Tondalus' visioen en St. Patricius' vagevuur (2 delen)
(1914-1917)–H.J.E. Endepols, René Verdeyen–
Auteursrecht onbekend
[Folio 41b]
| |
teghen eynen berch daer sach hi sitten so groete schaer van mannen ende van wijven jonc ende alt al naect ghecrummet op hoer teen Also dat die tormenten die hi te voren sach hem luttel dochten. Dese saten alle als der doet beydende ende saghen mit anxte ten noerden waert Ende doe desen ridder verwonderde waer nae die onsalige schaer ontbeyde / so seide hem eyn vanden duvelen: Het machschien du verwonders dy wat dit volc mit so groeten anxt ontbeydende is / Cuem had die duvel twoert gheeyndt / daer en quaem van noerden eyn stormende went dien die duvelen mitten ridder ende al dat volc begreyp ende warpse aen die ander side des berges in eyne stinckende solfer vluet weynende ende onsalichlic crijtende daer si in woerden ghepijnt mit ontelliker calden Ende alsi hem pijnden op te comen uuter vluet so duckeldense die duvelen wieder onder die over dat water liepen Ende dye rydder en had niet vergheten den name sijns behalders aenteruepen Ende vant hem also sonder beyden aent dander over |
|