Den kerstelicken ridder

Een seer profijtelijck boecxken, seer nudt ende oorbaerlijck wesende voor allen Christen gheloovighe menschen

De thiende regel.

DE becoringhe des Duyvels wort aldermeest verdreven met gantscher herten wilt van hem u selven af keeren ende hem verspouwen, of dat ghy hertelijcken God om gratie bidt, oft dat ghy u selven gheeft tot eenighe heylighe occupatie oft becommeringhe, oft dat ghy den bedriegher antwoordt met woorden wt de Heylighe Schrift als hier boven vermaent is. Ende het sal wter maten seer wel helpen tegen alle manieren der temtatien dat ghy bereydt hebt sommighe autoriteyten oft goede puntkens wt der Heyliger Schrift, bysonder alsulcke met welcke dat ghy ghevoelt dat u herte aldermeest mede becommert wort.