Tondalus' visioen en St. Patricius' vagevuur (2 delen)

Hoedat jhesus cristus patricius gaf een ewangelij boec ende enen staf. ende wijs[de] hem den putten van den veghevuere.

Alse ic voreseghede Doe die hilighe patricius dit voergeseghede volc bekeren wolde vander dwalingen. vermids anxte der pinen. ende minne der vrouden. so segheden sie. dat sie nummermeer tot cristum hem bekeren en solden. noch omme die mirakelen die si hem saghen doen. noch bi sijnre predicacien. ten waer dat yement van hem sien mochte. die pinen der quaden. ende die vrouden der goeden. Dat si sekere werden solden vanden dingen die men saghe dan die men gheloevede. Die hilighe patricius die tot gode innich was. hi waert doe innigher in waken. in vastene. in bedingen. ende in goden werken. om des volkes sa\licheit

[fol. 3b]

Ende doe hi hem tot dusdanighen goeden werken gaf omme des volkes salicheit. soe openbaerde hem onse goedertierene heer jhesus cristus. ende gaf hem een ewangeli boec. ende enen staf. den men noch heeft in ierlant voer groet heylichdoem in groter weerdicheit. Desen selven staf. heet men jhesus staf Om datten jhesus cristus onse here sinen lieven vrende patricius gaf. Ende die in dit lantschop die hogheste eertsche biscop is hi sal dit hebben. Dat is den text der ewangelien. ende den staf voer een teyken des hoechsten bisdoems van dien lande. Ende onse heer leide patricius uut in der wuestenien ende hi toende hem daer enen ronden puttedie binnen hol was ende seghede: Soe wie dat ghewarighe penitencie doet. ende ghewapent is mit warachtighen ghelove. ende in desen grave gaet. ende die tijt van enen dach ende nacht daer in duert. hi sal werden ghereynicht van alle den sunden sijns levens. Mer [...] daer doer gaende so en sal hi niet allene sien die pinen der quader. mer oec ist dat hi sterc blivet inden ghelove. so sal hi sien

[fol. 4a]

die glorie der heilighen. Ende aldus ontvoer onse heer van sinen oghen. Ende sancte patricius wert vervullet mit gheestliker vrouden. beide om dat hem onse heer gheopenbaert. ende hi hem die kule ghetoent hadde. daer bi hi hopede te bekeren dat volc van haerre dwalinge. Ende to hant maecte hi ter selver stede ene kerke. ende sette daer in sancte augustinus canonicke. die der heilyghen apostelen ghelove na volghen Ende dese kule [die] is inden kerchof buten den voerhovede vander kerke oestwert. omme moerde hi. ende maecte daer doeren ende slote an. om dat niement overmids overmodigher koenheit ende sonder oerlof. hem en onderwonde daer in to gane. Mer hi beval den slotel te holden den prior van der kerken. Ende in des heilighen vaders tiden so ghengen veel menschen van berouwenissen bervoet indese kule. welke do si weder quamen tugheden dat si alte grote pine hadden gheleden. ende dat si grote blijscap hadden [...] ghesien. Ende die hilighe patricius beval dat men hore openbaringen scriven solde in die kerke. ende vermits hoerre ghetuge\nissen

[fol. 4b]

so begonden die anderen toe ontfane sancte patricius predekinge. Ende om dat daer een mensche van sinen sunden wort ghereynighet. so nomet men die stede. sancte patricius veghever Mer die stat der kerken noemet men regularis