Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.Esbatement van den coopman die vyf pondt grooten vercuste.
Ao. 1513.

Den Coopman.
De Weert.
De Weerdinne.
Den Burchmeester.
Den Greffier.
+ Den Coopman.
 
Een smans zin es altyts vul soorghen
 
Die sculden moet jnnen hier ofte daer.
 
Ghelooft hyt heden/ men ontdraecht hem moorghen.
 
Een smans zin es altyts vul soorghen.
5
Nochtan zo moet men de lieden boorghen
 
Jae die proffyt doen zal varre ofte naer.
 
Een smans zin es altyts vul soorghen
 
Die sculden te jnnen heift hier ofte daer.
 
Men es my sculdich gheseyt voorwaer
10
Jn dyueersche passagen/ binnen slands berynghen
 
Hier vier pondt/ daer vyf pondt ghunde zes pondt maer
 
Al es den [dach] verscenen/ nyement en haest hem om brynghen.
 
Jc weddicse selue zal ghaen besprynghen
 
Eerse byde vorst ghecryghen de pouere.
15
Jc hebber my toe ghestelt/ ende men mach wel ouere
 
Allomme den rechten wech/ zonder vereenen.
 
Noch tauent tot Rousselare/ ende moorghen tot Meenen.
 
So stryck jc duere als de frayste ghequeecxste.
 
Jc weddicse betrapen zal/ vp huerlieder weecxste.
20
Dus neimp [jc] lancx den hyse/ den wech ten naesten
 
Om by daghe ter herberghe tzyne zallic my haesten.
De Weert.
 
Wyf draecht zoorghe jnt bereeden der spyse
 
Dat wy gheen scande behalen cleen noch groot.
De Weerdinne.
 
Bestiert ghy den wyn/ goet van pryse.
Weert
25
Wyf draecht zoorghe/ jnt bereeden de[r] spyse.
Weerd.
 
Jc salt wel coken naer mynder ghyse.
 
Dat ghy beroert zyt/ ten es gheen noot.+
Weert
 
Wyf draecht zoorghe/ jnt bereeden der spyse
 
Dat wy gheen scande/ behalen cleen noch groot.
Weerd.
30
Laet my coken/ by Ghans doot.
 
Jc salder my toe voughen/ met al de leden.
Weert
 
Dat de tafel ghedect zy.
Weerd.
 
Syt seck tevreden.
 
Jc salt wel doen/ laet my behandelen.
Weert
 
Nu jc laet hu gheworden ic wil ghaen wandelen
35
Hier ter plaetsen/ zonder versaghen
 
Om tvolc te vergharene.
Weerd.
 
Ende jc ghaen vaeghen
 
De vloer de camer/ van bouen tot ondre
 
Ende stellen alle dync vp zyn plaetse bysondere.
 
So worden myn gasten/ reynelic ontfaen.
Coopm.
40
By mer trauwen/ jc hebbe zeere gheghaen.
 
Van waermten zweetic/ ghelyc den dasse.
 
Maer jc bem hier juuste/ by daghe van passe
 
Want ten es maer vyfue/ zo jc bevynde.
 
Als een meinsche reyst voorden wynde
45
Te lichter ende zeerder/ dat hy ghaet.
 
Bey es ghuent niet myn sculdenaer die daer staet?
 
My dyncke jaet/ zo jc can loncken.
 
Jc ghae hem toe/ dats vry ghecloncken.+
 
Maer jnt eerste beroncken/ sallic van heesschene spennen.
50
Vrient kentge me niet?
Weert
 
Soudic hu niet kennen?
 
Myn jonste es thuwaerts heuen vlugghe.
 
Waenen comt de reyse?
Coopm.
 
By Lo van Brugghe.
 
Jc waere gheerne/ naer Meenen zonder dangier.
Weert
 
Thameer niet?
Coopm.
 
Thameer blyf j[c] hier.
55
Maer berecht my schier/ zonder vertraghen
 
Jc bem alleene/ wilt my ghewaghen
 
Weitge gheen gheselscip doet my dat weten
 
Om chiere te maken?
Weert
 
Tmynent comt heten
 
Den burchmeester met den greffier hier gheseyt.
60
Want zy hebben doen bereeden plentheyt
 
Van spyse ghesoden ende ghebraden.
 
Se sonden een breyken met spyse gheladen
 
Dat hy bycans vanden/ laste bucte.
Coopm.
 
Noynt dynck my bet en ghelucte
65
So ghy my tverstant pynt te ontdoenene.
Weert
 
Daer wort zo leckerlic te mockoenene
 
Bier ende wyn van tweederande/ manniere.
 
Se sullen maken de fynste chiere.+
 
Blyder volc en saecht ghy noyt.
70
Daer wort noch tauent vry ghepoyt
 
Een deel wyns/ jae commenser alle by.
Coopm.
 
Endt hemlieden belieft/ jc valle by
 
Want goet chiere te makene/ zyn myne zeden
 
Alssic reyse.
Weert
 
Ghunder vander stede
75
Staet den burchmeester ende greffier te saemen.
 
Jc ghaese spreken. Volcht/ sonder scaemen.
 
Jc zal maken uwen wech/ onverbloot fijn
 
So dat ghy sult van hemlieden ghenoot zyn.
 
Jc ghae vooren./ Zyt my jnt volghen appeert.
80
Goet jaer myn eeren.
Den Burchmeester.
 
Wellecomme heer weert.
 
Wat man volcht hu daer achter rugghe?
Weert
 
Et es een myn credituer van Brugghe
 
Wien jc noch wat reste zo jc meene.
 
Ende mids dat hy comt ter stont alleene
85
Sach hy my staen ende quam my vraghen
 
Of jc nyement en wiste naer zyn behaghen.
 
Om goet chiere te makene/ eshy hem vermetere.
Den Greffier.
 
Comme by ons.
Weert
 
Hy en gheerdt gheen betere+
 
Alzo hy my selue heift gheseyt.
Coopm.
90
Goet jaer myn heeren.
Burchm.
 
Me vrient endt hu greyt
 
Thauent by te commene met corter spraken
 
Wy sullen een cleen gheeskin maken
 
Elc om zynen pennync/ jent ende net.
 
Belieft hu te commene?
Coopm.
 
Jc en begheerre niet bet
95
Dan goet chiere te makene/ blyde ende vroylic.
 
Jc hebbe altoos/ eenen pennync moylic
 
Om met goe mannen te vertheerren.
Greff.
 
Orssa myn eeren zonder ontbeerren
 
Laet ons ter maeltyt ons ghaen bereeden.
100
Tylic jnt vergaren tylic jnt sceeden
 
Dat dynct my zynde tbeste aduys.
Burchm.
 
Sa heer weert doet ons bewys
 
Van onser saten naer tbehooren.
Greff.
 
Om rasch te zyne jn hu logys.
Coopm.
105
Sa heer weert doet ons bewys.
Burchm.
 
Van ons zo sult ghy hebben prys+
 
Eist dat wy mueghen vruecht oorbooren.
Greff.
 
Sa heer weert doet ons bewys
 
Van onser saten naer tbehooren.
Weert
110
Siet hier myn huus jc stepper jn vooren.
 
Volcht my al tsaemen/ naer myn bestier scier.
 
Waer zytge au wyf? Maect ons goet vier. Hier
 
Syn een deel vrienden/ myn weerdste blomme fyn.
Weerd.
 
Vrienden altoos wellecomme zyn.
115
Tot hueren dienste/ zoudic my eeuwich vitten.
Burchm.
 
Seght ons weerdinne/ waer sullen wy sitten?
 
Doet ons daer of een claer besceet.
Weerd.
 
Heer burchmeester hier binnen tes al bereet.
 
Ghy sulter bet zyn dan jn vloeren of wynckelen.
120
Jc sal hu ghaen halen zo wel te kynckelen
 
Al waert ghy gheseten ommertoes.
Coopm.
 
Wat dynghe es kynckelen?
Weerd.
 
Een goet boes
 
Crychter elc of zynt zuwersche of westelen.
 
Wel kynckelen/ ghemeenelic doet wel vernestelen
125
Twelc de vrauwen blytscepe doet gheuoelen.+
Weert
 
Siet hier myn heeren scabbellen stoelen.
 
Elc pyne te sittene altemet.
Greff.
 
Haelt ons te drynckene onghelet.
 
Van durste dynct my/ de kele verspaect zyn.
Weert
130
Jc loopper omme onghelaect fyn.
 
Niet langher en beydic om een groen stof.
Weerd.
 
Vrient sit neffens vier doet den capproen of.
 
Ghy comt gheghaen/ zo muecht ghy hu rusten.
 
Hu zal veil te bet hetens lusten.
135
Ende hu leden sullen te min verstyuen.
Coopm.
 
Met sulc een lief zoudemen rage bedryuen
 
Die eenen man zo wel can thouuen.
Weerd.
 
Of ghy sulc eene hadt.
Coopm.
 
Tot huer behouuen
 
Soudicse prouuen/ sdaechs eens te meer.
Weerd.
140
Laet staen hu worppen ghy doet my zeer.
 
Jc bem veil te theer/ om sulc een last.
 
Ghenouch van dien wel lieue ghast
 
Of by dien my scaemte/ jnt sussen brochte.
Coopm.
 
Of jc hu weerdinne/ eens cussen mochte+
145
Jc en korer niet vooren twee ghebraen snipkens.
Weerd.
 
Wat wilt geme gheuen?
Coopm.
 
Twee lipkins
 
Sallic hu quytte scelden vander scult.
Weerd.
 
Vraghet myn man.
Weert
 
Waen coopman ghy en sult
 
Gheseyt onghedrult/ dus weist gherust wat.
150
Twaere van zueren biere/ als ghyse ghecust hadt.
 
Troc jct hu of/ tzoude hu verzeeren.
Coopm.
 
Ten sal dat belouic/ als man van eeren
 
Ter kennisse van tgheselscip zonder veil beroers.
Weert
 
Naer dat hu lust jc en spinne gheen floers.
155
Jc consenteret vp dit termyn
 
Present de lieden die hier zyn
 
Vp sulcke voorwaerde/ alst gheseyt zy.
Coopm.
 
So en wort niet langgher van my ghebeyt vry.
 
Weerdinnekin/ hu sallic cussen vp dit besprec.
Weerd.
160
Ay my.+
Weert
 
Wat dats eenen smeck.
 
Alsment hoort/ men seght/ tes verdoene.
Coopm.
 
Willict verdoen dan?
Weert
 
Neen niet zo coene.
 
Tes al ghenouch/ ghecust an eens.
 
Ooc es de voorwaerde vulcommen jc meens
165
Naer hu bespreck/ gheheel ende al.
Coopm.
 
Cusme noch eens.
Weerd.
 
Jc wedde ken zal
 
Al ghaeft ghy my meer ter tyt van nv.
Coopm.
 
Waer omme?
Weerd.
 
Veil te ru
 
Es uwen baerdt/ et smartme noch daer.
Coopm.
170
Jc begheert an hu.
Weert
 
Sen sal voorwaer.
 
Jc en wilt gheensins/ consenteren.
 
Waert voor my niet een groot verneren
 
Of achter myn rugghe wierde vertelt
 
Dat jc myn wyf liete cussen om ghelt?
175
Men soude achter my wysen jnt ghaen jnt keeren.+
Burchm.
 
Ghenomen of hyement jn duecht jn eeren
 
Myn wyf eens cussen/ zoude willen
 
Ende hyse custe wat zoutmy scillen?
 
Wilt my de waerheyt daer of bedieden ziet.
180
Heer weerdt wy en zyn de lieden niet
 
Om eenich clap te makene onghestichtich.
Coopm.
 
Wilge zes lipkins?
Weert
 
Neen jc niet vichtich
 
Al saghic hu tghelt daar legghen bloet.
Greff.
 
Ghy zyt een vry man als jct hu segghen moet.
185
Een vrauwe die eerlic es wetende bekent
 
Al waert dat mense/ custe/ heymelic absent
 
Wiltse niet wye salse cleenicheyt thooghen?
Weert
 
Nyement trauwen.
Greff.
 
Muechge niet gheooghen
 
So en achtich hu voere niet/ twee sleteren.
Weert
190
Hoevele wilge elc lipkin beteren?
 
Wilt my dat segghen met een milde grondekin.
Coopm.
 
Elc lipkin viere.
Greff.
 
Elc lipkin een pondekin.+
 
Dat maect effen rekenynghe verstaet den zin.
Coopm.
 
Dat waere twee pondt.
Burchm.
 
Noch meer noch min.
195
Daer omme muecht ghyse cussen/ met jenter zede.
Coopm.
 
Wat seghges heer weert?
Weert
 
Jc bems te vreden
 
Vp sulcke condicie/ als zy segghen.
Coopm.
 
So sallic noch eens myn muulkin legghen
 
Weerdinnekin andt uwe/ met blyden ghedochte.
Weerd.
200
Doet dan properlic.
Coopm.
 
Met allen sochte.
 
Myn vruecht moet nv/ meer dobblen dan hynckelen.
 
Wat segge daer of?
Weerd.
 
Ghaen halen te kynckelen
 
Sallic hu ter stondt waerm ende heet
 
Een voor assyssekin aerdich bereet.
205
Ghy en proufdet/ gheen beter spyse van daghe.
Burchm.
 
Heer weerdt zyt van onsen ghelaghe.+
 
Maect dat ghy by comt sitten gherynghe.
Weerd.
 
Siet myn heeren wat jc hier brynghe.
 
Dits om te kynckelen/ ende wel te smullene.
210
Elc pyne van desen zyn buucxskin te vullene.
 
Tsal hu bet becommen/ dan eenich quacxskin.
Greff.
 
Coopman gheluc.
Coopm.
 
Jc wachs een bacxskin.
 
Voort brynghict elcken int ronde vutte.
Burchm.
 
Laet ons beclemmen/ der vruechden tacxskin.
215
Hu wort gheluc.
Weerd.
 
Jc wachs een bacxskin.
Weert
 
Elc ghietes een vierendeel jn zyn sacxskin.
 
Tvat en es nauwernaer vp de grute.
Weerd.
 
Hu wort gheluc.
Weert
 
Jc wachs een bacxskin.
 
Voort brynghict elcken jnt ronde vutte.
Coopm.
220
Totter een vander banck valt.+
Greff.
 
Dat ware een clute.
 
Godt besceerme my te commene jn sulc ghefach.
Burchm.
 
Myn heeren hoe vynden wy dit ghelach?
 
Laets peynsen om dassyssen te weerrene.
Greff.
 
Marchandyse zonder te ontbeerrene.
225
Weitge niet veyls te coopene heer weert?
Weert
 
Jc vercooppe hyement een koe.
Burchm.
 
Ende jc een peert
 
Vp tberau van tghelach./ Greyt hu den loop niet?
 
Wat seght ghys coopman?
Coopm.
 
Ten es mynen coop niet.
 
Jc en wil coopen noch vercoopen als nv ten stonden.
Greff.
230
Tghelach moet nochtan/ worden ghevonden
 
Vp eenighe condicie/ ghesproken naect.
Weert
 
Et behoort te zyne.
Coopm.
 
Jc weet ghemaect.
 
Wilt naer my hooren/ ende een lettele sust.
 
Jc hebbe de weerdinne/ tweewarf ghecust
235
Present hu allen binnen desen bedelue.+
 
Wat wilt ghy hebben weerdt dat zou my selue
 
Zal commen cussen vp dit termyn?
Burchm.
 
Dat wil ghaen voort.
Greff.
 
Dat moet seck zyn.
 
Men mach gheen beter/ condicie peynsen.
Burchm.
240
Sa heer weerdt zonder veynsen
 
Smedet hysere binder wyle dat gloeyt.
Greff.
 
Plucket blomken binder wyle dat bloeyt
 
Blydelic met eenen lichten leuere.
Weert
 
Jc en wil niet heesschen.
Burchm.
 
Wat wil ghy huer zijn een gheuere
245
Of quytte scelden vp datse/ hu begheerte vulcomme?
Coopm.
 
Dheltsceede van touerblyf vander somme
 
Sallic huer quytte scelden/ zonder kyuen.
Greff.
 
Wat sal dan de reste blyuen?
 
Berecht my datte eer jct bequele.
Weert
250
Seer lettele.+
Weerd.
 
Niet vele.
 
Ten waere niet weert dat mer of sprake.
Greff.
 
Ten sal niet voortghaen ten zy dat jct make.
 
Dat hooric wel an dit volcx vytte.
 
Coopman ghy sult scelden de scult quytte.
255
Dies zal de weerdinne/ zonder verdrach
 
Hu commen cussen ende tghelach
 
Sal an hem seluen houden de weert.
 
Ende wat hier thameer wort vertheert
 
Wy en willen van gheender rekenynghe hooren.
Burchm.
260
Comter hiet meer twort al te vooren.
 
De weert moet thameer gheuen ons busynghe.
Greff.
 
Soudge zien vp een cleen plusynghe
 
Of onder goe mannen als een vreck poenken leuen?
Weerd.
 
Jc salhu zo amoureus een soenken gheuen
265
Wilge de scult quytte scelden al.
Coopm.
 
Sulget ooc doen?
Weerd.
 
Of jc zal.
 
Doe jct niet dat ment my verwytte.
Coopm.
 
Jc scelde hu de gheheele prondele quytte
 
Behouden dat ghy/ vulcomt hu woort.+
Weert
270
Jaese trauwen. Rechte voort
 
Willic datse hu vuldoet zonder falene.
Weerd.
 
Me vrient jc comme ziet zonder dralene
 
Om hu te betalene/ rasch onghelet.
 
Myn mondekin sallic stellen net
275
Andt uwe al waerter an ghevoucht.
 
Wat seghge nv?/ Ghy kent hu vernoucht
 
Van al de sculden die myn man ende jcke
 
Hu sculdich zyn/ van eeneghen sticke
 
By coopmanscepe ende anders twy ende hoe?
280
Doege niet?
Coopm.
 
Jae jc trauwen.
Weerd.
 
Vp dat sulge hebben een soenkin toe.
 
Want ghy zyt der vruechden knobbelknuvere.
Weert
 
Greffier ziet daer een dobbel stuuere.
 
Maect de quittancie/ pynt verstant te bussene
285
Vander quytsceldynghe.
Greff.
 
Dat et es van cussene?
 
Sallic zo scryuen?/ Wilt my besceeden.
Weert
 
Neenge ghy sullet wel anders beleeden.
 
Jc doet vp aventhuere/ of jc questie verworue.+
 
Of hy thauent of moorghen storue
290
Ende my zyn aeldynghers wilden deerren
 
Jc zoude my/ metter quyttancie verweerren.
 
Ten scaet niet dat hem hyement bewaert.
Coopm.
 
Jc wil ghaen slapen onghespaert.
 
Myn hooft drayt my/ ghelyc eenen toppe.
Weerd.
295
Sytge zo vul?
Coopm.
 
Tot den croppe
 
Ghelyc eenen cappoen/ die men stelt te vettene.
Burchm.
 
Wy willen sceeden zonder te lettene
 
Want wy hebben hier zeer wel gheweist.
Greff.
 
Coopman kyct dat brieuekin ende leist.
300
Tverstant van dien pynt/ jnwendich te speeckene.
Coopm.
 
Tes vander quytsceldynghe?
Weert
 
Stelt daer hu teeckene.
 
Dan sullen alle dynghen vp huerlieder mate staen.
Burchm.
 
Myn heeren et wort zeer late zaen.
 
Jc wil ghaen thuus zonder spaeren.
Weerd.
305
Heer burchmeester/ Godt wilhu bewaren.
 
Wy zyn thuwen besten met al ons macht.+
Coopm.
 
Adieu heer weert goeden nacht.
 
Jc ghae my jn myn bedde strecken.
 
Of jc my versliepe/ wilt my doch wecken.
310
Moorghen willic pleyen den wilde graspat.
Greff.
 
Noch peynsic omden coopman./ Wat ghilde was dat.
 
Vp de weerdinne versuft hy puer van luste.
Burchm.
 
Dat hy zo vyf pondt groote vercuste
 
Tverwonderen maect my puer confuus.
Greff.
315
Hy hadt jnt hooft.
Burchm.
 
Hy was puer buus.
 
Twas goet te ziene/ an zyne manniere.
Greff.
 
Twort moorghen al van zueren biere
 
Als de weert thooghen zal zyn ceduulken.
 
Non forche wy vaechden ommers ons muulken
320
Andt scoonlaken/ by huerlieder brauwen.
Burchm.
 
Thauent washy vul glorie.
Greff.
 
Moorghen wort hy vul rauwen.
 
Jnwendich beknauwen/ salhy houden te deele.
Burchm.
 
Thauent wasser miltheyt.+
Greff.
 
Moorghen worter beele.
 
Dies jc hem zeele met spytheyt verstooren.
Burchm.
325
Jc ghelooue men salder meer of hooren.
 
Adieu goeden nacht zonder beswaren al.
 
Moorghen salmen weten hoet varen sal.
Pausa cleene.
Coopm.
 
Al verslapen by Ghans doot.
 
Met dat jc vut mynen slape ontscoot
330
Ghevoeldic de timmerlieden te wercke.
 
Tes ooc claer dach zo jc bemercke.
 
Dus willic om vpstaen/ my pyne[n] te reedene
 
Te coussen te scoeyen my seluen te cleedene
 
Ende nemen van hier haest myn vertrecken.
Weert
335
Byder doot jc zoude hebben ghaen wecken
 
Mynen ghast also hy my bat.
 
Duust jn een dat jct niet en verghat.
 
Dus ghae jc hem wecken als een fray man.
 
Mach hy vp zyn? My dyncke jay tjan.
340
Jc meende hu te weckene naer hu ghesech.
Coopm.
 
Jc waere gheerne varyncx wech.
 
Jc hebbe hier noch vp tlancxste ghebleuen.
 
Maer eer jc ghae zout ghy my willen gheuen
 
Een deel ghelts? De somme zal altoos minderen.
Weert
345
Wat dynghe ghelt?
Coopm.
 
Jae tsalhu minst jnderen.+
 
Een lettel te gheuene sal lettel deerren.
 
Tsal my wel helpen om vertheerren
 
Vp den wech./ Dus my ghehuldich zyt.
Weert
 
Waer of?
Coopm.
 
Van dat ghy my sculdich zyt.
350
Ghy ghelaet hu zo blonc/ by uwen bedryue.
Weert
 
Jc en weet van gheen scult.
Coopm.
 
Sytge my [sculdich] niet der ponden vyfue?
 
Wilt ghyseme loochghenen?/ Jc zye abuus.
Weert
 
Van dien en weynschic hu niet een gruus+
 
Noch tminste stof van eender varte sporte.
Coopm.
355
Weynscht ghy my niet?
Weert
 
Neen jc niet een zwarte korte.
 
Van heesschene mocht ghy hu wel gherust hebben.
 
Me wyf heift hu betaelt.
Coopm.
 
Sou en ghaf my niet.
Weert
 
Waer vooren zout ghy huer ghecust hebben?
 
Berecht my datte naer hu besprecxs werck.
Coopm.
 
Ghecust hebben?+
Weert
 
Jae.
Coopm.
 
Dat houdic voor ghecxwerck.
360
Met eenen droncken hoofde/ wat achtic datte?
Weert
 
Huut ghecxwerck? Dat gheuic myn katte.
 
Vrient zo jct scatte/ verstaet tbediet
 
Van hu vyf pondt groote/ en sult ghy niet
 
Van my ghecryghen/ een hynckel luere.
Coopm.
365
So sallic hu hebben eer een huere
 
Voor de wet om de gheheele reste.
Weert
 
Jc consenteirt. Doet vry hu beste.
 
Jc zal ghenieten datter of zal ghescieden.
Coopm.
 
Jc zalhu ter stont ghaen doen ontbieden
370
Al en zoudic thameer/ van hier sceeden.
Weert
 
Ten es gheen noot. Ghaenwe onder ons beeden
 
Ende spaert den cost hoort myn ghesech.
 
Ghy sulter wel mede/ vp den wech
 
Een pynte biers dryncken goet van smake.
Burchm.
375
My langht te wetene hoe de sake
 
Van ghisterauent den coopman ghenoucht.
 
Maer hoet zy/ zo my den zin wroucht
 
Tes quaet hiet vut sweerds handt te treckene.
 
Vyf pondt groote te vercussene/ tes om te gheckene.+
380
Maer tbeste datter of zy hy es rycke van goede.
 
Ghunder commense beede. My draecht an moede
 
Datse doen sullen eenich gheclach.
Coopm.
 
Heer burchmeester Godt gheue hu goeden dach.
 
Soudge ons willen/ jnt spreken gherieuen?
Burchm.
385
Jae jc trauwen/ seght hu belieuen.
 
Laet my weten de meenynghe van uwer jntencie.
Coopm.
 
Tes van een lettel deferencie
 
Die tusschen de weert es ende my
 
Van vyf pondt groote/ de welcke hy
390
My sculdich es/ van goeden ghelde
 
De welcke jc gheerne/ binnen mynen ghewelde
 
Soude hebbe[n] tmywaerts ghehuldich.
Weert
 
Heer burchmeester jc en bem hem niet sculdich.
 
Me wyf heift hem/ te vullen betaelt
395
Oorconde de quyttancie/ die hy onghefaelt
 
Gheteekent heeft hu zynde present.
Burchm.
 
Dats hu handteeken?
Coopm.
 
Trauwen jc kent.
 
Maer jc was droncke als jcter stelde.
Burchm.
 
Quaelic zye jc hu te helpene thuwen ghelde
400
Want consent maect wet/ dus zytges te buten.+
Coopm.
 
Jae machmen een man/ zyn nuese so snuten?
 
Tmesleeden maectmy/ puer ongherust.
 
Bey hebbic zo vyf pondt groote vercust?
 
Jc salsme voort wachten/ jn elcken wycke.
405
Elc zye voor hem/ eshy aerm of rycke.
 
Dronckescip maect/ menich meinsche berut.
 
Ten es ooc nyement/ gheen bescut
 
Wat hy bedryft/ tsy goet ofte quaet.
 
Ons slichte colacie jn dancke ontfaet
410
Duer sHelichs Gheest gracie die tallen tyden
 
Met de Drie Santinnen hu wille verblyden.

†A†M†E†N†


Vorige Volgende

Over dit hoofdstuk/artikel

datums