Tondalus' visioen en St. Patricius' vagevuur (2 delen)

Van eynen alden priore mit eynen tande / ende hoe men int vegevyer gaet

Nae sinte patricius doet was in dese kerke eyn priore die heylich was van leven

[fol. 33a]

ende also alt dat hi mer eynen tant en had behalden in sijnen monde / ende want sinte gregorius seet al ist dat die alde minsche gesont is / nochtan is hi altoes van altheiden sieck. Dese guede man omme dat hi mit sijnre altheit den anderen niet verdrietlic en solde sijn so dede hi te sijnen behuef maken eyn cellekijn beneven der canonken dermter Mer die jonge bruedere als si som tijt desen alden man visitierden so plaghen si hem al boertende te segghen: Vader wie langhe wiltstu blijven in dit leven? Ende dan seide hi: Lieve kindere ic hedde liever haestlike van hijr te varen dan aldus lange te leven, die wille ons heren moet geschien. Hijr en gevoel ic niet dan onsalicheit mer inden toecomenden leven hoep ic groter glorien Die canoniken hoerden dicwijle van hoeren dormter in sijnre cellen die engelen mit hem spreken ende horen sanck in deser manyeren: Du bes salich ende salich is die tant die in dijnen mont is die nye lecker spijse en smaecte / want sijne spijse was droeghe broet ende salt ende sijn dranck was calt water / ende ten lesten als hi begeerte voer hi salichlic tot onsen here. Ende men sal dit weten dat in sinte patericius tijden / ende nae sijnre tijt voel minschen in dit vegevyer ghingen van wilken sommighe wieder quamen ende die ander bleven daer in verloren ende dat die ghene vertelden die wieder quamen / dat scrijven die canoniken. Ende dit is ghevonden vanden heiligen

[fol. 33b]

Patericius ende die nae hem comen gheset dat nyeman in dat vegevuer gaen en mach sonder orlof des bisscops in wilken lande dit gelegen is. Ende die mit sijnen vrien wille kiest voer sijne sonden daer in te gaen / ende als hi totten bisscop [...] comet ende seecht hem sijnen wille. so sal hem die bisscop ontraden vanden wille des ingaens / ende segghen hem datter voel sijn in gegaen die nye wieder en quamen ende ist dan dat hi in sijnen wille volstendich blijvet so sent die bisscop brieve mit hem totten prior van der stede ende alse die prior die brieve gelesen heet so sal hijt hem oec ontraden ende vermanen hem dat hi ander penitencie kieser daer voer ende toenen hem die vreide van voel minschen die daer in verloren bleven sijn. Mer ist dat hi vast blijft in sijnen wille so leydet hijne in de kerke dat hi hem daer oefenen sal .xv. daghe en waken vasten ende in bedene ende als die daghe voleyndt sijn so vergadert die prior die clergie ende convent die daer omme sijn ende men doet vroeghe meese ende ghieft desen minsche dat lichame ons heren ende men besprincten tot den dienste mit winwater ende aldus mit [...] processien ende mitter letanien so leydt mennen ter doet vanden vegevyer / ende die priore luket op die doer voer hem allen ende seghet hem die aenvechtinghe van den duvelen ende datter voel minschen in verloren sijn bleven. Mer blijft hi

[fol. 34a]

volstendich ende vroem in sijnen wille. so ontfanct hi van elliken priester die benedixie ende biddet hem allen dat si voer hem bidden ende hi maect mit sijnre hant eyn cruus voer sijn voerhoeft ende geyt in / ende te hant slutet die priore die doer ende gaet wieder mitter processien in die kirke ende des anderen daechs vroech so comet die prior mitter processien weder totter doeren ende luket si op / ist dan datmen den minsche vint so leitmenne mit blijtscapen in die kerke ende dueten noch eyns .xv. daghe offeren ende waken vasten ende beden. Mer ist datsijs niet comende totter selver uren en venden so sijn si herde seker van sijnen verliese / ende die prior slutet die doer ende si gaen enwech