De negenthiende reghel.
DAer na wilt onderscheyden die twee Heeren die in haer selven zijn alder ongelijckste, dat is God ende die duyvel, want als gy soude doet so maect ghy u God te vyant ende ghy segt den duyvel u Heer te wesen. Door onnooselheyt, ende danckbaerheyt wort ghy ghesedt int getal der vrienden Gods, ende wort vercoren in dat recht ende erffenisse der kinderen Gods, maer door die sonde wordt ghy een kindt ende knecht des duyvels. Godt is de eenige fonteyn form ende ghedaente des alder overste schoonheyts, des alder overste genoechlicheydt ende des alder overste goets, die hemselven alle goede menschen gemeyn maect. Die duyvel is een vader alder boosheyt, des aldermeeste leelijchyt, ende des alder wterste onsalicheyt. Daerom wilt overdencken die weldaden Christi, ende de quade daden ende wercken des duyvels. Oock wilt overdencken met wat grooter goetheyt dat God u geschapen heeft met wat barmherticheyt dz hy u verlost heeft, met wat mildicheyt dat hy u heeft beghaeft, met wat sachtmoedicheyt dat hy u lijt die daer noch alle dage sondiget, met wat blyschap dat hy u ontfanget als ghy u bekeert. Teghen alle dese doet die duyvel contrarie, want met wat grooter haet heeft hy u eer laghen gheleydt om u onsalicheydt door onse eerste ouders, in wat benautheydt heeft hy u ghebracht, ende hy en arbeyt dagelicx niet dan dat hy mach treckeu dat gheheel menschelijcke gheslacht inde eewighe verdomenis. Als ghy dit al wel breet overgheleydt hebt, soo wilt aldus in u selven dencken: Sal ick vergeten mijnen oorspronc ende alsulcken cleynen beetken des valschen wellust, sal ick alder ondanckbaerste menschen af gaen van alsulcken edelen leven ende wel verdiende vader, sal my eyghen maken onder die alder leelicste wreetsten Heere. Ende ick sal Godt dat niet geven dat ick wel eenen mensche
Auteursrechtvrij