Die vergaderinghe der remedien teghen die hitte der oncuysheydt.
OP dat ick die remedien cortelicken sal overloopen, so suldy weten dat dese alderbeste zijn om te wachten van die boose wellusticheyt des vleesches. Ten eersten dat ghy met alle uwe vlijt schouwen sult alle oorsaken die u daer toe brenghen moghen. Al ist goet ende betamelijcken dat dit ghebodt oock tot ander sonden seer nut ende profijtelijcken is te onderhouden, daerom, want die dat perijckel lief heeft die is waerdich dat hy daer in vergaen sal, dit zijn nochtans aldermeest die vrouwen diemen heet Syrenes, wiens handen niemandt en ontginck, dan die daer verre af vlooch. Daer nae suldy hebben maticheyt in drincken, eten ende slapen, ende onderhoudt, ende maticht u van sommighe toeghelaten geneuchten. Dat aensien ende overdenckinghe ws doodts, ende die aenschouwinghe des doots Christi sullen u seer helpen. Ist dat ghy leeft ende gheselschap hebt met deuchtsamighe ende reyne menschen, vliedet ende schouwet als fenijn dat geselschap der sachter ende onsuyvere menschen, voort soo sult ghy schouwen die ledighe eenicheydt, ende die onwetende ledicheydt. Ende ghy sult u hert becommeren met gedachten der Hemelscher dingen, ende met eerlicke studeringhe ende wercken, ende daer sult ghy alderbest toe comen, ist sake dat ghy u geeft tot de heylighe schrift. Ende als ghy voelt eenige becoringe so wilt terstont vierichlicken bidden.
Auteursrechtvrij