Tondalus' visioen en St. Patricius' vagevuur (2 delen)

Hoe die ridder hi in ginck ende hoe die .xx. monnichen hem visitierden

Het ghevyel in onsen tijden in coninc steven / daghen / dat eyn ridder die oweyn hiet daer men dit van vertelt quam totten bisscop te biechten / en wes bisdom dit vegevyer was / ende doe hem die bisscop omm[e] sijne sonden beresspede ende seide dat hi onsen heer swaerlic vertoernt hadde / so suchde hi van ynnigen berouwenis ende lovede den bisscop dat hi penitencie weder solde doen nae sijnen wille ende doe hem die bisscop penitencie setten wolde nae manyeren sijnre sonden so antwoerde die ridder / want ic als ghi segt mijnen scepper also zeer vertoernt heb / so wil ic aennyemen die pe\nitencie

[fol. 34b]

die boven alle penitencie swaer is; want omme dat ic verdienen sal verlatenysse mijnre sonden so wil ic by uwen bevelen gaen in sinte patricius vegevyer. Ende die bisscop ontriet hem dat te doen. Mer die ridder van menlicher stoltheit en volboerde des bisscops ontraden niet ende die bisscop om dat hi hem hijr af keren wolde / so seide hi hem datter voel [...] minschen in bleven waren / mer in gheynre manyeren en mochte hi des ridders herte die warachtich berouwenisse had / daer van keren. Die bisscop vermaende dat hi monnich woerde of dat hi canonicks habijt aen dede Die ridder seide dat hijt niet gherne en solde doen eer hi ghegaen weer in dit voerseide vegevyer. Ende doe die bisscop die vromicheit sach van sijnre berouwenisse so sende hi mit hem eynen brief aenden priore van der stede dat hi desen ridder die in penitencien was van berouwenisse leyden solde nae den zede in dit vegevyer. Ende doe die ridder daer comen was / ende die prior sijne saken wist / so lacht hi hem voer dat daer voel minschen in verloren weren bleven op dat hi hem hijr af trecken solde. Mer die ridder die wel bekende overdenckende dat hi gode swaerlic had vertoernt ende overmids ghewaer berouwenisse die hi ter [...] penitencien had verwan des priors ontraden. Ende aldys leyden die prior in die kerke / daer hi naeden sede .xv. daghe sich in oefende

[fol. 35a]

in waken en vasten in ghebede / Doe die voldaen waren si leyden hem die bruedere ende die clergie als voer gesacht is totten putte des ingancs vanden vegevyer. Ende doe seide men hem wieder die manyeren vanden tormenten die onverdraechlic sijn ende die prior ontriet hem dese penitencie [...] aen te gaen mer doe die ridder vromelic bleyf in sijnen wille / so ontfinc hi vanden prior dit woert: Sich du salt nu ingaen in den name ons heren / ende sals so lange gaen doer eyn hol / onder die eerde went du daer uut comes [...] in eyn velt daer du sals venden eynen sale mit wonderliker consten gemaect ende alstu daer in ghecomen biste so saltu te hant sien ingelen die di eerstelic solen segghen / wattu lijden sals / als die dan ewech sijn ghegaen ende du alleyne inden sale blijfs / so solen te hant tot dy comen quade gheisten / Aldus hebbense ghevaren die voer dy in ghegaen sijn / Mer wes gestadich ende sterc inden gelove cristi. Dese riddere druech in sijn herte eynen menliken moet ende ontsach niet die vreyse die hi hoerde / dat andere minschen verwonnen had. Ende die wilenneer ghewapent mit yser coenlic ginc int ghevecht der minschen die was nu harder dan yser ghewapent mit gelove mit hoep / ende mit gherechticheitden ende hem verlatende op die ontfermherticheit gods ende

[fol. 35b]

ginck coenlic in / omme te vechten teghen den duvele / Want eerste bat hi hem allen datsi voer hem bidden solden ende hi maecte mit sijnre rechterhant eyn teyken des heylighen cruces voer sijn voerhoeft ende blijdelic betruwende ginc hi in die poerte mit eynen vroeliken aensichte. Ende die prior sloetse te hant van buuten ende keerder weder mitter processien in die kerke. Dese ridder begheerde eyn nuwe onghewoenlic ridderscap te oefenen ende ginck vroemlic voert al was hi alleyne ende lange doer dat hol loepende ende hopende in onsen heer ende doe die donckerheiden meer ende meer wiesen so verloes hi kortlic dat liecht der claerheit. Ten lesten daer hi ginck begonde hem eyn cleyn liecht te openbaeren nauwelic doer dat hol ende niet lange en waest hi en quam totten voersegeden velde ende totten sale / want daer en scheyn gheyn liecht dan als hijr pliet te wenter tusschen daech ende nacht ende dese sale en hadde gheyne geheel want / mer hi was alre weghen gesticht mit clummen ende dat afbehanc als eyn cloester / ende doe hi lange omlanc den sale gewandelt had verwonderde hoer wonderliker maecsel so ginc hi daer in ende vantse bennen hoer beluke wonderlic ghemaect. Aldus sat hi neder ende keerde somtijt sijne oeghen herwaert ende derwaert ende verwonderde ghenoech hoere sierheit ende scoenheit

[fol. 36a]

Doe hi eyn tijt alleyne geseten hadde / so quamen daer in .xv. geystelike manne die nuwe gescoren waeren ende alle ghecleydt mit witten cleyderen ende si gruetenden in den naem ons heren ende saten by hem neder ende die eyne sprac mit hem / ende die ander sweghen alle ende dese scheyn hoer prior te wesen ende hoer leider / ende hi seide: Gebenedijt si die almechtige god die in dijn herte hevet vast ghemaect eeynen gueden wille / ende hi moet in dy volbringhen dat guet dat hi begonnen heeft. Ende omme dattu ghecomen bist totten vegevyer ghereynicht te [...] weerden van dijnen sonden, ende du salt gedwonghen weerden voel dinghen van noeden te doen manlic, offte overmids traecheiden dat god verbieden moet verloren blijven mit lijve ende mit ziele. Want te hant als wi uut ghegaen sijn / so sal dit huys vervollet weerden mit scaren van quadene gheesten / die dy swaerlic tormenten aen solen bringen ende noch swaerliker te tormenten solen dreyghen. Sy solen dy geloven weder te brengen ter poerten onghequets daer du in quames op dattu horen wille volboerdes ende in alsulker manyeren solen si hem pijnen dich te smeyken of si dy also hoenen mochten ende eest dattu mit eyniger manyeren of mit overlast der pijnen verwonnen woerdes of mit dreyghen verveert of mit geloefden bedroeghen, also dattu hem geloves, so saltu vervaren mit ziele ende mit lijve. Mer setstu gueden hoep inden gelove / also dattu mit pijnen noch mit

[fol. 36b]

dreyghen noch mit hoeren beloeften niet verleydt en werdes mer dattu si veronweerdes ende voer niet en achtes / so en saltu alleyne niet ghereynicht werden van alle dijnen sonden Mer du salt oec sien die tormenten die bereyt sijn den sonderen / ende die rast daer die gherechte in verblijden / Heb altoes gode in dijnen ghedechten / ende alsi di pijnen so aenruepe onsen heer jhesum cristum want omme dat aenruepen van desen name so saltu te hant van desen pijnen verloest weerden / want wi en moghen hijr niet langer by dy blijven mer wi bevelen di den almechtighen gode. Ende aldus doe si hem die benedixie ghegeven hadden so ginghen si ewech van hem. Dese ridder die aldus geleert was tot nuwer manyeren der ridderscap / die wileneer manlijc vacht teghen die minschen / hi was te hant bereydt manliker te vechten teghen die duvelen ende mitten wapenen cristi versiekert ontbeydt hi wilc vanden duvelen hem eerst ten strijde ruepen solde / hi was ghecleydt mitten halsberch der gherechticheit; ende mit hoep der verwenninghen ende der ewigher salicheit waert die ghedachte versiert / also dat hovet mit eynen helme ende mitten schilde des geloven die hem bedecten. Oec hevet hi des heyligen gheestes sweert, dat ist woert gods, want hi mit begheerten aenroep onsen heer jhesum cristum dat hijne moest beschermen dat hi niet en woerde verwonnen. Ende die guedertierenheit

[fol. 37a]

die nyemanne en bedrieghet die hoer betruwet si en bedroege hem niet