Tondalus' visioen en St. Patricius' vagevuur (2 delen)

van der sester pine

Van hier trecten si den ridder. ende quamen mit int vierde velt. dat vol was van vele vueren. daer men alle manieren van pinen in vant Sommighe henc men mitten voeten mit gluyenden ketenen

[fol. 14b]

Sommighen mitten handen Sommighen mitten haren Sommighen mitten armen Sommighen mitten dieen ende die hoevede hengen nederwert in swevelbornende vlammen Sommighe hengen int vuer. en yserne haken in die oghen gheslaghen. of in die oren. of in die neesteric gate. of in die strote. of in die memmem. of in die scaemte Sommighe briet men in ovenen van swevel vuere Sommighe verbrande men in pannen Sommighen worden doer steken mit gluyende speten ende ghebraden ant vuer. ende sommighe duvelen omme kierden sie. ende die ander duvele droepten sie mit manigher hande ghesmolten metael. ende op alle dese liepen die duvelen ende slueghen sie mit vleghelen Alle manieren van pinen die men denken mochte weren daer ghesien Dese ridder sach daer sommighen de sine ghesellen [...] wilneer tewesene pleghen ende hi bekende se wel. Ghene tunge en mochte vertellen dat roepen. dat krijschen. ende weinen der onsaligheden dat hi hoerde. Want dese velde en waren niet alle\ne

[fol. 15a]

vol van menschen die ghepinicht worden. mer oec vol van duvelen die sie pineden. Ende doe si den ridder daer pinighen wolden ende hi den name jhesus anriep doe bleef hi onghepijnt