Logo DBNL
Spelen (1920)

Spelen

(1920)–Cornelis Everaert–rechtenstatus Auteursrecht onbekend

Vorige Volgende

aant.tSpel van Maria Hoedeken.
Ao 1509.

Goet Gheselscip, een clerc.
Cleen Achterdyncken, een tavernier.
Sober Regement.
Quaet Beleedt.
Inwendighe Wroughynghe.
Gheduereghe Verarthede.
Duechdelic Onderwysen.

+ Prologhe.

 
Maria ons aldere aduocate
 
Hope ende troost van alle sondaren
 
Die hier versaemt zyt/ hooghe middel/ en mate
 
Bewaer hu al tsaemen/ houdt jonc van jaeren.
5
Ons meenynghe es/ om openbaren
 
Ter Gods eere Maria/ ter weerde groot
 
So wye huer anroupt/ jn eenich bezwaren
 
Die es zou helpende vut alder noot.
 
Hier jnt leuen/ ende naer de doot
10
Es zou den meinsche altyts by staende.
 
Gheen dienst zo cleene/ ghesproken bloot
 
Thuerer eeren ghedaen/ zou esse ontfaende
 
Dancbarich/ nyement en es zou versmaende.
 
Alzo wy/ by eenen exemple lesen
15
Van eenen clerc/ die daghelicx vut ghaende
 
Was blommekins pluckende/ jnt velt ghepresen
 
Daer hy een hoedekin vut deuocien gheresen
 
Of maecte/ twelc hy Maria vp thooft
 
Daghelicx stelde/ nochtans bouen desen
20
Washy/ van alder duecht/ gheclooft.
 
Met dobbelen tuusschen/ wierthy berooft
 
Van goede van scatte/ ende aerm versteken
 
Van vrienden van maghen/ nyeuwers ghelooft.
 
Maer Maria/ en heift hem/ niet bezweken.
25
Hy wiert bekeert van sondeghe ghebreken
 
Alzo wy hu/ speilwys sullen bethooghen.
 
Maer wacht hu/ voor de peckers treken
 
Die buten ougste/ te peckene pooghen.
 
Ons waere leedt/ zout ghy/ scade ghedooghen.
30
Dus weist vp hu hoede/ groot met den cleenen
 
Ende wilt ons/ ghejonsteghe audiencie verleenen.+

tSpel.

Goet gheselscip een clerc.
 
Myn herte verblyt/ te desen saysoene
 
Jnden lusteghen tyt/ jnde loouerkens groene
 
Jnde roke der cruden/ zoet van ghuere.
35
Tleuen my verhuecht/ clouc als de coene.
 
Elc dier maect vruecht/ naer zynen doene
 
Hoe cleene et van wasse zy/ byder nathuere.
 
De blomkens bloeyen/ dyueersch van coluere.
 
De vueghelkins de lucht/ met sanghe verchieren.
40
Al waere een herte/ vul van ghetruere
 
Sweders lusticheyt/ zoude hem druc doen vieren.
 
Dus willic ghaen/ naer myn hout anthieren
 
Wandelen jnt velt/ den moet verlichten
 
Ende plucken blomkens/ van alle mannieren
45
De scoonste die jc/ vynden can by ghesichten
 
Ende maken een hoedekin/ reyn zonder swichten
 
Om Maria/ naer myn/ daghelicx pleghen
 
Te gheuen vp dat zy/ voor dhelsche wichten
 
My om besceermen/ wil zyn gheneghen
50
Alsic vanden vyant/ zal worden bedreghen
 
Ende ooc betheghen/ van sonden verzworen
 
Dat zou my by stae/ als aduocate vercoren.
Cleen achterdyncken een tavernier.
 
Byder doot de ghilde/ ghaet al verloren.
 
Ghescoren/ moet hier zyn/ een ander raet snel.
55
De Vastene vry/ heift my ghescaet wel.
 
Mids huerer daet fel/ es my profyt bezweken
 
Ende by dese lollaerts/ clappen en preken.
 
Bem jc ghesteken/ vut mynder winnynghe.
 
Dies willic nv/ met goeder verzinnynghe
60
Om een beghinnynghe/ vut steken te puente
 
Myn banniere van Houder Ghewuente
 
Ende met blyden gheduente/ roupen den wyn fyn.
 
Mueghen hier lieden vp dit termyn zyn
 
Lydende by fenyn pyn/ andtheren[de] dwalynghe++
65
Ic hebbe hier hertsalue/ comt zonder dralynghe.
 
Nyement voor betalynghe/ en hebbe zoorghe of ducht.
Sober regement.
 
Wat dats een ruuttere.
Quaet beleedt.
 
Wat dats een clucht.
Sober
 
Tes sdrucxs vermutere.+
Quaet
 
Hy es vander lucht.
Sober
 
Tscynt rechs een clutere.
Quaet
 
Hy en acht gheen gherucht.
Sober
70
Wat dats een rutere.
Quaet
 
Wat dats een clucht
 
Die elcken plucht/ voor scadeghe myncken.
 
Tes best ghaen wy een pyntken dryncken
 
Om thooren clyncken zyn boerdelic rel wat.
Sober
 
Ouer my consenteric/ harde wel dat.+
75
Al waert een fel ghat/ jc en achs niet twee sleen.
Quaet
 
Hadden wy Goet Gheselscip
Sober
 
Jae met ons tween+
 
Wy en zouden niet scheen/ haest vutter taveerne.
Quaet
 
Hy es doch vroylic.
Sober
 
Hy drynct doch gheerne.
 
My plucht te deerne/ van zyn verscuwen.
Quaet
80
Quamer noch een Vastene/ my zouder of gruwen.
 
Want by huer verduwen/ bem jc noch flau.
Roupende
Cleen
 
Wat goeder wyn/ wat goeder wyn au.
 
Jc hebbe hier Paylgette/ Rynsch wyn Pittau
 
Een huenich dau/ dat goet en fyn es.
85
Wat goeder wyn/ wat goeder wyn au.
 
Dits jn dHoude Ghewuente daer goet wyn es.
 
Een eerst stoop/ een eerst stoop.
 
Den meesten hoop/ neimpt hier den loop.
 
Een eerst stoop/ een eerst stoop.
90
Goet wyn goetcoop/ om vinneghe passers.
Sober
 
Godt groet hu weert.
Cleen
 
Wellecomme brassers
 
Der vruechden tassers/ jn sweerels rosier.
 
Wats hu belieuen?
Quaet
 
Wyn of bier
 
So dat wy schier/ coelen den dorst heet.+
Cleen
95
Jc loopper omme ter stont ghereet.
 
Maer ongheveet / doet my besceet. Wat wilt ghy dryncken?+
Sober
 
Vanden besten.
Quaet
 
Dat muecht ghy wel dyncken.
 
Dus zonder myncken/ spoet hu vp tseerste.
 
Wy hebben dorst.
Cleen
 
Dats een eerste.
100
De rekenynghe es noch goet om sommen.
Sober
 
Eist wat goets?
Cleen
 
Jc darfs my berommen.
 
Tes kuere van blommen/ vut meneghen sticke.
 
Tvolc hales daghelicx/ al heuen dicke.
 
Al eist dat jc micke/ teenegher hueren
105
Om vrienden wat te houdene/ tmach qualic ghebueren.
 
Ghedueren en laetseme/ niet met vreden.
 
Belieft hu hiet anders?/ Jc wil naer zeden
 
In andre steden/ profyt bestoppen.
Quaet
 
Belieft ons hiet/ wy sullen wel cloppen.
110
Wy willen by moeten/ dryncken soppen.
 
Tes quaet vercroppen/ jnden meye.
Goet
 
Nu hebbic een hoedeken/ naer mynen greye.+
 
Langher jc niet en beye als der junsten jundere
 
Ghae jct Maria draghen.
Quaet
 
Wye comt ons ghundere?
115
Al waert van dundere/ tempeestich wedere
 
So roert hy zyn voeten/ vp ende nedere.
 
Et blyct een tredere/ jnt ghaen onvertraecht.
 
Wye macht wesen?
Sober
 
Tes Goet Gheselscip.
Quaet
 
Hoe comt hy ghejaecht?
 
Heift hy yeuwers belaecht/ wat dat hem mont?
120
Twaere goet gheweten.
Sober
 
Heer weert/
Cleen
 
Wats daer?
Quaet
 
Comt hier ter stont.
 
Verstaet den gront/ van ons ghebreken.
 
Daer lyt een voor by/ dien moeten wy spreken.
 
Crycht hem met treken/ jn dit bevryt.
 
Tes Goet Gheselscip.
Cleen
 
Achter zonder resspyt
125
Looppic onvermyt/ met claren ghesichte.
 
Jc weddic hem/ wel zal brynghen lichte
 
Jn dit ghestichte vul sondege telghen.
 
Hem au vrient.+
Goet
 
Meent ghy my?
Cleen
 
Jaeic/ maer en wilt niet belghen.
 
Wilt druck verswelghen/ laet vruecht hu naken.
130
Hoort wat naer my.
Goet
 
Wats hu belieuen?
Cleen
 
Jc zalt hu segghen met corter spraken.
 
Ghunder sitten lieden/ die naer hu haken
 
Om vruecht te maken/ gheerne elc wilde
 
Hebben Goet Gheselscip.
Goet
 
Wat volc eist?
Cleen
 
Tes seck de ghilde.
 
Endt hu niet en scilde/ by eeneghe wercken
135
Comt doch tot daer.
Goet
 
Haddic ter kercken
 
Om claer bemercken/ gheweist zonder envye
 
Ende ghegroet/ de beilde van Marye
 
Dan als [een] bye/ fray zonder zoorghen
 
Sallic hu volghen.
Cleen
 
Groet Marie moorghen.
140
Se zalhu wel boorghen/ willet verstant vaten
 
En comt nv met my.
Goet
 
Al mocht my tlant baten
 
Dat en zoudic om gheen pant laten te deser steden.+
 
Jc wil eerst Maria dienen.
Cleen
 
Jc bems te vreden.
 
Maer als ghedaen zyn hu ghebeden
145
Naer costumelicke zeden/ tot onser Vrauwen
 
Sult ghy dan commen?
Goet
 
Jae jc en trauwen.
 
Al zoudic duert benauwen/ cryghen onghevouch
 
Jc zal ziet commen.
Cleen
 
Dats myns ghenouch.
 
Buten sdroufheyts plouch/ ghae jc doen trapoort.
Goet
150
Ende jc wil ghaen/ ter kercken voort
 
Onghescoort/ vulcommen/ myn vpsetten.
Cleen
 
Al hebbic langghe/ gheweist jnt letten
 
Myn saken/ zyn ten besten verghaen.
Sober
 
Sal den man commen?
Cleen
 
Jae hy harde zaen
155
Haddy ghedaen/ zyn deuocie met ghewelscip.
Quaet
 
Non forche/ ghecryghen wy/ Goet Gheselscip
 
Sdrucx ghequelscip zal van ons vlien.
Goet
 
Nv stellic myn hoedeken/ vp thooft van Marien
 
Ende [wille] ouer knyen/ huer bieden groetenesse+
160
Dat jc mach cryghen/ van sonden boetenesse.
Pausa.
Ghebet.
 
O alder waerachtichste/ machtichste vrauwe
 
Ghetrauwe/ middelare myn toeuerlaet
 
Staet/ my jn staden/ zoetgrondeghe landauwe.
 
Rauwe/ hebbic jnt herte/ om myn mesdaet.
165
Beraet/ my in duechden/ reyn maechdelic zaet.
 
Versmaet/ niet den voys/ dyns dienaers bede.
 
Vrede/ my doet/ van svyants/ temptacie quaet.
 
Ghaet/ myns niet of/ duer uwe ontfaermichede.
 
De zede/ mynder ghewuente/ hier ter stede
170
Dede/ my hu besoucken/ Gods moeder reene
 
Om te gheuen/ dit hoedekin van weerden cleene.
 
 
 
O alder Gods weertste/ begheertste scat
 
Vat/ vul ghenaden/ der gracien vloet
 
Doet/ my worden/ jn uwer liefden mat
175
Dat/ jc mach besitten/ Gods rycke zoet.
 
Spoet/ hu Maria/ myn rouckeloosheyt boet.
 
Bevroet/ my hoe jc beteren zal myn leuen.
 
Gheuen/ wilt my gracie duer hu odtmoet.
 
Behoet/ my voor et sondich ancleuen.
180
Verheuen/ Gods moeder wacht my voor sneuen.
 
Ghedreuen/ tot hu com jc met rauw[e] en weene+
 
Om te gheuen dit hoedekin van weerden cleene.
 
 
 
O alder reuerenste/ excellenste ghecroont
 
Ghetroont/ naest Godt/ binnen shemels bevryt
185
Syt/ myns ghehuldich/ glorieuste ghepersoont.
 
Verscoont/ my met duechden/ jn alder tyt.
 
Stryt/ voor my Maria/ als my tleuen ontglyt.
 
Verblyt/ myn siele/ jnder glorien zanck.
 
Cranc/ zyn my[n] duechden/ o moeder ghebenendyt.
190
Quyt/ my voor hu zuens/ vonnesse stranck.+
 
Bedwanc/ dede my hier om uwen danck
 
Ghanc/ nemen tot hu/ Gods moeder alleene
 
Om te gheuen dit hoedekin/ van weerden cleene.
 
 
 
Princesse Maria/ Gods moeder ghepresen
195
Ghenesen/ wilt myn siele/ van deeuweghe doot.
 
Noot/ doet dat jc moet/ gheholpen wesen.
 
Gheresen/ weist tmynder hulpe/ scoon roose root.
 
Groot/ es uwe macht/ tjeghens svyants conroot.
 
Bloot/ bem jc van duechden/ jn sonden verblent.
200
Sent/ ghy gheen gracie/ vut hu maechdelic scoot
 
Als loot/ wordic versmolten/ jnt eeuwich torment.
 
O moeder excellent/ dit hoedekin jent
 
Brynghic hu/ vut jonsten doch dit bekent.+
 
Blyft my ontrent/ want jc my vereene
205
Ende neimpt danckelic dit hoedeken van weerden cleene.
Pausa.
Vp staende.
 
Nv es myn deuocie ghedaen/ zo jc meene
 
Dies jc rasch te beene/ als donvertraechde
 
Wil ghaen soucken tvolc/ dat naer my vraechde
 
Of my behaechde/ huer lieder rel hiet.
210
Dus ghae jc derwaerts/ met leden snel ziet
 
Eer my ghequel biet/ de sulcke jnt spreken.
 
Waer vynden hem lieden?/ Jc zye vut steken
 
De banniere onbesweken/ van Houder Costume.
 
Jc wilder naer ghaen/ licht als een plume
215
Ende sprynghen jnt rume/ rasch ouer tsillekin.
 
God seynt hu ruters.
Sober
 
Wy heeten willeken
 
Die van sweerls hilleken/ cunt zwaerheyt mayen.
 
Hu byzyns can elcken/ doen verfrayen
 
Ondancx diet becrayen/ met eeneghen nyde.
Quaet
220
Goet Gheselscip/ comt hier neffens myn zyde.+
 
Weist vroylic en blyde/ te deser huere.
 
Wy en saghen hu jn langhe.
Sober
 
Hoe muecht ghy vaeren?
Goet
 
Wel ter kuere.
 
Dies jc labuere/ jnder vruechden eestere.
 
Om vruecht tanthieren/ bem jc een meestere.
225
Alssic myn tweestere bem ghepartuert
 
Gheen onghenouchte/ by my gheduert
 
Maer therte onghetruert/ leift buten sdroufheyts gheclach.
 
Sytge dus alleene?
Quaet
 
Wy hebben alden dach
 
Verbeyt zonder verdrach/ hu Goet Gheselscip fyn.
230
Maer naer dat ghy commen zyt vp dit termyn
 
Sullen wij vroylic zyn/ van druck ontbonden.
Inwendeghe Wroughynghe
 
O meinschen versworen/ meynheedich ghevonden
 
Ondancbaerder vele/ dan beesten of honden
 
Men mach wel vermonden/ dat ghy onbekent zyt
235
Als ghy by Sober Regemente/ nv ten stonden
 
Ghaet sitten/ jn Houde Ghewuente van Sonden.
 
Wye zoude ghegronden hoe ghy verblent zyt?
 
Vliet Quaet Beleedscip/ eer ghy ghescent zyt
 
By Cleen Achterdyncken/ jnt eeuwich bederuen.
240
Eist dat ghy/ van tsondich voetsels/ niet ghespent zyt
 
Godt zalhu verdryuen/ vut zynder eruen.
 
O meinsche peynst/ dat ghy moet steruen
 
Ende eer ghy verweruen/ sult Gods zoete verblyden
 
Ghy moet laten Ghewuente/ der Sonden tallen tyden.+
Quaet
245
Laet ons met vruechden zyn zonder vermyden.
 
An allen zyden/ zal dies druck myncken.
Cleen
 
Goet Gheselscip/ laet alle zwaerheyt zyncken.
 
En wilt niet dyncken/ dan om te smullene.
 
Hier es eenen dranck/ zonder te drullene
250
Om te vullene/ sapetyts boetsele
 
Smake jn te vyndene.
Goet
 
Hoe esse gheheeten?
Cleen
 
Hoese heeten mach?/ Sondich Voetsele
 
Een verzoetsele/ bereedt tot elcx behouuen.
 
Ic zalhu scyncken/ rasch zonder thouuen.
255
Wiltse doch prouuen/ binnen desen vergiere.
 
Ses zoet om nutten.
Goet
 
Dat willic doen.
Cleen
 
Hoe becomse hu?
Goet
 
Nv bem jc ghestelt/ om te makene chiere
 
Met blyder manniere/ binnen dit ghespan.
 
Dats een dranck/ die een verblyden can.
 
Menich man/ zoude tsoorghens meskief
260
Gheheel by vergheten.
Gheduereghe Verarthede
 
Godt seynt hu myn eeren.
Sober
 
Wellecomme lief
 
Die swaerheyts grief/ van elc cunt weeren.+
Quaet
 
Weerdinnekin sit by/ tes ons begheeren
 
Sonder ontbeeren/ te deser stede.
 
Wy biddens hu.
Gheduer
 
Tes een weselicke bede.
265
Der vreuchden snede/ my jnt herte daect.
Inwend.
 
Tspel es nv gheheel vulmaect.
 
Als den meinsche niet en staect/ zyn sonden onghemeten
 
Wort [hy] met Gheduereghe Verarthede beseten.
 
Die tverstant weten/ men darft niet breeden.
Sober
270
Weerdinnekin maect chiere.
Gheduer.
 
Jc wilder my toe bereeden.
 
Goet Gheselscip/ en mach my niet verleeden
 
Al washy ghesceeden/ van hier een poossekin.
 
Ommers eshy ghekeert.
Goet
 
Jaeic scoon roosekin.
 
Verstaet wel tgloossekin/ myn weertste moncxskin.
275
Jc blyfs hu by.
Cleen
 
Brynct huer een droncxskin.
 
Als een fray joncxskin/ met blyden zinne.
Quaet
 
So mach hier worden/ ten eersten beghinne
 
Der vreuchden vinne/ blydelic verstelt.
Goet
 
Hu wort een droncxskin.+
Gheduer.
 
Dat wachtic onghequelt.
280
Met jonsten ghehelt/ thuwaerts vut duechden.
Goet
 
Myn herte es/ jn uwer liefden ghevelt.
 
Hu wort een droncxskin.
Gheduer.
 
Dat wachtic onghequelt.
Quaet
 
So wye zyn lesse / niet wel en spelt
 
Eer hy met Venus verselt/ wort den onthuechden.
Goet
285
Hu wort een droncxskin.
Gheduer.
 
Dat wachtic onghequelt.
 
Met jonsten ghehelt/ thuwaerts vut duechden.
 
Voort brynghict hu allen.
Goet
 
Elc wachs met vruechden.
 
Als edele juechden/ willet elc andren brynghen.
Cleen.
 
Jae/ jae/ seck vry/ by sulcken dynghen
290
Soude men laten vyoolken zoorghen.
Quaet
 
Hebben wy gheen ghelt men zal ons boorghen.
 
Hem hietic verwoorghen/ diet ons ontvochte.
Goet
 
Weerdinnekin/ of jct vraghen mochte
 
Ghy zyt zo vriendelic een bekuereghe
295
Hoe es uwen naeme?+
Gheduer.
 
Jc heete Gheduereghe.
 
So wye jn dit logyst comt/ es my bequaeme.
Goet.
 
Gheduereghe/ dats een vreimde naeme.
 
My dyncke naerden betaeme/ dat ghy anders heeten moet.
Sober
 
Tes Gheduereghe Blyscepe.
Quaet
 
Of Gheduerich Goet.
Goet
300
Noynt en wassic/ daermen/ van sulcke naeme queilde.
 
Ses vreimt om hooren.
Sober
 
Tes Gheduerich Ryckdom.
Quaet
 
Of Gheduereghe Weilde
 
Een amoureuse beilde/ van weerden pryselic.
Inwend.
 
Ay aerme meinschen/ tes Verarthede afgryselic
 
Daer ghy onwyselic/ by blyft als pachtere.
305
Gheduerich noompt zou vooren/ maar zou laet achtere
 
Verarthede thuwen lachtere/ wilt dit vry gronden.
 
Ooc wuentse/ jn Houde Ghewuente van Sonden.
 
Daer ghy nv ten stonden/ zit thuwen verdrietene.+
Gheduer.
 
Goet Gheselscip/ niet te verscietene
310
Maer pynt te beghietene/ te netten hu caken
 
Met desen drancke/ zeer zoet van smaken.
 
Hy can doen slaecken/ tsoorghens bequelen.+
Quaet
 
Goet Gheselscip/ wat ghaen wy maken?
 
Secht hu motyf/ rasch zonder helen.
Goet
315
Quaet Beleedt/ versiert ghy de saken.
Sober
 
Goet Gheselscip/ wat ghaen wy maken?
Quaet
 
Wilt yedt versieren/ met corter spraken
 
Dit sitten/ zoude veil lieden vervelen.
Sober
 
Goet Gheselscip/ wat ghaen wy maken?
320
Secht hu motyf/ rasch zonder helen.
Goet
 
Danssen of sprynghen/ tuusschen of spelen
 
My en roucx machic pelen/ der vruechden ey.
 
Wat ghy versiert/ twort mynen grey.
 
Maer myn zinnen vey/ ziet zonder twyffelen
325
Haken meest/ om tuusschen en myffelen
 
Fluusschen mornyffelen/ rouffelen honueren.
 
Al waert te dobbelen/ te deser hueren
 
Jc zal aventhueren/ ruterlic myn deel
 
Al zouder al tmyne/ blyuen gheheel.
330
Haut dit parcheel/ en doe jc gheen ghekeer
 
Jc en zy rudder of meersman.
Inwend.
 
Wat wilt ghy by stellen? Qualic esser meer.
 
Dies teeuwich zeer/ duer svyants bedryf
 
Hu bereedt es.
Goet
 
Wye snaetert daer?+
Cleen
 
Een zinneloos wyf.
 
Inwendeghe Wroughynghe/ es zou gheheeten.
335
Daer en es niet vp te tachtene.
Gheduer.
 
Huer moetic puer veeten.
 
Want by huer bleeten/ ghecreechghic gru.
 
Doet de sottinne wech ghaen.
Inwend.
 
Die de waerheyt seght/ es zinneloos nv
 
Of zot gherekent/ binnen sweerels warande.
 
O meinschen ontsiet/ ghy hu niet der scande
340
Dat ghy met verstande/ verhardt van zinnen
 
Ghaet weder hu houdt anthieren beghinnen?
 
Syt vry te binnen/ myns woords ghewaghen.
 
Tsal hu noch leet zyn.
Quaet
 
Wat wilhy daer naer vraghen?
 
Doet elders hu claghen/ laet hem onghemoeyt.
345
Weerdt esser gheen cruudt/ jnt vleesch ghegroeyt
 
Dat wy onvernoeyt/ vermaecten ons gheestkins?
Cleen
 
Jaet/ ziet daer/ twee aardeghe beestkins
 
Die meneghe feestkins/ maken ghestoort snel.
 
Deene heet Onghereghelt Voortstel
350
Acht myn woort wel/ der verclaerichede.
Sober
 
Hoe heet dander?
Cleen
 
Ondancbaeriche[de]
 
Daer den meinsche by zwaerichede/ als de vervaldere
 
Comt jn Ghewuente van Sonden.+
Quaet
 
Dats uwer aldere
 
Goet Gheselscip wat stelt ghy/ metter spoet?
355
Van zeuene?
Goet
 
Dat van zeuene.
Quaet
 
Dat houdic fyn bloet.
 
Siet daer ghemoet/ ter eerster kanse.
 
Dats weder uwer alder/ God weer hu van chanse.
 
Wat stelt ghy ter balanche?/ Doet myns bediet.
 
Van sessen?
Goet
 
Dat van sessen.
Quaet
 
Dat houdic noch ziet
360
Eer van my vliet/ tgheluc by crachte.
 
Dats myne ziet/ jc hebbe achte
 
Dies jc verwachte/ binnen deser coye
 
Sys deus/ of choncke/ troye.
 
So machic de proye/ te desen termyne
365
Tmywaerts trecken.
Goet
 
Worpt dat ghy kunt.
Quaet
 
Dat es noch myne
 
Alst blyct andt scyne/ byde steenen jent.
 
Tzyn twee quaeters.
Goet
 
Tes waer jc kent.
 
My es ontrent/ songhelucxs last.
Cleen
 
Ghy hebt van daghe/ wat ongheluckicx ghetast+
370
Dies wort ghy ghebonden vast/ jn sdroufheyts bondele.
Quaet
 
Wat lecht ghy van neghene?
Goet
 
De gheheele prondele.
 
Rudder of meersman/ willic bedien snel.
Quaet
 
Jc hebbe vyue ziet.
Goet
 
Jc hebt ghezien wel.
 
Worpt laet ghescien spel/ zonder dralen.
375
Al heift my/ tongheluc beghunnen straelen
 
Jc meene te verhalen/ noch myn scade.+
Quaet
 
Siet daer quaeter aes.
Goet
 
Nu eiste spade
 
Dies jc versmade/ steerlyncx bedryuen.
 
Jc hebt al verloren/ my zal by blyuen
380
Sachterdeels beclyuen/ met grooten hooppen.
 
Den teerlync es my/ contrarie jnt looppen
 
Dies moetic nv cnooppen/ der soorghen bandt.
 
Jc en weet wat raet.
Quaet
 
Wilges noch?
Goet
 
Daer en es niet jn dhandt
 
Ghelt noch pandt/ ghesworen by eeden.
Sober
385
Es den bucht vut/ zo willen wy sceeden.+
 
Niet langher Goet Gheselscip/ dan tghelt gheduert.
Cleen
 
Die niet en mach docken/ men crycht zyns verleeden.
Quaet
 
Es den bucht vut/ zo willen wy sceeden.
Sober
 
Ghy muecht wel in droghaerts bilck ghaen weeden.
390
Met Royghems ghequel/ wort ghy besmuert.
Quaet
 
Es den bucht vut/ zo willen wy sceeden.
 
Niet langher Goet Gheselscip/ dan tghelt gheduert.
Goet
 
Dat weetic te vooren/ dies therte truert
 
By welc verstooren/ myn vruecht nv scuert.
395
Jn drucke bemuert/ jc mach wel claghen.
 
Wye heift mueghen hooren/ dat hyement ghebuert
 
Es songelucx oorbooren/ zoo bitterlic versuert
 
Of zo wreet ghepartuert/ hardt om verdraghen
 
Als nv es vp my./ O Fortune vul plaghen
400
Ghy doet my versaghen./ Jc en weet gheenen raet.
 
Wat sallic beghinnen/ om scosts behaghen?
 
Jc en can niet winnen./ Hoe sallic de laghen
 
Sonder vertraghen/ scuwen der aermoeden staet?
 
O Maria/ naest Godt myn toeuerlaet
405
Hu ooghen vp my slaet/ te desen termyne nv
 
Want tongheluc/ doet my/ jnt herte pyne nv.
Inwend.
 
O meinsche de sculden zyn dyne nv
 
Soot blyct ten fyne nv/ by dyne ghewercken.
 
Wat tyt eist leden/ om claer bemercken
410
Dat ghy om tverstercken/ van uwer sielen+
 
Ghereynicht waert/ van tsondich ghecrielen?
 
Nv hebt [ghy] dhielen/ als de onwetende
 
Ghekeert vut den wech/ alle duechden verghetende
 
Daer ghy waert vermetende/ myn woorden acht
415
Dat ghy hu zout hebben/ van sonden ghewacht.
 
Maer lachen ghy slacht/ den roukeloosen
 
Die by Cleen Achterdyncken/ niet en gloosen
 
Dat zy te menegher poosen/ der temptacien vermaen
 
Wel zouden beletten/ ende sonden wederstaen.
420
Maer haestelic waen/ zo men bevynt
 
Keeren zy/ als den weirhaene/ met den wynt
 
Duecht achtende twynt/ zoot openbaer es.
 
Schelycx eist met hu.
Goet
 
Jc kenne dat waer es.
 
Myn siele jn vaer es/ duer myn quaet leuen.
425
Ic en weet wat bestaen.
Inwend.
 
Ic zal hu raet gheuen.
 
Wilt ghy versmaet gheuen/ tsondich afgrysen
 
Met leedtscip van herten?
Goet
 
Jae jc en trauwen.
Inwend.
 
So ghaen wy tsaemen/ tot Duechdelic Onderwysen.
 
Ende met goede avysen/ jn woorden ghestadelic
 
Sult ghy hem ontdecken/ hu ghebreken scadelic.
430
Hy zal hu beradelic/ als een goet troostere
 
Hopic bevroeden.
Goet
 
Waer sallic hem vynden?+
Inwend.
 
Int ghuent cloostere.
 
Doet by rade doch/ tes meer dan tyt.
 
Ic zal hu by blyuen/ om hu proffyt
 
In svyants spyt/ thuwer sielen salichede.
Goet
435
Ic dancx hu vrauwe/ met corter verhalichede.
 
Al hebbic by dwalichede/ my dickens mesdreghen
 
My hopic te beteren.
Inwend.
 
Den prelaet ons comt tjeghen.
 
Weist niet weirsleghen/ hem groet zoot betaemt
 
Naer zynder weerden.
Goet
 
Ic bem bescaemt
440
Sulc man vernaemt/ te sprekene ziet.
Inwend.
 
Et moet wesen/ en scaemt hu niet.
 
Tes tjeghens den meesten/ te sprekene best
 
Dan tjeghens den minsten.
Goet
 
Voorwaer dat eist.
 
Dus sallic my verstouten/ by uwen raet.
445
Hooghe ende muechghende/ eerweerdich prelaet
 
Myn groeten ontfaet/ vut jonstegher minne.
 
My brynct hier/ dese vrauwe/ als myn vriendinne
 
Met onderdaneghen zinne/ tot hu onderwysen
 
By pueren odmoede.
Duechdelic Onderwysen
 
Myn vrient wilt rysen.
450
Sulc prysen/ en treckic niet tmynder weerden.
 
Dus zyt vp staende/ vander eerden.+
 
Wilt om segghen anveerden/ de saken bloot
 
Waeromme ghy hier comt.
Goet
 
De sake es groot.
 
Vader my doet noot/ dat jc hier comme
455
Tot hu/ verstaet de redene waeromme.
 
Jc aerme domme/ verdoolt verblent
 
Buten Gods weghe/ alle duechden ontwent
 
By Sober Regement/ vul sonden stynckende
 
Met Quaet Beleedscip/ vp Godt niet dynckende
460
Maer etende drynckende/ te meneghen stonden
 
By Gheduereghe Verardthede/ jn Ghewuente van Sonden
 
Jc was ontbonden/ van allen mesdade
 
Ende onlancx ghesuuert/ van sondeghen quade.
 
Ooc haddic ghenade/ van Gode ghecreghen
465
Mids dat jc beloofde/ te scuwen tgheneghen
 
Van tsondich pleghen/ zoorghelic van staten.
 
Maer by Cleen Achterdyncken/ te mynder onbaten
 
Hebbict al ghelaten/ nyeuwers vp rouckende.
 
Ooc hebbic my seluen/ gheweist verclouckende
470
Weder versouckende/ plaetsen en steden
 
Van Houder Ghewuente/ vul sondeghe sneden.
 
Dus hebbic ontgleden/ mynder beloften woort
 
By myn sondich anthieren.
Duechd.
 
Helpe wat hooric.
Inwend.
 
Ende noch bouen al desen voort
 
Heift hy gheoorboort/ naer zyn houdt anthieren
475
Te dobbelen te spelen/ gheen sonde te vieren
 
Mids welke mannieren/ weerdich vader vercoren
 
Heift hy gheheel/ ende al tsyne verloren.+
 
Hy en leift niet gheboren/ onder shemels bedecken
 
So ghebreckelic als hy.
Duechd.
 
Wat hooric vertrecken.
480
Sulc meinsche waent/ met Gode ghecken
 
Maer by zyn selfs strecken/ wort hy ghevaen.
 
Me vrient/ ghy hebt hu grootelic mesghaen
 
Ende vele mesdaen/ tjeghens Godt verheuen
 
Ghemerct dat de mesdaet/ ende tsondich leuen
485
Dy was vergheuen/ zuuer ende reene
 
Ende weder gheghaen zyt/ alst blyct ghemeene
 
By Achterdyncken Cleene/ thuwer versmaetheyt
 
Jn Houde Ghewuente/ vul sondeghe quaetheyt
 
Daer ghy jn bescaetheyt/ zyt grootelic commen
490
Hu stellende jn soorghen/ van teeuwich verdommen.
 
Ten baet rechten noch crommen/ dits claer besceet.
 
Ghy moet hu beteren.
Goet
 
Daer toe bem jc bereet.
 
Maer lachen jc en weet/ hooft/ middel/ of steert
 
Om een beghinnen.
Duechd.
 
Naer dat ghy begheert
495
Hu te beteren weert/ Houde Ghewuente blamelic.
 
Neimpt met hu deuchdelic/ werc eersaemelic.
 
Ooc eist betamelic/ dat ghy met diligencie
 
Hu sonden betert/ met penitencie.
 
Van bedynghe abstinencie/ en wilt niet vertraghen.
500
Ooc moet ghy scuwen/ by nachten en daghen
 
Dyueersche ghelaghen/ ende bouen al
 
Van Quaet Beleedscip.
Inwend.
 
Ic duchte hyne zal
 
Oorconde thabyt/ daer hy mede ghecleet es.+
Goet
 
Myn ghebreckelicheyt/ my hertelic leet es.
505
Myn siele bereedt es/ met ghewillegher affecxcie+
 
Om my te stellenne/ onder uwe protecxcie.
 
Om by sduechs corecxcie/ sonden te vermoordene
 
So biddic om thabyt/ van uwer oordene.
 
Vp dat jc ten accoordene/ Gods zoude gheraken
510
So willic begheuen alle weerlicke saken.
 
Met corter spraken/ zonder cesseren
 
Biddic om uwe gracie.
Duechd.
 
Thabyt sallic hu consenteren
 
Naer dat ghy hu stylleren wilt tot duechden goet
 
Met ghewillegher herten.
Goet
 
Jae jc vader vercoren.
Duechd.
 
So eist dan noot alsnu metter spoet
515
Dat ghy of doet dese habituwacie.
 
Dus comt met my./ In corter spacie
 
Byder Gods gracie/ zal by hu verstaen zyn
 
Hoe een muenick zyn/ hueverste moet onderdaen zyn.
Pausa.
Quaet
 
Wye zouds hem/ bemoet hebben
Sober
 
Voorwaer jc niet
520
Al haddement ghezworen/ by eeden diere
Gheduer.
 
Dat Goet Gheselscip/ so haestelic sciet?
Quaet
 
Wye zouds hem bemoet hebben?+
Sober
 
Voorwaer jc niet.
Cleen
 
Tgraen was/ vut ghedorsschen/ verstaet tbediet.
 
Den scoof es hy/ ghaen legghen te viere.
Quaet
525
Wye zouds hem bemoet hebben?
Sober
 
Voorwaer jc niet.
 
Al haddement ghezworen/ by eeden diere.
 
Hy es begheuen.
Gheduer.
 
Seght by wat manniere
 
Eer jc verthiere/ veil woorden te quiste.
 
Eshy ooc muenick?
Sober
 
Jaey serteyn.+
Gheduer.
 
Wat daer of dat jc niet en wiste.
530
Seer lettel dat j[c] ghiste/ op sulken keer.
 
Hy zoude my by blyuen.
Cleen
 
Men vynter al meer.
 
Als hemlieden tjeghen es/ svoorspoets beclyuen
 
Dan looppen zy jn cloosters/ zynt mannen of wyfuen.
 
Lettel achtick tbedryuen/ van sulcke bewynders.
Gheduer.
535
Jc hoore wel/ zy slachten Venus kynders
 
Die hemlieden met mutsen/ dicwil gherieuen
 
So datse somtyts/ buten vrienden ghelieuen
 
By woorden of brieuen/ elc andre belouen
 
Mueghen zy huers wille/ niet commen te bouen
540
Dat zy worden ghescouen/ van huerlieder begheeren+
 
Nummermeer te huwene/ dat zy dan zweeren.
 
By sulc gheneeren/ dus zynde jn roere
 
Looppen zy jn cloosters.
Quaet
 
Deene wort suster.
Sober
 
Ende dander broere.
 
Maer sulcke voere/ en maect nyement helich.
Quaet
545
Als den moet ghecoelt es
Cleen
 
Wordense scloosters vervelich.
 
Dus leuense bequelich/ by sulker kueren
Sober
 
Met weenen en claghen
Quaet
 
Met suchten en trueren
 
Vermalendydende de hueren/ datse oynt saghen
 
Cappe of kueuele.
Gheduer.
 
Sen zyn niet al helich/ die crune draghen.
550
Dat darf jc ghewaghen met coenen ghedochte.
Cleen
 
Goet Gheselscip/ schelycx wel worden mochte
 
Naer dat hy plochte/ jn zyn conversacie
 
So rouckeloos te zyne.
Sober
 
Niet meer arguwacie/ te desen termyne
555
Voor men ziet ten fyne/ of hy blyft ghesticht.+
 
Jnt beghinsels zyn om doen/ alle dynghen licht.
Pausa cleene.
Goet
 
Noynt en wassic blyder/ jc en weet wat bediet.
 
My dyncke/ my en mach/ beheghenen niet.
 
Want nv hebbic ziet/ om beghunnen lust fyn.
560
Om Gode te dienen/ myn zinnen gherust zyn
 
Mids dat ghesust zyn/ myn sonden verhit.
 
Ende jn teeken/ dat my Maria onbesmit
 
Heift gheholpen jn dit/ by huerer odmoet
 
So willic ghaen plucken/ crudekin zoet
565
Ende maken eenen hoet/ huer die nyement en screeut.
 
Benedicite/ noynt en sachghict/ zoo zeere ghesneeut
 
Van dattic gheheeut/ was jn sweerels trape.
 
Want waeric metten ooghen/ kycke of gape
 
Gheen kennesse en rape/ jc om claer vermaen
570
Dattic yeuwers loof/ of cruudt zye staen.
 
Dus sallic best ghaen/ my seluen vercloucken
 
Te velde waert jn/ ende neerstelic zoucken
 
Jn allen houcken/ vp aventhuere bysondere
 
Of jc yeuwers wat vonde.
Duechd.
 
My abuseric van wondere.
575
Tghepeyns hout my tondere/ duer svreesens ghescien
 
Want van alden dach/ en hebbic niet ghesien
 
Dat duechdelic engien/ den jonghelync
 
Goet Gheselscip/ die hier thabyt ontfync.
 
Want alsmen ghync/ elcx porcie draghen
580
Hoordic elckerlyc/ naer hem vraghen
 
Ende nyement can ghewaghen/ hier ofte daer
 
Eshy gheghaen gheseyt voorwaer.
 
Dus hebbic vaer/ of svyants temptacie
 
Hem mochte ghebrocht hebben/ tot dessperacie.
585
Subtyl es svyants reyngnacie/ gheseyt ouerluut.
Goet
 
Waer jc my keere/ oost/ west/ ofte zuut+
 
Ghars loof of cruut/ jc nyeuwers en vynde.
 
Wat aerbeyt dat jc doe/ hoe jcx my bewynde
 
Nichtemeer dan den kynde/ van jaeren twee
590
En besciet dat ic doe/ omder dicte der snee
 
Ende den dach alree/ es den auende by.
 
Hoe jc met handen of voeten/ scrauende zy
 
Of hoe ic slauende my/ met aerbeyde vermoede
 
Nyeuwers en vyndic hiet/ te mynen goede.
595
Dus willic met spoede/ keeren ten clooster waert.
 
O Maria/ nv es my/ therte bezwaert
 
Met drucke onghespaert/ niet om vulspreken
 
Dat jc uwen dienst/ nv lachen moet breken.
 
Myn ooghen leken/ duer dit bedryf.
Duechd.
600
De vreese es my zo groot jnt lyf.
 
Therte blyft styf/ by dien in duchte
 
Om desen muenick/ dies jc versuchte.
 
Want nyeuwers gheruchte/ zo en hooric vermonden
 
Dat hem yement ghesien heift ofte ghevonden.
605
Jc en can ghegronden/ waer hy es belendt.
Goet
 
My dyncke jc bem/ den clooster ontrendt.
 
Ook zye jc myn regendt/ dien willic groeten
 
So jc bem sculdich.
Duechd.
 
Wye zal nv verzoeten
 
Ende mynen druc boeten/ groot bouen somme?
Goet
610
Vader weist ghegroet.
Duechd.
 
Broeder wellecomme.
 
Waer omme/ hebt ghy ons dit verdriet ghedaen?+
Goet
 
Vader hoe zoo?
Duechd.
 
Dat ghy wech zyt gheghaen.
 
Doet my verstaen, de waerachticheyt claer
 
Waer ghy gheweist hebt.
Goet
 
O vader eerbaer
615
Ten bescote niet een haer/ al zeydict hu voorwaer
 
Naer/ dat men zien mach/ styts gheneghe[n]theyt.
Duechd.
 
Jc begheert te wetene/ seght my de gheleghentheyt.
 
Hebt ghy bejeghentheyt/ by eeneghen drucke
 
Jc zalhu beraden.
Goet
 
Cranc bem jc van ghelucke.
620
Want waeric my betrucke/ varre ofte by
 
Myn begheeren en vyndic niet.
Duechd.
 
Wilt hu ghebreken my
 
Ontdecken vry/ jc zal dy troosten zuene.
Goet
 
So sallict hu segghen/ binnen desen gheduene.
 
Vader jc was ghewuene/ jn mynen jonghen tyt
625
Ter eeren van Maria/ ghebenendyt
 
Eer jc dede onbyt/ van dranc of spyse
 
Een hoedekin te makene/ naer myn selfs ghyse
 
Met blomkins van pryse/ naer myn verstant.
 
Ende thoedekin/ ghemaect zynde altehant
630
Ghynghic daer jc vant/ niet om vernetten
 
De beilde van Marie/ dien jct zonder letten
 
Vp thooft ghync setten/ hoort myn vermonden.
 
Dit hebbic daghelicx ghedaen/ tot nv ten stonden+
 
Hoe vul van sonden/ datic wesen mochte.
635
Hedent meendic te doene/ alzo jc plochte.
 
Maer waer jc sochte/ in velden jn straeten
 
Een gharssekin en vandic niet te mynder baeten.
 
Ende om niet te laeten/ myn houde pleghen
 
So wassic te meer/ om soucken gheneghen.
640
Maer de snee onversweghen/ licht zo dicke en zwaer
 
Dat jc niet vynden can.
Duechd.
 
Huer en hebt ghy ghedient niet?
Goet
 
Och neen jc voorwaer
 
Al hadt my mueghen baten sweerels goet.
Duechd.
 
Wilt ghy Maria/ maken eenen hoet
 
Van blommekins zoet/ exellent ghepresen
645
Jc zalt hu leeren.
Goet
 
Jaeic vader vercoren.
Duechd.
 
So sult ghy lesen
 
Vichtich Aue Marien/ maer bouen desen
 
So moeter wesen/ tusschen elcken tiene
 
Een Pater nostere./ By desen ghesciene
 
So zult ghy Maria/ telcker poossen
650
Maken den scoonsten hoet van roossen
 
Wilt hier vp gloossen/ zonder vernoeyen
 
Dan oynt vutter eerden mochten groyen.
 
Ooc zal hu toe vloeyen/ gracien menichfuldich.
Goet
 
Jc dancku dat ghy/ myns zyt ghehuldich.+
655
Nu bem jc verduldich/ jn myn lyden stranc.
 
Jc zal ghaen nemen/ tot Maria ghanc
 
Eer jc spyse of dranc/ thameer zal prouuen.
Duechd.
 
Suene zo doet.
Goet
 
O Maria troosteghe der drouuen
 
Tot hu zonder thouuen/ com jc te deser steden.
660
Maer hu te beghiftene/ naer dhoude zeden
 
Jnder waerheden/ gheseyt ouer luudt
 
Es my onmueghelic/ weerde Gods bruudt.
 
Maer synghels saluut/ scoon bloeyende rancke
 
Sallic hu scyncken/ nemet jn dancke.
Pausa.
Sober
665
Hoe makent wy nv?
Quaet
 
Tjacop jc en weet.
 
Tes al verdaen/ dat jn myn bewelt stont.
Sober
 
Om by stellen/ en esser niet meer ghereet.
 
Hoe makent wy nv?
Quaet
 
Tjacop jc en weet.
Cleen
 
Sout ghy ghelooft zyn/ verstaet tbesceet
670
Et waere van nooden/ dat ghy ghelt bont.
Sober
 
Hoe makent wy nv?
Quaet
 
Tjacop jc en weet.+
 
Tes al verdaen/ dat jn myn bewelt stont.
Sober
 
Quaet Beleedt/ jc weet/ een ghestelt vont
 
Tonsen voordeele ghespelt ront/ jnt bemercken.
Quaet
675
Secht vp laet hooren.
Sober
 
Dat wy ghaen wercken
 
In eeneghe percken/ of dienen als cnapen.
Quaet
 
Myn leden zyn/ alte zeere verslapen.
 
By dien mochtic rapen/ myn onghevouch.
 
En spreict van gheen wercken. Van dien ghenouch.
680
Want wonde[r]lic abuus/ mochter tusschen vlieten.
Sober
 
Wat wilt ghy doen dan?/ Huusmusschen scieten?
 
Alzo mach men den cost ghemackelicxst versaemen.
Cleen
 
Quaet Beleedt zouds hem te zeere scaemen.
 
Naer myn raemen/ en waerhy niet weert een mussche.
685
Jc riede hem eer/ om te ligghene ten bussche
 
Dan een blytter te wordene/ van elc versteken.
Quaet
 
By Gheerre/ daer hooric een ruter spreken.
 
Heer weert onbesweken/ wilt ghy belouen my
 
Dat ghy my ghetrauwelic/ zult blyuen by
690
Ic ende ghy/ sullen/ jn cloucker zede
 
Tsaemen ghaen roouen.
Sober
 
Jc wil mede.+
 
Meent ghy/ dat jc/ hyeuwers vooren versaghe?
Cleen
 
Ghaen wy tsaemen/ jc weet een haghe
 
De beste laghe/ die men mach bespien.
Goet
695
Noynt en hebbic/ meerder wonder ghesien.
 
Nv alssic Marien/ thoedeken hebbe ghelesen
 
So myn prelaet/ my heift ghewesen
 
So zye jc mids desen/ vp de beilde rycke
 
Eenen hoet van roosen/ wit zonder ghelycke.
700
Ende alssicse bekycke/ met stercken engiene+
 
Een roose root staeter/ tusschen elcken tiene
 
Scoone inden ansiene/ al waert somers tyt.
 
Myn herte inwendich/ by dien verblijt.
 
O Gods moeder/ Maria ghebenendyt
705
Naer dien onvermyt/ hu desen dienst greyt
 
Nummermeer en wortse/ van my verleyt.
Cleen
 
Jn desen busch gheheeten/ sWeerels Onsekerheyt
 
Hier gheseyt/ wilt ghys hebben te bet
 
Moet tvolc ghewacht zyn.
Quaet
 
Deerste onghelet
710
Wort of gheset/ zuuer ende net zonder helen.
Sober
 
Wilhy hem weeren/ jc zalhem kelen.
 
My en mach vervelen/ nu gheen quaetdoen.
Cleen
 
Ghesellen/ wilt ghy/ mynen raet doen
 
Wilt elcken bescaet doen/ ende nyement sparen++
715
Weir zy looppen/ of ghaen ryden of varen
 
Of hoe zy mesbaren/ by eenegher weenynghe
 
Pilgieret al.
Quaet
 
Dats seck de meenynghe.
 
Myns quaetheyts vereenynghe/ tot elcken helt nv.
Goet
 
Om ghaen hebbic/ my selven ghestelt nv.
720
Dies ic ouer tvelt nv/ my wil ghaen haesten
 
Ende nemen den wech/ al hier ten naesten
 
Vp dattic te eer wesen mach/ daer jc begheere.
Sober
 
Alle man/ zye toe/ zyt vp hu weere
 
Dat ons nyement en deere/ van bezyden.
Cleen
725
Ghunder comt een muenick.
Sober
 
Wilt hy hier lyden
 
Syn ghetyden/ sallic hem anders leeren.
Quaet
 
Hy salter al laten/ cappen ende cleeren
 
So dat hy mach keeren/ of ghaen te lichter
 
Daer hy wil wesen.
Cleen
 
Elc zy een swichter
730
Van zynder talen/ vry van ghescalle.
Quaet
 
Hy es ghelyc de muus/ jnde valle.
 
Hy comt te slaghe/ ghelyc de meese.+
Goet
 
Jc moet duer desen busch/ dies hebbic vreese.
 
Want meneghe weese/ zo jc wel weet
735
Worter ghemaect/ by de moordenaers wreet.
 
Ende wien lief of leedt/ dien zy ghecryghen
 
Dien nemen zy thuere/ ende moeten zwyghen.
 
Hoese stupen nyghen/ tvolc zy als verdoouers buusschen.
 
My dyncke/ jc hoore de loouers ruusschen.
740
Eist dat hier roouers luusschen/ twort myn bescaet
 
Dat weetic te vooren.
Sober
 
Bylo pape jaet.
 
Eer ghy varre ghaet/ sult ghys worden gheware.
Goet
 
Jc beghunne nv rechts/ te worden jn vare.
 
Tes best vp aventhuere/ wats gheviele
745
Dat jc hier neder ter eerden kniele
 
Om te stellen myn siele/ jn Marien bewarenesse
 
Ende huer lesen een hoedeken/ zo dopenbarenesse
 
Myn spryoors verclarenesse/ laests dede bediet
 
Vp dat my by huer/ alle vrede ghesciet
750
So by sulcker zede ziet/ my heift gheluckt.
Quaet
 
Wat maect de pape/ dat hy zo huct?
 
Tscynt dat hy pluct/ roosen die bloeyen.
Cleen
 
Jc en wiste hier noynt/ gheen roosen groeyen.
 
Hu ooghen vloeyen/ by vulheyt van bloede.
Sober
755
Hy es besich met tmaken/ van eenen hoede.
 
Ende zo jc ghevroede de roosen zyn wit
 
Die hy der anstelt.+
Cleen
 
Nu zye jct ooc/ mids dat hy daer vit
 
Eene roode roose/ niet te ghelyckene.
Quaet
 
Hy weetse jnt stellen/ so jent te hyckene.
760
Van desen kyckene/ jc niet en versade.
Sober
 
Den hoet wort vulmaect/ eer jc hem bescade
 
Of eer jc hem by quaede/ doe eenich belet.
 
De roosen zyn zo scoone/ zo zuuer zo net
 
De welcke hy set/ an shoeds berynghen.
765
Noynt gheen scoonder.
Quaet
 
Noynt vreimder dynghen.
 
Qualic can jc my dwynghen/ jc wilder ghaen.
Cleen
 
Ontbeyt/ den hoedt es bycans vuldaen.
 
Wilt noch wat staen/ ende bezien te deser steden
 
Wat hij doen zal.
Quaet
 
Jc bems te vreden.
770
Qualic machy treden/ buten onsen beloken.
Goet
 
Maria nv hebbic/ uwen lof ghesproken.
 
Wilt my bestoken/ met uwer minnen gloet
 
Ende alle jeghenspoet/ van my dinnen doet.
 
Thoedekin met zinnen vroet/ by my ghelesen wanckelic
775
Hu biddic Maria/ laet hu wesen danckelic.
Sober
 
Noynt zo veruaert.+
Quaet
 
Noynt zo vereent.
Cleen
 
Noynt zo bezwaert.
Sober
 
Noynt zo verbeent.
 
Therte es vercleent/ duer swonders bedryf.
Quaet
 
Van vreese zyn my/ de leden noch styf.
780
Duer der varen bedryf/ stae jc noch en wemele.
Cleen
 
Als Maria daelde/ vut den hemele
 
By sclaerheits scemele/ was my tghesichte berooft.
Sober
 
Hy stelde huer seluen/ den hoedt vp thooft.
 
Jc en hads niet ghelooft/ duer nyemends eedt
785
Haddict niet ghezien.
Quaet
 
Laet ons hem ghereet
 
Thooghen dat ons leet/ es tsondich anthieren.
Goet
 
Nu willic ghaen duere/ zonder vieren.
 
Gheen dangieren/ en darf jc ontsien.
 
Ghunder commen roouers/ onder hem drien
790
Ende jc en mach niet vlien/ ghesproken bloot
 
Want zy commen/ my tjeghen jnden scoot.
Cleen
 
O vader ontfaermt ons/ jn onsen noot
 
Eer ons de doot/ crycht byden slippen.
Goet
 
Myns lyfs ghenade.+
Sober
 
Vreest niet twee snippen.
795
Gheerne zouden ons lippen/ hu openbaren
 
Ons ghebreckelicheyt.
Goet
 
Wilt my verclaeren
 
Ghy die als moordenaeren/ hier hebt verkeert
 
Waer comt hu deis rauwe?
Quaet
 
O vader gheeert
 
By uwe duecht vermeert/ saghen wy dalen
800
Maria/ vut den hemele/ de welcke quam halen
 
Eenen hoedt zonder falen/ dien ghy hadt ghemaect
 
Van witten roosen/ jent ende wel gheraect.
 
Ende als Maria gedaect/ was vp der eerden
 
Steldet ghyse vp huer hooft/ met grooter weerden.
805
Doen voerse huerer veerden/ met ghewelscip
 
Leedende met huer/ al themelsche gheselscip
 
Dat zonder ghequelscip/ met huer was commen.
 
Ooc drouchse met huer/ den hoet van blommen.
 
Wy verdoolde dommen/ vul sonden stynckende
810
Dit ziende/ wierden ons bedynckende
 
Tot hu vader blynckende/ vul duechden ghepresen
 
Te commen om raet.
Sober
 
Ende noch bouen desen
 
Saghen wy hu lesen/ de roosen scoone
 
Jn desen busch/ by hu selfs persoone
815
Gheseyt zonder hoone/ tot hu zonder stooren.
 
Ende hier en groeyen gheen/ dit weten wy te vooren.
 
Ons wondert wilt hooren/ by dit ghescien.
 
Want hier en staen roose noch boom/ zo men mach zien.
 
Dus kennen wy by dien/ te deser steden+
820
Dat et comt byder duecht/ van uwer beden
 
By welker zeden/ verstaet ons besceet
 
Commen wy tot hu.
Goet
 
Van al jc niet en weet
 
Smal noch breet/ van deser saken.
Cleen
 
Wy saghen hu nochtans/ den hoet wel maken.
825
Dies wy zonder slaken/ bidden ghemeene
 
Dat ghy ons seght/ jnt secrete alleene
 
Waer ghy Maria reene/ mede hebt ghedient
 
Datse hu bescermt heift.
Goet
 
Jc salt hu segghen vrient.
 
Hoe jonc gheengient/ dat ic wesen mochte
830
Van dat jc verstant hadde/ jn myn ghedochte
 
Altoos jc plochte/ ter eeren van haer
 
Een hoedekin van blommen/ te makene voorwaer
 
Twelc jc Maria eerbaer/ voor alle dync
 
Altoos ter kercken offeren ghync.
835
Ende naer dattic ontfync/ dit gheestelic habyt
 
Ter eeren van Maria/ ghebenendyt
 
Eens vp eenen tyt/ zo men doe sach
 
So zwaer een snee/ allomme lach
 
Dattic dien dach/ hadde moeten breken
840
Hadde my den raet/ myn pryoors besweken
 
Die my riet te spreken/ tallen poosen
 
Alssic Marie/ wilde maken/ eenen hoedt van roosen
 
Wilt vp dit gloosen/ met deuoten engiene
 
Vichtich Aue Marien/ maer tusschen elcke tiene
845
Moester een Pater nostere/ wesen
 
Twelc jc noch daghelicx/ hebbe ghelesen.
 
Dus hebbic huer mids desen/ tmynder noot vercoren.+
Sober
 
Sou heift hu besceermt/ wy hadden hu doot ghezworen.
 
Ende wy zyn bloot ghescoren/ als beestelicke honden
850
Van allen duechden.
Quaet
 
Och dat wy jn sonden
 
Syn ghebleuen tmach ons/ wel rauwen.
Sober
 
Daer wyt al verdaen hebben/ om claer vermonden.
Cleen
 
Och dat wy oynt bleuen/ jn Ghewuente van Sonden.
Quaet
 
By Cleen Achterdyncken/ zyn wy als roouers vonden
855
In sWeerls Onsekerheyt/ duer hu quaet brauwen.+
Sober
 
Och dat wy oynt bleuen/ jn Ghewuente van Sonden
 
By Gheduereghe Verardthede/ tmach ons wel rauwen.
Cleen
 
Vader vp dat Godt/ ons leedtscip mach scauwen
 
Seght ons jn trauwen/ zonder bedriechte
860
Hoe sullen wy ons beteren?
Goet
 
Met waerachteghe biechte
 
Jnt vuldoen/ der penitencien ghesedelic.
Quaet
 
Daer toe willen wy ons voughen vredelic
 
Vp dat wy edelic/ gheraken jn Gods rycke bouen.
Goet
 
In saleghe vulstandicheyt/ laet ons Maria louen+
865
Huer bedanckende dat zou/ hu heift kennesse ghegheuen
 
Ende jcke/ dat zou my heift behouden tleuen
 
Als roose verheuen/ bouen alle blommen reene.
Sober
 
Sou eist wel weerdich/ dus ghaen wy ghemeene
 
Tot huer alleene/ die vul gracien vloeyt
870
Vut wien de roose/ onser salicheyt es ghegroeyt
 
Dat zy onvernoeyt/ ons verbidde als aduocate.
Goet
 
Wilt ghy Maria/ ghecryghen te bate
 
Siet hier jn state/ huer beilde wiltse groeten.
 
Noynt sondaer huer en badt/ hyne creech verzoeten.
Pausa cleene.
Quaet
875
Lof bloeyende roose/ zuuer onbesmit wit
 
Anhoort my sondaer/ die vierich verhit bit.
 
Maria ons troost/ die hier in 't leuen leuen
 
Als alder machtichste/ ghy bouen dit zit
 
Naest Godt inden hemel./ Jn sweerels pit vit
880
Huwe gracie vp ons/ die hier in sneuen sneuen.
 
Huwe ghenade my wilt/ zonder begheuen gheuen.
 
Scoon roose ons alder/ bevroedichste/ bevroedeghe
 
Wy mochten wel/ voor thelsche beuen beuen
 
Ten dede hu alder/ odtmoedichste odmoedeghe.
885
Ghy zyt ons sondaers de behoedichste behoedeghe.
 
Hu segghic zoot vuter herten/ comt ghevloten
 
Lof bloeyende roose/ vut Jesse ghesproten.
Sober
 
Lof roose die als/ den roode coluere puere
 
Syt bloeyende by uwer/ nathuere kuere
890
Soetghuerich van roke/ by uwer crachten cracht.
 
O Maria maechdelicke/ vyguere fluere
 
Elc meinsche loost/ van uwen labuere dhuere+
 
Scoon bloeyende roose/ by uwer drachten dracht.
 
Dyn claerheyt verjaecht/ svyants machten macht.
895
Elc sondaer ontghaet/ by dy allen pynen pynelic.
 
Dyn caritate ons besceermt/ jnder nachten nacht.
 
Hu zuuerheyt ghaet/ bouen allen/ mynen mynelic.
 
Ghy verlicht ons als de zunne/ jnt scynen scynelic.
 
Dies men wel segghen mach/ jn steden jn sloten
900
Lof bloeyende roose/ vut Jesse ghesproten.
Cleen
 
Lof lusteghe roose/ scoon egglentier fier
 
Besceermt myn siele/ voor thelsche vier. Ghier
 
Bem jc Maria/ om uwer ghenaden ghenadelic.
 
Al heift myn leuen gheweist/ zeer putertier hier
905
Hopic my te beteren/ o maechdelic roosier scier.
 
Besceermt my voor svyants/ bescaden scadelic.
 
O troost ende hope/ den onberaden beradelic
 
Ons sondaers ontweicht/ weist jnt beweghen weghelic.
 
Maria/ ghy en zyt nyement/ jnt versmaden smadelic.
910
By uwes sduechs/ ontfaermicheyts pleghen pleghelic
 
O roose tot elcken/ gheneghen ghenegelic
 
Mach elc wel segghen/ tot hu onverdroten
 
Lof bloeyende roose/ vut Jesse ghesproten.
Goet
 
Princesse/ Maria/ dyns deruens deruen
915
Wy niet en mueghen/ jn sweerels eruens eruen.
 
Huwe liefde elc onser/ wilt jnt herte poten
 
O confortatyueghe/ bouen des conseruens conseruen.
 
Lof die my besceermt hebt/ voor steruens steruen
920
Als bloeyende roose vut Jesse ghesproten.
Pausa cleene.
 
O sondaers/ ende sondareghen/ vul sonden ghegoten+
 
Scuut de ghewuenelicke coten/ van sonden blamelic.
Quaet
 
Syt ghy gheuallen/ jn Houde Ghewuenten onvramelic
 
Onbetamelic/ thuwer sielen verdommenesse
 
Anroupt Maria/ met duechdelicke vulcommenesse.
925
Weist huer een hoedeken/ te makene ghedachtich.
Sober
 
Sou es middelareghe/ ende paysmakeghe waerachtich
 
Tusschen ons sondaers/ ende hueren zuene verscoont.
Cleen
 
Gheen duecht noch weldaet/ en laetse ongheloont
 
Duer huer ghedaen/ zo ghy hier mercken muecht.
Goet
930
Dus vrienden bemint/ wilt verstercken duecht
 
Te deser kercken vruecht./ Jn dupperste glorie
 
Sal hu bedancken Maria/ de zuuer siborie.
 
Hebt doch jn memorie/ dese ghilde scoone
 
Deuotelic jnghestelt/ byden persoone
935
Van sinte Dominicus/ hooft ende prelaet
 
Van deser oordene./ Dus niet en versmaet
 
Den dienst van Maria./ Deser gilden jnwesene
 
En es maer drie hoedekens/ de weke te lesene.
 
Ooc wort elc ghildebroeder/ ende suster zonder resspyt
940
Deelachtich jn alde diensten/ ter weerelt wyt
 
Die men jn alde oorden/ ende ghilden doet.
 
Van jncommen/ en begheert men scat noch goet
 
Maer broederlicke minsaemheyt/ zonder comocie
 
Jnt steruen ofte vutghaen/ elc zyn deuocie.
945
Men verscatter nyement dan elc zyn duecht.
 
Dus beminde vrienden/ sulc als ghy vermuecht
 
Helpt den houtaer van Maria/ houden jn eeren
 
Ende wilt ons werck/ jnt beste keeren.
 
Want jc comme om leeren/ als scolier vut minnen
950
Den Heleghen Gheest/ ende de Drie Santinnen.

†A†M†E†N†


Vorige Volgende

Over dit hoofdstuk/artikel

datums