De xiij. reghel.
ALtijt sult ghy strijden met alsulcke opset ende hope dat dit die leste strijt sal wesen indien dat ghy verwint, want het mach gheschien dat die Godlicke goedertierenheyt u sal te loon geven voor uwen arbeydt, dat die vyant die eens verwonnen ende t'onder ghebrocht is u nemmermeer bevechten en sal, wantmen leest dattet veel heylige persoonen alsoo gheschiet is, als Origenes oock ghelooft, segghende: Als een Christen mensche verwint, so worden vermindert die scharen der vyanden, ende als hy eens sterckelicken verdreven is, dat hy nemmermeer toeghelaten en wordt om die mensche weder aen te vechten. Daerom wilt vast vermoeden ende hopen na dien strijt een eewige vrede. Ende als ghy hebt verwonnen so wilt u weder bereyden, recht of ghy terstont weder inden strijt sout gaen: Want men moet na die eene becoringhe altijdt een ander verwachten, waerom dat ghy nemmermeer en moet aflegghen u wapenen, noch buyten die slachoorden staen, ende wy moeten altijt vaste wake houden alsoo langhe als wy in dit lichaem moeten strijden, ende wy moeten dat woort des Propheets altijt in onse herten dragen, die daer seyt: Ic sal staen op mijn wake oft hoede.
Auteursrechtvrij