Tondalus' visioen en St. Patricius' vagevuur (2 delen)

Die derde pijne was hoe dat sijne treckeden doer eyn doncker woest lantscap daer die eerde swart was

Aldus lieten die duvelen dit huys alhuylende mit vreysliken gheruecht ende trocken den ridder mit hem daer buten / ende daer scheide die eyne [...] partye vanden andere ende deyn partye trocken den ridder doer eyn woeste conincrijke daer derde al swart was ende die lucht donckere ende daer hi niet en sach dan die duvelen die hem trectden. Oec wayede daer eyn borrende wint

[fol. 38b]

diemen cuem en hoerde / nochtan mit sijnre stijfheit dochte dat hem sijn herte doer vloech [...] Si trockenne derwaert daer die sonne opgaet te midde somere Alsi quamen alse ten eynde vander werelt ginghen si omme ter rechter hant ende quamen in eyne wijde valeye die ginc alse ten zuyden waert dats daer die sonne op gaet te midde wentere / Daer begonste hi te horen ontfermelike weyninghe ende scryinghe alse van alle den volc vanden lande. Ende so hijre meer naecte so hi bat hoerde. Tachterst waert hi ghetrocken in eyn breyt ende in eyn herde lanc velt al vol rouwen ende katijvicheyden Dende van dien velde en conste die ridder niet ghesien Dat velt was al vol naecder lude ligghende mitten buyck op derde ghestrect / Beyde manne ende wijve jonc ende alt hande ende voet doer nagelt mit blickenden nagelen. Het scheyn dat dese derde eten solden van rouwen Selken tijt riepense al weynende ende al scryende alte ontfermelike: Spaert spaert ochte ontfermt ontfermet Mer in dat velt en was nyemen die bekende sparen of ontfermen Die duvelen liepen daertusschen hem ende boven hem die nummermeer en gherusten hem te gheyselen mit alte wreden geeselen Doe seiden die ongeesten totten ridder / Dese tormenten moetstu ondersueken [...] omme dattu ons niet en wils gehoren dat is dattu weder

[fol. 39a]

keres Ende eest dattu wils wi solen dy weder leyden mit gueden ghemake ende onghescaet ter poerten daer du in quames Hi ontseit al mit onwerden Si worpenen ter eerden ende pijnden hem te nagelen gelijc den anderen Mer als hi den name

jhesus aenriepe so en bescoet hoer pijnen niet