nen, die haten ende mishaghet diefte, rooverije, dootslach ende overspel, maer een simpel onsuyverheydt ende matighe ghewoonte der wellust als een lichte sonde, en schouwen sy nerghens. Die een is in alle deuchden onstraffelijcken, maer geneyghet tot veel drincken ende onmatich, gulsich, de ander en can zijn tonge niet wel bedwingen, die ander is ydel ende vermetel. Ist sake dat wy met dese manieren ons selven besmeecken, so sal ons duncken dat wy gheen sonden en hebben, alsoo coemt dat de ghene die noch behaechlicheyt hebben in eenige sonden, dat sy geenerhande deuchden volcomelicken en besitten, maer het zijn niet anders dan beeldingen der deuchden, diemen vander natueren of van opvoeding, of van ghewoonte, of van onse naetuerlijcke verstandts weghen heeft. Die met een Christelijcke haedt versmaet de sonden, die is van noode af te stellen alle sonden, ende wiens hert de warachtige liefde becommert heeft die sal versmaden ende vervolgen alle de scharen der sonden, ende en sal niet met hem selven smeecken ooc in dagelijcksche sonden, op dat hy niet en valle altemet van de minste tot de meeste: Ende als hy traech is inde cleyne sonden af te legghen, dat hy dan niet en valt in de grootste. Ende al ist sake dat ghy alle die scharen der sonden niet en meucht verdrijven, nochtans sult ghy dat quaet verminderen, ende de goede wercken vermeeren.
Auteursrechtvrij