Tondalus' visioen en St. Patricius' vagevuur (2 delen)

van der ander hoe datten die duvele int vuer worpen.

Doe die duvele saghen dat die ridder sie veronweerde. soe grimmeden sie eyselic op hem Ende sie maecten int [...] huus een alten groten vuer. ende se bon\den

[fol. 11b]

hem hande ende voete ende worpene int vuer Ende mit iseren haken toeghen sine al roepende. hier ende daer int vuer. Ende doe hi ierst int vuer gheworpen was so leet hisware pinen Mer dese [...] man godes die omme beset was. mitter [...] hulpen sijns koninges. ende vanden voersegheden mannen gheleert. hien hadde niet vergheten die wapenen der gheesteliker ridderscop. Ende do hem die viande int vuer brieden so an riep hi den goedertieren name jhesu. ende te hants wert hi vanden vuere verloest alse van hoerre ierster dreigingen. Wante doe hi onses goedertieren beholders name an gheroepen had eer ment ghespreken conde. so was al dat vuer also ghelesschet. dat mens ene vonke niet en solde ghevonden hebben. Doe die ridder dit sach. so wart hi stolter. ende sette vaster in sijn herte. dat hi se voertmeer niet ontsien en wolde. doe hi sach dat hi so lichtelic verwan. mitten anroepen des hilighen namen