Den kerstelicken ridder

Een seer profijtelijck boecxken, seer nudt ende oorbaerlijck wesende voor allen Christen gheloovighe menschen

De xvij. reghel.

GElijc de aenvechtinge der duyvelen zijn menigherley, alsoo zijn daer veel profijtelicke remedien teghen, maer een remedie is die alderbeste ende machtichste tegen alle tegenspoet ende tegen alle manieren der temtatie, dat is dat cruys Christi, welcke alle dwalende ende sondige menschen een exempel is, ende die arbeydende een vercoelinghe, ende die strijdende een wapentuych. Dit is een eenighe pijl diemen wtschieten sal teghen alle becoringe des vyants, hier in moet ghy u selven oeffenen: Niet also als dat gemeyn volck doet. Sommighe lesen daghelijcx die passie Christi, oft sy aenbeden die gedaenten des cruyces, of sy seghenen al dat gheheel lichaem met duysendt teeckenen, of sy bewaren in haer huys een stuckxken van dat heylighe cruys, of in sonderlinghe uren overdencken sy dat lijden Christi, ende hebben medelijden ende weenen na de menschelijcke begeerten als tot een rechtveerdich mensche die onwaerdighe dingen gheleden heeft. Dit en is niet die warachtighe vrucht des cruys, maer anders niet dan melck der sielen voor die ghene die noch jonck ende cranck zijn in Christo. Maer wilt ghy opstijghen op desen Palmboom ende nemen daer af die waerachtighe vrucht. Dit zijn

[p. 81]

die principale ende sonderlinge vruchten, ist sake dat wy sorchvoudich zijn de leden ghelijck te maken dat hooft, dat is onse lede oft ons selven na ons vermoghen ghelijck te maken Christo met dat dootslaen onser quader begheerte. Dit en sal ons niet bitter wesen, maer seer begheerlijcken ende ghenoechlijcken ist sake dat die gheest Christi in ons leeft. Wie heeft hem warachtelijcken lief dan die hem alder ghelijckste is. Maer om dat ghy met meerder vreucht sult moghen overdencken ende overlegghen die heymelijcke gheestelijcheyt des cruys, soo salt u van noode wesen te bereyden een niewe maniere ende een goedertieren const om te strijden, ende daer in naerstich te worden ende ondersocht, ende alst van noode is dat dan alle dinc bereyt is. Ende dese maniere is aldusdanich, dat ghy uwe begeerten te sterven altijt wilt voeghen met een deel des cruys Christi. Daer en is geen becoringe noch tegenspoet of een yegelijck heeft zijn sonderlingen remedien in dat cruys. Ghelijckerwijs als u aensoeckt die eergiericheyt der werelt, ende als u begint te verdrieten dat ghy overmits u goede leven bespot ende versmaet wort, so overdenct dat ghy zijdt dat minste lidt, ende hoe groot dat u hooft Christus is, ende hoe seer dat ghy hem selven verworpen, ende verootmoedicht heeft om uwen wille in dat cruyce. Als u aenvecht die sonde des haets so wilt overdencken hoe goedertierlijcken dat hy hem heeft gegheven tot onse behoef, ende hoe goet dat hy gheweest is ooc de alderbooste menschen. Als ghy aenghevochten wort met gulsicheyt, so wilt overdencken dat het met edick, ende galle gelaeft wordt. Als ghy beroert wordt met wellust, soo weest ghedachtich hoe dat alle dat leven ons hooft Christi is gheweest sonder eenighe wellust ende vol verdriets ende pijnlijckheyt. Als u beroert toornicheyt, so laet u voor oogen comen hoe dat hy als een lam dat geschoren ende geslagen wert heeft gheswegen, ende en heeft zijnen mont niet op ghedaen. Ist sake dat u verdriet die armoede ende de giericheyt u beweghet, soo wilt ghedencken dat die almachtighe Heer also arm voor u is gheworden dat hy niet en hadde daer hy zijn hooft op rusten mochte: Indien dat ghy aldus doet in alle u becoringhen, so en salt u niet alleen scharp ende verdrietelijcken wesen dat ghy u sinlijckheydt, u begheerten ghewelt doet ende haer doodet, maer het sal u oock seer soedt ende ghenoechlijck wesen want dan sult ghy verstaen ende begrijpen dat gy met alsulcke manieren u sult ghelijck maken met u hooft Christo, ende soo sult ghy hem grootelijcken dancken voor zijn onwtsprekelijcke pijn, die hy om uwen wille gheleden heeft.