Van desen velde scheidense ende trocken den ridder teynen anderen velde dat was noch van mere katijvicheiden. Dit selve was oec al vol van mannen ende van wijven jonc ende alt genagelt in derde Mer tusschen dit velt / ende dandere. [was dit ondersceit] daer lagen hoere buyke op derde ende [...] dese lagen op ten rugge genagelt ende op selke saten vuyrighe draken Diese mit hoeren vuyrighen tanden ontfermelic alse ocht sijse geten hedden ontwey scoerden Ende oec waren omme sulke[r] halse ende arme ende omme hoeren lichame vuyerighe serpenten ghewonden die hoer hoeft staken in derre onghevalliger herten. Padden van wonderliker groetheit al vuyerich saten op sulker herten ende pijnden hem mit hoeren ongescapenen beckenen die herten uut te trecken. Die daer aldus genagelt ende gegeeselt waren en rusten gheynen tijt van weynen ende van schryen. Die ongeesten over hem loepende pijndense starclic mit geeselen ende mit vlegelen te slaen Dinde van desen velde en conste hi niet
[Folio 39b]
[fol. 39b]
ghesien nummere dan die breyde daer hi in ginc ende uut quaem / want te weers leit hi over beyde die velde Dese tormenten soldi lijden, seiden die quade gheesten, en wildi niet wider keren Hi versmadese Si pijndeten alse te voren mit nagelen Mer als si hoerden [den] name jhesu so en mochten si hem niet doen
Auteursrecht onbekend