Tondalus' visioen en St. Patricius' vagevuur (2 delen)

(1914-1917)–H.J.E. Endepols, René Verdeyen– rechtenstatus


Dat .vj.de tormente Doe trocken si den ridder van daer totten vierden velde dat was vol van mennigen vuyer daermen in vinden mochte alrehande tormenten Solke woerden gehangen aen vuyerige kettenen
[Folio 40a]
mitten voeten Selke mitten handen Selke mitten armen Selke mitten schenen die hoefde nederwaert hangende in solfereghe vlammen Solke hinghen in vuyer ende waren gheclauwet mit yseren haken in hoer oeghen ofte in hoer oren / ofte in hoer naseloken / of in hoer stroete / ofte in die boerste / ofte in hoer schemelheit Sulke berntmen daer in solfreghe oven Dander breatmen opten roestere Die .iij^de. keertmen in den speet teghen tvuyer Sulke duvelen brachten ghesmolten metale ende drouptense Ende boven dese liepen al over al duvelen diese al doer en doer geyselden Daer kinde hi oec selke van sijnen ghesellen / mer teghen hem en sprac hi niet Hi hoerde huylinge ende gheweyn der ongevalliger also groet dat egheyne tonge en mochte vertellen Doe si hem oec daer wolden tormenten So riepe hi aen den name jhesu ende bleef gesont