Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.tSpel van Ghewillich Labuer ende Volc van Neerrynghe.
Ao. 1526.

Ghewillich Labuer, een personage als een landsman, hebbende jn dhandt een onruste ofte oorloge.
Volc van Neerrynghe, een personage als een ambochsman, zouckende met beede de handen gheboeyt.
Den Beroerlicken Tyt, als een capeteyn van oorloghe jnt arnasch.
Troostich Confoort, een personage als een zeeman, sprekende Zeeusche tale.
sHeeren Wille, ghecleet met eenen wapenroc als een heraut met de wapene vanden keyser.
Pays, een vrauwe zeer chierlic ghecleet.
+ Ghewillich Labuer een personage als een landsman hebbende jn dhandt een onruste ofte oorloge gheheeten Ghewillich Labuer.
 
Wat es hu soucken
Volc van Neerrynghe een personage als een ambochsman zouckende met beede de handen gheboeyt gheheeten Volc van Neerrynghe.
 
Jc en canse niet vynden.
Ghewill.
 
Jn allen houcken?
Volc
 
Jc moets my bewynden.
Ghewill.
 
Wilt jnt segghen vercloucken.
Volc
 
Jc salt hu ontbynden.
Ghewill.
 
Wat eshu soucken?
Volc
 
Jc en canse niet vynden
5
Die my mach verlossen/ vut deser benaute.
Ghewill.
 
Jnschelicx hebbic met/ goeder betraute
 
Ende met grooter onrusten/ langhe ghesocht.
 
Maer jn meneghen tyden en wassich gherocht
 
Daer jc vynden conste/ myn sins begheerrynghe.
10
Want jc soucke Pays
Volc
 
Ende jcke Neerrynghe
 
Duer wiens ontbeerrynghe/ zynde vermoeyt
 
Blyue met ghedueregher/ benaute gheboeyt
 
Twelc my tot vruechden/ can lettel lusten gheuen.
Ghewill.
 
Jc Ghewillich Labuer/ moet jn onrusten leuen
 
Mids den Beroerlicken Tyt van vreimder condicien+
 
Wyens rigoreusheyt/ ende wreede punycien
 
Tjeghens mynen danc/ jc moet verdraghen
 
By faute van Payse.
Volc
 
Te rechte wy claghen
 
Volc van Neerrynghe met Ghewillich Labuer
20
Dat wy dus blyuen/ jnt ghetruer
 
Duer tgheduer/ des tyts beroedere.+
 
Godt moets ontfaermen.
Ghewill.
 
O vruchtbaer moedere
 
Prysweerdeghe/ Pays/ blomme playsant
 
Waer zyt ghy bevaren?
Volc
 
Reyn dyamant
25
Bouen alle saphieren/ vut ghelesen
 
Neerrynghe weerde/ vrauwe ghepresen
 
Wiens haken my duerbroeyt/ als vierich brandere
 
Waer muecht ghy blyuen?
Ghewill.
 
Daer deen es daer es dandere.
 
Dus nemen wy/ paciencie/ vrient vercoren.
Volc
30
Jc Volc van Neerrynghe ghae verloren
 
Twelc jc beclaghen moet/ met drouuen moede.
 
Gheen huuttynghe en hebbic/ van wercke of goede
 
By den Beroerlicken Tyt/ dit moetic becrayen.
Ghewill.
 
Jc Ghewillich Labuer/ en mach zayen noch mayen.
35
Dus moetic als ghy ooc blyuen tondere.
Volc
 
Den Beroerlicken Tyt bedryft nv wondere
 
So elc mercken mach jn sweerls bescaute bloot.+
Ghewill.
 
My houdt hy jn onrusten
Volc
 
Ende my jn benauten groot.
 
Nauwe en machic/ vut steken thooft.
Ghewill.
40
Hier zyn wy ghejaecht
Volc
 
Ende ghunder berooft
Ghewill.
 
Om vanghen belaecht.
Volc
 
Dus blyuen wy ghescooft
 
Jn allen lydene/ met drouuer zeden.
Ghewill.
 
O weerdeghe Pays/ blomme van vreden
 
Hu langghe beyden/ dat wy beclaghen.
Volc
45
Twaere al claer/ vp dat wy hu zaghen.
 
Wy waeren haestelic/ vut bedwanc ziet
 
Des Tyts Beroerlic.
Den Beroerlicken Tyt als een capeteyn van oorloghe jnt arnasch.
 
Ten waere mynen danc niet
 
Dat ghy van my/ zout zyn verlost.
Ghewill.
 
O Beroerlicken Tyt wat doet ghy ons cost.
50
Ghy maect Ghewillich Labuer/ flau ende moedeloos
 
Ende Volc van Neerrynghe
Volc
 
Bystier ende goedeloos.
 
Tes recht dat elc/ hu byzyns lachtert.
 
Ghy houdt de zeede ghesloten+
Ghewill.
 
Ende de eerde verachtert
 
Dies therte jn alder onrusten/ dryuen moet
Volc
55
Ende my jn gheduereghe benauten blyuen doet.
 
Dus zyn wy by hu/ jn allen lydene.
Beroerl.
 
Godt heift my ghesonden/ om hu te castydene
 
Volc van Neerrynghe/ ende Ghewillich Labuer.
 
Al maect ghy jn benauten/ met onrusten ghetruer
60
Twaere scade dat jc/ by/ veil delays waere
 
Eenich tyt van hu.
Ghewill.
 
Hoe zoo?
Beroerl.
 
Ghy en zout niet weten/ wat dynghe dat Pays waere
 
Haddic Tyt Beroerlic/ met hu niet verkeert.
Volc
 
Och lachen wy hebbent/ te langhe gheleert.
 
Dus biddic Godt om gracien/ zynder punycien.
Ghewill.
65
By hu Tyt Beroerlic/ tzyn hu condicien
 
Ghebuerter alle quaetheit/ jc en cant ghehelen.
Volc
 
Roouen moorden
Ghewill.
 
Branden stelen
Volc
 
Bynden ende coorden
Ghewill.
 
Sulc byder kelen
 
Die onnoosselic steruen/ by cleene bedrachten.+
Volc
70
Maechden vyoleren
Ghewill.
 
Ende vrauwen vercrachten.
 
De rycke van machte/ ghy ter aermoede brynct.
Volc
 
Een duechdelic punt/ men niet en vynt
 
Als dedelheyt hu antrect/ theift ghebleken.
Ghewill.
 
Oorloghe wort ghevoordert
Volc
 
Ende Pays versteken
75
Huut wyen dat vloeyen/ alle duechden.
Beroerl.
 
Eist niet melodie voor/ dedele juechden
 
Alsse byden toedoene/ van myn verwecken
 
Tlichaeme met fynen/ arnassche decken
 
Ende dan vut trecken/ met opene bannieren
80
Te velde jn een/ coragieus versieren?
 
Tes edelic te ziene/ sulc eenen staet vry.
Ghewill.
 
Dat eist alsser/ nyement/ by bescaet zy.
 
Maer lachen jaet dy/ doettet ghescieden.
Beroerl.
 
Wye behinderet?
Volc
 
Vier staten van lieden
85
Den coopman/ den ackerman/ van reynder zede
 
Den zeeman/ ende ter menegher stede
 
Volc van Neerrynghe/ jn dyueerssche wycken.
Ghewill.
 
O prysweerdeghe Pays/ niet om verrycken
 
Wyen zout ghy mueghen/ vp de weerlt vernoeyen?+
Beroerl.
 
Wat canse brauwen?
Volc
90
Vut huer zo vloeyen
 
Dyueerssche weluaren/ menegherande.
Ghewill.
 
Pays maect eendrachticheyt
Volc
 
Te watre/ te lande.
Ghewill.
 
Pays besceermt met voordachticheyt
Volc
 
Voor scade ende scande
 
De vier staten van volcke/ van alder deerynghe.
Ghewill.
95
Pays voordert coopmanscepe.
Volc
 
Pays voet neerrynghe.
 
Ooc wort den landsman/ by payse gheheert.
Ghewill.
 
Ende den zeeman/ die ter zee verkeert
 
Mach met Payse/ zyn broot beslaeuen.
Volc
 
Pays es moeder der miltheit
Ghewill.
 
Ende vrauwe der ghaeuen
100
Jn wat stede ofte haeuen/ dat zou aryveirt.
Volc
 
O keyserlicke mueghentheit/ die nv dommineirt
 
Kaerle de vyfsten/ van edelen persoone
 
Wy hoopten omde/ myraculuese victorye scoone
 
Die hu ghebuert es/ bycans sjaers termyn+
105
Dat Pays te eer/ zoude hebben ghezyn
 
Tusschen hu ende dedele/ lelye ghepresen
 
Vp dat wy hadden/ mueghen/ quytte wesen
 
Den Beroerlicken Tyt/ vul van onspoede.
Beroerl.
 
Volc van Neerrynghe/ al zyt ghy myns moede
 
Met Ghewillich Labuer/ jc en achs niet een pluumken.
 
Jc sal noch wat ligghen/ rechs vp myn luumken.
Ghewill.
 
Wy en achtens/ niet een scuumken
 
Al hebt ghyt vp tduumken/ langhe ghehat.
 
Wy hopen eerlanc/ thuwen verstranghe dat
 
Ons blyde tydynghe sal/ vut shedelheyts palays commen.
Volc
 
Daer twee stryden/ moet thende Pays commen.
 
So Lucanus seght oorloghe/ moet eens myneren.
Ghewill.
 
Laet ons tot Gode/ jn bedynghe perseuereren
 
So wy vanden eersten/ waeren beghinnelic.
120
Want bedynghe es altyts/ gracie ghewinnelic.
Troostich Confoort een personage als een zeeman sprekende Zeeusche tale gheheeten Troostich Confoort.
 
Myn deeghen en wassic/ naynt zae verblyt.
 
Jc dancke Hesus ghebenendyt
 
Dat hy my heift willen/ te mynen beheeghen speerren.
 
Jc comme jn neghen deeghe/ heveerren
125
Van vut den edelen/ Spaenschen lande
 
Sonder stoet te lydene van Calaenschen zande
 
Tot hier anden/ Vleemschen candt.+
 
Nu willic my steken/ ouer tlandt
 
Ende segghen allomme/ jnt openbeerre
130
Tydynghe van graeter/ blyder meerre
 
Volc van Neerrynghe/ met Ghewilleghen Labuere.
 
Sy en hebben/ ghelueuic jn menegher huere
 
Blyder meerre/ jn langhe ghehoort.+
 
Waer bestge/ Volc van Neerrynghe? Comt voort
135
Met Ghewillich Labuer./ Jc saldy verblyden.
Volc
 
Wat Troostich Confoort/ jn meneghen tyden
 
Hebbic langhe moeten wesen/ huwes ontbeer.
 
Hoe staen de saken?
Troostich
 
Al cleer al cleer.
 
Jc saldy van blyscepe/ segghen wat nyeus.
140
Tes al pays.
Volc ende Ghewillich tsaemen
 
Wat dynghe Pays?
Troostich
 
Tsy jura Dieus.
 
Vruecht doetet dat jct/ vp tSpaensche zweerre.
Beroerl.
 
Quesque quil dyt/ serache ghueerre?
 
Daer naer bem jc/ een verlanghere.
Troostich
 
Bey maet jc en sach/ jn langhe gheen stranghere.
145
Tscynt dat syn meskin/ onghevoerlicken snyt.+
 
Hoe es zynen naeme?
Ghewill.
 
Den Beroerlicken Tyt
 
Die ons ende hu/ doet scade ende lachtere.
Troostich
 
Dhebst my dickens/ ghehouden tachtere
 
Dies jc beede myn vuulle stomppen
150
Lichte dy zoude/ vp dyn muulle tromppen.
 
Maer jc waene du corts/ sult worden verdreuen.+
Beroerl.
 
Wye zout my doen?
Troostich
 
Den Pays verheuen
 
Met sheeren eendrachticheyt/ sullen dy verjaeghen.+
Beroerl.
 
Hoe cunt ghyt gheweten?
Volc
 
Hy hoordet ghewaghen
155
Eer hy quam vutter Spaensche/ landauwe zoet
 
De welcke wete hy ons/ vp trauwe doet
 
Dies wy met rechten/ daer of verblyden.
Ghewill.
 
Troostich Confoort/ wilt ons belyden.
 
Weit ghy niet met/ hoedanegher alyanche
160
Dese heeren ghenomen/ hebben accordanche?
 
Twaere ons jnt hooren een confoort.
Troostich
 
Jc sal dy segghen/ wat jc hebbe ghehoort.
 
Den Vrancxschen conync/ van edelen lyfue
 
Soude Leonora hebben te wyfue
165
Des skeysers suster/ van grooten vermueghene.
 
Dit hoordic saghen.
Beroerl.
 
Dats half lueghene.
 
Thooren segghen/ achtich als een luere.
 
Want men liecht daghelicx van duere te duere
 
So elc mercken mach/ te meneghen stonde.
170
By Lo maet ghy speilt ooc/ metten monde.
 
Om drynctghelt thebbene/ maect ghy dit voortstel.
Troostich
 
Du maecxs my/ van moede ghestoort snel.
 
Haddic dy binnen/ mynder grepe
 
Te mynen wille/ binden scepe
175
Al zoudy dyn meskin/ west of noort scerpen
 
Jc zoude dy ouer tscips boort werpen
 
Al zout my costen beede/ dhooren.
 
Jc saechdy lieuer/ jn zeede versmooren
 
Dan jc om hulpe/ dy bode vyngher ofte handt.
Beroerl.
180
Daer hebt ghyt juuste.+
Troostich
 
Jae jc lieue quant
 
Ergher dan sulc truwant/ die om zyn broot ghaet.
Beroerl.
 
Waer omme?
Troostich
 
Menich meinsche ghy besnoot laet.
 
Sulc lyt noot jaet/ by dy jc scatte dat.
Beroerl.
 
Jc weynsche hu jn tSwin.
Troostich
 
Ende jc hu jnt Catteghat
185
Gheseyt jnt platte nat/ jn dYpersche Leet lanc.
Beroerl.
 
Ghy zyt den zoeten knecht
Troostich
 
Ende ghy zyt wreet stranc
 
Jn nydicheyt heet wranc/ spyttich ende stuer.
Beroerl.
 
Jc salhu noch rynghelen.
Volc
 
Ghy en sult gheen gheduer
 
Hopic langhe hebben/ onder shemels ghewolc.
Ghewill.
190
Cort hu sermoen/ of ghy verliest hu volc
 
Tot hulieden gheseyt jnt openbaer.
 
Maer Troostich Confoort/ eist ooc waer
 
Sal den conync hebben/ Leonora ghepresen?
 
Berecht ons datte.
Troostich
 
De juecht vutghelesen
195
Es bruudt vanden conync/ tryonphant.
Volc
 
So worter een zoetghuereghe roose gheplant
 
Metter lelye jnt pryeel/ der Vrancxscher croone+
 
Van conynclicken bloede/ edel van persoone+
 
Dies tVrancxsche landt/ twelcke stont te lydene
200
Wel cause mach hebben/ te verblydene
 
By dese roose die de lelye/ ghepresenteirt es.
Ghewill.
 
Godt zy lof/ danc/ dat zo gheaccordeirt es.
 
Jc hope eerlanc/ te wordene quytte
 
Van alder onrusten.
Volc
 
Ende jc ten spytte
205
Van hu Tyt Beroerlick/ vp sPays betraute
 
Worde verlost van/ gheduereghe benaute.
 
Want men seght/ hoe ment recht of cromt
 
Men roupt zo langghe Pays/ dat den Pays comt.
Pausa.
sHeeren Wille/ ghecleet met eenen wapenroc als een heraut met de wapene vanden keyser.
 
Stelt hu vp reyse/ vrauwe duechdelic.
210
By hu zo wort menich herte vruechdelic
 
Jnt anscauwen/ van uwen blyde ghelate.
Pays/ een vrauwe zeer chierlic ghecleet.
 
O sHeeren Wille/ hooghe van state
 
Hu willic opengieren/ alst redene ende recht zy.
 
Maer vercoren vrient/ jc biddu seght my
215
Mach jc met hu reysen jn behoorlicker zede?
 
Berecht my doch datte.
sHeeren
 
Jae ghy en trauwen.
Pays moet hier nemen Ghebruuck van Coopmanscepe ghecleet als een coopman byder handt ende Gheryue Neerrynghe ghecleet statelic als een ambochsvrauwe.
 
So leedic dan mede
 
Dese twee persoonen/ te mynder begheerynghe
 
Ghebruuck van Coopmanscepe/ met Gheryue Neerrynghe
 
Ten secourse vanden Volcke/ mids Labuer Ghehuldich.
220
Sy sullen hem verblyden/ menichfuldich
 
Als zy ons zien sullen/ om een ghebruucken.+
sHeeren
 
Volc van Neerrynghe/ zyt ghy ghaen duucken
 
Met Ghewillich Labuer?/ Elc als de snelle comme.
Ghewill.
 
SHeeren Wille wy heeten hu wellecomme
225
Ende hu duechdelicke Pays/ vrauwe van weerden.
Pays
 
Volc van Neerrynghe/ ryst vander eerden
 
Ende Ghewillich Labuer ryst vp te beene
 
Met Troostich Confoort.
Troostich
 
O vrauwe reene
 
Ghy hebt ons zo langhe/ jn drucke ghelaten.
Volc
230
Verblyt hu nv/ dyveersch van staten
 
Ende elcken die langhe/ naer Pays ghehaect heift.
 
Dit es den dach/ die Godt/ ghemaect heift
 
Om te verblydene/ tsy leecke of clercken.
Pays
 
Volc van Neerrynghe/ by wat ghewercken
235
Ghaet ghy aldus/ jn aerbeyde vermoeyt
 
Met gheduereghe benaute/ altyts gheboeyt
 
Ende Labuer met onrusten?/ Jc hebbes verdriet.
 
Voorwaer aldus/ en liet jc hu niet
 
Doen jc moeste vertrecken/ ende van hu ghaen.
Ghewill.
240
Den Beroerlicken Tyt/ heuet ons ghedaen
 
Duer tderuen van coopmanscepe ghepresen.
sHeeren
 
Jc sHeeren Wille/ reyn vutghelesen
 
Vriendhoudeghe Pays/ net ende appeert
 
Volc van Neerrynghe/ de boeyen weert
245
Van gheduereghe benaute/ by hem verdreghen.
Pays
 
Volc van Neerrynghe/ ghy wort ontsleghen+
 
By sHeeren Wille/ van uwer onlusten.
 
Ende Ghewillich Labuer/ huwer onrusten
 
Willic ooc van dy verlegghende zyn.
Volc
250
Wy mueghen met Dauidt wel segghende zyn
 
O heere die hu dienaere/ bem waerachtich
 
+ Die ghebroken hebt/ myn banden crachtich
 
Hu willic sacreficie/ van loue toe zenden
 
Ende uwe naeme belyden/ zonder ofwenden
255
Myn belofte vulcommen/ jn dyn volcx anscaute.
Ghewill.
 
Jc bem quytte der onrusten
Volc
 
Ende jc verlost der benaute
 
Byden toedoene/ van Payse goedertiere.
sHeeren
 
Tyt van Beroerten/ jn alder manniere
 
Jc sHeeren Wille van mueghenthede
260
Ghebiede hu te rumene/ landt ende stede
 
Vander keyserlicke magesteyt/ ende Vrancxsche croone vry
 
Vp den ban crymineel.
Beroerl.
 
Valt dat te loone my
 
So moetic/ naer ander logyst bespien
 
Jn tlandt van Ytalien/ ofte jn Turckien.
265
Daer wordic ontfanghen/ als een cadet.
Pays
 
Volc van Neerrynghe/ hoort onghelet
 
Jc brynghe tot hu/ om vercouvereren
 
Coopmanscepe met my/ die frequenteren
 
Sal met hu/ naer hu begheerrynghe.
270
Ende Ghewillich Labuer/ hu gheuic Neerrynghe
 
Te ghebruuckene/ gherustich ende stille.
 
Voort blyf jc by hulieden/ tes sheeren wille.
 
Met Troostich Confoort/ sallic met hu paeren.+
sHeeren
 
Godt salhem liefhebben/ altyts bewaeren.
275
Dapostele seght/ twelc elc mach vruecht voen
 
Die Godt vreest/ die zal altoos duecht doen
 
So Kaerle onsen keyser/ edel gheboren
 
Die van joncx/ Godt heift vercoren
 
Ende altoos de vreese Gods/ heift voor ooghen.
Ghewill.
280
Eist niet een groote duecht/ jnt bethooghen
 
Dat Kaerle onsen keyser/ die onbesmit es
 
De lelye die metter wortele vut ghespit es
 
Wedere jn zyn eerste/ plaetse stelt?
Volc
 
Jae/ ende noch met/ duechdelicker ghewelt
285
Jnt verchieren/ sVrancx pryeel playsant
 
Metter lelye/ een scoone roose plant
 
Om payselicke vrienscepe/ te onderhoudene.
Pays
 
Den edelen keyser/ om de waerheyt tonvoudene
 
Synde vut eenen payselicken/ tronck ghesproten
290
Hem heift ouer lanc/ beroerte verdroten
 
Haddys eenichsins/ ghemueghen voor by.
sHeeren
 
Cycero jnt bouck der Officien/ verstaet my
 
Vraecht waer omme/ hyement oorloghe voert.
 
De cause es datter/ een toe roert
295
Vp dat hy/ zonder blaemte mach/ in payse leuen.
Pays
 
Daer eendrachticheyt wort/ binden palayse beseuen
 
Daer zietmen cleene saken/ commen ter grootheyt.
 
Ende ter contrarie daer/ stweedrachticheyts snootheyt
 
Es/ worden groote saken ghemyneirt
300
So Tulius seght.
sHeeren
 
Dit es gheapprobeirt
 
Anden Vrancxschen conync/ voor soorloghens cryhieren.+
 
Haddy willen met payse/ appointhieren
 
Hy hadde belet/ veil griefs ende scade.
 
Want al zyn blommen/ van edelen dade
305
Quaemen by dien/ jn groot verseeren.
Pays
 
Onsen edelen keyser vul alder eeren
 
Hebbende al de blommen/ onder zyn subgecxcie
 
Begheerrende pays/ ende gheen corecxcie
 
Laetse weder ghaen/ vry los/ ende quytte
Volc
310
Sonder van rentsoene/ te nemene een mytte.
 
Dese edelheyt salmen/ noch langhe ghewaghen.
Pays
 
Men salder of spreken/ ten eeuweghen daghen
 
Van zyn duechdelicke/ liberaelicheyt.
sHeeren
 
Den paysmaker/ van uwer alder salicheyt
315
Heift nv ghemaect/ jn corten tyden
 
Pays ende accoort/ an beeden zyden
 
Met dese twee machteghe/ heeren coen
 
Twelc gheen creatuere/ en heift cunnen ghedoen
 
Hoe edele hoe rycke/ houdt ofte jonc.
320
Maer vp eenen/ corten spronc
 
Wierdense by my/ sHeeren Wille
 
Rasscher dan de/ weirhaene vp de spille
 
Van huerlieder/ opynie/ omme ghedrayt.
Pays
 
Smeinschens herte/ es lichte ghepayt
325
Daer Godt zyn gracie/ zendt onverholen.
 
Tmeinschelicke gheslachte/ moeste dolen
 
Omde sonde/ die Adam eerst/ wrochte
 
Tot sHeeren Wille/ by compassye versochte
 
Dat hy den paysmaker/ jn Maria zant.
330
Dits den saleghen paysmaker/ by redene want
 
Noynt pays zo diere/ als by hem ghecocht.+
sHeeren
 
Noynt en wasser waerachtich/ pays ghecnocht
 
Tusschen Godt den vader/ ende tmeinschelicke gheslachte
 
Hoe helich hoe goet/ hoe groot van machte+
335
Sy en moesten al/ ter hellen dalen
 
Tot dodmoedicheyt/ van Maria conste stralen
 
Den paysmaker Christus/ vut shemels pleyn.
Ghewill.
 
Lof ende danc/ o goddelic greyn
 
Dat jc hu segghe/ vut mynder herten gront.
Pays
340
Volc van Neerrynghe/ zo ghy langghe stont
 
Hebt moeten lyden/ der benauten plaghen
 
Schelycx de vaders/ die jnt voorbouch laghen
 
Jn ghedueregher benaute/ zo langghe tyt
 
Tot den paysmaker Christus/ ghebenendyt
345
Den pays beseghelde/ met zynen bloede.
Volc
 
Ende zo Maria/ by hueren odmoede
 
Den leuende Gods zuene/ heift bekuert
 
Huer niet te naer ghesproken/ zo eist ghebuert
 
Met Leonora/ wien dat heift ghegreyt
350
Den Vrancxschen conync/ die an huer gheleyt
 
Heift zyn liefde/ tes goet te peynsene.
Ghewill.
 
Pays wort te vastere
Volc
 
Sonder te deynsene.
 
Taccoort by desen wort/ te noeder ghebroken
 
An beeden zyden/ duer thuwelic besproken.
355
Want der vrauwen liefde/ doet jonste rysen.
Pays
 
Ghelyc jc hu te vooren/ wilde bewysen
 
Sichtent dat Godt/ meinsche wiert tonser noot
 
Heift hy tonswaert jonste/ ghehadt zo groot
 
Dat hy lieuer de doot/ noch eens zoude steruen
360
Dan by zynen toedoene/ een siele bederuen.+
 
So vaste houdt hy/ den pays beseghelt.
sHeeren
 
Hu seluen reghelt
 
Volc van Neerrynghe/ dyveersch ghestaet.
 
Paysiert tjeghens Godt/ van tsondich quaet.
365
Want Godt een paysich/ herte ansiet.
Pays
 
Sonder Gods pays/ ten es al niet.
 
Want daer pays es/ daer es Godt.
 
Pays heift ontsloten/ shemels slodt
 
Oorconde den zeghele/ van Christus vyf wonden.
Ghewill.
370
Lof Godt dat wy Pays/ hebben ghevonden
 
By sHeeren Wille/ jn onsen tyt.
sHeeren
 
SHeeren wille es/ dat ghy zonder resspyt
 
Hem ghebenendyt/ zonder delayhieren
 
Ende dat ghy met deuocien sult/ zyn lof verchieren.
375
Wilt hu daer toe voughen/ met leden snellich.
Volc
 
Hy moeste wel wesen/ ondancbaer rebellich
 
Onbekent onwetende/ ende van quaeden aerde
 
Die Godt niet en dancte/ vande hooghe vermaerde
 
Tydynghe van payse/ die hy ons gheift.
sHeeren
380
Verblyt al dat nv ter weerelt leift
 
Sonderlynghe ghy edele/ kerstene lieden
 
Dat den wille des sheeren/ heift laten ghescieden
 
Dese accoordancie scoone/ niet om gronderen.
Pays
 
Ten es niet doenelic/ om te vermonderen
385
De duecht de gracie/ ende tweluaren.
 
Tsal hondert duust meinschen/ tleuen sparen
 
Die jn huer bloet/ zouden hebben versmoort.+
Ghewill.
 
Ghebenendyt zy dhuere/ dat dit accoort
 
SHeeren wille wilde/ laeten ghehynghen
390
Ende dese edele heeren/ ten payse brynghen.
 
Tkynt behoort jn smoeders lichaeme te verhueghene.
Volc
 
Ghy kerkelicke persoonen/ naer uwen vermueghene
 
Heft vp van vruechden/ dyns voys gheclanc.
 
Synght/ Te Deum laudamus/ gheift lof ende danc
395
Den almueghende Godt/ zonder te vermydene.
Ghewill.
 
Luudt nv de clocken/ tot elcx verblydene
 
Ende uwe atenten/ tot alle vruechden lecht.
Volc
 
Wye sal lof segghen/ jn duechden recht
 
Dat bequaeme mach wesen/ voor Gods ooghen?
Pays
400
Volc van Neerrynghe/ jc salt hu bethooghen.
 
Met Ghewillich Labuer/ maer de gordynen ghescouen.
 
Jn dancbaerhede wilt/ den heere louen.
Pausa.
Hier scuuft men de gordynen. Ende jn den tooch moet staen ons heere andt crucen ghestoffeirt ghelyc eenen olyueboom ende bouen tcruce moet staen jn een rolle jn latine Venite et videte opera domini qui posuit prodigia super terram auferens bella vaque ad finem terre /Psalmus 45/. Ende buten voor den thooch sal staen een metere jn latine/ Ex ore jnfancium et lactancium perfecisti laudem /Psalmus 8/. Item ende beneden voor tcruce moeten knyelen drie jonghe kynderen twee cnechkins ende een meyskin jnde middele waer of deerste jnde handt hebben sal een rolleken waer jn dat ghescreuen zyn sal/ Da pacem domine jn diebus nostris. tMeyskin der ghelycken zal hebben ooc een rolle/ waer jn dat staen sal Quia non est alius qui pugnet pro nobis/ tdander cnec[h]ken een rolle waer jn staen sal/ Nisi tu domine Deus noster.
Volc
 
Lof teeken van payse/ boom tryonphant
 
Bouen den olyue wien/ den heere de naeme+
405
Heift ghegheuen vruchtbaer/ chierich want
 
Bouen andren boomen/ zyt ghy bequaeme
 
Een teekene van payse/ zo Noe tzynder vraeme
 
Jn de aercke byder duue/ waerachtich bevonden heift
 
Jnder tyt der deluvye/ dus naerden bethaeme
410
Tes recht dat men dy lof/ met allen monden gheift.
 
Lof teekene by wien/ de siele jn ghesonden leift.
 
Want Christus andy/ om ons ghecnocht was.
 
Duer dy cruce den vyant/ tallen stonden beift
 
Mids dat den pays/ an dy vulbrocht was
415
Van onser salicheyt/ die langghe ghesocht was
 
By ons vaders dier jn benauten/ laghen onghehoort.+
 
Lof teekene van payse/ ons alder confoort.
Ghewill.
 
Wel machmen hu/ byden olyuenboom ghelycken
 
Wiens scorsse ende wortel es van smaken bittere
420
Huut wien de zunne doet vloeyen zonder beswycken
 
Soetsmaeckende olye/ als sbooms verhittere.
 
Christus ghy hebt ghesmaect/ als vpperste besittere
 
Scrucens bitterheyt/ jnt lyden ende doot
 
Dies den vyant verwonnen es/ der sielen besmittere
425
Ende den pays es ghemaect/ van cleen ende groot.
 
Lof by wien wy/ gherocht zyn vut deeuweghe noot
 
Tjeghens svyants temptacien zeer putertierich.
 
De olye der ontfaermicheyt vut huwer zyde vloot
 
Mids de zunne der caritaten tonswaert vierich.
430
Met rechten mach elcken thuwen loue verchierich
 
Dit woort wel segghen oost west zuudt noort
 
Lof teekene van payse ons alder confoort.
Troostich
 
Gheneselic es de olye der zoeter olyuen
 
Hoe dangereus dat zyn alle quetsueren
435
Tsy varssche wonden ofte die coresyuen.+
 
Sy es nootsakelic ter surgye tallen hueren.
 
O boom des crucen by wien de dolueren
 
Van Adams wonde wiert versoet
 
Duer hu vrucht Christus edel van nathueren
440
Godt ende meinsche die an hu stoet
 
Tes recht dat hu elc goet kerstene groet
 
Als teeken van payse met deuoter jntencie.
 
Om dat Jhesus an hu sturte/ zyn helich bloet
 
Es men hu sculdich/ alle reuerencie.
445
Dus segghic te rechte met dyligencie
 
So alsmen dede jnt eerste woort
 
Lof teeken van payse ons alder confoort.
Pays
 
O princhelic boom daer Christus waerachtich
 
Pays an verwarf met handen voeten ende zyde duerboort
450
Hout den pays gheduerich van dese heeren machtich
 
Als teeken van payse ons alder confoort.
Volc
 
Wilt danckelic nemen duer tpaysich accoort
 
Eerweerdeghe heeren ons slichte colacie.
Ghewill.
 
Wy bidden dats hem nyement en stoort.
Volc
455
Wilt danckelic nemen duer tpaysich accoort.
Ghewill.
 
Al commen wy nu plompelic voort
 
Et es ghedaen vut recryacie.
Volc
 
Wilt danckelic nemen duer tpaysich accoort
 
Eerweerdeghe heeren ons slichte colacie+
460
Duer den Heleghen Gheest wiens zoete gracie
 
Dat wy al te saemen mueghen ghewinnen
 
Mids der bede der heleghe Drie Santinnen.

†A†M†E†N†


Vorige Volgende

Over dit hoofdstuk/artikel

datums