Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.tSpel van den hooghen wynt ende den zoeten reyn.
Ao. 1525.

Eenich, een persoonage ghecleet als een coopman.
Menich, een personage ghecleet als een ambochsman.
Den Hooghen Wynt, een persoonage hooghe vpgheblasen scynende.
Den Zoeten Reyn, een personage jent ghecleet blaeu oft graeu, waterachtich scynende.
Redelicke Verstannesse, een vrauwe persoonage jentelic gheabitutuweirt als een rudders vrauwe.

Prologhe.

 
+ Ter eeren der hoogher victorie scoone
 
Die Kaerle onsen keyser es ghebuert
 
Vp den conync vander/ Vrancxscher croone
 
So zyn wy nv/ tot vruechden bekuert.
5
Den gheest die langhe/ heift ghetruert
 
Moet nv eensdeels/ wat verlichten.
 
Onsen keyser ter eeren/ edel ghenathuert
 
Bidden wy/ Menich/ Eenich datse zwichten
 
Van lude te zyne/ maer wilt hu stichten
10
Om zien om hooren./ Weist tsins ontweckers
 
Om wel te verstaene/ ons materie ons dichten.
 
Draecht zoorghe voor/ tverlies weist hu scats deckers.
 
Want jn vergharynghe van volcke vyntmen onghetydeghe peckers.

tSpel.

Eenich een persoonage ghecleet als een coopman.
 
Wel Menich hoe staet?
Menich een personage ghecleet als een ambochsman.
 
Als eyers die vut looppen.
15
Ten scoonter niet wat mer screipt of vaecht.
Eenich
 
Wy Menich/ Eenich/ zyn wel gheplaecht
 
By deser oorloghe/ langghe jnt ghedueren.
 
Mochtich my Eenich/ aventhueren
 
Te watre te lande/ naer myn begheerrynghe
20
Ghy Menich zoudt hebben/ goede neerrynghe
 
Dat coopmanscepe/ reyngneirde vry ende vranck.+
Menich
 
Jc Menich plach te sittene vp den banck
 
Te biere/ te wyne/ vry zonder zoorghen.
 
Verteerdict hedent/ jc want weder moorghen.
25
Sonder ludtsen boorghen/ wiert de weert betaelt.
Eenich
 
So wort hy noch.
Menich
 
Alst niet en faelt.
 
Jc Menich bem ghedaelt/ gheseyt jnt ronde.+
 
Costelic leuen dat dynct my sonde.
 
Ouerdaet met my vutter buche vliet.
Eenich
 
Hoe comt dat?
Menich
 
Ken zye een cruce niet.
 
Niet hebben/ doet spaeren by ghebreke.
Eenich
 
Sytge dan blent?
Menich
 
Ken zye niet een steke.
 
Tnaebesaet es thuutcoy/ om claer versinnen.
Eenich
 
Ende jc Eenich/ en doe hu Menich niet winnen
35
Duer dese oorloghe/ valsch verzworen.
 
Dus ghaet Menich ende Eenich tsaemen verloren
 
Deen metden andren/ elders als hier.
Menich
 
Jc Menich dryneke daghelicx bier.
 
Tsmaecteme hier voortyts bekaent vermostelic.+
Eenich
40
Niet voorden Rynschen.
Menich
 
Die es Menich te costelic.
 
Hans vanden Ryne/ die moetic deruen.
 
Maer mochtic/ noch Jan de France verweruen
 
So stont my scoone/ ghelyc alst plochte.
Eenich
 
Ende dat jc Eenich allomme mochte
45
Reysen jn coopmanscepe/ van zoorghen vry
 
Neerrynghe quaeme hu Menich/ eer moorghen by.
 
Dies mocht ghy te rechte/ wel verhueghen.
Menich
 
Jc Menich helpe my naer myn vermueghen.
 
Alzoot ghescepen es moettet ghenayt staen.
Eenich
50
Hier by moetet al verdrayt ghaen.
 
Als coopmanscepe ende neerrynghe zyn bedwonghen
 
Ten baet ghelesen/ gheseyt/ ghesonghen.
 
Ghy comter Menich by jnt verzeeren.
Menich
 
Als ghy Eenich niet en muecht verkeeren
55
Payselic zonder zoorghe te watre te lande
 
Coopmanscepe ghebruuckende thuwen onderstande
 
Adieu dan faelt my ter stondt de neerrynghe.
Eenich
 
Jc Eenich slute de buerse.
Menich
 
Jc Menich cryghes deerrynghe.
 
Groote theerrynghe moet jc dan scuwen.+
60
Benaute wil rysen/ ende weilde verduwen
 
Dies jc Menich by dien moet ghaen te quisten.
Eenich
 
Jc Eenich sitte stille.
Menich
 
Jc Menich soucke listen
 
Om den daghelicxschen cost jn dyueerscher manniere.
 
Neerrynghe/ ende coopmanscepe dat ic anthiere
65
Alzo men zien mach ouer al.
Eenich
 
Jc theerre vanden kante.
Menich
 
Jc Menich groot en smal
 
Volghe nv coopmanscepe/ met neersteghen labuere.
 
Jnt cooppen ende vercooppen/ jc grootelic puere.
 
Want gheerne jc ooc an tgroot ghesloc zwolghe.
Eenich
70
Wort Menich een coopman?
Menich
 
Alssic den stock volghe
 
Jnt louen jnt bieden/ watge relt
 
Bem jc dan niet een coopman ghetelt?
 
Jc meene jaic/ ten baet gheen stuenynghe.
Eenich
 
Menich doet nv twee ambochten in een wuenynghe
75
Twelc selden hier voor tyts was ghezien.
 
Doetet weilde?
Menich
 
Jaet messchien.
 
Haddic Menich wasdom ghelyc jc plochte+
 
Ten waere gheen noot dat jc neerrynghe sochte
 
Ghelyc jc nv doen moet jn allen houcken.
80
Vermalendyt zy doorloghe/ jc moetse vloucke
 
De quaede moordadeghe/ fenyneghe slangghe.
 
Se houdt my jnder/ benauten bedwanghe.
 
Dus moet Menich/ smal duer huer bestierken pappen.
Eenich
 
Menich leert nv/ een bierkin tappen
85
Hy en plochter hier voortyts niet of te wetene+
 
Maer was jn taveerne deerste ghesetene
 
Ende de laetste sceedende/ van goede ghesellen.
 
Jc duchte hem Menich/ zal tachter stellen
 
Met al dese taveernen/ jn dyueersche plaetsen.+
90
Ooc salt beheghenen/ de ghuene die maetsen
 
Of decken al waerense/ noch zo scalc.
Menich
 
Waer omme?
 
De dierste jnt calc
 
Maect Menich al zoudicker omme bekeuen zyn.
 
Drynct hy twee bieren tdeene moet ghescreuen zyn
95
So scaers heift Menich nv jn dhandt.
Menich
 
Wy Menich ende Eenich an elcken kant
 
Verliesen dat wy hebben met herten bevreest.
 
Dus en hebben wy/ Menich Eenich/ gheenen gheest
 
Mids den tyt van beroerten vul van dolueren.
Eenich
100
Jc duchte et sal noch langghe ghedueren
 
Eermen payseghe Eendrachticheyt de scoone playsande
 
Weder vynden zal jn elcken lande+
 
Met Neerrynghe zo men heift ghezien.
Menich
 
Tdynct my qualic mueghelic.
Eenich
 
Hoe zout ghescien
105
Alzoot noch daghelicx/ ghaet jn zyn werck?
 
Synt niet twee conynghen van machten sterck
 
Edele van bloede/ niet om verrycken?
Menich
 
Ende deen en wil den andren niet wycken.
 
Dus staet ons pays noch langhe te deruene.
Eenich
110
Huwer Menich vele mocht gheraecken te besteruene
 
Buten ghetale groot bouen nommere.
Den Hooghen Wynt een persoonage hooghe vp gheblasen scynende.
 
Maect plaetse/ mae[c]t plaetse/ je commere jc commere.
 
Wye zout my beletten? Jc en hebs gheen duchten.
 
Al waer hy gheseten jnt hoochste der luchten
115
Hy wierde van my ghesleghen ter eerde.+
Eenich
 
Wat veynst es dat met zynen zweerde?
 
Hy zwelt van houeerde/ al waert een cafzack.
Menich
 
Hy scynt ghevult ghelyc eenen drafzack.
 
Myn daghen en sachic vreimder fatsoen.
Wynt
120
Jc moeter zyn.
Eenich
 
Wat wilger doen?+
 
Tscynt ofge de weerelt alleene zout dwynghen.
Wynt
 
Dat jc wilde myn cracht voort brynghen
 
Ten zyn gheen dynghen/ vp sweerels eruen
 
Jc en dedese/ jn corten tyden bederuen
125
Ende te nyeten brynghen/ met cleender saken.
Menich
 
My dyncke ghy hebbet wel jnde caken
 
Alzo jc bemercke by uwer ronthede.
Wynt
 
Ten zyn gheen fabelen myn vermonthede.
 
Maer mids myn rasscheyt/ niet om versnellen
130
Soudic by crachte/ ter nedere vellen
 
Husen/ torren/ kercken/ ende mueren.
 
Steden/ casteellen/ berghen doe jc scueren
 
De boomen vallen/ de eerde beuen.
 
De scepen jn zeede/ worden voort ghedreuen
135
By mynder cracht/ ten es gheen lueghene.
Eenich
 
Naer dat ghy zyt van zo grooten vermueghene
 
Wy bidden hu ons te segghene pynt
 
Hoe zyt ghy ghenaemt?
Wynt
 
Den Hooghen Wynt.
 
Capeteyn van Eolus de grooten godt
140
Die vp een oogheblic/ by zyn ghebodt
 
Eerde/ watre/ lucht/ met fellen oreeste
 
Lichtelic stellen zoude/ jn grooten tempeeste
 
Daer den godt Eolus/ myn cracht vallen laet.+
Menich
 
Godt besceerme de leeu die vp der hallen staet
145
Sinte Donaes wederhaene/ ende al dander mede.
 
Jc hoore wel ghy hebt te menegher stede
 
Huwen part ghebesicht/ jn nydegher voormen.
Wynt
 
Hildic niet Vlixes/ by myn bestoormen
 
Capiteyn vanden Griecken/ met moede gram
150
Jnde zeede/ eer hy te lande quam
 
Meer ende bet dan der jaeren thiene?
Menick
 
Eenich zoude vreesen hu an te siene
 
Omde felheyt van uwen bedryue.
Wynt
 
Roofdic niet Eneas bycans vanden lyfue
155
Ter begheerte van Juno de goddinne
 
Verstellende eenen berch met cloucken zinne
 
Om hem te doene/ groote bescaetheyt?
Eenich
 
Helpe wat hooric.
Wynt
 
Noch by myn quaetheyt
 
Steldic niet Jobs huus dat vooren dat achtere
160
Daer zyn kynders jn bleuen te zynen lachtere
 
So elcken jn Job mach vynden ghescreuen?
Menich
 
Wat Godt seyne ons.
Wynt
 
Noch hebbic bedreuen
 
Doen Christus ghesceipt was/ by goeden besceede++
 
Met zyn descipelen vp de zeede
165
Binnen dat hy sliep/ maectic sulcke voere
 
Dat jc de zeede/ stelde al jn roere
 
Dies zy waeren/ jn sulcker noot
 
Dat zy Christum wecten/ diet my verboot+
 
Daer hy gheseten was binnen scips boort.
170
Anders haddic Pieter/ ende dander versmoort
 
Maer jc wiert bedwonghen by zynder macht.
Eenich
 
By Lo zo hebt ghy zeer groote cracht.
 
Hy waere sot die tjeghen hu hilde stryt.
Wynt
 
Jn den vierden keyser/ Ludouicus tyt
175
Dedic by mynder foortsen sulc ghewelt
 
Dat husen/ torren wierden ghevelt.
 
Ooc dedic sommeghe steden verdryncken.
 
Sulc mochter vry wel omma dyncken
 
Byden watre dat jc dede vloeyen.
Menich
180
Comge jn hYnghelandt/ Godt moetge boeyen.
 
Jc en hoorde noynt man zo ghehertich.
Wynt
 
Alsmen screef acht hondert jaer ende vierendertich
 
So sachmen dat jc binder Walscher palen
 
By mynder cracht wel dede dalen
185
Dies elcx herte/ mochte hebben afgrys
 
Huutter lucht een zwaer stick hys
 
Jnde langhde van sestien voeten ghemeten
 
Ende zesse jn de breede/ noch moetge weten
 
Twas jnde hoochde/ twee voeten dicke.+
Eenick
190
So en hoordic myn daghen van vreimder sticke
 
Dies jc verscricke duer sbloets verstooren.
Den Zoeten Reyn een personage jent ghecleet blaeu ofte graeu waterachtich scynende.
 
Wat moetic van dien berommer hooren.
 
Tdynct hem al zyne achter ende vooren.
 
Hy laet hem dyncken heere der heeren.
195
Die tjeghen hem rese hy zouds hem stooren.
 
Dus moet jc nv myn cracht oorbooren
 
Ende hem van my/ een toerkin leeren.
 
Hy wort ommerynght/ wil hy niet keeren
 
So zalhy hem vynden jn myn bedwanc.
200
Hy salder omme commen jnt verzeeren
 
Mach hy gheraken/ jn myn bevanc.
 
Jc wilhem toe/ met leden stranc.
 
Dus neimp jc den ghanc/ tot hem serteyn.
 
Gheift hu ghevanghen.
Wynt
 
Wien?
Reyn
 
Den Zoeten Reyn.
205
Dus licht daer neder/ tes mynen wille.
Eenich
 
Den Hooghen Wynt es gheleghen stille
 
Ghelyc een ghelte by huere vigghen.
Reyn
 
Jc Zoeten Reyn/ doe Hooghen Wynt wel ligghen.
 
Jn tyden van jaere/ ziet men dat ghescieden.
Menich
210
Wye zal nv Menich/ Eenich bedieden
 
Trechte verstant meenynghe jntencie+
 
Van dat hier ghethoocht es jn elcx presencie?
 
Tdynct ons Menich Eenich groot abuus.
Redelicke Verstannesse een vrauwe persoonage jentelic gheabituweirt als een rudders vrauwe.
 
Menich/ ende Eenich/ weist niet confuus.
215
Den Vrancxschen conync zo je bevynde
 
Es te ghelyckene byden Hooghen Wynde.
 
Ende Kaerle/ onsen keyser tedele greyn
 
Ghelyckic byden Zoeten Reyn
 
Vp dat hu belieft te hoorene naer my.
Eenich
220
Eerweerde vrauwe/ wy biddens dy
 
Wy sullender gheerne/ beede naer hooren.
Redel.
 
So den Hooghen Wynt/ stelt jnt verstooren
 
De watren/ de luchten/ de crachten der eerden
 
Elcken grieuelic/ dies hy es jn onweerden
225
Van meinschen beesten/ ende al dat leift
 
Ende alde vruchten/ die de eerde vut gheift
 
Schelycx hebben de hooghe rommeghe daden
 
Des Vrancx conyncx/ ghedaen bescaden
 
Al dat leift te watre te lande
230
So elc Menich/ Eenich/ van verstande
 
Wel es wetende hier present.
Menich
 
Den Vrancxschen conync/ tes waer je kent
 
Mach men wel/ den Hooghen Wynt nomen
 
Die alomme met foortsen/ wil duere dromen
235
Ghelyc als den wynde onghestichtich.+
Eenich
 
Den Zoeten Reyn/ den Hooghen Wynt lichtich
 
Saghen wy ter stont ter neder legghen.
Redel.
 
Jn tyden van jaere verstaet myn segghen
 
Siet men dat ghemeenelic/ ghebueren
240
Als wassende dynghen/ by nathueren
 
Jnt middel zyn/ van huer vpcommen.
Eenich
 
Kaerle jnt middel nv vp gheclommen
 
Van goeden verstande/ ende groote mueghentheit
 
Jnt beghinsels alst jaer/ elc gheift verhueghentheit
245
So was hy gheboren/ wien dattet wondert
 
Vierentwyntich jn sporkele/ vichthien hondert
 
Vp den scrickeldach jnt jaer van gracien.
Redel.
 
Hy es den Zoeten Reyn/ tot elcx confortacien
 
Wiens dauweghe duecht/ ons zal toe vloeyen.
250
Al hebben wy gheleden/ jn zyn vp groeyen
 
Byden Hooghen Wynt wat bestoormen
 
Hy heift hem nv tonder jnder voormen
 
Ghelyc als den Reyn/ den Wynt bevaet
 
Jnt beghinsels des jaers/ dit wel verstaet.
255
Vierentwyntich jn sporkele/ zo washy gheboren
 
Tjaer vyfentwyntich van gracien vercoren
 
Jnt middel van tupcommen/ zyns edel juecht.
Menich
 
Godt wilhem verleenen voorspoet ende duecht
 
Ende zyn eeuweghe vruecht/ naer dit leuen.
260
Jc hope de Turcken/ sullen noch beuen
 
So van hem es ghescreuen/ eer langghe tyden.
Redel.
 
O Menich ende Eenich/ wilt hu verblyden+
 
Ende Godt ghebenendyden/ met alder memorie.
 
Looft/ danct/ Godt/ vande victorie
265
Die hy uwen keyser heift gheleyt toe
 
Jn een jaer van gracien/ ghelyc hier gheseyt doe
 
Hy hu gheboren wiert/ ter weerelt naect.
Eenich
 
Den Hooghen Wynt/ by droochten verspaect
 
De eerde/ ende neimpt/ huer zoete vuchticheyt
270
Vertheerrende by dien/ huer juechdeghe vruchticheyt
 
Dies zaet ende bloesseme/ ghaet te ruwyne.
Redel.
 
Den Vrancxschen conync/ jnde landen zyne
 
Heeft themwaert ghetrocken/ groot goet ende scat
 
Van zyn ondersaten/ byden welcken dat
275
Coopmanscepe ende neerrynghe/ zeere es ghehindert
 
Eenich bescaet/ ende Menich vermindert
 
Diet noch duchtich zal/ beclaghen langhe.
Menich
 
Ghelyc den Hooghen Wynt stoormich en stranghe
 
Alle dynck behindert/ by zynen tempeeste.
Redel.
280
Ter contrarie Kaerle/ edele van gheeste
 
Van zyn gheboorte/ tot nv jeghenwoordich
 
Heift ghehouden zyn landen accoordich
 
Met wysen raede/ ende voordachticheyt
 
Jn payse/ jn liefde/ ende jn eendrachticheyt
285
Ende hu Menich/ Eenich/ jn allen zyn landen
 
Allomme bescut voor zyne vyanden
 
Wiens bescadich vplooppen/ nv wort gheswicht
 
So als den Wynt/ byden Reyne licht
 
Dies de nydeghe hitte/ nv wort ghecoelt.+
Eenich
290
Den Reyn voedtsels gheift/ dit ghevoelt
 
Jnder eerden alle wassende dynghen.
 
Schelycx zal by Kaerle/ met Gods ghehynghen
 
Coopmanscepe wassen/ ende neerrynghe
 
Ouervloedelic/ naer elcx begheerrynghe
295
De weerelt duere/ noort/ west/ zuut/ oost.
Redel.
 
Menich ende Eenich ghy wort nv vertroost
 
Edel/ onedele/ priesters ende clercken.
 
Want den edelen aerndt heift onder zyn vlercken
 
De lelye/ met zynen wortele gheheel
300
Ende meestdeel de blommen vut Vransche pryeel.
 
Dies moet hem eeuweghe/ eere ancleuen.
Menich
 
Jc hope oorloge wort nv verdreuen.
 
Dierste zal ons begheuen/ zonder veil delays.
Redel.
 
Eenen vasten gheduereghen pays
305
Wort eer lanc hier mede ghevonden.
Eenich
 
Golias macht jn voorledene stonden
 
Vp gheblaesen vul wyndegher houeerde
 
Was lichtelicken/ gheworpen ter eerde
 
Byden reyn van Dauids/ odmoedichede.
Menich
310
Dies tYsraelsche volc/ byde voorhoedichede
 
Van Dauidt huer svyants/ wierden ontsleghen.
Redel.
 
Noynt en hebbense victorye ghecreghen+
 
Die met houeerdeghen/ vpgheblaesen moede
 
Met onghelyc wilden bescaden de goede.
315
Godt es altoos/ jn huer bewaerynghe.
Eenich
 
Vp den dach/ des stryts vergarynghe
 
Dat den Hooghen Wynt stoormich wayde
 
Den Zoeten Reyn/ hem omme drayde
 
Jn dhoude van zyn vyfentwyntichste jaer
320
Ende heift ter neder gheleyt voorwaer
 
De lelye die hueren ghuer verloren heift.
Menich
 
Godt den aerne/ daer toe vercoren heift
 
Te vlieghene/ bouen alle vueghelen hooghe.
Redel.
 
So doet hy ooc Kaerle/ met goeden bethooghe
325
Keyser ende conync/ edele ende machtich
 
Bouen alle conynghen/ ende prynchen crachtich
 
Die nv leuen/ binnen sweerels rynck.
 
Ghebenendyt zy dhandt die de lelye vynck
 
Noynt scoonder blomme/ hy ons en plucte.
Eenich
330
Noynt scoonder victorye/ ons en ghelucte.
 
Tkersten bloet hopic/ worter by ghespaert.
Menich
 
O Vransche landauwe van zoeter aert
 
Wat staet hu nv/ al griefs te lydene.
Redel.
 
Sulc maect de roede een ander te castydene+
335
Hy worter selue/ mede ghesmeten.
 
Met sulcke mate als een meidt/ wort hy ghemeten.
 
Tes Gods woort hy heuet ghesproken.
 
Dus Menich ende Eenich/ jn benauten beloken
 
Van neerrynghe winnynghe ofte wasdom
340
Syt nv verblyt vreest niet een vlas crom.
 
De Vrancxsche weirspooricheyt/ es commen ten hende.
Eenich
 
Daer esser bleuen/ jn eender bende
 
Veerthien duust zonder die dhielen
 
Keerden jnt looppen.
Menich
 
Godt hebbe de sielen
345
Van alle de ghuene/ die ouerleden zyn
 
Die voor hueren prinche hebben ghestreden fyn.
 
Godt wilse besceermen/ voor dhelsche tribulacie.
Redel.
 
Godt bedause met den reyn van zynder gracie
 
Die Borbon/ ende Piscare/ waeren ghehuldich.
350
Meenich ende Eenich/ ghy zyt sculdich
 
Te biddene voor hemlieden die met ghewelt
 
Huer leuen ghelaten hebben jnt velt
 
Voor onsen keyser/ tedele engien.
Eenich
 
Kaerle onsen keyser/ wort noch ontsien
355
De weerelt duere jc darfsme berommen.
Redel.
 
Den Zoeten Reyn es te bouen ghecommen
 
De Hooghe Wynden/ vut Vrancxsche pleyn
 
By zyne druepelen/ elc capeteyn
 
Die hem clouckelic hebben by ghestaen.+
360
Dies moet Borbon ende Pisscare prys ontfaen
 
Mids le vycheroy de Napels clouc van daden
 
Ende met al dandre edele zaden
 
Baenraedtsen/ rudders/ ende cnechten
 
Die zo clouck hebben/ gheweist jnt vechten
365
Datse behouden hebben/ stryt ende velt
 
Ende hebben ghecreghen jn saerns ghewelt
 
De lelye met zyne princepale bladeren.
Menich
 
De druepelen de[s] Zoets Reyns jnt vergaderen
 
Brochten den Hooghen Wynt/ jn plaghen.
Redel.
370
Ghelyc jnt middel/ der somersche daghen
 
Tweder ghesien wort claer ende lustich
 
Wel ghetempert ende zeer gherustich
 
Dickents onvoorsien fel ende oreestich
 
Ryster den Hooghen Wynt tempeestich
375
Die haestelic ommerynght wort byder wolcke
 
Van den Zoeten Reyne/ vallende vp den volcke
 
So ghesien mach worden van houde van jonghen.
 
De eerde wort vercoelt/ ende den wynt bedwonghen
 
Hoe hy ghewayt heift/ onghemuustert.
Eenich
380
Den Vrancxschen conync zonder redene verduustert
 
Heift meneghen vploop ghedaen onvoorsien
 
Hier ende eldre/ waenende by dien
 
Dese landen ende andre te doene bescaden.
 
Maer de druepelen des Reyns/ met vrome daden
385
Hebben dat clouckelic/ weder staen.+
Menich
 
Ghelyc dese twee heeren hebben ghedaen
 
Borbon ende Pisscare machtich edele ende rycke.
Redel.
 
De welcke jc by Dauidt ghelycke.
 
Doen Golyam capeteyn/ de[r] Phelistynen
390
TYsraelsche volc/ beleyt hadde om dwynen
 
Die hy bedwanc/ in sulcker blootheyt
 
Dat nyemende en dorste/ duer zyn grootheyt
 
Ende cracht bevechten moordadich fel
 
Dies den conync Saul dede een beuel
395
So wye den ruese/ zoude dooden of vanghen
 
Groote ghiften zoudy te loone ontfanghen
 
Sconyncx dochter zoudy hebben te wyfue
 
Voort zo zoudy/ te zynen beclyfue
 
Hy ende de zyne teeuwegher tyt
400
Van allen trybuten zyn bevryt.
 
Maer nyemende en achte/ sconyncx ghebodt
 
Dan Dauidt hebbende/ betrauwen vp Godt
 
Die den ruese van zynen buucke thooft
 
Victorieuselicken/ heift gherooft
409
Ende ghebrocht binnen Jherusalem der stede.
Eenich
 
Daer men hem groote eere dede.
 
Want vrauwen ende maechdekins jentelic
 
Met sanghe met spele jnstrumentelic
 
Quaemen hem tjeghen te ghemoete
410
Omde groote victorie/ ooc omde boete
 
Die Godt by Dauidt hemlieden verleende.
Redel.
 
Dat Dauidt Golyas houeerde vercleende
 
Duer zyn odtmoedt lietet Godt ghescieden.
 
Dies hem ter eeren/ zeyden de lieden+
415
Dat Sauls volck hadden versleghen
 
Een duust vyanden/ maer Dauidt daer tjeghen
 
Hadder verwonnen thien duust alleene
 
Wickende sruesens cracht ghemeene
 
Dat Dauidt ghedaen hadde meer gheweer
420
Dan al tgheheelle Sauls heer.
 
Sulcke weerdicheyt hebbense hem toe gheleyt
 
Ende ghewellecomt/ alst es voorseyt
 
So men hu fyguerlic zal laten scauwen.
Pausa.
Hier thoocht men Dauidt jncommende binnen Jherusalem met Golias [hooft] vp de punt van zynen zweerde ende vrauwen maechden met harpen luuten flueten hem commende te ghemoete ende hem ghewellecomt.
 
Menich ende Eenich/ mannen ende vrauwen
425
Ziet hoe Dauidt/ om zyn victorie
 
Ontfanghen was/ met grooter glorye
 
Binnen Jherusalem der stede reyn
 
Duer zyn verdiente.
Menich
 
Schelycx serteyn
 
Hebben dese twee edele/ wys gheengient
430
Eere ende glorie wel verdient
 
Bouen andren/ hyemende ongheblaemt
 
Ghelyc Dauidt/ de victorieuste ghenaemt
 
Die onder den volcke de naeme drouch
 
Om dat hy den vppercapeteyn verslouch
435
Waer by tgheheelle heer wiert ghescuert.
Eenich
 
Dauidt presenteerde/ fray onghetruert
 
Thooft van Golyam/ jn scuenyncx handen.
Redel.
 
Schelycx zal den conync vande Vrancxsche landen
 
Onse keyser Kaerle/ worden ghepresenteirt
440
By Borbon ende Piscare/ die hy onghecesseirt
 
Beghiften zal wel ende duechdelic+
 
Ende ontfanghense beede blyde ende vruechdelic.
 
Sy worden vry hooghelic/ by dien gheloont.
Eenich
 
Sy zyn weert te zyne ghecroont
445
Ende al dandre capiteynen ghemeene.
 
Want daer waeren Fransoysen twee jeghen eene
 
Alzo jc Eenich wel hebbe ghehoort.
Redel.
 
Van Menich Eenich hebben zy twoort
 
Ende eere vander victorie ongheviert
450
Om dat den conync ghevanghen wiert
 
Onder huerlieder aermeye clouc ende vayljant.
Menich
 
Wy Menich ende Eenich an elcken cant
 
Hebben wel cause om te verhueghene
 
Ende Gode te danckene/ naer onsen vermueghene
455
Dat onsen keyser/ dese victorye heift vercreghen.
Redel.
 
Daer omme was vryndaghe/ omme ghedreghen
 
Tweerde heleghe bloet/ met processien scoone
 
Om te biddene Godt jnden troone
 
Dat hy kerstenrycke/ wille stellen jn vreden.
Eenich
460
Saterdaghe was ouer de sielen ghebeden
 
Vanden versleghene/ an beede de zyden.
Menich
 
Nu moet Menich/ met Eenich verblyden
 
Duer de victorye/ van zynen heere.
Redel.
 
Tes redene naer sapostels leere.+
465
Metten drouuen salmen/ altyts bedrouuen
 
Metten blyden moeter blyscepe behouuen.
 
Tes recht want et bewyst nathuere.
Eenich
 
Als den Hooghen Wynt stoormich ende stuere
 
De lucht beroert/ deimster ende druckich
470
Dan es elckerlyc zyn hooft jntruckich.
 
Maer wanneer de lucht es scoone ende claer
 
Menich ende Eenich/ ghaet hier ende daer
 
Wandelen spaceren/ blyde ghemoet.
Menich
 
Ghelyckerwys dat de crudekins zoet
475
Byden Zoeten Reyn/ huer roke vut scieten
 
Schelycx moet ons blyscepe/ vut vlieten
 
Duer de victorye/ die in sweerels pleyn
 
Godt ghegheuen heift/ den Zoeten Reyn
 
Kaerle onsen keyser/ hier vp deerde
480
Dien wy daer by ghelycken tzynder weerde
 
Syn hoocheyt te gheender cleenicheyt ghesproken.
Redel.
 
Jn dese scoone victorye/ es beloken
 
So groot weluaren duecht ende proffyt
 
Dat sichtent Christus doot ghebenendyt+
485
Ende daer te vooren ter weerelt was vonden.
Eenich
 
Godt wilhem verleenen/ tallen stonden
 
Goeden raet disscreit ende wys
 
Ende met voorsienichede/ een goet avys.
 
Want tes wel noot/ zo elc mach mercken.+
Menich
490
Den Heleghen Gheest wilder jn wercken
 
Ende verlichten zyn/ edele zinnen
 
Dat kerstenrycke/ mach pays ghewinnen
 
So mueghen wy leuen onghetruert.
Redel.
 
Voor Pauyen es desen slach ghebuert
495
Vp den selven dach/ ten seluen saysoene
 
Als Kaerle gheboren was ons keyser coene
 
Binnen Vlaendren/ der stede van Ghent
 
Jnt jaer van gracien doe zynde bekent
 
Ghelyc alst nv es/ gheseyt voorwaer
500
Juuste jn zyn/ vyf entwyntichste jaer
 
Daer hy als nv es jn ghetorden.
Eenich
 
Godt wilhem met zynder gracien begorden
 
Jn al zyn voortstel/ wercken ende doen.
Menich
 
Plus Oultre/ es zyn opynioen
505
Ghelyc hy stelt/ jn zyn deuyse.
Eenich
 
Syn faeme/ van victorieusen pryse
 
Sal ouer de gheheele/ weerelt vermeeren.
Redel.
 
Wy bidden hu/ eerweerdeghe heeren
 
Ons werck wilt jnde beste voude slaen.
Menich
510
Als simpele scolieren/ commen wy om leeren.+
Eenich
 
Dus bidden wy eerweerdeghe heeren.
Menich
 
Esser hiet messeyt/ willet ten besten keeren
 
Want ter eeren/ van onsen keyser eist ghedaen.
Redel.
 
Wy bidden hu eerweerdeghe heeren
515
Ons werck wilt/ jnde beste voude slaen.
 
Wilt danckelic nemen ons slicht vermaen
 
Want tes bestaen/ vut vieregher minnen
 
Des sHelichs Gheest ende der Drie Santinnen.

†A†M†E†N†


Vorige Volgende

Over dit hoofdstuk/artikel

datums