Tondalus' visioen en St. Patricius' vagevuur (2 delen)

Hoe een ridder hier in genc ende hem .xv. monike visitierden.

[fol. 6b]

Het gheviel in desen onsen tiden in coninc stevens daghen. dat een ridder die. owem heet. daer men dit of vertellet. quam ten biscope te bijchten in wes bisdom dit veghevuer is. Ende doe hem die biscop berespede om sine sunden. ende seghede hem. dat hi onsen heren swaerlic vertoernt hadde. so versuchte hi van innigher berouwenisse. ende belovede dat hi weerdighe penitencie doen solde na willen des biscops Ende doe die biscop hem penitencie setten wolde. na de maniere van sinen sunden. soe antwoerde die ridder. Want ic also ghi segget. minen schepper soe seer vertoernt heb. so wil ic an nemen die penitencie die boven allen penitencien swaer is. Want om hem dat ic verdienen sal verghevenisse mijnre sunden. so sal ic bi dijnre beveelnisse gaen in sancte patricius veghevuer. Ende die biscop ontriet hem dat te done Mer die ridder van manliker kuenheit en volborde des biscops ontraden niet Ende die biscop om dat hine hier of kieren wolde. so seghede hi hem

[fol. 7a]

datter veel menschen in verloren bleven waren. Mer in gheenre maniren en mochte hi des ghewarighen ridders de ghewarich berou hadde. sijn herte daer of keren. Die biscop vermaende hem dat hi monic worde. of canonics habijt an name Ende de ridder antwoerde. dat hijt mit gheenre redene doen en solde. eer hi ghegaen weer in dit voer gheseyde veghevuer. Ende doe die biscop sach die vromicheit sijnre berouwenisse. so sende hi bi hem enen brief. den prior van deser stede dat hi desen ridder die in penitencien was. leiden solde. na den sede der gheenre die penitencie doen in dit veghevuer. Ende doe die ridder daer comen was. ende die prior sine waken wiste. soe sette hi hem voer datter veel menschen weren verloren in ghebleven. op dat hi sinen wille hier of solde trecken. Mer die ridder bedachte dat hi gode swaerlic vertoernet hadde. ende bi ghewarigher berouwenissen. ende heter penitencien. verwan hi des priors ontraden. Dus leydene de prior in die kerke. daer hi in naden seden .xv. daghen hem oefende in vasten. ende in bedingen. Doe dat voldaen was. so leyden hem die bruedere ende clergie [...] daer omme lanc. als voer secht is toe den veghevuer. ende daer seghede men hem weder die manieren vanden pinen die onverdrachtlic sin. Ende die prior ontriet hem daer dese

penitencie an te gane Ende doe die ridder sterkelic in sinen willen bleef. so ontfenc hi van den prior dit woert: Sie du salt daer nu in gaen in den namen ons heren. ende du salte so lange gaen doer een hol onder die eerde. hent du daer uut comest in een velt daer du in vindest ene sale mit wonderliker konsten ghemaket. Alstu daer in gheghaen biste. so salste te handes boden hebben die di eernstlic solen seggen wattu liden salste. Ende als die en wech gaen. ende du allene inden sale blives so solen te handes dine pijnres andi comen. Want aldus leest men dattet den ghenen ghevallen is. die voer di

[fol. 8a]

hier in ghegaen sin Mer du salt sterc wesen in den ghelove cristi. Ende dese ridder droech in sinen herten enen manliken moet. ende en ontsach die vrese niet die hi hoerde dat ander menschen verwonnen had. Ende die wileneer ghewapent mit yser inden stride der menschen was. die was nu herder dan yser ghewapent mitten ghelove. hope ende gherechti[c]heiden. hem verlatende op goeds bernherticheit. ende hi ghenc betruwende in. om teghens die duvelen te vechtene. Want ierst bat hi hem allen. dat si voer hem bidden solden. ende hi maecte een teyken des hileghen cruces voer sijn hoevet ende blidelic mit betrouwene so ghenc hi doer die poerte in. Ende die prior sloet se te hants van buten toe ende kierde weder mitter processien in die kerke. Ende dese ridder begheerde ene onghewoenlikenije ridderscop te done. hi genc vromelike voert al was hi allene. ende lange doer dat hol, hopende in onsen heren. Ende doe die donkerheiden meer ende meer wiesen. so verloes hi cortelic tlicht der claerheit.

[fol. 8b]

Ten lesten begonde hem daer hi ginc. een cleyne licht doer dat hol te openbaren. ende niet lange en wast hi en quam toe den voer\segheden velde ende ten sale. Wante daer en scheen anders gheen licht. dan alse hier plecht te openbaren inden winter na der sonnen onderganc. Ende dit sale en hadde ghene hele wande. mer hi was over al ghesticht op colommen. ende of saten. als [...] een monike cloester. Ende doe hi lange omme lanc den sale ghewandert hadde. hem verwonderde [...] haerre wonderliker maecsel. soe genc hi daer in. ende hi vant sie binnen horen begripe wonderliker ghemaect. Aldus sa[l] hi neder. ende kierde sijn oghen herwert ende derwerts. ende verwonderde seer van des saels reetscop ende schoenheit. Ende doe hi ene wile tijts allene had gheseten. siet so quemen daer in .xv. manne alse gheestelic. die nijes gheschoren werden ende ghecledet mit witten clederen. Ende sie groeten hem inden namen onses heren. ende saten mit hem neder. ende die ene sprac mit hem ende die ande\ren sweghen. Ende die daer sprac dat scheen

[fol. 9a]

te wesen haer prior ende leydere. die seghede: Ghebenedijt so si die almech[tige] god die in dinen herten hevet vast ghemaket enen goeden willen. ende hi moet in dit volbrengen dat goede dat hi in di begonnen heeft. Ende om dattu ghecomen biste ten veghevuere. om ghereinicht te werden van dinen sunden. so salstu ghedwongen werden van node veel dingen manlic te doene. of vermits [...] traecheiden. dat god verren moet. verloren te werden mit lif ende mit siel. Wante te hant alse wi uut ghegaen sin so sal dit huus verwullet werden. mit eenre veelheit van quaden geesten. de di sware pinen solen anbrengen ende solen di dreyghen meerre te doene. si solen di loven weder te brengen ter poerten onversericheit daer du in quamest. op dattu horen willen volboert ghevest. ende si solen hem pinen. of si di in desser manie\ren bedrieghen moghen. Ende ist dattu in enigher [...] manieren of mit verdriete van pinen verwonnen werdes. of mit horen drey\ghene

[fol. 9b]

verveert. of mit beloften bedroghen. ende du hem volbort gheves. soe salte verloren [...] wesen an live ende an siele. Mer settestu goede hoepe inden ghelove. also dattu noch mit pinen. noch mit dreighene. noch mit haren beloften niet verleidet en werdes. mer dattuse veronweerdest alse niet. so en salstu [...] niet allene ghereynicht werden van dinen sunden. mer du salt oec sien die pinen die den sunderen bereit werden. ende die ruste daer die gherechtighen inne verbliden. Heb altoes gode in dine ghedenkenissen ende alse si di pine an doen. soe anroepe onsen heren. jhesum cristum. Want omme dat anroepen deses namen. so salste te hants verloset werden vanden pinen. Ende wi en moghen hier niet langer mitti bliven. mer wi bevelen di den almechtighen god. Ende aldus doe si desen man die benedixie ghegheven hadden. so ghengensie en wech van hem ¶ Dese ridder die aldus gheleert was toe der ridderscop van nijer manieren. die wileneer manlic teghen die menschen vacht hi was

[fol. 10a]

te hants bereit manliker te striden tegen die duvelen. Ende mitten wapenen cristi ontbeide hi versekert. Welke vanden duvelen hem ierst te stride roepen solde. Hi was ghecleedet mitten panssier der gherechticheit. ende mit hopene der verwiningen ende der ewigher salicheit waert die ghedachte verloset. alse dat hoevet mit enen helme mitten schilde des gheloven die en bedecte. Wante hi had [dat] sweert des gheestes dat woert goeds. dat is innichlic angheroepen. onsen lieven heren jhesum cristum. dat hie ne bescherme mit koninckliker versekerheit. dat hi niet en worde verwonnen. vander viande anvech\tingen. Ende die goedertierenheit bedroech en niet. die niet bedrieghen en can diegene die in hoer betruwen