Tondalus' visioen en St. Patricius' vagevuur (2 delen)

Dat achte tormente

Soe ginghense voert ende trocken [...] den ridder teynen groeten huyse waert / dat was eyslic ende roecde Dat huys was herde breyt / Mer die lengde en mochtmen niet sien Doe siere noch eyn deyl verre

[fol. 41a]

af waren quaem daer so grote hitten uut / dat die rydder stoent ende vreysede voert te gaen Doe seiden die duvelen: Het is eyn bat dat ghi daer siet waer nae beydi / wildi of en wildy ghi moet derwaert ende baden mitten anderen. Ende hi hoerde uut ghenen huyse jamerlike gheweyn ende ghe\screy Doe hi int huys quaem / so sach hi dat eyslic ende verveerlic was aen te sien want die vloer van desen huyse ende dat pavymente was vol ronder putten die aen malcanderen stoenden also datmen daer niet tusschen en mocht gaen Ende ellic put was vol van menigerhande solfer ende gesmolten metale Daer eyne grote mennichte van mannen ende van wijven in waren jonc ende alt en stoenden gesoncken Ende sommige waren te male daer in ghesoncken Sommige totten wijnbrauwen Somyghe totten oeghen Somyghe totten lippen Somige totten halse Somyge totter boerst Somighe totten navele Somighe totten knyen Somighe totten beynen Somige mit eynen voet Ende som mit beyden handen of mit eynre alleyne Sy weynde alle van pijnen ende riepen Sich, seiden die duvelen, mit desen saltu baden. Doe hieven si den ridder op ende woldenten in eyn vanden putten werpen. Mer als si den name jhesu cristi hoerden so en mochten si hem niet doen