Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.tSpel vande Wellecomme vanden predicaren jnt capyttele provinciael.
Ao. 1523.

Ofjunstich Bemerck, een personage ghecleet als een broodbiddere sober jnt habyt, zynde crepele.
Nydeghe Clappeghe, een persoonage ghecleet als een broodbiddeghe aermelic jn thabyt, wesende manc.
Brugghe, een vrauwelicke personage zeer tryonphant ghecleet als een rudders vrauwe met baghen ende ketenen.
Vreidsaem Regement, een personage ghecleet als een scout ofte baluy van eender stede.
Minsaem Onderhoudt, een personage ghecleet als een eerbaer poortere ofte rentier.
Gheleerde Clerghye, als een prelaet ghecleet als een Predicant metten habytte vander oordene.
Scriftuerlic Bewys, ooc jnschelycx ghecleet als een Predicant als medegheselle.
 
+ Tspel vande wellecomme van den Predicaren
 
ghemaect jnt capittele prouinciael ao. 152[3].

Prologhe.

 
De goddelicke salutacie/ vanden hynghel ghegheuen
 
Der maghet vul gracie/ wiens naeme beseuen
 
Es Maria verheuen/ Gods moeder dyvyne
 
Wilhu jn alder spacie/ binnen sweerels dreuen
5
Van trybulacie/ met besceermen ancleuen
 
Voor ancxst en sneuen/ verdriet en pyne.
 
Eerweerdeghe gheleerde/ die te desen termyne
 
Jn minsaemeghen scyne/ hier zyt versaemt
 
Wy rhethorisienen/ van cleender doctryne
10
Behooren jn hu comste verblyt te zyne+
 
Ten fyne/ dat vrienthoudeghe jonste blyue ongheblaemt.
 
Mids welcken eerweerdeghe/ gheleerde voornaemt
 
Ten besten raemt/ ons simpel meenen
 
Ende wilt den onconsteghe/ ghejonsteghe audiencie verleenen.

Hier naer volghet TSPEL.

Ofjunstich Bemerck een personage ghecleet als een broodbiddere sober jn thabyt zynde crepele.
15
Ey nichte nichte
Nydeghe Clappeghe een persoonage ghecleet als een broodbiddeghe aermelic jnt habyt wesende manc.
 
Ey swagher/ swaghere
Ofjunst.
 
Ons lichaems ghestichte
Nydeghe
 
Wort zo lancx zo traghere.
Ofjunst.
 
Wy slachten de lichte
Nydeghe
 
Al heuen maghere.
Ofjunst.
 
Ey nichte/ nichte
Nydeghe
 
Ey swagher/ swaghere
 
Al slachten wy den claghere ten es gheen wondere.
Ofjunst.
20
Alssic gheestelic/ ende weerlic bysondere+
 
Bemercke rondere/ by sweildens bedryuekin
 
Waerm ghecleedt ende wel jnt lyfuekin
 
Ronder dan een scyueken/ duer sghemacx ghewelt
 
Dan deert my dat ons Pouer/ dus hout ghequelt
25
Die met ons verselt/ als sauwenier.
Nydeghe
 
Sy busen den wyn.
Ofjunst.
 
Qualic ghecryghen wy bier.
 
Ghemeenelic scepscoone es tonsen besten
Nydeghe
 
Hyeuwers vutter gracht
Ofjunst.
 
Jae ofte vut der vesten.
 
Daer mueghen wy houden witte dunderdachs ghenoot
30
Als wy panem hebben.
Nydeghe
 
Daer licht de cloot.
 
Sonder broot/ zouden wy qualic connen leuen.
Ofjunst.
 
Wy en hebben niet anders/ dan men ons wil gheuen
 
Voor elcx duere daer wy omme nyghen.
Nydeghe
 
Qualic wy van acht husen/ vut deen wat cryghen.
35
Men seght Godt helpge/ Maria zytge troosters.
Ofjunst.
 
Maer dese broe[r]kins/ vut dyueersche cloosters
 
Alsse mette besaetse looppen achter straete+
 
Men bryntse tjeghen svolcx caritate
 
Van simple ende mate/ vut dyueerssche husen.
Nydeghe
40
Bedy zo cunnen zy/ lobbekin lusen.
 
Met de vrauwen/ houden zy hem bemint.
Ofjunst.
 
Die zyn karitatyf.
Nydeghe
 
Dats wel versint.
 
Vrauwen herte/ es lyberael.
Ofjunst.
 
Se gheuen bet dan de mans.
Nydeghe
 
Dats tprincepael.
45
Sy ghecryghen bet/ de stuuers dan wy de mytten.
 
Tmach ons wel deerren.
Ofjunst.
 
Tmach ons wel spytten
 
Dat wy blyuen elcx refuus.
Nydeghe
 
Sy deelen ons mede.
Ofjunst.
 
Dat doense tsurpluus
 
Van dat hemlieden ter maeltyt/ ouersciet.
Nydeghe
50
Jnde vier oordenen
Ofjunst.
 
Daer en falen wy niet.
 
Dach by dach/ es dat te doene.+
Nydeghe
 
Alsse gheten hebben/ vander noene
 
Looppense vp huer sellen/ nemen een luumkin.
Ofjunst.
 
Sy hebben tghemack vp huerlieder duumkin.
55
Sy en zoorghen een pluumkin/ nyeuwers vooren.
Nydeghe
 
Lesense of synghense/ naer tbehooren
 
Dats den aerbeyt/ diese doen binder weken.
Ofjunst.
 
Ende alsse yeuwers/ een sermoen ghaen preken
 
Van alderhande ghebreken/ es huerlieder cout.
Nydeghe
60
Sy zyn ontscamele
Ofjunst.
 
Ende daer toe stout.
 
Men machse jnt blanden/ niet verblooden.
Nydeghe
 
Sy bidden ouer leuende ende ouer dooden
 
Alzoo zy segghen/ jn huerlieder sprake.
Ofjunst.
 
Dat blasic.
stekende met de vyngher vp de cricke scynende boorende.
Nydeghe
 
Kir wacht hu kaecke
65
Van duere te boorne/ et zoudge smartten.
Ofjunst.
 
Dus payen zy tvolc.+
Nydeghe
 
Welcke parten.
 
Hoe doense de lieden/ waenen waers.
Ofjunst.
 
Wy bidden ooc.
Nydeghe
 
Dats waer eens jaers
 
Vp den alder sielen dach/ metten ghemeenen ghebede.
Ofjunst.
70
Schelycx doense ooc.
Nydeghe
 
Houdt uwen vrede.
 
Stilt de zede/ van uwer snappage.
 
Ghy zyt Ofjunstich Bemerck.
Ofjunst.
 
Ende ghy Nydeghe Clappage.
 
Hoe zouden wy onder de stage des shemels beweluen zyn
 
Sonder clappen?
Nydeghe
 
Al zout van ons seluen zyn.
75
Want wy en helen/ gheen secreten
 
Dan de ghuene/ die wy niet en weten.
 
Dus hoe hooghe gheseten/ ofte hoe neir ghestaet
 
Die onsen clap minst acht/ doet den besten raet.
Pausa
Brugghe een vrauwelicke personage zeer tryonphant ghecleet als een rudders vrauwe met baghen ende ketenen de welcke bedect sullen zyn mids een huecskin ofte ma[n]telken tot hier naer daer zout of doen zal lamenteirlic sprekende.
 
O weemoedich deerren/ noynt my sul[c] deerren en deerde
80
Duer de diffamacie die my daghelicx ghesciet nv.
 
Want elcx begheerren/ my met begheerren begheerde.
 
Sulc my blydelic volchde die drouuelic vliet nv.
 
Neerrynghe was weildic/ die scamelic ziet nv.
 
Coopmanscepe was grootelic/ met my gheheert.+
85
De waeromme wildic wel hebben bediet nv
 
Hoe my alle dese saken/ dus zyn ontkeert.
 
Jc was verchiert/ met menich gheleert.
 
Clergye tryonpheirde/ die jnt bezwaeren sneift.
 
Dit zye jc daghelicx/ dies mynen druc vermeert.
90
Dus machic wel segghen met herten verseert
 
Die te claghene comt hy qualic gheuaren heift.
Vreidsaem Regement een personage ghecleet als een scout ofte baluy van eender stede.
 
Wat dient sulc vermonden?
Minsaem Onderhoudt een personage ghecleet als een eerbaer poortere ofte rentier.
 
Wat helpt sulc claghen?
Vreids.
 
Ghy zyt noch bevonden
Mins.
 
Net jnt behaghen.
Vreids.
 
Sulcke woorden onghebonden
Mins.
 
Wilt hu onderdraghen.
Vreids.
95
Wat dient sulc vermonden+
Mins.
 
Wat helpt sulc claghen?
 
Vreest Gods plaghen/ der ondancbaerichede.
Vreids.
 
Ghy en hebt gheen cause/ noch van swaerichede.
 
Stelt tot danckbaerichede/ al hu zinnen.+
Brugghe
 
O Gheleerde Clergye/ hu moetic beminnen
100
Duer de excellencie/ van uwer weerden groot.
 
Want die dyns ghebruuck niet en ghewinnen
 
Syn als een scaduwe bouen der eerden doot.
 
Dyn wysheyt es elcken/ om anveerden noot
 
Want zonder dy/ zoude tvolc als beesten leuen.
105
Als myn gheleerde met hu/ hem gheneerden bloot
 
Doen was my/ lof ende prys ghegheuen.
 
O Gheleerde Clergye/ by hu wassic verheuen.
 
Sulc weet de waerheyt/ die hout van jaeren leift.
 
Maer nv hebben hu/ donwetende bekeuen verdreuen.
110
Dus machic wel segghen/ et woort voorscreuen
 
Die te claghene comt/ hy qualic gheuaeren heift.
Vreids.
 
Weist bekent.
Mins.
 
Scuut sulcken cout.
Vreids.
 
Clergye excellent
Mins.
 
Es by hu menichfout.
Vreids.
 
Syt diligent
Mins.
 
Dat ghy hem onderhout.
Vreids.
115
Weist bekent.
Mins.
 
Scuut sulcken cout.+
 
Voorwaer ghy zout/ hu by dien verneren.
Vreids.
 
Ghy en hebt gheen cause/ om murmereren.
 
Scuut sulc fantezeren/ zonder resspyt.
Brugghe
 
O Gheleerde Clergye/ myn sins jolyt
120
Die my zo wysselic/ deit onderstant
 
Dies myn naeme spreedde/ de weerelt wyt
 
Onder dyueerssche nacien/ jn menich lant.
 
Nu staetse te faelgieren/ by redene want
 
Dyn wyselic onderstant/ van my ontvreimt
125
Mids dat de gheleerde/ an elcken cant
 
Dyn zoete savuer/ so cleen gade neimt.
 
Roome ende Athenen/ hebben ghebreimt
 
By dy Clergye/ wiens wysheyt/ elc verclaeren gheift.
 
Dies my den zin te segghene gheteimt
130
Als een die met drucke sitte bedeimt
 
Die te claghene comt hy qualic gheuaeren heift.
Vreids.
 
Stelt hu te vreden.
Mins.
 
Weist onvervaert.
Vreids.
 
Huwe edele zeden
Mins.
 
Van reynder aert
Vreids.
 
Als andre steden+
Mins.
 
Syn noch vermaert.
Vreids.
135
Stelt hu te vreden.
Mins.
 
Weist onvervaert.
 
Blyft onbezwaert/ reyn vrauwelic adere.
Vreids.
 
Wy sullen hu by blyuen alst kyndt den vadere
 
Een beradere es/ met ryppen bevroede.
Brugghe
 
Keysers conynghen/ princhen hooch van moede
140
Myn byzyns was/ hem lieden bequaeme.
 
Busscoppen prelaten/ gheleerde en vroede
 
Verblyden hem jnt hooren van mynen naeme.
 
O edel Clergye/ reyn zonder blaeme
 
Die my sulcke ghejunsticheyt/ hebt ghethoocht
145
Dat al de weerelt duere/ strecte myn faeme
 
Waer by jc grootelic was verhoocht
 
De sulcke achter hu/ te segghene poocht
 
Blaemte/ nochtans an dy/ zyn weluaeren cleift.
 
Of dit tjeghens mynen danck/ moet zyn ghedoocht
150
So segghic als een die zyn juecht verdroocht
 
Die te claghene comt/ hy qualic gheuaeren heift.
Vreids.
 
Hebt goet verdrach.
Mins.
 
Maect cloucken moet.
Vreids.
 
Al en es hu bejach+
Mins.
 
Niet juuste zo goet
Vreids.
 
Alst te zyne plach
Mins.
 
Tes al hebbe ende vloet.
Vreids.
155
Hebt goet verdrach.
Mins.
 
Maect cloucken moet.
 
Peynst Fortune doet/ alle dynck verkeeren.
Brugghe
 
O edele Clergye/ vul alder eeren
 
Huut den Griecken ghesproten/ ende voort ghecommen
 
Alle die hu bemindt hebben/ zyn gheclommen
160
Jn eeren jn famen/ tot jnden hoochsten graet.
 
Maer wanneerse/ huus byzyns hebben versmaet
 
Sy zyn ghedaelt/ by onwetender blentheyt.
 
Dus daermen niet en acht/ uwe excellentheyt
 
Ten es gheen wonder/ dat ghy verscuut.
Vreids.
165
Seneca seght/ reyn edele bruut
 
Jn Pollicrato/ datter waeren drie saken
 
Twelc de Roomeynen dede maken
 
Hooft te wesene van alder weerelt
 
Daer de clerckelicke wysheyt net ghepeerelt
170
Deene of was/ by wiens bestieren
 
Sy de gheheele weerelt/ consten regieren+
 
Dies zy jn weilden saten/ ter causen van dien.
Mins.
 
Jn Roome waren wyse/ mannen ghesien
 
Als Pauetus/ philosophe/ van wyser aert
175
Possidonius stoycus/ gheleert vermaert
 
Scipio wys ende/ clouc van moede
 
Catho deerste philosophe/ als de vroede
 
Tytus Lyuius/ van wyser nathueren
 
Ende Tullius/ Cicero prinche der orathueren
180
By wiens labueren/ wiert bestiert
 
De Roomsche stede.
Vreids.
 
Als Griecken gheregiert
 
Was van Thales/ Milesius/ van wyser daet
 
Solon [van] Athene/ een gheleert mannelic zaet
 
Chilon Lacedemonius / met wyse zede
185
Pitacus Miteleneus/ jnschelycx mede
 
Byas Prhieneus/ van vroeden raede
 
Cleobolus Lindus/ van wysen dade
 
Periander Corinthus/ vroet ende wys
 
Doen creech Griecken/ lof ende prys
190
By desen mannen/ weerdich gheheert.
Mins.
 
Jn Athenen waren ooc mannen gheleert
 
Dies zy bekent wiert/ met elcker prouinche.
Vreids.
 
Aristotiles/ der philosophen prinche
 
Reyngneirde binnen/ Athenen meneghen dach.+
Mins.
195
Plato ende Socrates/ daer wysheyt an lach
 
Demostenes ende Eschines/ van zinnen rycke
 
Waeren jn Athenen.
Brugghe
 
Och jnder ghelycke
 
Hebben ghereyngneirt jn dit ghestichte
 
Mannen verchiert/ met goddelicken lichte
200
Wiens naemen jn myn ghedyncken blyuen ghescreuen.
Vreids.
 
Meester Eeustaes Leeuwercke/ een doctuer verheuen
 
Jnde goddelicke theologye/ als een verclouckere
 
Vanden ghelooue/ een ondersouckere
 
Jn zynen tyt Predicant/ van zoeter eloquencie.
Mins.
205
Meester Nycolaus Venne/ vulder excellencie
 
Der goddelicke theologye/ als eerweerdich doctuer+
 
Dede met predicacien/ sulc labuer
 
Dat hy van erruer besceermde de volcke
Brugghe
 
Wiens leuen was zuuer/ onder shemels wolke.
210
Te rechte datmen zyns ghewaecht.
 
Want hy ghestoruen es/ een zuuer maecht
 
So jn zyn begrauynghe/ elc mochte scauwen.
Vreids.
 
Ondersoucker vanden ghelooue
Mins.
 
Dat washy en trauwen
 
Jn zynen tyt pastuer ende regent+
215
Van desen convente.
Brugghe
 
Tes waer jc kent.
 
Crepele ende blent/ zyn doctryne presen.
Vreids.
 
Meester Adriaen de Mil/ bin zynen termyne desen
 
Christus graf ten heleghen lande besochte+
 
Die met hem tot scloosters/ onderstande brochte
220
De melc van Maria/ ghebenendyt
 
Doctuer ende ondersoucker/ jn zynen tyt
 
Doende den volcke/ menich scoon sermoen.
Mins.
 
Meester Anthuenis de Floriano/ een edel opynioen
 
Wuenende hier binnen/ scloosters bevanc.
Brugghe
225
Meester Pieter Haudtvelt/ meester Maertin Franc
 
Ende salegher memorie/ meester Jacop de Clerc
 
Dit waeren al doctueren/ jnt goddelic werc
 
Pylaren sterc/ grootelic ten verstyue
 
Vanden ghelooue
Vreids.
 
Jn leuende lyfue
230
Tsaemen hier wuenende/ ten clooster binnen
 
Sonder noch al dandre edele zinnen
 
Die voor gheen doctueren/ en zyn befaemt
Mins.
 
Maer Predicanten weerdich te zyne ghenaemt
 
Twelcke wy laeten/ om de cortheyt passeren.
Brugghe
235
Daer waeren doctueren ten Carmers ten Freren+
 
Ende ten Augustynen/ een groot ghedeel
 
Ende weerlicke doctueren/ wiens weerde gheheel
 
Te vullen nummermeer/ mach worden vu[l]seyt.
Vreids.
 
Et scheen te wesene/ een vniueersitheyt
240
Jn een vergaderynghe van processye generale
 
Ofte jn een desputacie vniueerssale
 
Ghelyc als te Lueuene/ ofte Parys.
Mins.
 
Doen hadt ghy lof.
Vreids.
 
Doen hadt ghy prys
 
De weerelt duere/ noordt/ west/ oost/ zuudt.
Brugghe
245
Twas puer een glorie.
Pausa cleene.
Ofjunst.
 
Jnt zien een juudt
 
Voor slicht en ruudt/ niet om vernetten.
 
Doen kende men doctuers.
Nydeghe
 
Jae ande peerssche bonetten
 
Ofte ande capproenen/ diese droughen vpt scoere.
 
Kent nv eenen prelaet
Ofjunst.
 
By een simpplen broere.
250
Tes jnt zien alleens/ zo zy gheslooft ghaen.
Nydeghe
 
De capproenen moeten/ nv al vp thooft staen
 
Twelc clergye rooft waen/ te zyne gheheert.+
Ofjunst.
 
Dus eist verandert.
Nydeghe
 
Dus eist verkeert.
 
By de reformacie scuwense sweerels lof.
255
Se zyn puer helich.
Ofjunst.
 
Kir doet dat of.
 
De helicheyt en salse/ niet verweghen.
Nydeghe
 
Sen zyn niet ghierich.
Ofjunst.
 
Alzo ze pleghen
 
Van dien en willense/ gheen ghescal hebben.
 
Sen begheerrent niet zom.
Nydeghe
 
Maer se wildent wel al hebben.
260
Ten es gheen noot dat ment bewimple.
Ofjunst.
 
Se ghaen zo sebaer.
Nydeghe
 
Met allen simple
 
Siense ouer houck ofse niet en wisten.
Ofjunst.
 
Sen begheerren gheen rycdom.
Nydeghe
 
Maer met allen listen
 
Sy daer toe verquisten/ verstant ende zinnen
265
Om scat te vercryghene.
Ofjunst.
 
Wye sietmer an winnen+
 
Ghelyc alst hier voortyts te doene plochte?
 
Sulc werckman/ als de coene wrochte
 
Die jaerlicx versekert was van gage ende saut.
Nydeghe
 
Sy doent nv al selue.
Ofjunst.
 
Watge braut.
270
Sy wetent te doene alst naut/ bet dan weecke boers.
Nydeghe
 
Hoe zoo?
Ofjunst.
 
Sy maken nv leecke broers
 
Van dyueersche ambochten/ als scoemakers sceppers.
 
Weir datse zyn traghe ofte lichte steppers
 
Sy gheuen elc werck naer zyn gheneichede.
275
Deene wordet vut deuocien
Nydeghe
 
Ende dander vut leichede.
 
Al steicxse de steichede/ ze cunnense regieren.
 
Se moeten twerck doen.
Ofjunst.
 
Dat zyn de mannieren.
 
By sulc bestieren blyuet/ jn huerlieder behout.
Nydeghe
 
Tes al hebben huerlieder cout.
280
Maer zeer lettele van hemlieden druupt.
Ofjunst.
 
Deene flets[t] ende fleeut.+
Nydeghe
 
Dander nycht en stuupt.
 
De proye die sluupt/ met hemlieden jnt codt.
Ofjunst.
 
Tes al ghemeene.
Nydeghe
 
Een pot een Godt
 
Daer wys en bodt/ by moeten leuen.
Ofjunst.
285
Sy cunnen de lieden den gheeu wel gheuen.
 
Tvolc met woorden zy dus verdoouen.
Nydeghe
 
Wy segghent ooc wel.
Ofjunst.
 
Men wil ons niet gheloouen
 
Twelc my doet roouen/ de zinnen cranc.
 
Sy nutten den besten
Nydeghe
 
Ende wy den dinnen dranc.
290
Al zyn ons vinnen manc/ men heues gheen deerren.
Ofjunst.
 
Die met Jan Blandeyn hem can gheneerren+
 
Ende meest thuus brynct/ es liefst jnt hende.+
Nydeghe
 
Wye gheift men varyncx/ anders prebende
 
Dan die met fletserien cunnen ommeghaen?
295
Datter een gheleert clerc/ comme waen
 
Niet lichte en salmen/ zyns ghedyncken.
Ofjunst.
 
Eist gheen looftuter+
Nydeghe
 
Of can hy niet dryncken
 
Sy[n] leerynghe en salhem niet zeere bescieten.
Ofjunst.
 
Hola tmochte de sommeghe verdrieten.
300
Ons woorden vlieten/ te zeere vp stuere.
Nydeghe
 
Wy moeten clappen.
Ofjunst.
 
Tes ons nathuere
 
Met nydeghen labuere/ by ofjunstich verweck.
 
Wy zien elcx messit.
Nydeghe
 
Maer niet ons ghebreck.
 
Tes den treck/ van mancke ende crepele.
305
Wy gheuen elcken tsyne.
Ofjunst.
 
Daer en gaet nyement wepele
 
So ons nydeghe ofjunsticheyt/ wel bethooghen can.
Nydeghe
 
Alle dync zien wy met quaden ooghen an.
 
Eist wonder dat wy pooghen dan/ tvolc te bewreuwene?
Ofjunst.
 
Wy en zyn jnt clappen/ niet te verscreeuwene
310
Wient tjeghen of mede/ghaet jn scaden of baten.
 
Want houde costumen zyn quaet om laten.
Pausa.
Brugghe
 
O Gheleerde Clergye reyn ghemanniert
 
By wien jc hier voortyts/ was gheregiert+
 
Dies myn naeme wiert/ jn eeren beseuen
315
Wel voeric/ doen jc was bestiert
 
By uwer wysheyt goddelic duerviert.
 
Maer de doot heift ghescoffiert/ sulcke mannen tleuen.
 
Jc mach beuen/ voor ancxst en sneuen.
 
Want die my/ gheseten zyn beneuen
320
Tarden buter screuen/ vanden ghelooue verheuen.
 
O Clergye/ dat ghy my nv hebt begheuen.
 
Hoe wort verdreuen/ de dolacie quaet
 
Die nv vp staet?
Vreids.
 
Reyn vrauwelic zaet
 
Hu dies verlaet./ Der Clergyen raet
325
Sal hu hopic dies bewachten.
Mins.
 
By hu zyn noch/ gheleerde mannen jaet
 
Die met wysser daet/ voor sulc bescaet
 
Hu sullen bescermen/ met alder crachten.
Vreids.
 
Al hoort ghy clachten/ der kettereghe drachten
330
By daghen en nachten/ en wiltse niet achten.
 
Ghelaet hu als de dooue.
Mins.
 
Maer hu ghedachten
 
Met al hu machten/ eenpaer wilt scachten
 
Jn een vast ghelooue.
Brugghe
 
Och als jct al verghaere teenen scooue
335
Ouerdynckende/ hoe jn voorleden tyden
 
Clergye tryonpheirde/ met een verblyden
 
By my jnt zien/ ghelyc abten prelaten
 
Gheabylgiert/ als mannen van staten
 
Doen en constic bevaten/ gheen vreese van erruer.+
340
Maer nu staet my te nakene ghetruer
 
Want Clergye puer/ van my vervreimt.
Vreids.
 
Al eist dat de Clergye/ nv niet en breimt
 
Ghelyc als hier voortijts/ pompues vutwendich
 
Ghy hebt noch wyse mannen/ behendich
345
Jn dit bevanc ende eldere/ hu altyts ontrent.
Mins.
 
Ten waere duer Clergye/ Vreidsaem Regement
 
Ende jc Minsaem Onderhout waeren hu ontdoken.
Brugghe
 
Hoe comt dat de sommeghe/ huer tanden stoken
 
Segghende/ dat men niet en kent/ zo men plochte
 
De gheleerde voor de simple?
Vreids.
350
Een quaet ghedochte
 
Twelc ofjunstich es/ jn zyn besluten
 
Sal altyts zyn quaetheyt huten
 
Met nydegher clappynghe/ zonder cesseren.
Mins.
 
Deene lachteren
Vreids.
 
Dander blameren
355
Altyts murmereren/ als quaede vpsetters.
Mins.
 
Sondeghe stokers
Vreids.
 
Sduechs beletters
 
Als valsche ketters/ zy tvolc beroeren.+
Mins.
 
De tonghe/ der vyandelicke tamboeren
 
Met loose thoeren/ zyn zy een slaghere.
 
Watse zien
Vreids.
360
Te vet te maghere
 
Altyts ghewaghere/ der lieden blaemte
 
Sonder vreese
Mins.
 
Sonder scaemte
 
Achter den rugghe/ zy tvolc belieghen.
Brugghe
 
Huer ofjunstich fenyn doense vlieghen
365
Met nydeghen clap/ achter gheestelic ende weerlic.
Vreids.
 
Een sanders weluaeren/ es hemlieden deerlic
 
Twelc zy vut nyde begheerlic/ dat verjunnen.
 
Se willent al bestieren.
Mins.
 
Maer zy en cunnen
 
Hem niet regieren/ vut Pouers bedwanc.
Vreids.
370
Tes de condicie van crepele ende manck.
 
Huut nyde wranc/ blamerense de wyse.
Brugghe
 
O Gheleerde Clergye te rechten jc hu pryse.
 
Want van houden tyden hebbic hu bemindt.
 
Tes redene dat men dy/ eere bewyse
375
Want alle eere/ men by hu ghewindt.
 
Maer lachen dat tmywaerts/ hu jonste dint
 
Dat doet my lyden/ pyne ende verdriet.+
Mins.
 
Dint thuwaerts zyn jonste?
Brugghe
 
En doetse niet?
 
My dyncke jaes/ zo jc can beseffen.
Vreids.
380
Noynt en conste/ de jonste/ zo verheffen
 
Van Gheleerde Clergye/ varre ofte by
 
Vp eeneghe steden/ zou en heift vry
 
Gheweist vp dy/ my wel versint.
Mins.
 
Et blyct wel dat ghy zyt bemint
385
Met Gheleerde Clergye/ vut dyveerssche houcken.
 
Want vut jonsten minsaemich/ comt hy hu besoucken
 
Om capyttel provinciael/ bin deser bevrydynghe
 
Met hu te houdene.
Brugghe
 
Danck hebt der tydynghe.
 
Een verblydynghe/ ghecryghicx/ jn mynen gront.
390
Dies willic my ghaen/ bereeden ter stont
 
Om hem tonfanghene/ met wysen beleede.
 
Dus biddic hu om bystant/ alle beede
 
Minsaem Onderhout/ ende Vreidsaem Regement
 
Dat ghy my tsaemen/ wilt wesen ontrent.
395
Want hoe ment keert of went/ by lachteren of prysen
 
Een vrient bemindt/ salmen eere bewysen.
Pausa.
Nydeghe
 
Wat helpe/ helpe jc blyuer ondere.
Ofjunst.
 
Hoe sult ghy thieren.+
Nydeghe
 
Dyncket hu wondere?
 
Jc bem verladen/ plats metten packe.
Ofjunst.
400
Wel wat brynge nv hier binden sacke?
 
Wilt my daer of doen een ontdec.
Nydeghe
 
Wat jcker jn brynghe?
Ofjunst.
 
Jae.
Nydeghe
 
Elcx ghebrec
 
Van alle persoonen/ mannen ende vrauwen.
Ofjunst.
 
Elcx ghebrec?
Nydeghe
 
Soudic niet trauwen?
405
Hoe zoudic my anders/ te clappene bewynden
 
Jc en moeste tsacx crop ontbynden
 
Van elcx ghebrec/ twelc ons meslimpt?
Ofjunst.
 
Tmoet al wesen van ons bescimpt
 
Gheestelic weerlic/ zonder spaeren.
410
Maer hoort nichte/ laet dat vaeren.
 
Van andre maeren/ sallic hu doen ghewach.
Nydeghe
 
Esser wat nyeus?
Ofjunst.
 
Dat men niet en sach+
 
Jn hondert jaeren/ zo helpe my alle santen.
Nydeghe
 
Seghtme daer of besceet.
Ofjunst.
 
Ten Predicanten
415
Sal cortelynghe worden/ om cort verhael
 
Capyttele vander oordene provinciael
 
Daer de gheleerde princepael/ van huerlieder nacien
 
Een deel commen sullen.
Nydeghe
 
Tworter vul gaudacien.
 
Dat hooric wel an hu ghewaghen.
Ofjunst.
420
Wat trauwen Brugghe/ en darf nv niet claghen
 
Dat Gheleerde Clergye huer vergheit.
Nydeghe
 
Jc peynse datse zal worden ghevreit.
 
Huer blyscepe wort rumer dan een hallekin.
Ofjunst.
 
Et worter al gaudiamus kallekin
425
Alzo wel jnde kercke als jnde kueckene.
Nydeghe
 
Myn tanden beghunnen alreede te jueckene
 
Naer touerblyf vande lecker morseelen.
 
Nu salmer gheuen.
Ofjunst.
 
Nu salmer deelen.
 
Broeder Jan moeten wy reuerencie bieden.+
 
Hoe salmer nv vaghen.
Nydeghe
430
Ende de straete wieden
 
Alzo wel achter/ als ter voorster poorte.
Ofjunst.
 
Wy moeten hem verghen naerde behoorte
 
Bystant te doene/ een lettel gheveynst.
 
Hy salt wel nemen.
Nydeghe
 
Dats wel ghepeynst.
435
Hy zal ons te bet doen/ zyn caritate.
 
Want zo wye daghelicx/ wil hebben bate
 
Sy moeten de huecke/ naer den wynde hanghen.
Ofjunst.
 
Wy zyn argher dan/ fenynde slanghen
 
Tygren/ serpenten/ ofte sulcke quicken.
Nydeghe
440
Met ofjunsteghen nyde/ wy alle dync bescicken
 
So men wel hooren mach/ an onse clopherynghe.
Ofjunst.
 
Hy es wys die scuwen can onse comerynghe.
 
Want ons en rouct/ wien wy bescaet doen.
 
Al ghaeuen zy ons hedent/ moorghen zouden wyse quaet doen.
Pausa.
Vreids.
445
Comt voort scoon blomme net ghecoluert.
 
Syt nv verblyt/ niet meer en truert
 
Bekuert hu tsmaeckene/ der blyscepen keest.+
Mins.
 
Den douck/ der merancolyen scuert.
 
Al heift hu haken/ wat gheduert
450
Ghebuert es/ hu begheerren onbevreest.
 
Siet hier uwen beminden.
Brugghe vut commende zeer tryonphant of ghedaen hebbende tclocxskin daer mede dat huer baghen ende juweelen bedect waeren hebbende voor huer boeseme de wapene van Brugghe ghemaect aerdich van scilderye.
 
Wellecomme licht vanden Heleghen Gheest.
 
Goddelicke spaercke/ vierich laysele
 
Ouervloedich scynsels/ blynckende raysele
 
Wiens claerheyt den deimstereghen brynct ten lichte+
455
Hu hetic wellecomme jn dit ghestichte
 
Als myn pastuer/ regent ende prelaet
 
Onder wien dat myn/ obediencie staet
 
Dien jc alle reuerencie/ bem te doene sculdich.
Vreids.
 
Wellecomme Scriftuerlic/ Bewys ghehuldich
460
Slichaems troostere/ der sielen spyse
 
Sluter der hellen/ poortier vanden paradyse
 
Die met uwen bewyse/ voor dhelsche tribulacien
 
Gheerne elcken zout besceermen.
Brugghe
 
Wellecomme der Vlaemscher nacien
 
Gheleerde Clergye/ nv hier present
465
Sonderlynghe/ ghy eerweerdeghe van Ghent
 
Met Scriftuerlic Bewys de sonden begryppere.
Mins.
 
Wellecomme ghy/ minsaemeghe van Yppre
 
Bereedt tot Gods dienste licht/ ende fray.
Vreids.
 
Wellecomme Ryssele.+
Brugghe
 
Wellecomme Douway
470
Gheleerde Clergye/ die de sonden bevecht
 
Met Scriftuerlic Bewysen.
Mins.
 
Wellecomme Valenchyne.
Brugghe
 
Wellecomme Atrecht
 
Gheleerde Clergye/ bescut van erghe
 
Met Bewys Scriftuerlic.
Vreids.
 
Wellecomme Sint Omaers.
Mins.
 
Wellecomme Berghe
 
Gheleerde Clergye/ jent ende mynjoot
475
Der Vlaemscher nacien/ cleen ende groot.
 
Huus byzyns jnwendich/ my de siele verhuecht.
 
Ghy zyt my zo wellecomme.
Gheleerde Clerghye als een prelaet ghecleet als een Predicant metten habytte vander oordene.
 
Danck hebt der duecht
 
Reyn edel juecht/ vul eeren vermaert.
Brugghe
 
Scriftuerlic Bewys/ van duechdelicker aert
480
Met Clergye ghepaert/ binnen tVlaemsche bevryden
 
Syt minlic wellecomme.
Scriftuerlic Bewys ooc jnschelycx ghecleet als een Predicant als medegheselle.
 
Sonder vermyden
 
Danc jcx hu vrauwe/ tmywaerts vul trauwen.
Brugghe
 
Wellecomme der/ Brabanscher landauwen+
 
Gheleerde Clergye/ net ende exspeert
485
Van Lueuen der stede/ alder eeren weert
 
Jn wien de wortel der Clergyen/ neimpt huer virtuut
Vreids.
 
Daer zo meneghe weerde/ blomme vut spruut
 
Van mannen gheleert/ de weerelt duere
Mins.
 
Wiens edel roke/ van soeter ghuere
490
By Scriftuerlic Bewysen/ wort bekent.
Brugghe
 
Wellecomme Bruessele/ daer dedelheyt jent
 
Ghemeenlic/ neimpt huer residencie
 
Clergye die met scriftuerlicke/ eloquencie
 
Syt leerende de claer ziende/ scheluwe en lossche.
Vreids.
 
Wellecomme Andtworppen.
Mins.
495
Wellecomme vanden Bossche
 
Wiens leerrynghe den meinsche/ Gods weghe naest lecht
 
Met Bewys Scriftuerlic.
Brugghe
 
Wellecomme Maestrecht
 
Met al de Brabanscher nacien net ende appeert.+
Vreids.
 
En vreest niet al zyt ghy wat ghedeert
500
Der kettereghe quellynghe/ weist onbedrouft.
Mins.
 
Men kent nyements cloucheyt hy en zy gheprouft.
 
Sulc es wel sterck die somtyts scynt cranc.+
Brugghe
 
Den standaert der godelicke leerynghe ontbynt lanc.
 
Mynen bystant en wort hu niet faelgierich
 
Tghelooue te bescuddene.
Gheleerde
505
Reyn ghemannierich
 
Juecht roosierich/ hebt minnelicken danc.
Brugghe
 
Wellecomme nacie/ huut den Hollandsche bevanc
 
Gheleerde Clergye/ ghestileirt ornaet
 
Ende hu Scriftuerlic Bewys/ die de sonden quaet
510
Met wyser daet/ lachtert/ by nachte by daghe.
Vreids.
 
Wellecomme Haerlem.
Mins.
 
Wellecomme vander Haghe
 
Ende van Rotterdamme/ gheleerde vroet
 
Die de sielen met Scriftuerlic Bewys behoet
 
Dies men dy prys/ oost ende zuut secht.
Vreids.
 
Wellecomme Zyerichzee.
Brugghe
515
Wellecomme Vutrecht
 
Gheleerde Clergye/ wetende prudent
 
Scriftuerlic Bewys/ pastuer bekent
 
Van vier nacien/ hooft ende prelaet
 
Wellecomme zyt/ met uwen staet
520
Ende al dHollandsche nacie ghemeene.
Gheleerde
 
Hu segghicx danc weerde reene+
 
Minsaemeghe vrauwe/ elcken vrienthoudich
Scrift.
 
Wiens jonste tonswaert/ es menichfoudich
 
Heere bewysende/ hier ende heldere.
Brugghe
 
Wellecomme vut/ der nacie van Gheldere
 
Gheleerde Clergye/ edel ghemanniert
 
Met Scriftuerlic Bewysen/ jent verchiert.
 
Tes redene jc moet/ hu vrienscip pleghen.
Vreids.
 
Wellecomme gheleerde/ van Nimweghen
530
Clergye met Scriftuerlic/ Bewys gheacht.
Mins.
 
Wellecomme/ Zutphen/ die wysselic bedacht+
 
Clergye zyt houdende/ thuwer verdoenynghe.
Vreids.
 
Wellecomme Kalkere.
Brugghe
 
Wellecomme Groenynghe
 
Swollen Wyntsen/ ende Leeuwaerde
535
Gheleerde Clergye/ duechdelic van aerde
 
Die met Scriftuerlic/ Bewys gheheert
 
Den volcke den wech/ der salicheyt leert
 
Dies Gods dienst vermeert/ jnt eerdsche dal.
Mins.
 
Wellecomme generalicken al
540
Eerweerdeghe jnde goddelicke theologye
 
Ghedoctoriseirde/ Gheleerde Clergye+
 
Van alle nacien jnt gheheele.
Vreids.
 
Wellecomme binden Brugschen pryeele
 
Scriftuerlic Bewysen Predicanten eersaeme
545
Die den volcke/ eloquentelic Gods leeringhe bequaeme
 
Ter sielen vraeme/ cunt openbaeren.
Brugghe
 
Wellecomme vaders jn wiens bewaeren
 
Den religieuslicken/ staet es ghegheuen
 
Van de vrauwelicke oordenen hier jnt leuen
550
Van dyueersche nacien/ vut allen houcken
 
Die my zo minnelic comt besoucken
 
Hu heetic wellecomme/ van waer dat ghy zyt.
Gheleerde
 
Hu danckicx vrauwe/ zonder resspyt
 
Te deser tyt/ die jn dit bevryt
555
Hu seluen tmywaerts/ zo wetende quyt
 
Met jonsteghen bethooghe.
Scrift.
 
Den gheest jnwendich/ jn my verblyt.
 
Vruecht my duersnyt/ jc kent jc lyt.
 
Want tonswaert draecht ghy varre ende wyt
 
Hu eerbaerheyt hooghe.
Brugghe
560
By ghedooghe
 
Al seght ghy hu duecht/ jc en trecx an my niet.
Gheleerde
 
Waer dat jc reyse varre ofte by ziet
 
Myn ghehuldicheyt/ wordt hu altyts bereet
 
Vp dattet my kennelic zy ende weet+
565
By persoonelicke tydynghe/ wete of ghescrifte.
Brugghe Hier moet Brugghe hebben jn dhandt een groen tacxsken ghelyc een olyuetacxsken.
 
Thuwer wellecomme/ dat jc hu beghifte
 
Met desen olyuetack/ teeken van payse
 
De welcke jc hu offre/ binnen desen palayse
 
Met Minsaem Onderhout/ ende Vreidsaem Regemente.
Vreidsaem Dese personage moet jnschelycx jn dhandt hebben eenen tack van genyueren.
570
Ende jc presentere hu vutter naeme/ van den conuente
 
Thuwer wellecomme/ zo dies wel behoort
 
Als Vreidsaem Regement/ eendrachtich accoort
 
Met Minsaem Onderhout/ als donghegriefde.
Minsaem De[se] moet jnschelycx jn dhandt hebben eene roode ofte witte roose an eenen tack.
 
Met den teeken van payse/ gheif jc hu liefde
575
So ghy dies ondersoucken muecht/ de waerachticheyt.
Brugghe
 
Pays
Mins.
 
Liefde
Vreids.
 
Ende eendrachticheyt
 
Thuwer wellecomme/ scyncken wy hu desen.
Brugghe
 
Deen en mach zonder dander niet wesen
 
Daer vrede ende minsaemheyt sullen logieren.
Vreids.
580
Gheen landt noch stede/ en zal multiplieren
 
Van duecht/ van goede/ weirt west of noort es
 
Daer aet of nyt/ twist ofte disscoort es+
 
So selue Christus heift ghesproken.+
Mins.
 
Alle rycken jn wien dat wort beloken
585
Devysie ghescil/ haet ofte ranckuer
 
En sullen hebben/ gheen gheduer
 
Maer sullen gheheel ghaen/ te ruwyne.
Brugghe
 
Tzyn Christus woorden.+
Vreids.
 
Tes Gods doctryne
 
So jc byder ewangelisten wel versindt hebbe.
590
Bemindt elc andren
Mins.
 
So jc hu bemindt hebbe
 
Sprac Christus tot zyn descipelen/ tonser leerynghe.+
Brugghe
 
Gheen weerdegher ghifte/ thuwer heerynghe
 
En wisten wy te vyndene/ jn onse voordachticheyt
 
Dan pays
Mins.
 
Liefde
Vreids.
 
Ende eendrachticheyt
595
Twelc wy hu presenteren/ met odmoedeghen engiene.
Brugghe
 
Tes een vader zo lief om ziene
 
Syn kynders minsaem eendrachtich/ ende paysich te leuene
 
Dus [wisten] wy hu hyet/ excellenters te gheuene+
 
Thuwer weerden dienende/ wy zoudent hu junnen.
Mins.
600
Maer tliefste dat wy hu presenteren cunnen
 
Es den dienst van/ onser elc lichaemelic.
Vreids.
 
Wy bidden hu/ dat hu zy bequaemelic
 
De simpel jonste/ nv hier ghethoocht.
Brugghe
 
Tes ghedaen thuwer wellecomme eersaemelic.
Mins.
605
Wy bidden hu/ dat hu zy/ bequaemelic.
Vreids.
 
Al en zyn wy jn consten niet vernaemelic
 
Eerweerdeghe gheleerde/ ons slichticheyt ghedoocht.
Brugghe
 
Wy bidden hu/ dat hu zy/ bequaemelic.
 
De simpel jonste/ nv hier ghethoocht
610
Duer sHelichs Gheest gracie/ jn wiens liefde ghehoocht
 
Tryonpheren/ als barnende cheraphinnen
 
De weerde heleghe/ Drie Santinnen.

†A†M†E†N†


Vorige Volgende

Over dit hoofdstuk/artikel

datums