Tondalus' visioen en St. Patricius' vagevuur (2 delen)

van enen oelden prior mit enen tande. ende hoe men in dit veghever gaet.

Na sancte patricius dode. was in dese kerke een prioer. een heilich man van levene. ende alsoe oelt dat hi van oltheiden mer enen tant in sinen monde en hadde. Ende want sancte gregorius secht. al is die oelde mensche ghesont. nochtan is hi altoes siec vander oeltheit. Ende dese goede man. om dat hi niet schinen en solde mit sijnre oeltheit den anderen verdriet te done. soe liet hi maken tot sijnre behoef een camerken. beneffen den canonike dormter. Mer die jonxten broeders doe si dic wile desen oelden man visitierden. soe pleghen si in buerten te seggen: Vader hoe lange woltu bliven in dit leven. Ende hi antwoerde. Lieven kinder. ic hadde liever haestelic van hene te varen dan dus lange te leven. die wille godes moet gheschien

[fol. 5a]

. Hier en ghevoele ic anders niet dan onsalicheit. mer anders waer sal ic grote glorie hebben. Die canonike hoerden in sine celle van horen dormter. die engelen dicwile beneven hem roepende. ende hare sanc was desse maniere: Du biste salich. ende salich is die tant den du in dinen [...] monde heves die nye lecker spise en [...] smaecte. Wante sine spise was salt. ende drughe broet. ende sijn dranc coelt water. ende ten lesten also hi begheerde [...] voer hi salichlic tot onsen heren ¶ Ende men sal dit weten dat in sancte patricius tiden. ende in anderen tiden daer na[...]. veel menschen ghengen in dit veghevuer. van welken dat sommighe wederquamen. ende die anderen bleven daer in verloren Ende dat die ghene die weder quamen vertelleden. dat screven die canonike. Ende dit is ghewoente beide van den hilighen patricius. ende van den genen die na hem comen gheset. dat nyement in dit veghevuer gaen en mach sonder oerlof des biscops. in wes machte ende bisdoem dit veghevuer is. ende

[fol. 5b]

mit sinen vrien willen verkiest daer in te gane voer sine sunden Ende alse hi toe den biscop coemt. ende hem sinen willen secht. soe sal hem die biscop eersten raden van desen wille of te stane. ende seggen datter veel is inghegaen die nye weder en quamen. Ende ist dat hi in sinen willen blivet. so sendet die biscop breve des bevelens to den cloestere mit hem. ende alse die prior die breve ghelesen heeft. so sal hi den menschen ontraden in dat veghevuer te gane. ende vermanen hem dat hi ander penitencie verkiese Ende hi sal hem toenen den anxt van veel menschen die daer in veerloren sin ghebleven. Ende blijft hi in sinen wille so leydet hine in die kerke dat hi hem daer oefenen sal .xv. daghe in waken ende in bedingen. Ende als die dage gheeyndet sin. so vergadert die prior daer omme lancs die clergie. ende men doet vroe misse. ende ghevet desen menschen dat licham ons heren.

ende men besprengeden mit wi water toe dien dienste Ende aldus leydet menne mit. processien. ende mitter letanien toe der dueren van

[fol. 6a]

den veghevuer. ende die prior slutet se hem op. voer hem allen. Ende secht hem dat ane vechten vandenduvelen. ende dat veel menschen in deser kulen verloren bleven sin. Mer blijft hi sterc in sinen willen. so ontfanct hi van alle den prees[teren] die benedixie. ende hi bit hem allen dat si voer hem bidden. ende hi maect mit sijnre hant een cruce voer sijn hoevet. ende gaet daer in. ende te hant slutet die prior die doere. ende aldus kiert hi weder mitter processien in die kerke. Ende des anderen daghes soe gaet die prior mitter processien uuter kerke toe der doeren van der kulen. ende die prior doet die doere op. ende vint men den menschen daer. soe leydet me[...]nne mit blijscopen in die kerke. ende daer duert hi in noch .xv. daghe hem oefende in waken ende in bedingen. Ende en vint men hem niet weder comen des anderen daghes to der selver uren. soe sin se herde seker van sinen verliese. ende die prior slutet die doere ende si gaen [...] alle en wech.