Tondalus' visioen en St. Patricius' vagevuur (2 delen)

Die ierste pijne was van .ij. strijden die hi mitten duvelen hadde

Alse aldus dese ridder alleyne sat int huys mit eynen onversaechden moede beydende nae tghevecht vanden quaeden gheysten So begonste hi te horene ommetrent gheen huys eyn alte eyslic [...] bedruysch also ochte alle die werelt in roeren waer Hem dochte wel sekerlijc al maecten alle minschen ende al dat leeft / beyde in die zee ende daer buyten al hoer machte teynen gadere eyn bedruyssche so en mochten sijt niet meere maken. Ende en hed hi hem niet beschermen mitter godliker doecht Ende oec dat hi geleert was vanden voerseiden mannen hi waer vanden [...] eyseliken geruechte [...] uut sijnen sin ghecomen ende in onmachte ghevallen Ende nae dat eyselike hoeren volchde eyn voel eyseliker aenschouwen

vanden aensichten alle der duvelen Hi sach dat tallen gaten insloech onvertellike van leliken duvelen. Al spottende ende al bescherende si hem grueten ende seiden: Dit achten wi hem te schanden Ander lude die ons dienen en comen tot ons niet dan nae hoere doet. Daeromme solen wy di beteren loen gheven dattu onser geselscap die dueerstlic diens so voel eren woldes doen dattu niet en woldes

[fol. 37b]

verbeyden den dach dijnre doet met dattu tot ons comen bes mit zeel ende mit [live]. Du heves ghedaen omme dattu te meeren loen soldes hebben Ende daeromme saltu myldelike ontfaen dattu verdient heves Du bist hijr comen omme pijne te ontfaen / voer dijne sonden / ende seker du sals vinden dattu suekes dats druefheit ende rouwe Mer omme dattu ons noch voert dienen soles wiltu onsen rade hoeren ende weder keren wi solen dy dat doen te lone dat wi di weder [...] ongequetst solen leiden ter poerten daer du in quames dattu noch levende blijtscap moghes hebben in die weerlt So dattu doch niet alte male dat dijnen lichame versueten mach en verlieses. Dit geloefden si hem omme datsijne mit vervarennyssen ochte mit smeyken mochten bedrieghen Mer die ghewarighe gods ridder en waert mit vervaerenisse niet versaecht noch mit smeyken niet verleyt Mer mit eynen sterken moede so versmade hi hoer vervaerenisse ende hoer smeyken ende en antwoerde eyn twint albedalle niet