Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.Esbatement van Stout ende Onbescaemt.
Ao. 1527.

tWyf.
Den Coster.
Onbescaemt, een speilman.
Stout, ooc een speilman.

+ Esbatement.

tWyf.
 
My dyncke dat jc van luste verpruetele.
 
Myn ossemuulken/ waere gheerne ghewreuen.
 
Jc sal wat ghecryghen/ jn myn blende scuetele
 
Al zouder de helle/ noch omme beuen.
5
Jc hebbe eenen man/ met Gode moet hy leuen
 
Die juecht noch vruecht/ en heift jn tlyf.
 
Hoe zoudy my vanden/ zynen ghegheuen?
 
Want vooren eshy lam/ ende achter styf.
 
Ende jc bem noch/ een wellustich wyf
10
Die eenen ruter vry wel zoude payen.
 
Vondic hyemende/ naer myn motyf
 
Die zyn vrienscepe/ tmywaerts liete drayen
 
Jc zoude my laeten/ van hem verfrayen.
 
My en roucx wat hy waere/ coster of clerc.
15
Sallic my laeten van luste duerlayen
 
Byden ghebreke/ van dat sotte ghewerc?
 
Of jc by dien storue/ tvolc heuen sterc
 
Soude achter myn doot met my ghecken.
 
Jc zye onsen coster/ ghunder jnt bemerc.
20
Of my sulc een ruter/ wilde antrecken?
 
Hy comt tmywaerts./ Jc moet my bedecken.
 
Tes somtyts noot datmen/ de woorden bewimpele.
Den Coster.
 
Wel vrauwe hoe staet?/ Ghy ziet zo simpele.
 
Men zoude druc/ jn hu ghesichte verweruen.
Wyf
25
Met goeder cause.
Coster
 
Es uwen man sieck?
Wyf
 
Kir hy en wil noch/ niet steruen.
 
Hy es van ghesonthede/ noch veil te fray.+
 
Godt heift hem ghemaect/ van eerde zo tay
 
Noynt pottebacker sulc/ jn zyn fornoys dede.
Coster
 
Hy maect hu veil doens?
Wyf
 
Jc hebber veil roys mede.
30
Wonderlic van zinne/ ende zo ouervry
 
Tdeen eshem te varre/ ende tander te by.
 
Niet wat zy/ en can men te passe setten.
Coster
 
Vrauwe ghy en muecht/ daer vp niet letten.
 
Ghy moetet hem toe gheuen omde houdtheyt.
35
Al segghic hu zoo/ jc spreke vp stoutheyt
 
Om hu te beradene/ tot alder duecht.
Wyf
 
Ghecreghic van hem/ doch eeneghe vruecht
 
Ten zoude my niet/ zo zeere spytten.
 
Dat jc myn jonghe juecht/ dus moet verslytten
40
Jn deser alende tmach/ my wel rauwen.
Coster
 
Weist pacient.
Wyf
 
Bem jc meer dan ander vrauwen+
 
Van steenen van beenen? My dat ghewaecht.
 
Ten weet nyement wat huer deert/ dan diese draecht.
 
Coster/ coster/ ghy hebbet/ goet segghen.
Coster
45
Dorstic hu myn meenynghe/ vooren legghen
 
Om tghebrec/ van uwen luste te stelpene+
 
Jc zoud my voughen om hu te helpene
 
Hier gheseyt tusschen/ ons beeden secretelic.
Wyf
 
Ghy ghecter mede.
Coster
 
Jc bems my vermetelic
50
Ghecreghic met hu/ tyt ende spacie.
Wyf
 
Foolger niet mede?
Coster
 
Stondic jn hu gracie
 
Hu steldic te passe/ naer myn berommen.
Wyf
 
Coster wilt dan thauent/ tmynent commen.
 
Jc zal ons een aerdich/ chierkin bereeden.
55
Wy sullen vroylic zyn eer wy sceeden.
 
Jc onsteke jn uwer liefden gheheel
 
Ey lodderlic monckaert.
Coster
 
Ey aerdich dreel.
 
Hu jonste es my/ jnt herte gheseten.
 
Maer te wat huere? Laet my dat weten.
60
So willic commen/ en hu behaecht
 
Thuwen huse.
Wyf
 
Dats wel ghevraecht.
 
Want nyement el/ en mach de wete dienen
 
Dan ons beeden.+
Coster
 
Dats wel gheseyt.
Wyf
 
Wanneer?
Coster
 
Jae.
Wyf
 
Ontrent den thienen.
 
Dan wort mynen man/ tjoncwyf de cnaepe
65
Te bedde jn hueren/ eersten slaepe.
 
Dan sullen wy leuen/ buten ghetruere.
Coster
 
Waer wordet te doene?
Wyf
 
Tmynent binder scuere.
 
Daer sullen wy tsaemen vruecht oorbooren.
 
Al zyn wy ludachtich/ men salt niet hooren.
70
Wy mueghen daer zyn/ zonder vreese ofte vaer.
Coster
 
Die dat peynsde weynschic/ een vroylic jaer.
 
Jc salder my vynden/ zonder falen.
Wyf
 
Jc wil ghaen thuuswaert/ zonder dralen.
 
Den vieljaert sal waenen/ my hebben verloren.
75
Adieu costere.
Coster
 
Adieu myn vutvercoren.
Wyf
 
En laet ommers thauent/ niet te commene.+
Coster
 
Jc segghe neen jc by eede ghesworen.
Wyf
 
Adieu coster.
Coster
 
Adieu myn vutvercoren.
Wyf
 
Den raet tusschen hu ende my ghescoren
80
Sal groote vruecht/ ons pynen te sommene.
 
[Adieu coster].
Coster
 
Adieu myn vutvercoren.
 
Jc en sal niet laten/ thauent te commene.
Wyf
 
Wy sullen bedect pynen te mommene.
 
Dus willic ghaen thuus/ met blyden gheeste.
85
Jn myn scuere wort thauent hopic feeste.
Pausa cleene.
Onbescaemt een speilman.
 
Waer zytge au Stout?
Stout ooc een speilman.
 
Hier Onbescaemt
 
By hu zoot betaemt/ tallen keere.
Onbesc.
 
Die niet en zoorcht/ en heift gheen heere.
 
Waer sullen thauent/ ons mesken legghen?
Stout
90
Die ons dat wilde/ om een seskin segghen
 
Hem ghaef jc ter stont/ myn laetste ghelt.
 
Et wort zeer donckere+
Onbesc.
 
Ende wy zyn vp tvelt.
 
Wye zal ons thauent willen logieren?
Stout
 
Die van doene heift/ twee drooghe rothieren
95
Die slepe ons tsaemen/ binden cote.
Onbesc.
 
Ghy zyt een ruetelaere.
Stout
 
Ende ghy een droochscote.
 
Besiet wat den loeten/ verwyt den houenstake.
Onbesc.
 
Daer hebber ghestaen vp een cake
 
Ende snachs ghewacht/ de scapen jnt maenschyn
100
Beter dan ghy.
Stout
 
Ghy hebt een hoerenvoorhooft
Onbesc.
 
Ende ghy een barderen aenschyn.
 
Ons beeder condicien/ zyn varre vernaemt.
 
Ghy zyt Stout
Stout
 
Ende ghy Onbescaemt.
 
Tsyn ons ghebreken jnt bemercken.
Onbesc.
 
Wy versoucken meer taveernen
Stout
 
Dan tsondaechs kercken.
105
Want bloote clercken/ by aermoede quelen.+
Onbesc.
 
Noode wy wercken
Stout
 
Maer lieuer wy spelen
Onbesc.
 
Jn dyueersche percken
Stout
 
Dies wy zonder helen
 
Musycke oorbooren/ jn menegher ghyse.
Onbesc.
 
Met eender bedecter/ truwandyse
110
Looppen wy van ghelaghe/ te ghelaghe.
Stout
 
Hier laven wy ons kele
Onbesc.
 
Ghunder vullen wy ons craghe.
 
Tsommeghen daghe/ comt wat jnde poot.
Stout
 
Wy worden vermenicht
Onbesc.
 
Ons conste versnoot.
 
Want cleen ende groot/ die ons hadden begheerrynghe
115
Wysen ons voor by.
Stout
 
Dat comt bedy
Onbesc.
 
Tvolc en heift gheen neerrynghe.
 
Die hier voortyts teerrynghe/ te doene bestoet+
 
Jn taveerne of eldre/ nv thuus ghedoet
 
Met een simpel bancketkin al stille zwyghende.
Stout
 
Eer wy eenen pennync/ zyn ghecryghende
120
Twaere noot eer wy tspelen beghonsten
 
Dat wy alle nyeuwe/ liedekens consten
 
Naer de begheerte/ vanden ghaende man.
Onbesc.
 
Deene wil van Bou ha ha
Stout
 
Dandere van Jan dele Jan.
 
Diet niet en can/ men wysten ouer tvelt groen.
Onbesc.
125
Wy moeten nv veil/ te vele voor tghelt doen.
 
Elc wil ghedient zyn/ als een jonckere.
Stout
 
Ghenouch van dien/ et wort al donckere.
 
Wy moesten peynsen/ hoe wy sullen betrapen
 
Logyst daer wy/ sullen mueghen slapen.
130
Want wy zyn varre/ van doorpen of steden.
Onbesc.
 
My dyncke jc zye daer/ een huus beneden.
 
Laet ons maken by eenegher mannieren
 
Dat wy daer thauent mueghen logieren
 
Of anders zo sitten wy/ jnden rauwe.
Stout
135
Hola jc hebbe/ ghesien de vrauwe.+
 
Dien willic ghaen spreken/ zonder ontbeerren.
 
Goeden avendt vrauwe.
Wyf
 
Wats hu begheerren?
 
Wilt my dat segghen zonder jolen.
Stout
 
Wy zyn ruters die achter lande dolen
140
Om hier ende daer/ eenen pennync te raepene.
 
Wy zouden bidden om hier te slaepene.
 
Consenteret ten eersten/ eer jct hu erverghe.
Wyf
 
Tslaepene?
Stout
 
Jae.
Wyf
 
Jc en houde gheen herberghe.
 
Ghaet ende wilt elders/ hu tente slaen.
Onbesc.
145
Lieue vrauwe/ wy en weten waer ghaen.
 
Tweder es vuul/ cout ende nat
 
Ende twort helledonckere.
Wyf
 
Wat achtic dat?
 
Ghy hadt mueghen ter herberghe ghaen by daghe.
 
Loopt/ loopt/ licht yeuwers onder een haghe.
150
Jc en hebbe gheen logyst/ om hu behouuen.
Onbesc.
 
Wy zyn twee scamele pyppers.
Wyf
 
Jae of twee ledeghe bouuen.+
 
Godt moetge bedrouuen/ waent ghy my te verdullene?
 
Wat souct ghy anders dan uwen balch te vullene
 
Van tghuent dat ghy vynden mocht ghezoden ghebraden?
Stout
155
Ghy mocht wel lichte/ de waerheyt raden.
 
Want wierde hu spyse/ voor ons ghestelt
 
Wy droughen wel mede/ de meeste helt.
 
Want jc bem Stout/ ende myn maet Onbescaemt.
Wyf
 
Jc segghe ghaet van daer/ ghy quaemt.
160
Thaemeer en gheraect/ ghy hier jnt ghat.
Onbesc.
 
Wel wat rampsche/ wyf es dat.
 
Hoe onaerdelic sluutse/ daer de duere.
 
Wel wat raede?
Stout
 
Ghaen wy naer tscuere
 
Vp dat wy gheraken mueghen/ jnt stroo.
Onbesc.
165
Soot met ons staet/ tes beter alzoo.
 
Want wy mochten buten/ van coude vervriesen.
 
Laet ons van twee quaeden/ tminste kiesen.
Pausa cleene.
Coster
 
Helpe hoe hebbic al den dach ghehaect.
 
Den dach heuet my/ veil te lanc ghemaect
170
Mids dat my den zin/ jn liefden bekuert leift.
 
My dyncke datse/ twee daghen gheduert heift.
 
Dit heift ghedaen/ myn groot verlanghen.
 
Maer eer lanc hopic sallic troost ontfanghen.
 
Dus ghae jc derwaerts/ onghecesseirt.+
Wyf
175
My seluen hebbic/ jent ghepareirt.
 
Myn lief wort hier/ eer lanc jc wedde.
 
Tes al jn slaepe/ ende myn man te bedde.
 
De joncwyfs de cnaepen/ groot ende cleene
 
Daer en waect nyement/ dan jc alleene.
180
Daer of zoo weet jc trechte besceet.
 
Nu willic ghaen maeken/ alle dync ghereet.
 
Tmynder scuere wort vry/ wat jnde meersse.
Stout
 
Wats daer?/ My dyncke jc zye een keersse.
 
Ende wy en mueghen/ nyeuwers vlieden.
Onbesc.
185
Wye weet wat dit/ zal mueghen bedieden?
 
Laets nauwe duken/ ende zwyghen stille.
Wyf
 
Nu hebbic alle dync/ naer mynen wille
 
Bereedt tjeghens zyn comste/ net ende fyn.
 
Dats waer/ nv moester wesen bier ende wyn.
190
Daer willic/ secretelic omme ghaen.
 
Hier latic de keersse/ tot jc comme staen.
 
Want jc weet de wycke/ van veynsters ende dueren.
Stout
 
Hier sal cherteyn/ wat vreimts ghebueren.
 
Om kycken moet van my/ den hals ghereet zyn.
195
Jc zyer spyse/ ende de tafele ghedect zyn.
 
Myn zinnen verwect zyn/ om daer of tetene.
Onbesc.
 
Tsus hoeryzuene/ quaemt te wetene
 
Dat wy hier waren/ ende zy ons zaghen
 
Sy zouden ons willen/ van hier verjaghen.
200
Laet ons zwyghen/ zo mueghen wy zien den hendt.
Coster
 
Ommers bem jc myn liefs/ huse ontrent+
 
Al doet my donckerheyt/ als de dweersse ghaen.
 
Jc zye duer de splete/ jnt scuere de keersse staen.
 
Sou verwacht me/ dat wordic wel ghewaere.
205
Godt seynt hier al.
Wyf
 
Wat myn kaere
 
Hu heetic wellecomme/ aerdich smullekin.
Coster
 
Myn scoon prosse.
Wyf
 
Myn weerdste cadullekin
 
Spoet hu vullekin./ Ghy ende jc
 
Moeten ons dynghen doen/ cort ende quic
210
Eerder hyement binden huse/ wort ontwaken.
Coster
 
Jc ghae ter stont/ ghereescip maken
 
Tot Venus labuer/ scoon blomme ghepresen.
Stout
 
So jc hoore tsal/ een bruloft wesen.
 
Noynt speillieden en quaemen/ bet ter streke.
Onbesc.
215
Jc zweete van vaere/ dat jc leke.
 
Jc wildic waere/ an ghuen zyde slyppen.
Stout
 
Byden bloede/ jc zal de bruloft pyppen
 
Hoor jcse toe ghaen/ by eenich mannierken.
Wyf
 
Laet ons eerst/ liefueken maecken een chierkin
220
Want hier es spyse/ ende dranck plentheyt.
Coster
 
Varyncx scoon roodemondt/ een lettelkin beyt.+
 
Hadden wy ghereyt/ een Venus rondekin
 
Dan ghaen wy sitten mondekin an mondeken
 
Ende rusten de leden/ met dryncken ende heten.
Stout
225
Se worden jnt werck/ eer wyt weten.
 
Tes best stellic/ myn musele te passe.
Onbesc.
 
Hoerysuene ontbeyt/ van hu vermeten.
Stout
 
Se worden jnt werck/ eer wyt weten.
Onbesc.
 
Ghy sult maken/ dat wy worden ghesmeten
230
By den toedoene/ van uwen ghebrasse.
Stout
 
Se worden jnt werck/ eer wyt weten.
 
Tes best stellic/ myn musele te passe.
Onbesc.
 
Ghy en maect/ nyeuwers of werck.
Stout
 
Jc spint al te vlasse.
 
My en roucxs hoet vaert/ jc achs een peerle.
Coster
235
Daer legghic myn ryeme/ ende hier myn keerle.
 
Scoon lief jc worde/ stappans bereedt.
Stout
 
Hy sal jnt werck zyn/ eer jet weedt.
 
Tes groot tyt/ dat jc beghunne te blasene.
Onbesc.
 
Ghy en zyt dynctme/ niet te verdwasene.+
240
Naer dat ghy pyppen/ wilt/ met uwer voere
 
So sallic slaen/ vp myn tamboere.
 
My en roucxs hoet vaert/ een hynckel haer.
Coster
 
Wat helpe doot/ wat hooric daer.
 
Van vaere so stellic/ my te looppene.
Wyf
245
Desen gru/ staet my wel te becooppene.
 
Den necker essere/ ofte eenich ghedrochte.
Coster
 
Jc en weet niet hoe jc/ van daer gherochte.
 
Noynt en wassic zoo/ bevreest van zinne.
 
Jc comme ghelooppen/ duer dicke duer dinne
250
So dat jc thuus bem/ te mynder onbaten.
 
Want jc hebbe keerle/ ende bucht ghelaten.
 
Maer jc hopet al weder/ te ghecryghene.
 
Jc en can niet ghedueren/ van hyghene
 
Alzoo my de vreese/ brynct gheraecht.
Wyf
255
Noynt wyf en was/ zo deerlic gheplaecht.
 
Want zoude my eens/ ghenouchte ghebueren
 
Den necker zoude wesen/ binder scueren.
 
Maer al moetict betrueren/ te deser spacien
 
Wy sullen noch tsaemen/ elders colacien
260
Den coster ende jc/ onder ons beeden.
Stout
 
Danssen se noch?
Onbesc.
 
Wat ze zyn ghesceeden.
 
Jc en weet niet/ waer datse zyn bevaeren.+
Stout
 
Wy sullen nu selue/ de tafele bewaeren
 
Ende ons ghebaeren/ zonder gheluudt
265
Of jc brudecomme waere/ ende ghy de bruudt.
 
Want hier es redelic/ wel te monckene.
Onbesc.
 
Al vooren besprekic/ niet te pronckene
 
Maer om heten/ willic roeren tkinneghat.
Stout
 
Siet Onbescaemt/ eist niet een goede vinne dat?
270
Ten es gheen mockayken/ te vermulene.
Onbesc.
 
Van hetene/ so beghun jc te pulene.
 
Haerre my de kanne/ dat jc eens dryncke.
 
Noynt bruloft en viel ons bet jnde clyncke.
 
Myn buucxskin redelic/ jc ghevult hebbe.
Stout
275
Jc waen jcse beede/ wel verdult hebbe.
 
Sonder my zy waeren/ te saemen ghepaert.
Onbesc.
 
Noynt lieden en waeren zo zeere vervaert.
 
Den eenen den andren/ niet en verbeyde
 
Om wech te looppe[n].
Stout
 
By dien zy ontseyde
280
Ons beeden tsaemen te logierne.
 
Sou meende vruecht/ bedect te anthierne
 
Niet waenende dat wyse/ zouden verlacken.
Onbesc.
 
Hoe spyttich spracse.
Stout
 
Hoe ghyncse snacken.+
 
Huer kinnebacken/ steldese ouer zyde
285
Van puerder aercheyt.
Onbesc.
 
Hoe slootse de duere
Stout
 
Met sulcken nyde
 
Ofse ons naer/ zoude hebben ghevloghen.
Onbesc.
 
Diese voor goet hilde/ waere bedroghen.
 
Want ze dynct my zynde/ spyttich ende quaet.
Stout
 
Wat zoudger of segghen Onbescaemt maet
290
Dat jc dede zo vele/ by myne treken
 
Hoe quaet datse es/ datse ons sal toe spreken+
 
Met scoone woorden/ eer wy rumen thuus
 
Ende selue bidden?
Onbesc.
 
Dat waere abuus.
 
Een blendt man/ zout veil lieuere zien
295
Dan hooren.
Stout
 
Ende bouen dien
 
So sallic huer doen betalen/ onverveilt
 
Van dat wy huer feeste/ hebben gespeilt.
 
Sou en salder niet durren/ tjeghens kicken.
Onbesc.
 
Myn daghen en hoordic/ van vreimder sticken.+
300
Wilt ons dat bescicken/ net ende appeert.
 
Al wortse begheeut/ zou eist wel weert.
 
Om huer wrancheyt/ en esse niet te claghene.
Wyf
 
My dyncke/ et beghunt te daghene.+
 
Tes noot zoude de sake/ blyuen secreit
305
Dat alle dync jnt scuere/ wierde besteit
 
Eerder hyement of weet/ cnaepe of joncwyf.
 
Ende vp dat verholen blyue/ myn bedryf
 
Tes best dat jct haele/ eer den dach wort claer.
 
Jc hope dat den necker/ nv wort van daer.
310
Maer jc sal my zeynen/ vp aventhuere.
Onbesc.
 
Waer zytge au Stout?/ Twyf comt naer tscuere.
 
Sou eist selue/ die daer de duere ontdede.
Stout
 
Kir wel/ wel/ houdt uwen vrede.
 
Jc ghae huer tjeghen/ jnt ghemoet.
315
Volcht my naer/ metter spoet.
 
Wy sullense tsaemen/ wel morellen.
Beede te saemen
 
Goeden dach vrau bruut.
Wyf
 
Ontbeyt ghesellen.
 
My bruudt te heetene/ dats vreimt bediet.
Stout
 
Wy en wisten/ gherauent/ anders niet
320
Al wilt ghyt loochghenen/ te deser huere.
Onbesc.
 
Wy saghen hu/ met den coster jnt scuere
 
Daer ghylieden eens waert/ van motyfue
 
Om tbeste te doene met den lyfue.
Stout
 
Ende om dat te bet/ ghaen zoude jnt werck
325
So bliesic myn musele/ heuen sterc.
 
Ende myn maet/ vp zyn tamboere slouch.
Wyf
 
Ghy deit my met hu spel/ groot onghevouch+
 
Dies jn myn scuere moeste vruecht ghefaelt zyn.
Onbesc.
 
Wy wilden wel/ van onser moeyte betaelt zyn.
330
Sciet te lappe/ zonder veil quellynghen.
Stout
 
Jae en gheift ons elc een coppel scellynghen.
 
Daer mede sult ghy/ ons vernoughen.
Wyf
 
Jc en hebs gheen meenynghe.
Onbesc.
 
So sullen wy hu wroughen.
 
Dat belouic hu/ byden goeden Veerle.
Stout
335
Den bucht vanden coster/ ryeme ende keerle
 
Die sullen wy houden/ te pande ziet
 
Ende elckerlyc thooghen.
Wyf
 
Ey en doet my die scande niet.
 
Dat biddic hu ghesellen/ vp alle beden.
 
Jc zalhu zo hepelic stellen te vreden.
340
Ghy en sult niet claghen/ van myn betalen.
Onbesc.
 
De woorden zyn goet.
Wyf
 
Jc ghaet seck halen.
 
Houdt tot jc comme/ een lettel stille ziet.
Stout
 
Jc ghelooue ten es hueren wille niet
 
Maer ze doet vut ontsienesse by bedwanghe.+
Onbesc.
345
Al vielse ons ghistereauent zeer stranghe
 
Sen heift ommer nv/ zo niet ghetiert.
Wyf
 
Myn daghen en wassic noynt zo bestiert.
 
Jc mach te rechten wel/ jn spytte wesen.
 
Maer ten baet niet. Willic/ de bouven quytte wesen
350
Jc moetse beede vreden/ met ghelt gheuen.
 
Tscoon spreken es myne/ willic onghequelt leuen.
 
Maer myn zinnen by dien/ ongherust wroeten.
 
Haddic doch mueghen/ mynen lust boeten
 
Ten zoudeme niet/ zo zeere spytten.
Stout
355
Jc zye twyf commen./ Ze salhuer quytten.
 
Wy willen stille zyn/ zonder veil ghecouts.
Wyf
 
Houdt ghesellen/ elc een stic gouds.
 
Daer gheuic hu meer/ dan uwen heesch.
 
Neimpt daer noch ziet/ een vinne vleesch.
360
Jc biddu wilt beede/ hoosch zyn van monden.
Onbesc.
 
Wy dancken hu vrauwe/ als nv ten stonden.
 
Wat by ons es vonden/ blyft secreit beloken.
Stout
 
Heifse niet ghebeden/ ende scoone ghesproken?
 
Wye zout ghelooft hebben/ hy en hadt ghesien?
Onbesc.
365
Ofse alle zo voeren/ die zyn van dien
 
Sen zouden sulc werck niet/ zo lichte ghetemen.
Stout
 
Eerweerdeghe ons ghenouchte/ wilt danckelic nemen.+
 
Want vut jonsten was ons/ de boerde vertelt.
Onbesc.
 
Ende es byden factuer/ nyeuwe ghestelt
370
Huut liefden rethoryckelic/ thuwer eeren.
Stout
 
Wy hebbent ghedaen om vruechs vermeeren
 
Om tgheselscip te verblydene/ te deser feeste.
Onbesc.
 
Wy bidden de gracie vanden Heleghen Gheeste
 
Dat die ons al tsaemen/ wille bewaeren
Stout
375
Mids de Drie Santinnen/ daer wy an paeren
 
Die ons altyts zonder/ vemoeyen vruechdich
 
Als drie blomkins/ jn therte bloeyen jeuchdich.

†A†M†E†N†


Vorige Volgende

Over dit hoofdstuk/artikel

datums