Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.tSpel van een Sanders welvaren.
Ao. 1511.

Meest Elc.
Practyckeghe List.
Suptyl Bedroch.
Eyghen Wasdom.
Dommenacie van Goede.
Een sanders Welvaren.
Ghethughe der Waerheyt.
+ Meest Elc.
 
De zinnen jnwendich/ zyn zo ontstelt
 
Fantasye eenpaerlic/ licht my en quelt
 
Met sulker ghewelt/ jc en cans gheweerren.
 
Therte tot alder beroerten helt.
5
Redene verstant es ter neder ghevelt
 
Als snee die smelt/ duer thittich vertheerren
 
Om huer wiens ghebruuc/ jc moet ontbeerren
 
Twelc my doet deerren/ jn allen saken.
 
Huer sderuens/ doet my/ de leden zweerren.
10
Mach myn begheerren/ corts niet gheraken
 
An huer naer wien/ de zinnen haken
 
So zal my slaken/ solaes ende vruecht.
 
O Domninacie van Goede/ begheerlicke juecht
 
Prysweerdeghe duecht/ groot van loue
15
Mochtic gheacht zyn/ binnen uwen houe
 
Buten den scoue/ des scommers bedwanc
 
Soudic vry zyn/ myn leuen lanc
 
Daer jc nv den banc/ besitte van soorghen.
 
Hebbic hedent tdeen/ tdander ghebreict my moorghen
20
Twelc jc lueteren boorghen/ met scaemten groot
 
Dicwylen moet/ hier ghesproken bloot.
 
Dit en ware gheen noot/ tmoet wel verclaert zyn
 
Mochtic noch met hu/ ghepaert zyn
 
So zoudic vermaert zyn/ daer jc bem versmaet.
25
Maer non forche/ jc weet noch raet.
 
Sonder verlaet/ om te scuwene twist
 
Willic ghaen soucken/ Practycke[ghe]n List.
 
Vry onghemist/ by sulcke kueren
 
Sal my de scoone/ wel/ ghebueren.
30
Dus zonder trueren/ willic pooghen te ghaene
 
Daer jc hem wel/ te vyndene waene
 
Want ter menegher baene/ doet hy zyn zoopkin zieden.
Practyckeghen list.
 
Waer by en zoudic?+
Suptyl bedroch.
 
Wye zout hu verbieden?
Pract.
 
Van my seluen houdic.
Suptyl
 
Men pryst sulcke lieden.
Pract.
35
Metten stouten verboudic.
Suptyl
 
Vanden blooden wilt vlieden.
Pract.
 
Waer by en zoudic?
Suptyl
 
Wye zout hu verbieden?
Pract.
 
Alle listen ontvoudic
Suptyl
 
Om sprofyts bedieden.
Pract.
 
Die my volghen bescoudic
Suptyl
 
Met sghiericheyts myeden.
Pract.
 
Waer by en zoudic?
Suptyl
 
Wye zout hu verbieden?
40
Tmoet zo ghescieden/ wient es onvramelic.+
Pract.
 
In allen plaetsen/ bem ic bequamelic.
 
Meest Elcken namelic/ aerm ende rycke
 
Es my anthierende/ jn elcken wycke.
 
By myn listeghe pratycke/ zy naer de bate staen.
Suptyl
45
Selfs dappelwyfs/ die achter strate ghaen
 
Wilt hier of de date slaen/ ten verstande
 
De welcke fruut draghen/ menegherande
 
In hue[r]lieder mande/ vut dyueersche hooppen
 
Siet men by mynen/ toedoene vercooppen
50
Dies zy hem cnoopen/ an mynder lyne.
Pract.
 
Myn reyngnacie es meest.
Suptyl
 
Dat blyct an tscyne.
 
Elc dyueersch van myne/ volcht hu zonder blusschen.
 
Dan gheraecicker altemets/ onder tusschen
 
Niet achtende twee musschen/ wient scaet of hindert.
Pract.
55
Daer esser by uwen/ toedoene vermindert
 
Wien de smarte noch zindert/ jn siele in lyfue.
Suptyl
 
Men vynter meer/ dan hondert waerf vyfue
 
Die met mynen bedryfue/ hem noch onderwynden.
Pract.
 
Jc zouder vry/ noch ghenouch vynden
60
Wildic ontbynden/ mynen secreten bouck
 
Die an my ende hu/ doen daghelicx besouck.
 
Jn sonden clouck/ zy hem totten croppe mynghen.
Suptyl
 
Als dese joncxskins eerst/ vutten doppe sprynghen
 
Ende noppe brynghen/ maer hem versnellen
65
Allomme te wesene/ met goede ghesellen+
 
Dan sietmense vellen/ an hu boort.
Pract.
 
Om wat jn dhandt.
Suptyl
 
Dats een waer woort
 
Dies ghyse rechte voort/ helpt zonder vieren.
Pract.
 
Bedy weetic/ de fynanchieren
70
In sweerels regieren/ om profyt te handt
 
Leenen zy wel/ vp juweel of pandt
 
Dies zy den brandt/ der benauden stelpen.
Suptyl
 
Die gheen en hebben
Pract.
 
Se cunnense ooc helpen.
 
Niet achtende twee scelpen/ jc doese als bevroeder
75
Vercooppen vp de doot/ van vader ofte moeder
 
Suster ofte broeder/ daer zy of zouden deelen
 
Of vp de toecomste/ van eeneghen parcheelen
 
Dies zy hem zeelen/ onder Royghems verduwen.
 
Andre vercoopmen/ vp huerlieder huwen.
80
Mae[r] meest zy scuwen/ daer niet staet vp te dakene.
 
Eist damast/ cameloot/ ofte Brugsch lakene
 
Jc weet te makene/ by myn deuoor
 
Als zyt ghecocht hebben/ jn tdeen contoor
 
Biet my ghehoor/ zonder verlangghen
85
Jc doese ter stont/ tghelt ontfanghen
 
Eer zy nemen de ghanghen/ vutte[t] selue huus.
Suptyl
 
Hoe maectge dat?
Pract.
 
Verstaet tconcluus.+
 
Tes een abuus/ jn swoorts belyden.
 
Daer staet een ander/ contoor bezyden.
90
Alssy zonder vermyden/ willen verkiesen
 
Vp een cleen coopmanscepe/ al sotte riesen
 
Om verliesen/ der ponden drie of twee
 
Ter stont ontfanghen/ zy tgheree
 
Waer by zy tghelee tHuutkercke pachten.
Suptyl
95
Alsse jn voochdie zyn
Pract.
 
Sy dat niet en achten
 
Maer lieuer wachten/ dan den coop zoude verscuut zyn
 
Of dat zy van cleen wasdom zouden ghesnuut zyn
 
Tot datse ghehuut zyn/ acht daghen of tiene.
 
Dan beghuntmen/ naer eenen notaris te ziene.
100
By sulcken engiene/ worden deze joncxskins verdult.
 
Dan maectmer brieuen/ dan kentmer scult.
 
Sulc ghier zyn kiste vult/ niet vreesende tghedreech
 
Van Godt almachtich.
Suptyl
 
De handt steicjcker jnt deech.
 
Men zout tasten ande weech/ by sulke malicien.+
Pract.
105
Dan zynder dese gheestelicke/ beneficien
 
Die men by condicien/ jnt wisselen barteirt.
Suptyl
 
Vercoopmen die?
Pract.
 
Neent
 
Maer men vraecht/ watse weert zyn gheabsenteirt
 
Eer mense resmeert/ by ghelde ofte ghifte.
 
Men zoudt qualic stellen/ jn ghescrifte+
110
Wat Meest Elc/ by mynen toedoene braut.
Suptyl
 
Dan zynder dese amoureusen/ alzo men scaut
 
Wien liefde cnaut/ met hitten vierich.
Pract.
 
Die soucken my daghelicx/ euen ghierich.
 
Seer onbestierich/ zy naer my bysen.
Suptyl
115
Sy soucken my ooc jn menegher ghysen
 
Dies jcse moet prysen/ jn dagen jn weken.
 
Als zy elc andren/ niet en mueghen spreken.
 
Tes wonder de treken/ die zij dan voort stellen.
Pract.
 
Twee ghelieuers/ die tsaemen/ accoort rellen
 
Siet men an myn boort vellen/ jn menegher mannieren.
Suptyl
 
Wy hebben varyncx/ ouer al tregieren
 
Dies wyt bestieren/ zonder beweerrynghe.
Pract.
 
Jn dyueersche coopmanscepe
Suptyl
 
Jn meeneghe neerrynghe
 
Heift [men] ons begheerrynghe/ jc moet ontdecken.
Pract.
125
Ghelyc dese ghiereghaerts jn dyueersche plecken.
 
Gheraect mense jnder necken/ by ghierich ouervals
 
Sy gheraecken scamel volc/ wel jnden hals
 
Sonder veil ghescals/ al zoude sulc verdueten.+
Suptyl
 
Selfs dese kynders alsse scieten met nueten
130
Of alsse kueten/ jn huerlieder spil
 
Elc bysondere/ ons anthieren wil.
 
Eist dan verschil/ dat houders naer ons luusschen?
Pract.
 
Wy zyn in alle spelen.
Suptyl
 
Eist dobbelen tuusschen
 
Allomme wy ruuschen/ onbeweerlic.
Pract.
135
Meest Elc ouer al/ es ons begheerlic
 
Gheestelic ende weerlic/ puer zynde verblent.
Suptyl
 
Alsmen van duuen coudt/ gheerne zynser ontrent.
 
Hu woorden spent/ slacht niet de verwaende.
Pract.
 
Waer omme?
Suptyl
 
Meest Elc/ comt hier ghaende.
140
Van monde zyt slaende/ sulc woords verhalen.
Pract.
 
Naer dat hy ons zouct/ hem moet wat falen
 
Twelck jc haest weten zal/ jc darfs me berommen.
Meest elc
 
Ghegroet weist bede.
Suptyl
 
Wel zyt ghy ons commen+
 
Meest Elc bouen sommen/ ghezworen by eede.+
Pract.
145
Wilt met ons plucken/ der vruechden blommen.
Meest elc
 
Ghegroet weist beede.
Suptyl
 
Wel zyt ghy ons commen.
Pract.
 
Die ons beclappen/ weynschic te worden als stommen
 
Of te aperen jnde drommen/ des droufheyts weede.
Meest elc
 
Ghegroet weist beede.
Suptyl
 
Wel zyt ghy ons commen
150
Meest Elc bouen sommen/ ghezworen by eede.
Pract.
 
Waer neimpge den ghanc?
Suptyl
 
Spreict by besceede.
Pract.
 
Seght hu belanc.
Suptyl
 
Slacht niet de ghedweede.
 
Ontdect jnt breede/ wat hu belieft.
Pract.
 
Mescomt hu hiet?
Suptyl
 
Sytge ghegrieft?
Pract.
155
Wat mach hu deerren?+
Suptyl
 
Ons dat nv brieft.
 
Huwen druck wort gheclieft/ eist jn ons macht.
Meest elc
 
Och de zinnen zyn ontrust/ dach ende nacht
 
Dies de cracht/ myns juechs verdwynt.
Suptyl
 
Ghy heescht hu te vele.
Pract.
 
Te zeere ghy hu pynt.
Suptyl
160
Sytge bestouen met den mele?
Pract.
 
My dyncke jaeyhy/ zoot scynt.
 
Alle zwaerheyt verslynt/ ende therte ontlast.
Suptyl
 
Meest Elc es swaermoedich/ wanneer hy vast.
 
Als abstinencie hem tast/ bezwaert den gheest.
Meest elc
 
Ten houdt my daer niet.
Pract.
 
Wat deert hu dan meest?
165
Ontdeckt den keest/ met cloucken daden.
Suptyl
 
Al waert ghy met Venus packe gheladen
 
Wy zouden hu beraden/ wel by gheual.
 
Let hu daer of?
Meest elc
 
Daer houdet my al
 
Twelc breet en smal/ myn vruecht doet ontglyden.+
170
Om hier of quytte te zyne/ jn corten tyden
 
Hebbic zonder vermyden/ hu beeden ghesocht.
Suptyl
 
So en waert ghy/ jn langghe bet gherocht.
 
Weist vroylic bedocht/ ende wilt verhueghen.
Pract.
 
Ghy hebt de lieden/ die hu helpen mueghen.
175
Scuut vry de vlueghen/ des zwaerheyts vloet.
Suptyl
 
Ontdect hu herte.
Pract.
 
Secht wiet hu doet.
 
Verlicht den moet/ doet als de vroede.
Suptyl
 
Hoe esse ghenaemt?
Meest elc
 
Dommenacie van Goede
 
Heift my jn gloede/ dus vierich ontsteken.
180
Tverstant es bedwelmt/ redene es besweken
 
By welcke ghebreken/ jc moet belyden
 
Es thooft vul fantasyen jn allen zyden.
 
Jc en cans vertyden/ hoe jcx my pooghe.
Suptyl
 
Ghy laetet hu te naer ghaen.
Pract.
 
Ghy neimptet te hooghe.
Suptyl
185
Vliet sulcke ghepeynsen zwaer zaen+
Pract.
 
Eer juecht verdrooghe.
 
So mach by ghedooghe/ ruste vp hu daken.
Meest elc
 
Therte es zo beroert/ jc en weet wat maken.
 
De zinnen die blaken/ tinwendich ghedachte
 
Es fantaserende/ by daghe by nachte.
190
Al wildic by crachte/ jc en cans niet myncken.
 
Eist jnt ghaen staen/ eten of dryncken
 
Tghedyncken/ en can vut my niet verpercken.
 
Bem jc thuus vpt strate/ of jnder kercken
 
Of jn wat ghewercken/ anhoort deis lesse
195
Biddic/ lesic/ ofte hooric messe
 
Altoos zo esse/ my jnt ghedochte
 
Vut welcker causen/ dat jc hu sochte
 
Vp dat jc mochte/ hier of worden verlaten.
Pract.
 
Jc weet hu raet/ dus wilt hu saten
200
Tot uwer baten/ gheseyt ongheloghen.
 
My comt daer wat jnt hooft ghevloghen.
 
Ten es niet ghesoghen/ vut Botteghems tutere.
Suptyl
 
Laet varen swaerheyt.
Pract.
 
Syt dies vermutere.
 
Ghelaet hu als een rutere/ clouc van corage.
Suptyl
205
Wilt ghy Domnacie van Goede/ thuwer avantage
 
In sweerels passage/ als de gheengiende
 
So moet ghy noch eenen hebben te vriende
 
Anders en diende/ hu moeyte niet een vlas crom.
Meest elc
 
Wye es die?+
Pract.
 
Eyghen Wasdom.
210
Die helpse ras som/ zonder vertraghen
 
An huer daer hu de zinnen toe draghen
 
Dies men de claghen/ huer sdroufheyts spennen ziet.
Meest elc
 
Waer mach hy wuenen/ jc en kennen niet
 
Dies jn sdroufheyts rennen vliet/ therte stuenachtich.
Suptyl
215
Jnt Huus van Neersticheyt/ eshy wuenachtich
 
Daer Domnacie huer hout/ vul zoorgheghe vlegghen.
Meest elc
 
Hoe zoudicker gheraken?
Pract.
 
Jc salthu segghen.
 
Maer zin moet ghy legghen/ hier vp ghist
 
Om te volghen my/ Practyckeghen List
220
Ofte anders verquist/ ghy tyt ende moeyte.
 
Wilt ghy ontsleghen zyn/ vut tswaerheyts gheboeyte
 
Ende zonder vernoeyte/ rusten jn vreden
 
Oorboort my allomme/ met behendicheden
 
So sult ghy haest kneden/ jn svoorspoets troch.
Suptyl
225
Ende antierge my/ ooc Subtyl Bedroch
 
Te eer sulge noch/ Eyghen Wasdom vynden.
Meest elc
 
By wat condicien?
Pract.
 
Jc salthu ontbynden.
 
Wilt ghy ons bewynden/ zyt niet verbolghen.
 
Wy sullen hu leeden/ dus wilt ons volghen.+
230
Houdt de weghen verswolghen/ jn hu euen groene.
Meest elc
 
My en roucx/ wat my staet te doene
 
Machic als de coene/ jn corter tyt zyn
 
Van mynder zwaermoedicheyt/ verlicht verblyt zyn
 
Ende int bevryt zyn van huer dien ic minne.
Pract.
235
Jae ghy trauwen/ maer eerst ten beghinne
 
Moet ghy met zinne/ dit wel onthout
 
Nauwers bloot zyn/ maer allomme stout
 
Ende jn uwen cout/ van talen mannelic
 
Lichtelic nemen/ maer gheuen wannelic
240
So wort ghy spannelic/ der Domnacie croone.
Suptyl
 
Doet ghy coopmanscepe/ tjeghens eenich persoone
 
Van ware scoone/ verstaet de dynghen
 
Coopter slichter toe/ vp dat mense mach mynghen.
 
Doetse vry sprynghen/ myn redene anhoort+
245
Suptylic jn dandre.
Pract.
 
Ende vercoopse dan voo[r]t
 
Hyeuwers zuudt noordt/ ten meeste profytte.
Suptyl
 
Maer zoudge verliesen
Pract.
 
So makes hu quytte
 
Anhoort de vytte/ zonder eenich verdrach
 
Vp datse hu/ te bet ghelden mach.
250
Gheift een jaerkin dach/ of yedt jnden steert.
Suptyl
 
Ende hebt ghy ware/ die men begheert+
 
Eer ghy coop anveert/ hout hu daer of styf.
 
Vercoopse ten diersten/ tzy man of wyf
 
So crycht ghy tbeclyf/ valt niet als de slichte.
Pract.
255
Ontfaet hu ware ruum.
Suptyl
 
Gheift scaers ghewichte
 
So muecht ghy lichte/ Wasdom verweruen.
Meest elc
 
Twaere tjeghens Een sAnders Weluaren.
Pract.
 
En achs niet twee sceruen.
 
Soudt ghy Wasdom deruen/ om een sanders gherief?
Suptyl
 
Hebt ghy Domnacie/ van Goede lief
260
Een sander[s] grief/ en muechge niet wachten.
Pract.
 
Wat ghaet ghy vp Een sAnders Weluaren achten?
 
Wilt scachten/ de zinnen vp hu verkies.
Meest elc
 
Jc sachse gheerne
Suptyl
 
Wat achtic dies?
 
Ghy moet nv sceeren tvlies/ al waert ghevleghen
265
Wilt ghy jn weilden sitten.
Meest elc
 
Jc bemder toe gheneghen.
 
Sulc pleghen/ en lietic duer nyemende gheene.+
Pract.
 
Jn al hu handtghewerck groot ende cleene
 
Generael ghemeene/ moetge suptyl zyn.
Meest elc
 
By wat condicien?
Suptyl
 
Wilt zonder ghyl zyn
270
Ende jnt hooren abyl zyn/ myns woords ghewaghelic.
 
Maect hu werck oncostelic/ jent ende behaghelic.
 
Dat men nv draghelic/ onder tvolc anthiert
 
Souct daer jn list.
Pract.
 
Alle nyeuwicheyt versiert
 
Men zalhu prysen ongheviert/ binnen sweerels lysten.
Suptyl
275
Hout grauytheyt.
Pract.
 
Doet den buck vysten
 
Maer prysten/ die hu biet ghewin.
Suptyl
 
Den rycken dient vry eenen pennync min.
 
Daer licht bate jn/ hebt dies versinnynghe
 
Meer dan jn de aerme.
Meest elc
 
Waer omme?
Pract.
 
Anden rycken licht de meeste winnynghe.
280
Sverstants jnnynghe/ es goet om bevaten.
 
Die doen meest verdienen.
Suptyl
 
Daer ligghen de baten.+
 
Scamel van staten/ die commen selden.
Pract.
 
Dats tminste proffyt.
Suptyl
 
Doet die meest ghelden.
 
So sult ghy met ghewelden/ vut bescaet dryuen.
285
Dat ghy neimpt den aermen
Pract.
 
Den rycken gheift.
Suptyl.
 
So zal elc jn zynen staet blyuen.
 
Wilt by ons raet blyuen/ zonder verlech zaen.
Meest elc
 
Eist noch varre?
Pract.
 
Ghy moet noch desen wech ghaen
 
Wilt naer ons ghesech staen/ zonder slapen.
Meest elc
 
Hoe esse ghenaemt?
Suptyl
 
Rapen ende Scrapen
290
Medecynael van zapen/ thuwen ghesonde.
Pract.
 
Wat ghy vercrycht
Suptyl
 
Binnen sweerels ronde
 
En ontsiet gheen sonde/ van vrient of ghast.
Pract.
 
Wat ghy ghecrycht+
Suptyl
 
Houdet vry vast.
Pract.
295
Syt vreck van uwen pennync.
Suptyl
 
Al hebben zy last
 
Daer vp niet en past/ een hynckel maelge.
Pract.
 
Au ziet
Meest elc
 
Wat dynghe
Pract.
 
Eyghen Wasdom licht/ up zyn baelge.
 
Syt als een kaelge/ clouc ghemoet.
Suptyl
 
Spreict hem toe.
Pract.
 
Hem feestelic groet.
300
Corts wort gheboet/ uwen quets teenenmale.
Meest elc
 
Hem willic ghaen spreken by speciale.
 
Mynder siecten quale machy ghenesen.
 
Weist minnelic ghegroet.
Eyghen wasdom.
 
Meest Elc vrient ghepresen
 
Secht my macht wesen/ de saken onghespleten.
305
Waer zytge vp reyse?
Meest elc
 
Dat sult ghy weten.
 
Myn verlanghen onghemeten/ zwaer ende gruwelic+
 
Muecht ghy beteren.
Eyghen
 
Weist druck verduwelic
 
Swaermoedicheyt scuwelic/ ende sulcke resten
 
Van datic vermach binnen sweerels vesten
310
Es thuwen besten/ als vrient vul trauwen.
Meest elc
 
Jc hebbe hu ghesocht/ jn dyueersche landauwen
 
Onder mannen en vrauwen/ wat dienet versweghen.
 
Hadden dese twee/ my niet ghewesen de weghen
 
Te mynder onseghen/ qualic by myn vpstel
315
Haddic hu vonden.
Eyghen
 
Ic gheloofs hu wel.
 
Laet my weten snel/ de cause als ghebriefde
 
Dat ghy my zouct.
Meest elc
 
Och et doet liefde
 
Die my als ghegriefde/ heift zonder jolen
 
Redene verstant ende kennesse ghestolen.
320
Dus moet jc dolen/ radeloos zonder troost
 
Ten zy hu hulpe.
Eyghen
 
My te segghene gloost
 
Wye hu dus noost/ jc hebbes wondere.
 
Hoe esse gheheeten?
Meest elc
 
Die my hout tondere
 
Huer liefde bysondere/ my jnwendich broeyt
325
Dies thooft by fantasien es zo vermoeyt
 
Twelc my vernoeyt/ dus bem jc ghewent+
 
Tot Domnacie van Goede die ghy wel kent
 
Als principael regent/ van huerer pale.
 
Hu biddic dat ghy/ wilt voeren myn tale
330
Ende leeden ter sale/ daer jcse mach scauwen zaen.
Eyghen
 
Wilt my volghen/ zonder verflauwen zaen.
 
Bedauwen zaen/ zal troost thuwer baten.
 
Siet hier de zoethueneghe zoete garnate
 
Hooghe van state/ voorspoedich becleet.
Meest elc
335
O duerluchteghe robyne/ duer wien jc leet
 
Cout ende heet/ vele hebbe ghedoocht
 
Hu biddic dat ghy/ mynen aerbeyt behoocht
 
Wederjonste bethoocht/ scoon blomme eerbaer.
 
Ghy behooret te doene.
Domnacie van goede.
 
Jc kent tes waer.
340
Wye my volcht naer/ hoedanich hy zy
 
Hem moetic onderdaen zyn/ jc doets bely.
 
Want Godt heift my/ daer toe vp sweerels moude
 
Gheordoneirt.
Eyghen
 
Dies hy gheerne zoude
 
Binnen uwen onthoude/ ende sauvegaerde
345
Syn ghestelt by hu als de vermaerde
 
Want hy hu ghesocht heift met suptylen keere
Domnacie
 
Eyghen Wasdom cleedt hem met tydelicke eere
 
Onthoudt myn leere/ vulcomt myn vermet
 
Doet hem tsoorghens habyt vut onghelet.
 
Dan worthy gheset zo jc ghewaghen zal.+
Eyghen
 
Jc salt vulcommen zonder vertraghen al
 
Vp sweerels behaghen wal/ hu beuel.
 
Meest Elc doet zoorghe vut/ sciet dit an snel.
 
Lecht of tghequel/ tot uwer vrame.
355
Jc sal hier mede cleeden/ uwen lichaeme.
 
Men sal naerden betame/ hu eeren dan.
Pausa cleene.
Suptyl
 
Nu blyctge eere/ der heeren.
Pract.
 
Nu zytge een man.
Suptyl
 
Met dese cleeren
Pract.
 
Sal tvolc commen an.
Suptyl
 
Hu proffyt zal meeren
Pract.
 
Jn sweerels ghespan
360
Van Pieter of Jan/ ghesproken plat.
Suptyl
 
Ghy wort verheuen jn sweerls ghewat
 
Als Darius scat/ wat baet datment heilde.
Domnacie
 
Sit vp desen stoel van ghemack en weilde.
 
Alexanders beilde/ myn woorden versintse
365
Blyct ghy nv scynende.
Pract.
 
Nu zytge een caelge.+
Suptyl
 
Nu zytge een prinche.
 
Bemindse/ die hu hebben ghewesen den ghanc.
Meest elc
 
Hu allen tsamen zo weet jcx danc.
 
Myn leuen lane/ vrouch ende spade
 
Sallic voort leuen/ by uwen rade.
Pausa.
Eens sanders welvaren/ een vrauwe tamelic ghecleet.
370
Ach meer dan ach/ machic wel ghewaghen.
 
Gheclach meer dan gheclach machic wel claghen.
 
Want tallen daghen/ wast myn verdriet.
 
Verdrach meer dan verdrach/ moet jc verdraghen.
 
Ghevrach meer dan ghevrach/ mochtic wel vraghen
375
Waer by dit meshaghen/ my nv ghesciet.
 
Meest Elc die my minde/ vyandscip biet
 
My wetende niet/ hyeuwers of besculdich.
 
Hy die my volchde/ nv van my vliet.
 
By Practyckeghen List/ zo men nv ziet
380
Heift hy suptylic bespiet/ mids Bedroch ghehuldich
 
Dommenacie van Goede/ menichfuldich
 
My doende onverduldich/ leedt ommerynghen.
 
O Godt almachtich/ hoe muecht ghy ghehynghen
 
Meist Elc sulcke dynghen?/ By tghierich labueren
385
Wilt hy my/ gheheel te nieten brynghen.
 
Jc en can my niet dwynghen/ duer tsins bekueren
 
Jc zalhem berisspen/ al zoudict bezueren.
 
Ende moet jct betrueren/ by uwer ghenaden
 
So biddic hu heere/ staet my jn staden.
Pract.
390
Hoe greyt hu desen staet?+
Meest elc
 
Jc en cans versaden.
Suptyl
 
Naer Een sAnders Weluaert ghaet.
Meest elc
 
Jc hielpse lieuer verraden
 
Met bedriechghelicke daden/ by listeghe practycken.
Sanders
 
Dat doet ghy daghelicx/ allomme wel blycken
 
Jn dyveersche wycken/ onder shemels firmament.
395
O Meest Elc hoe comge dus blent
 
Daer ghy hu/ went tot Bedroch ende List
 
Daer ghy hier voortyts/ niet of en wist?
 
Den wech ghy mist/ ghy doolt vp tcromme.
Meest elc
 
Wye hooric daer?
Pract.
 
Ten es gheen stomme.
Meest elc
400
Doetse commen naer.
Suptyl
 
Wat gheifger omme?
 
Se zoude als de domme/ hu den gheest beroouen.
Pract.
 
Wystse voor by.
Suptyl
 
Soudge huer gheloouen
 
Ze zoude verdoouen/ gheheel hu vruecht.+
Sanders
 
Meest Elc by hu bem jc onthuecht.
405
Ghy deit my duecht/ jn voorleden tyden
 
Maer nv hindert ghy my/ an allen zyden.
 
Dese twee my benyden/ ende die ghelooft ghy
 
By huerlieder jnblasen/ hu verstant verdooft ghy
 
Byden welcken rooft ghy/ van mynen jolytte.
410
Ghy volcht Eyghen Wasdom/ met ghiereghen apetytte
 
Niet achtende een mytte/ wien ghy voorspoet beweert.
 
Ghy liecht/ ghy bedriecht/ ghy sweert ende ontzweert.
 
Maer vreest den steert/ tsal hu noch gruwen.
Pract.
 
Rust hu hooft.
Suptyl
 
Men salder matten mede luwen.
415
Eist quaet wilt scuwen/ zyn sondeghe smitte.
Meest elc
 
Eist sonde dat jc Dommenacie van Goede besitte
 
Of dat jc my vitte/ naer swasdoms chanche?
Sanders
 
Neent verstaet wel de arguwanche.
 
Pyndet ghy by vsanche/ der rechuaerdichede
420
Dese twee te weerren/ ende ghy jnde stede
 
My naer recht ende zede/ ghehuldich waert
 
Ghy en deit anders niet/ dan ghy sculdich waert
 
Daer by hu my menichfuldich naert scade ende lachtere.
Pract.
 
Hoortse staen lieghen.
Suptyl
 
Ghelyc eenen wachtere.
 
Se slacht den trachtere/ die gheen nat en houdt.+
 
Sou gheift hem tsyne.
Sanders
 
Och hoe zytge dus stout
 
Meest Elc jonck hout/ mannen ende vrauwen
 
Dat jc by hu ofjunstich beknauwen
 
Moet blyuen vul rauwen/ jn trybulacien pynelic.
430
Hu deert dat de zunne/ jnt water es scynelic
 
Byden toedoene fenynelic/ quaet ende spyttachtich
 
Van List ende Bedroch/ die my zyn verbyttachtich
 
Twelck Godt hu verwytachtich/ zal zyn verwyttelic.
 
Ghy thoocht my tghelaet/ scoon ende jolyttelic.
435
Maer gheveynst ypocryttelic/ achter den rugghe
 
Stroyt ghy hu fenyn/ al heuen vlugghe
 
Benemende de brugghe/ van Voorspoedeghen Ghanc.
 
Omde liefde die ghy draecht/ met jonsten stranc
 
Naer sWasdoms gheclanc/ telcker spacie
440
Biet ghy de ooren.
Meest elc
 
Sgoets Dommenacie.
 
Oock hebbic de gracie/ van wilt ende them
 
By hem vercreghen.
Sanders
 
Mindt my als hem
 
Ende hem als my/ euen ghelyck
 
Scuwende List ende Bedroch vp sweerels dyck
445
Doende aerme ende ryck/ jc moet ontweluen
 
Bet noch weerssere dan hu seluen
 
Of ghy sult hu deluen/ zyt dies afgrysere
 
Jnt helsche vier.+
Pract.
 
Stilt uwen clap.
Suptyl
 
Steict uwen bysere.
Pract.
 
Met al uwen snap
Suptyl
 
Ghy smeidt coudt ysere.
450
Hy es wysere/ dan ghy jn zyn saken ghetydich.
Sanders
 
En weist niet al Caym/ vp Abel nydich
 
Wiens offrande ghebenendydich/ voor Gods magesteyt
 
Was bequaeme/ ende de zyne ontseyt
 
Twelc Caym heift mesgreyt/ zynde by dien ghestoort
455
Heift zynen broeder/ om zyn weluaren vermoort
 
Dies Godt rechte voort/ zo scriftuere ghewaecht
 
Hem heift naer zynen broeder ghevraecht
 
Niet dat Godt was ontjaecht/ de wete van dien
 
Maer om dat hy zyn vonnesse zoude belien
460
Ende ooc om tcastien/ van zynder mesdaet.
 
Maer Caym verhart blyuende obstinaet
 
Godt zonder verlaet/ vermalendyde deerde
 
Dat hy gheen vruchten/ en creech van weerde.
 
Dese plaghe hem deerde/ zo langhen tyt groot
465
Tot Lamech/ hem onwetelicken duerscoot
 
Hem brynghende ter doot./ Dus wiert hy ghehendich
 
Omdat hy zyn broeder benyde.
Meest elc
 
Noynt en dedic moort.
Sanders
 
Ey aerme verblendich
 
Al was Caym ghescendich/ Abel van tleuen+
 
De mesdaet naerden hebreeuschen vutgheuen
470
En was niet beseuen/ voor Gode zo zwaer
 
Als de generacie die van Abel zoude naer
 
Hebben ghecommen voorwaer/ dit seght de gloose.
 
Schelycx al volcht ghy Wasdom te menegher poose+
 
Doet ghy gheen [noose]/ tzy wyf ofte man
475
Van Een sAnders Weluaren/ te min lichter an.
 
Maer lachen jc en can/ hu niet exscuseren.
 
Al zoudt hu smerten/ om myn mineren
 
Ghy zout hu verneren/ om my jnt streck
 
Den wulf te jaghene/ jnden bec.
480
Wien dat lydt ghebrec/ ghy en achs een meese.
 
Al ziet ghy dolen/ weduwe ofte weese
 
Ghy en hebt gheen vreese/ ghy en ontsiet gheen plaghen.
 
Maer ziet wel toe/ hu naken de daghen
 
Dat ghy sult ghewaghen/ wee meer dan wee.
485
Dan wordet te late.
Meest elc
 
Jc en achs niet een slee.
 
Myn bloet alree/ by uwen clap verstorbeirt.
 
Jc rade dat ghy/ van uwen snater cesseirt.
 
Hoe ghy meer arguweirt/ hoe jc min doen zal.
 
Om dese te latene/ sallic my spoen smal.
490
Dit muechge ghevroen al zoudge vernuetelen.
 
Wat hebbic hier te beseghen hu pruetelen?
 
Ghaet wilt hu scuetelen/ onder uwe conrooten.
 
Heftge van hier.
Pract.
 
Gheifse sulcke stooten.
 
Soudge [hu] laten verblooten/ van een wijfue?
Meest elc
495
Hefge van hier met uwen ghekyfue+
 
Eer by mynen bedryue/ hu ghescie meerder leet.
Sanders
 
Lieuer sallic nemen/ tvertrec ghereedt
 
Dan ghy my wreet/ bouen wreetheyt zout bieden.
 
O Godt hoe muecht ghy laeten ghescieden
500
Dat Meest [Elc] de lieden/ dus versteict?
 
Syn ghiericheyt/ myn berisspen van hem doet vlieden
 
Niet achtende twee wieden/ wat men seght of preict.
 
Want vp my die hem/ jn duechden toe spreict
 
Wreict/ hy zyn quaetheyt/ vut een nydich verstooren.
505
Nichtemeer verstants jn hem en leict
 
Dan of hem ghepeict/ toe waren dhooren.
 
Nochtans sallic noch caritate oorbooren
 
Ende ghaen al vooren/ met ghewillegher jntencie
 
Om Ghetughe der Waerheyt/ tmynder assistencie.
510
Syn eloquencie/ salhem trecken vut bescaetheyt
 
Want by duechden verwint men alle quaetheyt.
Pausa cleene.
Meest elc
 
Ic en zalhu niet laten jn sweerels pleyn
 
Myn weerdste greyn/ om nyements screeuwynghe.
Pract.
 
Twyf es huer ghanghen
Suptyl
 
Met al huer wreeuwynghe.
Pract.
515
Wye zoudse verstranghen?
Suptyl
 
Ses vul cabeeuwynghe.
 
Met fleeuwynghe/ zoudse gheerne Meest Elc ontlocken.+
Pract.
 
Se wil bemindt zyn
Suptyl
 
Ende ons doen focken.
 
Maer eer quaeme de clocken/ vande torren.
Pract.
 
Huerlieder cout viel zoet.
Suptyl
 
Als verckens die cnorren
520
So hoordicxse porren/ by eenen nyt groen.
Pract.
 
Gheerne warese gheholpen.
Suptyl
 
Waen ze speilt slytscoen.
 
Maer mocht hy proffyt doen/ zo liet jct goet zyn.
Pract.
 
Eyghen Wasdom doet hem te vroet zyn.
 
Hy moeste ghebroet zyn/ van eenen andren eye.
525
Dan volchthy ons beeden naer onsen greye.
 
Al liepse tot meye/ zen ghecreghe niet een luus.
Suptyl
 
Ghenouch van dien/ voor een concluus.
 
Laets slachten den muus/ doen ende zwyghen+
 
So mueghen wy te bet onsen wille ghecryghen.
Pausa cleene.
Sanders
530
Caritate/ verwect my/ te deser huere
 
Om Meest Elc te treckene/ vut ghiereghen labuere
 
Daer hy hem alduere/ mede heift verselt.
 
Myn heuenmeinsche/ Gods creathuer[e]
 
Eshy dus min jc hem/ by nathuere+
535
Al eshy vpstuere/ tmywaerts ghehelt.
 
Om Ghethughe der Waerheyt/ jn duechden verselt
 
Hebbic my ghestelt/ te weghe vierich.
 
By my wort hem/ de legende ghespelt
 
Ende ooc vertelt/ hoe onghemannierich
540
Dat Meest Elc zyn leuen es nv regierich
 
Met listen ghierich/ by Bedroch mespryselic.
 
Jc hebbe hem ghesien/ dus willic bestierich
 
Een groeten verchierich/ hem gheuen wysselic.
 
Eerweerdeghe weerdicheyt/ bouen der eerden rysselic
545
Wilt my avysselic/ met rade bevroeden.
 
Meest Elc die nu es dolende zeer hysselic
 
Syn blentheyt afgrysselic/ naer myn bemoeden
 
Salhem duchtich brynghen jn dhelsche gloeden.
 
Dus wilt hu spoeden/ eert wort te late.
550
Wilt hem met uwer leerynghe bevroeden
 
Ende zyn siele voeden/ duer caritate.
Ghethughe der Waerheyt ghecleet als een Moyses met twee steenen taeffels jn dhandt.
 
Ryst vp eerweerdeghe duechdelicke van state
 
Minsameghe aduocate/ vul eeren beglent.
 
Seght hu belieuen.
Sanders
 
Och eerweerdich regent
555
Meest Elc puer blent/ sittende jn ghemac en weilde
 
By Domnacie van Goede/ wat dient dat jct heilde
 
Myn berisspen verveilde/ dit wel versint
 
Mids dat hy Eyghen Wasdom/ bouen my bemint
 
Niet rouckende hoe hyt wint/ anhoort myn spreken
560
Met List ende Bedroch/ alzoot es ghebleken
 
Heift my versteken/ ende bouen dien
 
Doet hy my hindre an allen zien
 
Huutden welcken mocht ghescien/ hoort mijn verhalicheyt+
 
So biddic hu om zynder sielen salicheyt
565
Dat ghy zonder dralicheyt/ of langgher ontbeerren
 
Hem te weghe helpt.
Ghetughe
 
Naer hu begheerren
 
Ende om een verweerren/ als een vroom vechtere
 
Sallic dit bescut nemen.
Sanders
 
Wat bescut eist?
Ghetughe
 
TWoort vanden rechtere
 
Sallic hem als een hechtere/ jnt herte zo echten
570
Dat hem zyn haeren/ vp sullen rechten
 
Onder heeren cnechten/ nyeuwers en bluesich.
Sanders
 
Ansiet hem sitten houeerdich pompuesich
 
Wiens wesen orghylieusich/ es voor Godt stynckende.
Ghetughe
 
Meest Elc wat zyt [ghy] peynsende of dynckende?
575
Mynen voys cly[n]ckende/ jnt herte vest
 
Hoe comt ghy hier jn dit sondich nest?
 
Hu waere best/ anhoort myn rellynghe
 
Hu anders te voughene.
Meest elc
 
Bederuic de wellynghe?
 
Laet my zonder quellynghe jn payse ghesust.
Ghetughe
580
Ghy moet my hooren.+
Meest elc
 
Jae endt my lust.
 
Laet my gherust/ en maect my gheen zwaerheyt.
Ghetughe
 
Jc Scriftuere/ gheheeten Ghethuge der Waerheyt
 
Om de openbaerheyt/ van uwe meshusen
 
Te kennen te gheuen/ daer ghy by abusen
585
Jnne zoudt verslusen/ by onwetender daet
 
Mids dat ghy Een sAnders Weluaren versmaet
 
Ende ooc behaet/ om Eyghen Wasdoms wille
 
So bem jc ghelaten/ vp sweerels hille
 
Vp dat ghy tgescille/ tusschen goet en quaet
590
Te bet zout weten./ Nochtans ghy hu mesgaet
 
So ghy byder daet/ nv zyt gethughelic.
 
Onder Bedroch ende List/ zyt ghy hu bughelic.
 
Huer leerynghe zughelic/ hebt ghy jnwendich ghesoghen
 
Waer by hu alle duechden zyn ontvloghen
595
Ghy wort bedroghen/ ende van Gods rycke ghesnuut.
Meest elc
 
Wat sallic doen?
Ghetughe
 
List ende Bedroch scuut.
 
Eyghen Wasdom verduut/ onder der caritaten subgecxie.
 
Bemindt Een sAnders Weluaren met gheheelder affecxcie.
 
Wilt ghy scuwen correcxcie/ ruumpt dese plaetse met zinne.
Meest elc
600
Hoe zoudicse ghelaten dien jc beminne?
 
Want als een goddinne/ hebbicxse jnt herte gheplant.
 
Huer byzyns/ es my zo bequaeme playsant
 
Twelc my [in] den brant/ van liefden claer
 
De zinnen ontsteken heift vp haer.+
605
Want waer/ ofte wat jn eenich bemercken
 
Dat jc bem doende/ by eenighe wercken
 
Jn cloosters of kercken/ ten baet gheen veynsen
 
Wille cracht memorie/ verstannesse ghepeynsen
 
Moet jc huer vercheynsen/ want vp sweerels ronde
610
En min jc nyement voor haer.
Ghetughe
 
Dats groote sonde
 
Een wonde des doots/ die de siele versmoort.
 
Maer jc brynghe hier/ dat ghy zuudt noort
 
Behoort te houdene/ zonder ghec of spodt.
 
Leist watter jn staet.
Meest elc
 
Bemindt bouen al uwen Godt.
Ghetughe
615
Dat es srechtvaerdichs/ rechter woort.
 
Maer gheen accoort/ van liefden reene
 
En draecht ghy tot hem.
Meest elc
 
Jc doe als andre ghemeene
 
Groot ende cleene/ clouc ende koene.
 
Jc hoore messe jc ghae ten sermoene.
620
Jc pyne te doene/ by daghe by nachte
 
Naer mynen vermuechghene.
Ghetughe
 
Vp Godt cleen ghedachte
 
Hebt ghy/ slachtende/ tgheslachte van Ysrael.
 
Binnen dat Moyses/ vp den berch was/ by Gods beuel
 
Wierden zy rebel/ jn ondancbaregher voude+
625
Versierende een calf/ makende van goude
 
Twelc jonghe ende houde/ vp dat ghyt weit
 
Hebben voor hueren Godt gheanebeit.
 
Godt wiert ontvreit/ zo by my staet ghewaecht
 
Datter vier en twyntich duust meinschen waren gheplaecht.
630
Hadde Moyses onvertraecht/ voor tvolc niet ghebeden
 
Godt haddese al ghedaen/ te nieten ter steden.
 
Ten waere daghelicx heden/ Gods ontfaermen zoet
 
Tzoude hu te naer ghaen.
Meest elc
 
Jc anbede nyement dan Godt.
Ghetughe
 
Voorwaer ghy doet.
 
Syt dies wel vroet/ tes daghelicx merckelic.
635
Vp sGoets Dommenacie leght ghy den zin sterckelic
 
Dat gheen clerc zo clerckelic/ by zynder leerynghe
 
Hu dies en can doen/ gheen ofkeerynghe.
 
Ende daer ghy de vermeerynghe/ van uwen zin toe lecht
 
Daer maect ghy/ uwen Godt of/ zo Pauwelus secht.
640
Verstaet dit recht/ zonder veil arguweren.
 
Eist niet zo?
Meest elc
 
Hoe zoudic my exscuseren?
 
Tabuseren/ therte verduustert ghelyck eenen smoock
 
Beneimpt tscyn der zunnen.
Ghetughe
 
Leist watter noch staet.
Meest elc
 
Bemindt hu heuen als hu seluen.
Ghetughe
 
Ghy mesghaet hu jn dit oock.+
 
Ghelyc den roock/ clemt jnde lucht
645
So clemt ghy houeerdich/ zonder vreese of ducht.
 
Al hoort ghy gherucht/ van berisspen menichfuldich
 
Hu en dynct niet datger of zyt besculdich.
 
Ende dien ghy ghehuldich/ behoort te zyne
 
Dats hu heuenmeinsche / tallen termyne
650
Dien versteict ghy den zwyne/ zynde ghelyc
 
Dat gheen tyt zadt es maer wroetende jnt slyc.
 
Met listeghen practyck/ suptylic bedrieghende
 
Hu heuenmeinsche/ beclappende belieghende
 
Dus zyt ghy vlieghende/ met vlercken sondich
655
Ter helscher pyne.
Meest elc
 
Duer hu woorden vermondich
 
Consciencie duergrondich/ my jnwendich wrouc[h]t+
 
Dat jc my mesghaen hebbe.
Ghetughe
 
Hu seluen dan voucht
 
Dat ghy Gode ghenoucht/ van tsondich beplec.
 
Suuert hu jnwendich/ betert hu ghebrec.
660
So sult ghy hu vut strec/ des vyants thoom
 
Cortelic vynden.
Meest elc
 
By wat mannieren?
Ghetughe
 
Slaet mynder talen ghoom.
 
Plant jn hu den boom/ van liefden bloeyende
 
Tot Godt almachtich/ jn duechden groeyende.
 
De minne broeyende/ die hu jnt herte licht
665
Tot Dommenacie van Goede van weerden slicht+
 
Hu daer of zwicht/ ende hu liefde wilt junnen
 
Den almuechghende Godt.
Meest elc
 
Hoe zoudic ghekunnen
 
Ofte beghunnen jn eenegher mannieren
 
Van huer te sceedene/ ofte verthieren?
670
Myn sins verchieren/ jn sweerels pryeel
 
Moet jc hu laten/ zonder eenich appeel
 
Myn vruecht gheheel zal my ontduucken.
Ghetughe
 
Neen ghy trauwen.
Meest elc
 
Mach jcse behouden?
Ghetughe
 
Jae ghy by condicien.
Meest elc
 
Wilt my die ontvouden.
Ghetughe
675
In een redelic ghebruucken.
 
Maer wilt van hu stuucken/ de liefde onghestadich
 
Die ghy tot huer draecht/ zo onversadich
 
Ende jn Godt ghenadich/ verstaet myn nopen
 
Stellen gheheel hu minne/ hu hopen.
680
So wort ghy bedropen/ met zynder gracien vlot.
 
Dits teerste/ tmeeste/ ende tupperste ghebot.
 
Hebt ghy gheweist zot/ verhardt versteent
 
Dat ghy hem geen dancbaerheyt en hebt verleent
 
Beweent hu mesdaet/ met jnwendeghen rauwe.
685
Syt Godt houdende/ jn sweerels landauwen
 
De belofte ende trauwe/ groot van verbande
 
Die ghy hem sculdich zyt.+
Meest elc
 
Machicse ghebruucken tmynen onderstande
 
Jn sweerels warande/ met duechden voorsinnich
 
So sallic Godt almachtich/ zyn bemin[n]ich
690
Ende allomme jnnich/ zynen lof vermeeren.
Ghetughe
 
Ten andren moet ghy hu/ tot liefden keeren
 
Onthout myn leeren/ zonder sparen
Meest elc
 
Tot wien noch?
Ghetughe
 
Tot Een sAnders Weluaren
 
Met hu heuenmeinsche/ tes Gods beuel.
Meest elc
695
Hoe sallic dat doen?
Ghetughe
 
List ende Bedroch fel
 
Weert dese rebel/ der goddelicker wet.
 
Dese doen/ Een sAnders/ Weluaren belet
 
Spreedende sjeghens [t]net/ vul fenynegher quaetheyt
 
Daer hu heuen meinsche/ by crycht bescaetheyt.
700
Dus myn beraedtheyt/ volcht by besceede
 
Ende dese twee scuut.
Meest elc
 
Vliet van my beede
 
Die my hebt tmynen leede/ jnde sondeghe vleughe
 
Langghe ghehouden.
Suptyl
 
Spoetge haelt draf.
Pract.
 
Hier bekeert een zeughe.+
Suptyl
 
Mids der scriftueren theughe/ die hem es ghesconcken
705
By Ghethughe der Waerheyt.
Pract.
 
Waere hem den moet ghesoncken
 
Dan sallic hem beroncken/ fray ende blyde.
Suptyl
 
Twort goet te doene waert gh[e]preict ghecloncken.
Pract.
 
Adieu Meest Elc/ tot den moet wort ghesoncken.
Suptyl
 
Al doet hu Ghethughe der Waerheyt proncken
710
Wy sullen hu ontfoncken/ jn corten tyde.
Pract.
 
Adieu Meest Elc/ tot den moet wort ghesoncken.
 
Dan commic hu beroncken/ fray ende blyde.
Suptyl
 
Veerthien nacht naer Paesschen/ jc hem weder beryde.
 
Als eshy nv blyde/ dat wy rumen
715
Hy en sal niet laten zyn houde costumen.
Pausa cleene.
Ghetughe
 
Meest Elc/ om dat hu zoude te bet bekent zyn
 
Ende jnt herte gheprent zyn/ Gods liefde puere
 
Die hy gethoocht heift/ tot elcken creathuere
 
Eene fyguere/ moet ghy zien openbaerlic.
 
Merct wat Christus/ ghedoocht heift/ met pynen zwaerlic+
 
Om tweluaren claerlic/ van elc meinsche bysondere.
 
Duersleghen duerwont/ van bouen tot ondere
 
So Pauwels es vermondere/ naect ende bloot
 
Heift hy obedientich gheweist totter doot
725
Om dat cleen ende groot/ van Adams mesdaet
 
Jn zyn bloedt zouden zyn/ ghesuuert ghedwaet.+
 
Hu ooghen vp slaet/ ansiet zyn lyden stranc.
 
Dit leet hy vut liefden.
Meest elc
 
O heere hebt minnelicken danc.
 
Jc hebbe so dickens ghenomen den ghanc
730
Tot tsondich ghestanc/ by myn quaet gheneghen
 
Hu gheboden ghehouden/ jn weerden cranc
 
Ende myn heuenmeinsche/ by hate wranc
 
Sonder bedwanc/ ghescent tallen weghen.
 
O heere waer jn dat jc my hebbe mesdreghen
735
Duer hu ghenadich pleghen/ my met ontfaermen cleet
 
Want myn mesdaden zyn my hertelic leet.
Ghetughe
 
Meest Elc ende al maect hu bereet.
 
Biecht hu ende sceet/ vander sonden zwaerheyt.
 
Volcht mynen raet/ Ghetughe der Waerheyt
740
Wiens licht ende claerheyt/ de predicanten ghewaghen.
 
Wacht hu seluen dese heleghe daghen
 
Tot Gods behaghen/ jn sweerels slot.
 
Eert hem mindt hem/ vulcomt zyn ghebot.
 
So muecht [ghy] tcot/ der helle ontvlieden
745
Twelc hu moete ghescieden/ ende ons allen mede
 
By sHelichs Gheest cracht mids der Drie Santinnen bede.

†A†M†E†N†


Vorige Volgende

Over dit hoofdstuk/artikel

datums