Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.Esbatement van twesen.
Ao. 1512.

De Man.
tWyf.
De Gheuare.
De Pape.
+ De Man.
 
In myn wyfs wesen/ hebbic grooten wondere.
 
Maer jc leggher/ twee angelooten ondere
 
Jc zal huer wesen wel/ naer myn wesen setten.
 
En can huer wesen wel/ vp myn wesen letten
5
Jc meene huer wesen/ myn wesen/ eer lanc varen zal.
 
Maer eer jc huer wesen/ myn wesen/ openbaren zal
 
Ic ghelooue ze zal/ een ander liedeken synghen.
 
Myn wesen/ zal huer wesen/ als een riedeken dwynghen
 
Of huer wesen/ zal myn wesen/ moeten te bouen ghaen.
10
Myn wesen/ en can huer wesen/ niet louen waen
 
Want huer wesen/ myn wesen/ dickens ghequel biet.
 
Alse kyndt draecht/ es huer wesen/ zo fel ziet.
 
Jnt roupen jnt spreken/ es huer ghesech quaet.
 
Al datter jnt huus es/ lichte jn hueren wech staet.
15
De cnape tjoncwyf/ huer wesen fel duchten.
 
Ende alsse gheen kyndt en draecht/ dat zoudic wel pluchten
 
Men vonde gheen beter/ ouer zeuen straten.
 
Jc weddic huer zal jn sulc leuen laten.
 
Jn huer kyndt draghen/ zoude elc vruecht cleene rapen.
20
Jc ghelooue jc salse/ laten alleene slapen
 
So machse blyuen/ jn een wesen/ vul duechden goet.
 
Een payselic wyf/ es een huus vul vruechden zoet.
 
Jc zal my voordan wachten meer kynders te makene
 
Ende eer jc my pynde/ huer met vynders te nakene
25
Jc zonghe lieuer/ sulcke lesse/ die noynt clerc sanc
 
Ghisteren zo dedese hueren kercghanc
 
Ende te nacht/ heifse huer ruste/ alleene ghenomen.
 
Nv willic vutter steden/ al zout cleene bevromen.
 
Van huer waert noot/ datic my een deel daghen dwonghe
30
Vp aventhuere/ of de koe ouer de waghen spronghe.
 
Maer eer jc wech ghae/ willic huer waerscuwen van grief.
 
Waer zytge au wyf?+
tWyf.
 
Hier bem jc man lief.
 
Wilt my hu meenynghe/ openbaren snel.
Man
 
Ic reyse vutter steden/ wilt doch bewaren wel
35
Thuus achter ende vooren/ ende ziet toe nauwe.
 
Draecht last ende zoorghe/ als een goe vrauwe.
 
Want somtyts meskief/ vp sulc parcheel druupt.
Wyf
 
Ontbeyt man tes best datge/ een candeel zuupt
 
So sult ghy te bet ghaen/ tallen gheduene wyt.
40
Sulge gheenen oorlof nemen/ zo ghy ghewuene zyt?
 
So en wort hu wechghaen van my ghepresen niet.
Man
 
Vp dit termyn/ en salt niet wesen ziet.
 
Jn langhe en treckic my/ sulc bezwaren an.
 
Ende daer mede adieu.
Wyf
 
Godt wil hu bewaren dan
45
Ende laet hu weder thuus keeren/ zonder noot.
 
Ontbeyt jn myn mans wesen/ hebbic wonder groot.
 
Jn zyn vreimtheyt/ jc noynt sulc abuus vync.
 
Twas selden eer hy/ vuter steden of van huus ghync
 
Jc en hadde van hem alzo/ jc hu zeyde wat.
 
Ende nv nyeuwers of/ voor ooghen hy my en leyde plat
 
Maer alshy wech ghync/ dochte hy my stuer spreken.
 
Lettel ghaf hy om my/ jc hebt duer keken.
 
De gheheele maent die jc gheleghen hebbe
 
Cleen touvenesse jc/ van hem ghecreghen hebbe.
55
Jc duchte hy al elders zal te neste draghen.
 
Jc mach wel segghen/ adieu myn beste daghen.
 
Eist zo/ zo naectme/ veil zware plaghen.
 
Maer comtse/ jc saltme gheuare claghen.
 
Van raet te gheuene/ eszou bouen sommen fyn.+
De Gheuare.
60
God seynt hier al.
Wyf
 
Gheuaerkin wel moetge commen zyn.
 
Hu visentacie wort van my/ net ghepresen.
Gheuare
 
Gheuare wel moetge vp zyn/ ende bet ghenesen.
 
Godt wilhu lyden/ jn sweerels vlodt scoonen.
Wyf
 
Ey gheuaerkin/ dat wilhu Godt loonen
65
Met meerder duechden/ dan jc hu brieuen can.
Gheuare
 
Hoe eist met myn gheuare/ uwen lieuen man?
 
Syn de kynders/ jnder ghesonden ghespan zoet?
Wyf
 
Vande kynders en weetic niet dan goet.
 
Godt loons/ dat ghyt vraghende te desen termyne zyt.
70
Maer om een ander sake/ myn herte pyne lyt
 
Dies jn drucke/ my de leden/ sullen wesen woel.
Gheuare
 
Mescomt hu hiet?
Wyf
 
Wilt doch sitten vp desen stoel.
 
Jc moet hu vut passien mynen noot claghen.
 
Myn man duchticx zalmy/ jn myn doot jaghen.
75
Van gramscepe/ dat my de leden beuen.
Gheuare
 
Hoe zoo?
Wyf
 
Jc duchte jc zal moeten/ jn onvreden leuen
 
Met mynen man/ twelc my afgrysende es.
 
Cleen liefde tmywaerts hy bewyssende es.
 
Seer lettele hy/ om myn voere gheift.
80
Jc duchter yeuwers/ een quade snoere leift+
 
Daer hy zyn zinnen/ vp ghesleghen heift.
 
Tmisselicxste wesen/ dat hy ghecreghen heift
 
En gheseydic hu/ jn eenen daghe ghevare.
 
Wy worden noch/ meeneghe plaghe gheware
85
Die vp hem ende my/ sullen weluen plat.
Gheuare
 
Kir gheuare tempert hu seluen wat.
 
En ontstelt hu/ zo zeere niet duer smalle beden.
 
Jc hebbe ghesien/ dat ghy talle steden
 
Plocht tsaemen jn payse/ zonder verdrach te zyne.
Wyf
90
Gheuaerkin tes al verkeert/ dat plach te zyne.
 
Hy acht my als een zueghe/ met cleene vigghen.
 
Te nacht liet hy my/ alleene ligghen
 
Daer jc in eender maent/ by zynder zyde [e]n lach.+
 
Ende hedent nuchtent/ voor den blyden dach
95
Hy haestelic vutter steden liep
 
Sonder oorlof te nemene./ Jn onvreden diep
 
My therte by dien/ vul drucx/ ghescoeft leift.
Gheuare
 
Tes misselic gheuare/ wat hy beloeft heift
 
Duer uwen aerbeyt/ jnt ouerlegghen stille
100
Eer ghy ghelaecht/ zo jc hu segghen wille
 
Van pilgrymagen te doene/ voor alle saken ziet+
 
Eer hy huus lichaems/ zoude ghenaken hiet
 
Vp dat ghy te eer mocht/ van pynen verlicht zyn.
 
Men vonder niet vele die zo ghesticht zyn.
105
Van hem met rechten/ hu wel te belouene staet.
Wyf
 
Ghy en telt niet/ dat my meneghe prouene scaet
 
Dien jc by dien/ gheuaerkin/ ontheeren moet.
 
Als jcker om peynse/ my noch meer deeren doet.
 
Hoe vriendelic hy my/ te thouvene plochte.+
110
Al dat hem te mynen/ behouvene dochte
 
Haddic want zyn besoorch/ menichfout was.
 
De eerde/ hem dicwils/ veil te cout was
 
Daer jc somtyts/ ouer ghynck vry.
 
Maer nv eist anders/ tusschen ons dat dynck my.
 
Godt betre myn verdriet/ binnen sweerels bedelue coen.
Gheuare
 
Dat zeyde vrau sbackers/ ende zou mocht selue doen.
 
Maer vp dat ghy muecht/ inder vruechden staet leuen
 
Gheuare/ hoort naer my/ jc salhu raet gheuen.
 
Jc biddu jnwendich/ doch myn concluus somt
120
Hebt wat paciencie/ tot dat hy thuus comt.
 
Ende eist dat hy blyft/ by zyn vermeten quaet
 
Dat ghyt my dan ter stont/ te weten laet.
 
Jc zalhu bevroeden/ als myn suster waerachtich.
Wyf
 
By dien wordic/ te gheruster claerachtich
125
Eist dat uwen bystant/ my bereedt wort.
 
Gheuaerkin hu onderwysen/ my niet verleet wort
 
Maer blyue hu onderdaen/ alst kyndt de moeder vry.
Gheuare
 
Nu adieu gheuare.+
Wyf
 
Gods behoeder zy
 
Hu als broeder by/ jn siele ende jn lyfue fyn.
Gheuare
130
Jc zal altyts/ tot uwen verstyfue zyn.
 
Adieu gheuare.
Wyf
 
Mach jc hu hebben/ ten beclijfve myn
 
Jc zalhu verkiesen/ voor myn bevroeder vry.++
Gheuare
 
Nu adieu gheuare.
Wyf
 
Gods behoeder zy+
 
Hu als broeder by/ jn siele en jn lyfue fyn.
Gheuare
135
Jc zalhu altyts/ tot uwen bedryfue zyn
 
Jn rade/ jn dade/ dus weist ghesticht doch.
 
Ende daer mede adieu.
Wyf
 
Myn herte verlicht noch
 
Duer de troostbaerheyt/ van uwe woorden zoet.
 
Godt gheue dat hy/ met my accoorden moet
140
Alshy thuus comt/ dits myn begheerren al.
 
Wordet anders jc ducht my zoo deerren zal
 
Dat jc my qualic zal cunen bestieren wel.
 
Nu comme alshy wille/ met zoeter mannieren snel
 
Sallic thooghen een ghelaet/ van blyder chieren zoet
145
Naer dattic by sulcke/ bestieren moet
 
My seluen voughen/ eer myn zin de secreten ziet.
 
De causen dat hy my/ scuut can jcse gheweten niet
 
So sallic tot myns gheuaers/ haestelic looppen naer
 
Ende de rechte waerheyt/ ontcnooppen haer
150
Want elders om troost/ en wistic waer ghaen.
Man
 
Godt danc al myn saken/ claer staen.
 
De ware es myn/ tghelt den coopman ontfanghen heift
 
Ende myn wyf naer my/ in groot verlanghen leift.
 
Om thuus te reysene/ willic my te weghe stellen.
155
Vyndic gheselscip/ zo machic te deghe rellen.
 
Maer weirt zy of niet/ jc achs cleene kuere.
 
Vyndic nyement/ jc sciete alleene duere
 
So en hebbic nyement/ daer jc naer wachten zal.+
 
Alssic thuus comme my[n] wyf zwaer achten zal
160
Dat jc by huer/ niet en zal willen slapen.
 
Ende al zoudic noch/ zo veil ghescillen rapen
 
Jc salse wenen/ naer mynder handt fyn.
 
Wat moetet niet wel/ een wonderlic verstant zyn
 
Als sommeghe vrauwen met kynde beghort zyn
165
Datse dan tot alder/ aercheyt gheport zyn+
 
Meer dan alsse gheen kyndt/ en draghen.
 
Tscynt datse naer nyement/ twynt en vraghen.
 
Tware noot dedemen/ naer hueren rade stille.
 
Wat eist anders dan/ eene quade wille
170
Datse deen tyt meer/ dan dander fel zyn?
 
Jc ghelooue zou en zal my/ niet meer rebel zyn.
 
Daer vooren en hebbic/ vry gheenen vaere.
 
Jc en sliepe lieuer by huer/ in eenen jaere
 
Of zou en zal/ al vooren/ dit es tmotyf myn
175
Belouen dat jc/ zal zonder ghekyf zyn
 
En zou meer kyndt/ te draghene poocht.
 
Hola niet meer van dien/ te ghewaghene doocht.
 
Ic bem by huus/ dus willic my dwynghen wat.
 
Jc hope goelicx/ by subtylen dynghen dat
180
Jc huer wel wenen zal/ naer myn begheeren vry
 
Sonder hiet te doene/ dat in huer deerren zy
 
Want noode dadic huer zaken van grieue an.
 
Godt seynt hier al.
Wyf
 
Wellecomme lieue man.
 
Verlanghen heïft my/ ghehouden tonder zwaer
185
Duer hu langghe beyden.
Man
 
Ten es gheen wonder claer+
 
Dat ghy naer my/ met groot verstranghen haect.
 
Jc weet wel dat lust/ menich verlanghen maect
 
Maer noch en wortse van my/ niet gheboet vry.
Wyf
 
Hoe staen de saken?
Man
 
Jc hope dat goet zy.
190
Tgheluc heift jn my/ doen smallen tgrief.
 
Den cost wort ghewonnen.
Wyf
 
Dats my met allen lief
 
Dat ghy gherocht/ jn svoorspoets ghewat zyt.
 
Jc zye wel dat ghy moede ende mat zyt.
 
Dus sallic ghaen/ om hu te touvene vrient
195
Wat bereeden/ dat thuwen behouvene dient
 
Van spyse ende dranc/ om te voedene hu groot lyf
 
Den vullen sloc fyn.
Man
 
Ten es gheen noot wyf
 
Want om eten ende dryncken/ hebbic cleene lusten.
 
Dect myn bedde/ jc wil alleene rusten
200
Daer jc sliep/ alssic vutter steden track
 
Ende slaept jn hu camer/ rust hu leden zwack.
 
Elc alleene es/ ghemackelic jolyt ziet.
Wyf
 
Sallic by hu niet slapen?
Man
 
Vp desen tyt niet.
 
Sulc es de meenynghe/ wiltse onverdooft sommen.
Wyf
205
Eist neerst of spel?+
Man
 
Tes my zo jnt hooft commen.
 
Jn een jaer en hebbicx/ meenynghe bloot.
Wyf
 
Dat wort voor my vercleenynghe groot.
 
Van weenynghe root/ zullen my dooghen pulen.
 
Jae eerre zult ghy my nv/ ghaen thooghen mulen.
210
Myn herte druc/ duer sulc ghescien scept.
 
My wondert wat ghy/ an my ghesien hept
 
Dat jc hu niet meer/ behaghen can.
 
Ghy moet elders/ te neste draghen man
 
Want noynt tusschen ons/ sulcke voere stuende.
215
Jc wildic wiste/ waer dat de snoere wuende
 
Duer wien jc moet saken/ van leede dooghen.
 
Jc haelde huer tlicht vut beede dooghen
 
Alzo jc nv bem/ van zinnen ghestelt.
Man
 
Jc en bem vry/ van gheen minnen ghequelt.
220
Tes ander sake/ die my daer toe port vry.
 
Ende daer mede goeden nacht.
Wyf
 
Weirt lanc of cort zy
 
Jc zal van uwer meenynghe/ den rechten cloot weten.
 
Ende eer jc thameer/ wil eenich broot eten
 
Sallic tot myns/ gheuaers ghaen/ de vriendinne goet
225
Ende huer mynen noot claghen/ met zinne vroet.
 
Sou sal my hopic beraden/ onghestuent fier.
 
Tes best dattic cloppe/ want zou wuent hier
 
By wiens rade dat jc/ zal mueghen ghewin vaten.
 
Au seck au.
Gheuare
 
Wye es daer?+
Wyf
 
Tes vrient/ wilt jn laten.
230
Gheuare/ willet therte by drucke verdwenen lauen.
Gheuare
 
Wat bediet dit?
Wyf
 
Noot doet houde quenen drauen
 
Ende puer vut noode/ moetic my vercloucken nv.
 
Omden moet te coelen/ com jc versoucken hu.
 
Van gramscepe en weetic/ gheenen raet.
Gheuare
235
Kir gheuaerkin doch hu weenen laet
 
Ende grypt eenen moet/ als een wyf fyn.
Wyf
 
Nummermeer ruste/ en zalder jnt lyf zyn.
 
Dats ghedaen gheuare/ daer en es gheen sommen an.
Gheuare
 
Es myn gheuare/ noch niet commen dan
240
Of hebt ghy tydynghe/ die hu by drucke stoort?
Wyf
 
Hy es commen te mynen/ onghelucke hoort.
 
Dus hy varen zal/ als sulc die duer zyn stroyken zeep.
Gheuare
 
Hoe staet tusschen hu beeden?
Wyf
 
Tes al vanden seluen dat Loyken peep.
 
Want alzo houde/ alshy thauent ten huse jnne quam
245
Ter stont jc voor my/ met zinne nam
 
De tafel te deckene/ ende tvier te makene.
 
Doen beual hy/ myn bestier te slakene
 
Maer zyn bedde te deckene/ hy my gheboot snel.+
 
Ooc wildy alleene slapen/ verstaet den cloot wel.
250
Van my dynct hem/ de walghe steken.
Gheuare
 
Kir hem doet dat hy moet byden balghe queken
 
Ander ghalghen reken/ onder der dieuen stanc.
 
Maer gheuaerkin ghy en seght/ niet vanden lieuen ghanc
 
Alshy thuus quam/ doen hy dede naer zeden dat
255
Alzo jc hu zeyde.
Wyf
 
Noch waeric te vreden wat
 
Al en dede hy niet/ haddy my gheveercht hiet.
 
Sichtent dat jc ghelach/ eshy zo gheheercht ziet
 
Hy en boot my noynt sint/ by aldie vynders niet.
 
Jc zalhem laten sitten/ met al de kynders ziet
260
Ende ghaen mynder/ veerden/ zo hebbict ghescat waen.
Gheuare
 
Kir gheuare laet ommers dat staen.
 
Ghy zout hu seluen vut goede/ ende eere jaghen
 
Dies de lieden hu zouden zeere claghen.
 
Een ander raet hebbic ghesomt schier.
Wyf
265
Gheuare wat rade?
Gheuare
 
Ons prochghyepape comt hier.
 
Jc salhem ghaen verhalen hu saken net.
 
Ten mach nyement ter weerelt maken bet
 
Payselicke eendrachticheyt/ daermen jn disscoort leift.
 
Jc weet wel/ alshy uwen twist/ ghehoort heift
270
Niet langhe en zal/ thuwent hebben ghescil stede.
Wyf
 
Sult ghyt hem durren veerghen?+
Gheuare
 
Jc doer al/ dat jc wil mede.
 
Jn my doet hy/ dicwil zyn secreit staen.
 
Jc stae bet jn zyn gracie/ dan ghy weit waen.
 
Jc weeter ander vry/ zy beslauent zeere
275
Om zyn vrienscepe te hebbene.
De Pape.
 
Godt seynge ghebuers.
Gheuare.
 
Goeden auent heere.
 
Tonsen weynsche comge juuste/ te deser huere ghaende.
Pape
 
Tbediet wat datge zyt/ voor duere staende.
 
Dus late pleichge thuus/ als een haerkin te stoppene.
Gheuare
 
Tes waer/ maer hier begonste myn gheuaerkin te cloppene
280
Wiens herte by drucke/ nv es ghenoost zeere.
 
Wortse by uwen onderstant/ niet vertroost seere+
 
Jc duchte huer den druc/ zal ter herten slaen.
Pape
 
Wistic den druck van hueren smerten zaen
 
Soudic huer helpen/ jc bems my vermetende fyn.
Wyf
285
Te rechte moet ghyt/ wel wetende zyn
 
Eerweerdich pastuer/ my waerachtich hoort.+
 
Myn man ende jc/ hebben eendrachtich voort
 
In payse gheleift/ zo myn gheuare tverclaren weet
 
Dat zoudic nemen/ vp eenen zwaren eet
290
Tot dat jc nv laets/ van kynde lach.+
 
Maer oynt sint/ so jc bevynde ach
 
Heift hy tmywaerts ghethoocht een wesen quaet.
 
Ten ware myns gheuaers vutghelesen raet+
 
Dien jc noode zoude/ met den slichten vitten
295
Jc hadde hem laten/ met de wichten sitten
 
Ende wech gheghaen/ zo haddict ghescat ziet.
Pape
 
Ten es geen noot vrauwe/ en doet dat niet.
 
Jc zalhu wel andersins/ helpen vry
 
Daer ghy uwen noot/ wel sult stelpen by.
300
Maer alle saken moeten/ by hu verstaen wesen.
 
Een goe vrauwe/ moet hueren man onderdaen wesen
 
Paysiuelic verdraghen/ al waert een ghuul eerre.
 
Niet te canoyene/ al ghecreichse een muulpeerre
 
Jae/ of al scynet zo/ dat hy als huer grieuer leift.
Gheuare
305
Me gheuare zoorcht/ dat hy een ander lieuer heift
 
Duer wien dat zou leift/ in deser onvreden ziet.
Wyf
 
Sichtent dattic ghelach/ en ghenaect hy myn leden niet.
 
Ende noch heift hy hem/ vermeten heere+
 
Jn een jaer en wordic/ van hem versleten zeere
310
Nochtan dat hy van nathueren/ vierich es.
 
Jc weet wel dat hy/ jnt bekueren ghierich es
 
Dies hy dickents/ tjeghens slusts verweck stryt.
Gheuare
 
Ende me gheuaerkin groot/ ghebrec lyt.
 
Ghy ziet wel my[n]/ heere wilt hueren noot blusschen.+
Pape
315
Al waerder ghescil/ noch zo groot tusschen
 
Hueren man ende huer/ jc blyver boorghe vooren
 
Jc salt wel maken/ ken hebber gheen zoorghe vooren.
 
Jc wedde jc haest beteren zal/ uwe claghe zwaer.
Wyf
 
Wanneer heere?++
Pape
 
Moorghen metten daghe claer
320
So sallic thuwent commen/ my verwacht vrauwe.
 
Jc zal ghaen peynsen/ jnt hooft te nacht nauwe.
 
Thuwen proffytte sallic/ een goet vers sommen.
Gheuare
 
Ende jc sal moorghen/ ouer dweers commen.
 
Of jc nyeuwers of en wiste/ sallic my ghelatende zyn.
Pape
325
Machic eenichsins/ zyn motyf vatende zyn
 
Jc hope eer lanc wort/ de reste goet.
Wyf
 
Heere zieter doch jn ende tbeste doet.
 
Huwen aerbeyt wort hu/ vergholden fyn.
Pape
 
Ic ghelooue hy zal/ van my ghescolden zyn.
330
Ende daer mede adieu/ tot moorghen vrouch.
Wyf
 
Dat woort vut mynder herten/ veil zoorghen jouch.
 
Heere/ Godt gheue hu goeden nacht.
 
Jc bidde Godt dat hy voor ontspoeden wacht
 
Hu gheuare die tmynen/ ghewinne helt.
Gheuare
335
Adieu gheuare hu gherust van zinne stelt.
 
Moorghen zalt hopic/ vp een beter mate staen.
Wyf
 
Nu willic thuus/ met blyden ghelate ghaen.
 
Myn zinnen hu voor myn liefste care presen.
 
Oft myn man wiste/ hoe zoude hy in vare wesen
340
Tjeghens moorghen/ zo hy zal verstraeft zyn.
 
Maer non forche/ machic altemets ghelaeft zyn
 
By dien te meer vruecht/ dattic rapen zal.+
Man
 
Byder doot/ jc hebbe my verslapen al.
 
Anden dach scynet/ der noene by.
345
Tghemack de cause/ van desen doene zy.
 
Dus langghe en pleghic/ te leyene niet.
 
Jc zal my ghaen cleeden/ zonder te beyene hiet
 
Ende voughen my seluen/ ter kercken zaen.
Pape
 
Nu willic tot myn ghebuers/ voor alle wercken ghaen.
350
Can jc pays maken/ de vrauwe zal blyde wesen.
 
Jc wil best jnt ghaen/ myn ghetyde lesen
 
Vp aventhuere/ hoe dat gheuallen mochte.+
Gheuare
 
Of jc den budt/ verghallen mochte
 
Hoe zoudic/ deze mans/ te cote dryuen.
355
Jc zoudse den pronckaert/ vutter tote wryuen
 
Als zy huer wyfs/ bemulende zyn.
 
Tscemynckele en zouder niet langghe sculende zyn.
 
Sulcke eene lesse/ zoudicse voor dooghe legghen.
 
Jc zoudt hemlieden/ zo drooghe segghen
360
Sy zouden myn meenynghe/ wel zonder bril lesen.
Pape
 
Jc bem hier juuste/ daer jc wil wesen.+
 
Al wildic by weynsche/ ter kuere ghaen
 
So comt de man juuste/ jnde duere staen.
 
Naer hem en darf jc/ doen gevrach zeere.
365
Godt seynge ghebuer.
Man
 
Goeden dach heere.
 
Dus tylic hier te commene/ moet bedien hiet.
Pape
 
Jc en hebbe hu in langhen/ tyden ghesien niet.+
 
Ende om allen grieue van leeden te brekene
 
So comic hier om hu beeden te sprekene
370
Hu ende hu wyf/ om goede waerommen.
Man
 
Myn wyf es hier/ heere/ wilt naer commen
 
Ende wilt ons beeden/ hu meenynghe voortlegghen.
Pape
 
Ghebuers/ eist zo jc/ hebbe ghehoort segghen
 
Vande sulcke die naer hu regement gheghist heift
375
Dat ghy tsaemen beede/ jn grooten twist leift?
 
Dit doet wonder in my bouen mate bynden+
 
Want haddic payselic volc/ willen jnt strate vynden
 
Jc hadt hulieden betraut/ bouen al dier wuenen mueghen.
 
Wat can sulc/ onpayselic stuenen dueghen?
380
Vliet sulcke voere/ eer ghy elc andren veet zeere.
Man
 
Van twist noch onpays/ jc niet en weet heere
 
Ic darfs my vermeten/ ghelyc als de verwaende romt.
 
Tzoude blycken met myn gheuare/ die hier ghaende comt.
 
Sou en salt niet segghen/ jc my als de snelle romme.
Gheuare
385
Hier zy Godt. Gheuaere wellecomme.
 
Ic en sach hu/ jn meneghe voorledene huere.
 
Heere en belcht niet/ dat jc hu redene scuere.
 
My ware leedt zoudic hu/ secreit verstoorende zyn.
Man
 
Ghy muecht ons secreit wel hoorende zyn.
390
Gheuare ghy weit/ de waerheyt wel
 
Of me wyf ende jc/ jn eeneghe zwaerheyt fel+
 
Van twisteghen disscoorde/ tsaemen gheleift hebben.
 
Tscynt dat wy daghelicx/ jn onghenouchte ghesneift hebben
 
Alzo myn heere/ tonswaert clachtich es.+
395
Ghy weit wel gheuaerkin/ oft waerachtich es.
 
Noynt en hebben ons/ twisteghe woorden ontvloghen zeere.
Gheuare
 
So me gheuare seght/ tes gheloghen heere.
 
Hy die dat zeyde/ was hu een lueghene tachtere.
Pape
 
Jc verdryue allomme/ naer mynen vermueghene lachtere.
400
Als pastuer bevrydic/ mynder werden scapen.
Wyf
 
Wat pays machgher zyn/ daer zy versceeden slapen
 
Man ende wyf/ zo wy een poosse ghedaen hebben?
 
Jc wilde wel/ de gloosse verstaen hebben
 
Waeromme dat ghy my/ niet ghesien muecht.
405
Sichtent dat jc ghelach/ en mochte my ghescien vruecht.
 
So vreimde zyt ghy/ tmywaert bedeghen ziet.
 
Jc en hebbe my/ nochtans mesdreghen niet.
 
Jc en weet waeromme/ dat ghy versteict my.
 
Secht wat hu/ an my ghebreict vry
410
Present myn heere/ met corter verhalicheyt styf.
Man
 
Dat jc hu niet en beslape?
Wyf
 
Jae.
Man
 
Om hu salicheyt wyf
 
So laet ict/ al doet ghys half ghejanc.
Pape
 
Jc hoore wel daer es water/ daer tcalf verdranc.
 
Ghebuer dat en es/ shuwelicx oorden niet
 
Dat ghy elc ander/ zonder eeneghe disscoorden vliet.+
 
Sulcke voere/ dicwils twist beloken heift.
 
Ghebuer/ weitge wel/ wat Godt ghesproken heift
 
Met wiens woort nyemendt mach/ by onweerde drullen?
 
Meinsche maect meinschen/ ende wilt deerde vullen
420
Dit was dat hy Adam/ ende Eua gheboot snel.
 
Waer by jc qualic/ mueghen zoude verstaet den cloot wel
 
Hu absolueren/ my zonder bedriechte raemt+
 
En ghy met sulcke sonde/ voor my te biechte quaemt+
 
Of ghyne wildet de waeromme/ in corter clausen segghen.
Man
425
Heere jc salhu/ fynabelic de causen segghen.+
 
Wanneer jc me wyf/ zo jc hu zeyde ghenaect hebbe
 
Ic en darf niet vraghen/ of jc een kyndt ghemaect hebbe.
 
Men wordet gheware/ an huer wesen snel jaet.
 
Se wort zo putertier/ ende vutghelesen fel quaet
430
Dat my dickens thuus/ te blyuene gruut.
 
De cnape tjoncwyf/ huer kyuene scuut.
 
Dan vlouchse zo te/ mynen meshaghe zeere
 
Sint Jans euel/ moetge hebben sint Jans plaghe heere
 
Huer woorden vul rampach[tich] ghescals steken.
 
Dan seghse de beenen moetge heere ende den hals breken.
 
Se tiert ze ghebaert/ met vulle kelen
 
Al zoudse by tyden/ jnt dulle spelen.
 
Ende ofse in sulc staet/ endt gheviele bestorue
 
Waert niet soorghe/ datse huer siele bedorue
440
Alsse sulcke fenyneghe/ teteren sciet?
Pape
 
Ende alsse gheen kyndt en draecht?
Man
 
Men machse verbeteren niet.
 
Huer byzyns elcken/ verblyden doet.
Pape
 
Vrauwe van sulcke felheyt/ ghy hu vermyden moet.+
 
Tes meest hu scult/ zo jc verstaen can.
Wyf
445
Tes my leet hebbic hu/ hiet mesdaen man.
 
Jc biddu niet meer/ myn gheselscip vliet.
Gheuare
 
Naer dat ghy hem sulc/ ghequelscip biet
 
Ten es gheen wonder/ dat hy hu om ghenaken vreest
 
Om kynders te makene.
Wyf
 
Al myn haken meest
450
Es naer hu man lief/ ken zal niet meer fel zyn.
Pape
 
Ghy en sult uwen man/ niet meer rebel zyn
 
Maer met hem leuen/ dat men gheen clachten hoort.
 
Van kyuen en scelden/ sult ghy hu wachten voort
 
Al wiert ghy kynt draghende/ duer zyn besoucken vrauwe.
455
Ghy sult hu wachten/ van rampen en vloucken nauwe
 
Vp dat hu man/ niet en zy huwes verstekere zeere.
 
Dat belooft ghy my?
Wyf
 
Jaeic sekere heere
 
Jndien dat my mach/ vruecht ghescien plat.
Pape
 
Ghebuer jc bidge/ wilter jn zien wat.
460
Om tbeste te doene wilt doch bereet zyn.
 
Neimpt huer jn gracien/ ansiet huer leetscyn.
 
Jc bidder vooren/ met drouuen keere.
 
Se zals huer wachten.
Man
 
Jc salse noch prouuen heere+
 
Nochtans dat uwe bede/ myn herte zwaer dochte
465
Jc zal met huer leuen/ zo jc vooren ende naer plochte
 
Jn dien zou/ zoot gheseyt es/ huer dwynghen wille.
Wyf
 
Man lief zwycht/ van voorledene dynghen stille.
 
Myn woort wort voort/ van my ghequeten vry.
Pape
 
Esser hyement jnt gheselscip gheseten by
470
Die daghelicx/ met zyn wyf jn ghescille leift
 
Alsse kyndt draecht/ al hueren wille gheift
 
Ende hebt paciencie/ tot datse ter kercken stept.
 
Bedwynse zo ghy hier tbemercken hebt.
 
Maer hebt ghyt te quaet/ wilt veil delays staken.
475
Comt by my jc zal wel/ den pays maken.
 
Jc weets my te behelpene/ alzo ghy zien muecht.
 
Eerweerdeghe/ om dat hu zoude ghescien vruecht
 
So was ons motyf/ hier toe bekuert eendrachtich.
 
Neimpt danckelic ons colacie/ tes ghebuert waerachtich.
480
Maer nyement en trecx hem an/ dan diet besculdich es
 
Duer sHelichs Gheest grade/ die menichfuldich es
 
Wiens gracie/ ons beware jn minnen vredelic
 
Mids de bede der Drie Santinnen edelic.

†A†M†E†N†


Vorige Volgende

Over dit hoofdstuk/artikel

datums