Tondalus' visioen en St. Patricius' vagevuur (2 delen)

Dander pijne hoe si hem in dat vuyer worpen

Die duvelen die hem aldus veronweerdt sagen vanden ridder, greysen eyslike op hem ende si maecden in gheen huys eyn anxtlic groet vuyer ende gebondenre hande ende voete worpense desen ridder in gheen vuyer ende mit yseren

[fol. 38a]

haeken trocken sijne herwaert ende derwart doer gheenen brant ende riepen. Also saen als die [...] ridder tvuyer ghevoelde / hadde hi groet pijne Mer die gewaernt was mitten wapenen sijns coninx ende oec vanden voerseiden mannen hijr te voren geleert, en hevet niet vergheten der wapenen sijns gheestlix ridderscap. Alse hem aldus sijne wedersaken int vuyer worpen so saen hi riepe den guedertieren name jhesu, waert hi te hant verledicht vanden brande / gelijc hi te voeren [was] van hoeren rade Ende alte hant als hi aenriepe den guedertieren name jhesu also snel waert ghene brant geblusschet so datmen gheyne goemstre en solde hebben gevonden / Alse die ridder dat sach / waert hi voel te stouter Ende sette in sijnen moet dat hijse voertaen eyn twint niet en solde ontsien omme dat hijse mit aenruepen des heilighen namen also lichtelike mochte verwennen