren/ hyne keue of vochtere?
Groot
 
Wy doent ter eeren van uwer dochtere
 
Couuer Handelynghe daer wy naer pooghen.
Ghaer.
370
Jc en wil hier dese janckynghe niet ghedooghen.
 
Al heift myn dochter ghelooppen jnt wilde
 
Sen snyt niet meer/ voor sulc scamel ghilde
 
Als ghy ende andre/ al moetet hu verzeeren.
Sober
 
Wy en volghense niet dan ter duecht van heeren
375
Ghaerpennync/ om te gebruuckene sleuens gheduer.
Splytte.
 
Hoe es hulieder naeme?
Groot
 
Groot Labuer
 
Bem jc gheheeten varre ende by.
Sober
 
Ende Sober Wasdom/ heet men my
 
Waer ic met Labuer comme myn gheselle.
Ghaer.
380
Wat cunt ghy doen?
Groot
 
Daghelicx jc my stelle
 
Tot alderande aerbeyt/ dat jc pleghe te hyghene.+
Splytte.
 
Ons dochter en es/ met labuer niet te cryghene.
 
Den Tyt van Nv en heuet niet jn.
Sober
 
Den Tyt van Nv om ons ghewin
385
Riet ons ten staet my/ niet te helene
 
Met Scalc Vont ende Loos Haket te spelene.
 
Maer wy en cunnens niet/ dies ons scande naert.
Groot
 
Nichtemeer dan eenich boer te lande waert
 
Omde waerheyt te segghene/ den zin vry spoet.
Ghaer.
390
Menich boer weet veil bet dan ghy doet+
 
Met Scalc Vondeken/ alzo jc waene
 
Ende Loos Haket omme te ghaene.
 
Ter tyt van nv/ weten zy den keer.
Splytte.
 
Ons dochter houdt huer bylich meer+
395
Buten der poorten dan daer binnen.
 
Cunt ghy niet dan met aerbeyde winnen
 
Couuer Handelynghe en salhu in langhe ghebueren.
Sober
 
Wy en cunnen seker/ zueren noch lueren.
 
En[de] moet Handelynghe daer mede zyn ghecreghen
400
Jc Sober Wasdom/ alzo wy pleghen
 
Met Groot Labuer/ doen pyne om niet.
Ghaer.
 
Huwen hondt doets my bediet
 
Can hy abe[l]heyt/? Boet myn verlanghen.
Groot
 
Hy heift ons eenen vueghel ghevanghen.
405
Jc wilde hem de moeyte/ noch waere ghebrekende.+
Splytte.
 
Waer omme?
Sober
 
Hy valt zo stekende.
 
Wy wilden hem wel quytte zyn/ zonder lieghen.
Ghaer.
 
Maect hem verscuut.
Groot
 
Hy en wil niet vervlieghen.
 
Hy duuct alomme/ an rebbe ende post.+
Splytte.
410
Hoe heet den vueghel?
Sober
 
Sober Cost.
 
Die houdt ons daghelicx/ zo ghepynt
 
So dat ons jeucht ende vruecht verdwynt.
 
My gruut dat jcker of moet spreken.
Groot
 
Hy gheift ons by tyden de grootste steken.
415
Qualic cunnen wy vp de beenen duer de smerte staen.
Sober
 
Syn steken dynct ons altemets ter herten ghaen.
 
Dus lyden wy by dien deer ghedruck.
Ghaer.
 
Hoe heet uwen hondt?
Groot
 
Weergheluc.
 
Die hebben wy langhen tyt ghehadt.
Splytte.
420
Weergheluc?/ Wel wat naeme es dat?
 
Jc en hoorde noynt van sulcke naeme lesen.
Ghaer.
 
Weergheluc?/ Tmach zeker wel wesen.
 
Want Sober Wasdom met Grooten Labuere
 
Siet men ter weerelt/ te menegher huere.+
425
Eer hemlieden hiet comt toe ghevloghen
 
Van ghelucke.
Splytte.
 
Ghy zyt bedroghen
 
Waent ghy te cryghene thuwen onderstande
 
Couuer Handelynghe./ Et waere scande
 
Dat wyse hu lieten/ wilt dit vry sommen.
Sober
 
Laetse ons doch zien.
Ghaer.
430
Ghy en sulter niet by commen
 
Noch ooc ghebruucken/ ter Tyt van Nv ziet.
 
Al wast sake dat hyt hu riet+
 
Ghy doet beede moeyte verloren.
Groot
 
Wy hebben Couuer Handelynghe vercoren
435
Dies wy huer herte/ ende zin toe scicken.
Splytte.
 
Ghy en muechse niet hebben/ hoe wyt wicken.
 
Want my[n] jonste en can thuwaerts niet by vlieten.
 
Dus muecht ghy wel goelicx/ beede voor by scieten.
 
Hu te gheuene/ en sallic niet ghenieten.
Sober
440
Groot Labuer tmach ons wel verdrieten
 
Dat Couuer Handelynghe/ ons es ontseyt.
Groot
 
Myn verdriet/ hier ooc gheseyt
 
Soude men qualic jn ghescriften ghestellen.
Ghaer.
 
Ontbeyt jc zalhu beghiften ghesellen.+
445
Jc en wil niet bekent zyn/ als een cauwettere.
Sober
 
Wat sulge ons gheuen?
Splytte.
 
Jn dhandt een lettere
 
Dies ghy noch leuen moet/ jn ghequelle
Ghaer.
 
Hout daer ziet/ hu zo gheif jc die helle
 
Waer mede ghy mueghen sult tallen tyden
450
Wat hu ouer comt spellen Lyden.
 
Daer mede sulge moeten de weerelt passeren.
Groot
 
Wat au/ wat au?
Splytte.
 
Ontbeyt jc zalhu ooc stofferen
 
Al stae jc hier onnoossele ende ghedwee.
 
Neimpt daer. Hu zo gheuic die pee.
455
Bewaertse jeghens alderhande quellynghe.
Groot
 
Wat bedietse?
Splytte.
 
Jnde spellynghe
 
Paciencie thuwer weluaert ghesomt.
 
Wat hu ter weerelt ouer comt
 
Tzy by weilden ofte aermoede ketyfuich
460
Syt altyts paciencie byblyuich
 
Adieu dit laeten wy thuwer bate.
Sober
 
Tjacop Thuenis ghy pypt ghoe mate.
 
Sullen wy niet anders dan een lettre jn dhant cryghen?
 
So achtich ons dynghen al voor cantfyghen.
465
Hope beghunt jn ons te falene.+
Groot
 
Wat niet dan een letter/ jn dhandt te behalene?
 
Myn herte dynctme van spytte crul worden.
Sober
 
Jc zouder jn raesen.
Groot
 
Jc zouder jn dul worden.
 
Om een haer hier gheseyt plat ziet
470
Wierp jcse wech.
Beleedt van Wijsheden.
 
Neen en doet dat niet.
 
Mueghelic ze dient naer uwe behoorte.
 
Wistic de cause van uwe ghestoorte
 
Jc mocht hu beraeden zonder bluesen.
Sober
 
Wy zyn twee scaemele amoureusen
475
Die met alder affecxcie/ dach ende nacht
 
Naer Couuer Handelynghe hebben ghewacht.
 
Maer waer wy looppen/ bysen of troten
 
Ghaerpennync houdtse/ zo vaste ghesloten.
 
Nochtans om huer/ wy van minnen quellen.
Beleedt
480
Wilt ghy vp Couuer Handelynghe/ hu zinnen stellen?
 
Voorwaer ghy zyt grootelic gheabuzeirt.
Groot
 
Waer omme?
Beleedt
 
Sou en es niet gheordoneirt
 
Van Godt om hu/ naer myn berommenesse.
 
Mueghelic gy zoudtse thuwer verdommenesse
485
Oorbooren. Dus laetse hu Godt vervremen.+
Sober
 
Splyttemytte/ Ghaerpennync/ met huer bremen
 
Se houdense zo nauwe/ ghecoffert ghekist
 
Wy en cunder niet an commen/ by gheender list.
 
Dit doet ons druc jnt herte sneuen.
Groot
490
Sy hebben ons elc een letter jn dhandt ghegheuen
 
Hem een helle/ ende my een pee.
Beleedt
 
Metter pee speltmen by goeden bescee
 
Peynsen. Dats een ouerdyncken
 
Hoe ghy hier voortyts/ jn heten jn dryncken
495
By Couuer Handelynghe/ ten dyveerschen stonden
 
Syt ghevallen jn zwaeren sonden
 
Waer by ghy Godt zeere verbolcht.
 
Dus eshu sheeren punycie ghevolcht
 
Duer de misdaet/ by hu ghedaen groot.
500
Dit beteekent tletter jn dhandt de pee gheseyt.
Sober
 
Sou heift my ooc een letter/ jn dhandt gheleyt
 
Twelc es een elle zo zou my briefde.
Beleedt
 
Metter helle mach men spellen Liefde
 
De welcke liefde/ alzoo jc bemoede
505
Ghy meer ghedreghen hebt ten eerdschen goede
 
Van Couuer Handelynghe/ jn sweerels slodt
 
Dan tot uwen heere/ tot uwen Godt
 
Dien ghy behoort te beminnen bouen al
 
Dat hye was/ es ofte wesen zal
510
Daer ghy dickens/ jn hebt ghefaylgiert.
 
Dus al zyt ghy daghelicx ghepuniert
 
Sober Wasdom by cleender winnynghe
 
Syt lydtsaemich. Dits de verzinnynghe+
 
Vander helle jn dhandt een lettere.
Groot
515
Mocht ons ghebueren wy wildent wel vettere.
 
Ons en roucx waent quaeme/ van west of oost.
Beleedt
 
Stelt jnden Heere hu hope hu troost.
 
Hy en zalhu laten jn gheen ghebreken.
Sober
 
Wy hebben ons hope van trooste ghesteken
520
Jn Rume Consciencie/ tonsen greye.
 
Consten wy Couuer Handelynghe desen meye
 
Ghecryghen/ wy zoudens ons belouen.
Beleedt
 
Hu hope zal strecken/ tot Godt hier bouen
 
Met een vulmaecte jntencie reyn.
525
Want van el nyement/ in consciencie serteyn
 
En mach hu ghebueren/ hier vp naect gloost
 
Jnder eeuwicheyt/ eenich vulmaect troost.
 
Alle eerdsche saken/ zyn ongheduerlic.
 
Dus moet ghy hu hope vulmaect en puerlic
530
Alleene vp Godt stellen/ van nu voort an.
 
Ende vp Couuer Handelynghe/ jn sweerels ghespan
 
En muecht ghy hu hope/ bouen Godt niet vesten.
Groot
 
Wy hebben nochtans ghedaen ons besten
 
Om met Scalc Vondekin/ ende Haket Loos
535
Te ghecryghene/ want huer elc let coos.
 
Den Tyt van Nv/ deder ons toe keeren.
Beleedt
 
Wat ghy doet? En wilt dat niet leeren.
 
Wat es Scalc Vondt/ anders dan bedroch+
 
Ende Loos Haket/ veil ergher noch
540
Huut wyen dat spruten/ veil saken sondich?
 
Groot Labuer weist dit vry grondich
 
Wilt ghy met Loos Haket omme ghaen
 
Of met Scalc Vondt ghy doolt vpt cromme waen.
 
Jnt vuthende/ en zalt hu proffyteren niet.
545
Merct van diese costumelic vseren ziet.
 
Se zyppender duere/ weirsse hooch of leech spreken.
Groot
 
Jc zoude nochtans gheerne de handt jnt deech steken
 
Om Handelynghe te hebbene altemets
 
Tjeghens alssic by ghebreke bem te wets
550
Vp dattic mochte/ mynen commere stelpen.
Beleedt
 
Groot Labuer/ wilt ghy hu ommere helpen
 
Gheen beter wilt hu/ ghewillich voughen
 
Ten labuere/ ende laet hu ghenoughen
 
Met sulc wasdom/ tzy sober of couvere
555
Als hu ghebueren mach/ al zyt ghy behouuere
 
Van meer/ endt hu niet en mach ghescien.
 
En zoorcht/ noch en wilt/ niet drouuelic zien.
 
Stelt hu betrauwen jnden Heere gheheel.
Sober
 
Tes wel gheseyt/ maect hem een candeel
560
Ofte een zupen/ naer zyn doot.
 
Doet labuer/ met aerbeyde groot.
 
Syt qualic ghecleedt/ hebt smal te pappene.
 
Weist pacient./ Tes goet te clappene
 
Voor die jn weilden/ sitten ghegrouft.
565
Maer zoo wye aermoede/ daghelicx prouft
 
Met groot labuer/ twort hem veruelich.
Beleedt
 
Dauidt de prophete/ ende conync helich+
 
Seght ten trooste/ van elcken ouer al
 
Salich zynse hier/ jnt eerdsche dal
570
Die Godt vreessen/ ende jn zyn weghen sterck
 
Wandelen/ winnende by huerlieder handtghewerck
 
Rechtuaerdelic/ waer by dat zy mueghen leuen.
 
Hemlieden es salicheyt/ toe ghescreuen
 
Thuwen confoorte/ dits Dauids woort.
Groot
 
Voorwaer tes zoete.
Beleedt
575
Noch seght hy voort
 
Jn dien ghy cunt/ tot Gods vreese dwynghen
 
Hu wyf dats hu siele/ zou zal voort brynghen
 
Veil kynders/ twelc zyn duechden bloeyende
 
Die menichfuldich zullen worden groeyende
580
Jn duechden vruchtbaer/ als de olyue.
Sober
 
O troostelicke woorden.
Beleedt
 
Tot uwen verstyue
 
Seght Christus selue/ cunt ghy hu vitten
 
Ter paciencie/ ghy sult besitten
 
Huwe siele ende byder/ paciencie duecht
585
Brynghen hier naermaels/ ter vpperste vruecht.
 
Dus wilt hu hope/ vp Godt fonderen.
Groot
 
Jc dancke hu grootelic/ hu vermonderen.
 
Al es den Tyt van Nv/ my scerpich nypelic
 
Jc zal voordan met zinnen rypelic
590
Lyden pacientich pynen te verdraghene.
 
Maer Sober Wasdom van mynen claghene
 
Es cause/ jn menegherande vouden.+
 
Ghemerct dat jc qualic/ can onderhouden
 
By cleen winnynghe de grootheyt/ van mynen laste.
Beleedt
595
Plant hu hope van troost/ vp Gode vaste.
 
Want Christus seght selue/ by zynder ghenaden
 
Comt alle tot my/ die zyt verladen
 
Met den packe van aerbeyde/ vp uwen hals.
 
Jc zalhu ontlasten/ van veil onghevals.
600
Want jc bem odmoedich/ ende sachtmoedich van wercken
 
Seght Christus zo ghy fyguerlic muecht mercken.
Groot
 
Lof Hope/ naer wien/ al ons hopen staet
 
Goddelicke goetheyt/ jn persoonen drievuldich.
 
De duere dyns troost ons doch open laet+
605
Ende maect ons aerme persoonen verduldich.
 
Syt tlabuer van dyveerssche persoonen ghehuldich
 
Die by Sober Wasdom/ groote smerten lydt
 
Want ghy zachtmoedich van herten zyt.
Sober
 
Lof Troost die al dat leift vertroosten can.
610
Eeuwich Godt/ wilt ons beradich wesen.
 
Den mestroosten wilt vallen met troosten an
 
Ende jn nooden weist doch beradich desen.
 
Wy sullen hu/ lof/ glorie/ beradich lesen.
 
Vertroost hem die duer/ benauten smerten lyt.
615
Want ghy zachtmoedich van herten zyt.
Beleedt
 
Lof Wysheyt die elcken/ zyt regierende wyselic.
 
Wilt Groot Labuer verleenen gracie
 
Dat hy hem mach zyn regierende wyselic
 
Dat dy[n] goetheyt by dien/ hem mach/ verleenen gracie.+
620
Den ghetrybuleirden wilt verleenen gracie
 
Die by ghebreken jn aermoeden smerten lyt.
 
Want ghy zachtmoedich van herten zyt.
Groot
 
Princhelic Godt/ wilt dancbaerich nemen
 
De simpel cunste van onsen louene.
Sober
625
Wy sullen hu gracie dancbaerich nemen.
 
Want wat wy doen/ tes tot uwen louene.+
Beleedt
 
Maect dat myn siele/ hu mach pynen te louene
 
Jndien zy naer de doot/ een[e]ghe smerten lyt
 
Want ghy zachtmoedich/ van herten zyt.
Pausa.
Groot
630
Beleedt van Wysheden/ minnelicken danc
 
Sy Godt ende hu/ van my toe gheleyt.
Beleedt
 
Groot Labuer/ menich aerbeyder gheseyt
 
Die met Sober Wasdom dats beseuen
 
Cleen winnynghe/ daer ghy vp moet leuen
635
Daghelicx met soberheden groot
 
Wyf kynders/ moet houden/ al lyt ghy noot
 
Hout lyden secreit jnt herte verboorghen.
 
Peynst zytger heden/ ghy moet steruen moorghen.
 
Wilt paciencie/ jn hu herte bevaten.
640
Al hadge Couuer Handelynghe/ ghy moetse laten
 
Wanneer de doot comt/ dit weitge plat
 
Ten baet rechten noch crommen.+
Groot
 
Wat can dan helpen/ ghelt goet of scat
Sober
 
Wanneer de doot comt dit weitge plat?
Beleedt
 
Lydt paciencie/ jc raede hu dat.
645
Ghy sult hu trybulacie/ te bouen commen
 
By sHelichs Gheests gracie/ mids de drie blommen
 
Magdaleene/ Kateryne/ Barbara/ ghepresen fyn
 
Die als Drie Santinnen met ons/ vutghelesen zyn.

†A†M†E†N†

De metren voorden tooch zyn dese Labores manum tuarum quia manducabis beatus es et bene tibi erit. Ps. cxxvij.
  In paciencia vestra possidebitis animas vestras. Luce 21.
De rolle die Godt jn dhandt hout jnden thooch Venite ad me omnes.  


Vorige Volgende

Over dit hoofdstuk/artikel

datums