Tondalus' visioen en St. Patricius' vagevuur (2 delen)

t Sevende tormente sach hi

Alse si hijr over waren leden / so openbaerde voer hem eyn vuyerich raet van wonderliker groetheit daer die speyken ende velgen af waren ommsat mit vuyerighen haken Ende in elke haken hingen minschen gesteken Deyne helft

[fol. 40b]

van desen rade stoent in die lucht buten der eerden Ende dander helft stoent rechte nederwaerts in eynen groeten gracht bynnen der eerden Eyne swarte solferighe vlamme quam al omme gheen rat op zeer stinckende. O wie ontfermelike gebeerden die ghene diere aenhinghen Doe seiden die duvelen totten ridder / dit moetdy lijden omme dat ghi niet en wilt wieder keren / ende wat si noch lijden suldi teersten sien Daer ghingen die duvelen staen aen elke sijde vanden rade / deyn jeghen die andere mit yseren rueden ende staekende tusschen die speyken ende keerden dat rat so dray[en]de omme / datmen den eynen voerden anderen niet en const gesien vanden ghenen diere aenhingen / want omme sijnen sterken loepe / so scheyn dat rat als eyn gloyende rinck Ende alsi den ridder hadden gheworpen opt rat ende in die lucht geheven So aenriep hi den name cristi ende hi quam da[n]e onghequetst